Deer Death: ਝਾਰਖੰਡ ਵਿੱਚ 10 ਦੁਰਲੱਭ ਪ੍ਰਜਾਤੀ ਦੇ ਹਿਰਨਾਂ ਦੀ ਭੇਦ ਭਰੀ ਹਾਲਤ ਵਿੱਚ ਮੌਤ
ਜਾਣੋ ਕੀ ਬੋਲੇ ਡਾਕਟਰ
By : Annie Khokhar
Black Buck Death Jharkhand: ਝਾਰਖੰਡ ਦੇ ਜਮਸ਼ੇਦਪੁਰ ਵਿੱਚ ਟਾਟਾ ਸਟੀਲ ਜ਼ੂਆਲੋਜੀਕਲ ਪਾਰਕ ਤੋਂ ਬੁਰੀ ਖ਼ਬਰ ਆਈ ਹੈ। ਸਿਰਫ਼ ਛੇ ਦਿਨਾਂ ਵਿੱਚ 10 ਕਾਲੇ ਹਿਰਨਾਂ ਦੀ ਭੇਦ ਭਰੀ ਹਾਲਤ ਵਿੱਚ ਮੌਤ ਹੋ ਗਈ ਹੈ। ਸੂਤਰਾਂ ਮੁਤਾਬਕ ਹਿਰਨਾਂ ਦੀ ਜਾਨ ਇੱਕ ਰਹੱਸਮਈ ਬੈਕਟੀਰੀਆ ਕਰਕੇ ਗਈ ਹੋ ਸਕਦੀ ਹੈ। ਦੱਸ ਦਈਏ ਕਿ ਇਹ ਪਾਰਕ ਹਿਰਨਾਂ ਦਾ ਘਰ ਹੈ, ਖ਼ਾਸ ਕਰਕੇ ਇੱਥੋਂ ਦੇ ਕਾਲੇ ਹਿਰਨ।
ਦੱਸਣਯੋਗ ਹੈ ਕਿ ਪਹਿਲਾ ਕਾਲਾ ਹਿਰਨ 1 ਦਸੰਬਰ ਨੂੰ ਮਰਿਆ ਸੀ, ਅਤੇ ਉਸਤੋਂ ਬਾਅਦ ਮੌਤਾਂ ਦਾ ਸਿਲਸਿਲਾ ਲਗਾਤਾਰ ਜਾਰੀ ਹੈ। ਮਾਹਿਰਾਂ ਨੂੰ ਸ਼ੱਕ ਹੈ ਕਿ ਹੈਮੋਰੈਜਿਕ ਸੈਪਟੀਸੀਮੀਆ (HS) ਨਾਮਕ ਇੱਕ ਇਨਫੈਕਸ਼ਨ ਕਾਲੇ ਹਿਰਨ ਦੀ ਜਾਨ ਲੈ ਰਿਹਾ ਹੈ। ਮੌਤਾਂ ਨੇ ਨਾ ਸਿਰਫ਼ ਜਮਸ਼ੇਦਪੁਰ ਸਗੋਂ ਰਾਂਚੀ ਦੇ ਬਿਰਸਾ ਬਾਇਓਲੋਜੀਕਲ ਪਾਰਕ ਨੂੰ ਵੀ ਸੁਚੇਤ ਕਰ ਦਿੱਤਾ ਹੈ, ਜਿੱਥੇ ਤੁਰੰਤ ਸਾਵਧਾਨੀ ਦੇ ਉਪਾਅ ਕੀਤੇ ਜਾ ਰਹੇ ਹਨ।
ਕਾਲੇ ਹਿਰਨ ਦੀ ਮੌਤ ਦਾ ਕਾਰਨ ਕੀ ਸੀ?
ਟਾਟਾ ਸਟੀਲ ਜ਼ੂਆਲੋਜੀਕਲ ਪਾਰਕ ਦੇ ਡਿਪਟੀ ਡਾਇਰੈਕਟਰ ਡਾ. ਨਈਮ ਅਖਤਰ ਨੇ ਕਿਹਾ, "ਪਾਰਕ ਵਿੱਚ ਹੁਣ ਤੱਕ ਦਸ ਕਾਲੇ ਹਿਰਨ ਦੀ ਮੌਤ ਹੋ ਚੁੱਕੀ ਹੈ। ਹਿਰਨਾਂ ਦੀਆਂ ਲਾਸ਼ਾਂ ਨੂੰ ਜਾਂਚ ਲਈ ਅਤੇ ਮੌਤ ਦੇ ਸਹੀ ਕਾਰਨ ਦਾ ਪਤਾ ਲਗਾਉਣ ਲਈ ਰਾਂਚੀ ਵੈਟਰਨਰੀ ਕਾਲਜ ਲਿਜਾਇਆ ਗਿਆ ਹੈ।" ਇਹ ਬੈਕਟੀਰੀਆ ਦੀ ਲਾਗ ਕਾਰਨ ਹੋਇਆ ਜਾਪਦਾ ਹੈ।
ਕੀ ਹਿਰਨ ਨੂੰ ਪਾਸਚੂਰੇਲੋਸਿਸ ਹੋਇਆ ਸੀ?
ਰਾਂਚੀ ਵੈਟਰਨਰੀ ਕਾਲਜ ਦੇ ਵੈਟਰਨਰੀ ਪੈਥੋਲੋਜੀ ਵਿਭਾਗ ਵਿੱਚ ਸਹਾਇਕ ਪ੍ਰੋਫੈਸਰ ਡਾ. ਪ੍ਰਗਿਆ ਲਾਕਰਾ ਨੇ ਕਿਹਾ ਕਿ ਲਾਸ਼ ਦਾ ਪੋਸਟਮਾਰਟਮ ਕੀਤਾ ਗਿਆ ਹੈ। ਉਨ੍ਹਾਂ ਕਿਹਾ, "ਇਹ ਹੈਮੋਰੇਜਿਕ ਸੈਪਟੀਸੀਮੀਆ ਹੋਣ ਦਾ ਸ਼ੱਕ ਹੈ, ਜੋ ਕਿ ਪਾਸਚੂਰੇਲਾ ਪ੍ਰਜਾਤੀ ਦੇ ਬੈਕਟੀਰੀਆ ਕਾਰਨ ਹੋਣ ਵਾਲੀ ਬਿਮਾਰੀ ਹੈ। ਇਸਨੂੰ ਪਾਸਚੂਰੇਲੋਸਿਸ ਵੀ ਕਿਹਾ ਜਾਂਦਾ ਹੈ।"
ਜ਼ੂਆਲੋਜੀਕਲ ਪਾਰਕ ਵਿੱਚ ਹੁਣ ਕਿੰਨੇ ਕਾਲੇ ਹਿਰਨ ਬਚੇ ਹਨ?
ਉਨ੍ਹਾਂ ਅੱਗੇ ਕਿਹਾ ਕਿ ਇਸ ਮਾਮਲੇ ਦੀ ਹੋਰ ਜਾਂਚ ਸੋਮਵਾਰ ਨੂੰ ਹੋਵੇਗੀ। ਇੱਕ ਵਾਰ ਹੋਰ ਪ੍ਰਕਿਰਿਆਵਾਂ ਪੂਰੀਆਂ ਹੋਣ ਤੋਂ ਬਾਅਦ, ਉਹ ਬਿਮਾਰੀ ਦੀ ਪੁਸ਼ਟੀ ਕਰ ਸਕਣਗੇ। ਦੱਸਣਯੋਗ ਹੈ ਕਿ ਟਾਟਾ ਸਟੀਲ ਜ਼ੂਆਲੋਜੀਕਲ ਪਾਰਕ ਵਿੱਚ ਪੰਛੀਆਂ ਸਮੇਤ ਲਗਭਗ 370 ਜਾਨਵਰ ਹਨ। ਪਹਿਲਾਂ ਉੱਥੇ 18 ਕਾਲੇ ਹਿਰਨ ਹੁੰਦੇ ਸਨ, ਪਰ ਹੁਣ ਸਿਰਫ਼ 8 ਹੀ ਬਚੇ ਹਨ।
ਪਾਸਚੂਰੇਲਾ ਬਿਮਾਰੀ ਕਿਵੇਂ ਮਾਰਦੀ ਹੈ?
ਅਖਤਰ ਨੇ ਕਿਹਾ ਕਿ ਪਹਿਲਾ ਕਾਲਾ ਹਿਰਨ 1 ਦਸੰਬਰ ਨੂੰ ਮਰ ਗਿਆ ਸੀ। ਇਸ ਦੌਰਾਨ, ਰਾਂਚੀ ਵੈਟਰਨਰੀ ਕਾਲਜ ਦੇ ਪੈਥੋਲੋਜੀ ਵਿਭਾਗ ਦੇ ਮੁਖੀ ਡਾ. ਐਮ.ਕੇ. ਗੁਪਤਾ ਨੇ ਕਿਹਾ ਕਿ ਪਾਸਚੂਰੇਲਾ ਇੱਕ ਬੈਕਟੀਰੀਆ ਵਾਲੀ ਬਿਮਾਰੀ ਹੈ ਜੋ ਸਰੀਰ ਵਿੱਚ ਤੇਜ਼ੀ ਨਾਲ ਫੈਲਦੀ ਹੈ ਅਤੇ ਫੇਫੜਿਆਂ ਨੂੰ ਪ੍ਰਭਾਵਿਤ ਕਰਦੀ ਹੈ। ਇਸ ਨਾਲ ਅਚਾਨਕ ਮੌਤ ਹੋ ਸਕਦੀ ਹੈ।
