ਵਰਿੰਦਾਵਨ 'ਚ ਜਗਰਾਓਂ ਦੇ 10 ਸ਼ਰਧਾਲੂਆਂ ਦੀ ਡੁੱਬ ਕੇ ਹੋਈ ਮੌਤ
ਵੀਰਵਾਰ ਰਾਤ ਪੰਜਾਬ ਦੇ ਸ਼ਹਿਰ ਜਗਰਾਓਂ ਤੋਂ ਵਰਿੰਦਾਵਨ ਦਰਸ਼ਨਾਂ ਲਈ ਗਏ ਸ਼ਰਧਾਲੂਆਂ ਦੇ ਇੱਕ ਜਥੇ ਦੀ ਸ਼ੁੱਕਰਵਾਰ ਨੂੰ ਯਮੁਨਾ ਨਦੀ ਵਿਚ ਕਿਸ਼ਤੀ ਪਲਟ ਗਈ
By : Mehtab-Ud-Din
ਕਿਸ਼ਤੀ ਪਲਟਣ ਕਾਰਣ ਫਸੇ 30 ਤੋਂ ਵੱਧ ਪੰਜਾਬੀ ਸ਼ਰਧਾਲੂ
ਉਠ ਸਕਦੀ ਹੈ SIT ਬਣਾਉਣ ਦੀ ਵੀ ਮੰਗ
ਵਰਿੰਦਾਵਨ (ਯੂਪੀ): ਵੀਰਵਾਰ ਰਾਤ ਪੰਜਾਬ ਦੇ ਸ਼ਹਿਰ ਜਗਰਾਓਂ ਤੋਂ ਵਰਿੰਦਾਵਨ ਦਰਸ਼ਨਾਂ ਲਈ ਗਏ ਸ਼ਰਧਾਲੂਆਂ ਦੇ ਇੱਕ ਜਥੇ ਦੀ ਸ਼ੁੱਕਰਵਾਰ ਨੂੰ ਯਮੁਨਾ ਨਦੀ ਵਿਚ ਕਿਸ਼ਤੀ ਪਲਟ ਗਈ। ਇਸ ਵੱਡੇ ਹਾਦਸੇ ਵਿਚ ਜਗਰਾਓਂ ਦੇ 30 ਤੋਂ ਵੱਧ ਸ਼ਰਧਾਲੂ ਫਸ ਗਏ। ਇਹ ਖ਼ਬਰ ਲਿਖੇ ਜਾਣ ਤੱਕ 10 ਸ਼ਰਧਾਲੂਆਂ ਦੀ ਮੌਤ ਦੀ ਖ਼ਬਰ ਆ ਚੁੱਕੀ ਹੈ।
ਕੇਸ਼ੀ ਘਾਟ ਤੋਂ ਦੁਪਹਿਰ ਕਰੀਬ ਢਾਈ ਵਜੇ ਕਿਸ਼ਤੀ ਰਵਾਨਾ ਹੋਈ ਸੀ ਅਤੇ ਥੋੜ੍ਹੀ ਦੂਰੀ ਤੇ ਜਾ ਕੇ ਇਹ ਅਸੰਤੁਲਿਤ ਹੋ ਕੇ ਪਲਟ ਗਈ। ਤੁਰੰਤ ਪ੍ਰਸ਼ਾਸਨ ਉੱਥੇ ਪਹੁੰਚਿਆ ਅਤੇ ਲਗਭਗ 100 ਗੋਤਾਖੋਰਾਂ ਨੇ ਬਚਾਅ ਕਾਰਜ ਸ਼ੁਰੂ ਕਰ ਦਿੱਤੇ। ਮਿਲੀ ਖ਼ਬਰ ਮੁਤਾਬਕ 10 ਤੋਂ 12 ਸ਼ਰਧਾਲੂਆਂ ਨੂੰ ਬਾਹਰ ਕੱਢ ਲਿਆ ਗਿਆ ਹੈ ਪਰ ਉਨ੍ਹਾਂ ਨੂੰ ਹਾਲ਼ੇ ਹੋਸ਼ ਨਹੀਂ ਆਇਆ। ਬਾਕੀਆਂ ਦੀ ਦੀ ਭਾਲ ਜਾਰੀ ਹੈ। ਘਟਨਾ ਥਾਂ ਉੱਤੇ ਹਫੜਾ-ਦਫੜੀ ਅਤੇ ਰੋਣ-ਪਿਟਾਈ ਦਾ ਮਾਹੌਲ ਹੈ। ਜਗਰਾਓਂ ਦੇ ਘਰਾਂ ਵਿਚ ਚਿੰਤਾ ਅਤੇ ਗਮਗੀਨੀ ਛਾਈ ਹੋਈ ਹੈ।
ਜਾਣਕਾਰੀ ਅਨੁਸਾਰ ਜਗਰਾਓਂ ਦੇ ਸ਼੍ਰੀ ਬਾਂਕੇ ਬਿਹਾਰੀ ਕਲੱਬ ਵੱਲੋਂ ਭਜਨ ਗਾਇਕ ਲਵੀ ਵਹਿਲ ਅਤੇ ਯਸ਼ੂ ਬਜਾਜ ਦੀ ਅਗਵਾਈ ਵਿਚ ਦੋ ਬੱਸਾਂ ਰਾਹੀਂ ਚਾਰ ਦਿਨਾਂ ਦੀ ਧਾਰਮਿਕ ਯਾਤਰਾ ਉੱਤੇ ਗਏ ਸਨ। ਵਰਿੰਦਾਵਨ ਪਹੁੰਚ ਕੇ ਬਾਂਕੇ ਬਿਹਾਰੀ ਦੇ ਦਰਸ਼ਨਾਂ ਤੋਂ ਬਾਅਦ ਉਹ ਯਮੁਨਾ ਪਾਰ ਹੋਰ ਮੰਦਰਾਂ ਦੇ ਦਰਸ਼ਨਾਂ ਲਈ ਕਿਸ਼ਤੀ ਵਿਚ ਬੈਠੇ। ਕਿਸ਼ਤੀ ਵਿਚ 30 ਤੋਂ ਵੱਧ ਸ਼ਰਧਾਲੂ ਸਨ। ਥੋੜ੍ਹੀ ਦੇਰ ਬਾਅਦ ਕਿਸ਼ਤੀ ਦਾ ਸੰਤੁਲਨ ਵਿਗੜ ਗਿਆ ਅਤੇ ਉਹ ਪਲਟ ਗਈ। ਹਾਦਸਾ ਨਦੀ ਵਿਚ ਤੈਰ ਰਹੇ ਪੀਪਿਆਂ ਨਾਲ ਟੱਕਰ ਲੱਗਣ ਕਾਰਨ ਹੋਇਆ। ਨਦੀ ਵਿਚ ਪਾਣੀ ਵਧਣ ਕਾਰਨ ਇਹ ਪੀਪੇ ਖੋਲ੍ਹ ਦਿੱਤੇ ਗਏ ਸਨ ਜੋ ਇੱਧਰ-ਉੱਧਰ ਤੈਰ ਰਹੇ ਸਨ।
ਕਿਸ਼ਤੀ ਨਦੀ ਵਿਚ ਤੈਰ ਰਹੇ ਖਾਲੀ ਪੀਪਿਆਂ ਨਾਲ ਟੱਕਰਾਈ ਅਤੇ ਤੁਰੰਤ ਪਲਟ ਗਈ। ਬਚਾਅ ਕਾਰਜ ਅਤੇ ਮੌਜੂਦਾ ਹਾਲਤ ਹਾਦਸਾ ਵਾਪਰਦਿਆਂ ਹੀ ਸਥਾਨਕ ਪ੍ਰਸ਼ਾਸਨ ਤੁਰੰਤ ਐਕਸ਼ਨ ਵਿਚ ਆ ਗਿਆ। ਲਗਭਗ 100 ਗੋਤਾਖੋਰਾਂ ਨੇ ਬਚਾਅ ਕਾਰਜ ਸ਼ੁਰੂ ਕਰ ਦਿੱਤਾ। ਘਟਨਾ ਸਥਾਨ ਉੱਤੇ ਭਾਰੀ ਹਫੜਾ-ਦਫੜੀ ਵਾਲ਼ਾ ਮਾਹੌਲ ਬਣਿਆ ਹੋਇਆ ਹੈ। ਲੋਕਾਂ ਦਾ ਰੋ-ਰੋ ਕੇ ਬੁਰਾ ਹਾਲ ਹੈ।
ਪ੍ਰਸ਼ਾਸਨ ਮੁਤਾਬਕ ਹਾਦਸਾ ਮੁੱਖ ਤੌਰ ਉੱਤੇ ਨਦੀ ਵਿਚ ਤੈਰ ਰਹੇ ਖਾਲੀ ਪੀਪਿਆਂ ਕਾਰਨ ਹੋਇਆ। ਇਹ ਪੀਪੇ ਯਮੁਨਾ ਵਿਚ ਪੁਲ ਬਣਾਉਣ ਲਈ ਵਰਤੇ ਜਾ ਰਹੇ ਸਨ ਅਤੇ ਪਾਣੀ ਵਧਣ ਕਾਰਨ ਉਨ੍ਹਾਂ ਨੂੰ ਖੋਲ੍ਹ ਦਿੱਤਾ ਗਿਆ ਸੀ। ਇਸ ਤੋਂ ਇਲਾਵਾ ਕਿਸ਼ਤੀ ਵਿਚ ਲੋੜ ਤੋਂ ਵੱਧ ਲੋਕ ਸਵਾਰ ਸਨ ਜਾਂ ਕਿਸ਼ਤੀ ਦਾ ਸੰਤੁਲਨ ਬਣਾਉਣ ਵਿਚ ਲਾਪਰਵਾਹੀ ਵੀ ਹੋ ਸਕਦੀ ਹੈ। ਇਸ ਘਟਨਾ ਨੇ ਇੱਕ ਵਾਰ ਫਿਰ ਯਮੁਨਾ ਨਦੀ ਵਿਚ ਬੋਟਿੰਗ ਸੁਰੱਖਿਆ ਅਤੇ ਧਾਰਮਿਕ ਯਾਤਰਾਵਾਂ ਦੌਰਾਨ ਸਾਵਧਾਨੀ ਉੱਤੇ ਸਵਾਲ ਖੜ੍ਹੇ ਕਰ ਦਿੱਤੇ ਹਨ।
ਵਰਿੰਦਾਵਨ ਭਗਵਾਨ ਕ੍ਰਿਸ਼ਨ ਨਾਲ ਜੁੜੀ ਪਵਿੱਤਰ ਥਾਂ ਹੈ ਅਤੇ ਇੱਥੇ ਹਰ ਸਾਲ ਲੱਖਾਂ ਸ਼ਰਧਾਲੂ ਆਉਂਦੇ ਹਨ। ਇਸ ਤਰ੍ਹਾਂ ਦਾ ਹਾਦਸਾ ਧਾਰਮਿਕ ਯਾਤਰਾਵਾਂ ਨੂੰ ਖਤਰਨਾਕ ਬਣਾ ਦਿੰਦਾ ਹੈ। ਜਗਰਾਓਂ ਤੋਂ ਗਏ ਇਸ ਜਥੇ ਵਿਚ ਆਮ ਲੋਕ ਅਤੇ ਭਜਨ ਗਾਇਕ ਸਨ, ਇਸ ਲਈ ਇਸ ਘਟਨਾ ਨੇ ਪੂਰੇ ਇਲਾਕੇ ਵਿਚ ਸੋਗ ਦੀ ਲਹਿਰ ਪਾ ਦਿੱਤੀ ਹੈ। ਇਹ ਘਟਨਾ ਇੱਕ ਵਾਰ ਫਿਰ ਇਸ ਗੱਲ ਉੱਤੇ ਧਿਆਨ ਖਿੱਚ ਰਹੀ ਹੈ ਕਿ ਧਾਰਮਿਕ ਥਾਵਾਂ ਉੱਤੇ ਬੋਟਿੰਗ ਅਤੇ ਨਦੀ ਯਾਤਰਾ ਲਈ ਤੰਗੀ, ਗੋਤਾਖੋਰੀ ਉਪਕਰਣ ਅਤੇ ਐਮਰਜੈਂਸੀ ਪਲਾਨ ਕਿੰਨਾ ਮਜ਼ਬੂਤ ਹੋਣਾ ਚਾਹੀਦਾ ਹੈ।
ਫਿਲਹਾਲ ਬਚਾਅ ਕਾਰਜ ਤੇਜ਼ ਗਤੀ ਨਾਲ ਚੱਲ ਰਹੇ ਹਨ। ਲਾਪਤਾ ਸ਼ਰਧਾਲੂਆਂ ਦੀ ਭਾਲ ਲਈ ਗੋਤਾਖੋਰਾਂ ਦੀ ਗਿਣਤੀ ਵਧਾਈ ਜਾ ਰਹੀ ਹੈ। ਉੱਤਰ ਪ੍ਰਦੇਸ਼ ਪ੍ਰਸ਼ਾਸਨ ਅਤੇ ਪੰਜਾਬ ਸਰਕਾਰ ਵੱਲੋਂ ਵੀ ਟੀਮਾਂ ਭੇਜੀਆਂ ਜਾ ਸਕਦੀਆਂ ਹਨ। ਹਾਦਸੇ ਦੀ ਜਾਂਚ ਲਈ ਐਸਆਈਟੀ ਬਣਾਈ ਜਾ ਸਕਦੀ ਹੈ ਤਾਂ ਜੋ ਲਾਪਰਵਾਹੀ ਉੱਤੇ ਕਾਰਵਾਈ ਹੋ ਸਕੇ। ਸ਼ਰਧਾਲੂਆਂ ਦੇ ਪਰਿਵਾਰਾਂ ਨੂੰ ਤੁਰੰਤ ਮਦਦ ਅਤੇ ਮੁਆਵਜ਼ਾ ਮੁਹੱਈਆ ਕਰਵਾਉਣ ਲਈ ਵੀ ਕਦਮ ਚੁੱਕੇ ਜਾਣਗੇ। ਇਸ ਘਟਨਾ ਤੋਂ ਬਾਅਦ ਯਮੁਨਾ ਵਿਚ ਬੋਟਿੰਗ ਲਈ ਨਵੀਆਂ ਗਾਈਡਲਾਈਨਜ਼ ਬਣਾਉਣ ਦੀ ਲੋੜ ਵੀ ਉੱਠ ਰਹੀ ਹੈ।
