ICC ਨੇ ਕੀਤਾ ਵੱਡਾ ਐਲਾਨ, ਕ੍ਰਿਕੇਟ 'ਚ ਆਇਆ ਇਹ ਨਵਾਂ ਨਿਯਮ

ਨਵੀਂ ਦਿੱਲੀ :ਅੰਤਰਰਾਸ਼ਟਰੀ ਕ੍ਰਿਕਟ ਕੌਂਸਲ ਨੇ ਕ੍ਰਿਕਟ ਵਿੱਚ ਇੱਕ ਨਵਾਂ ਨਿਯਮ ਲਾਗੂ ਕੀਤਾ ਹੈ। ਇਨ੍ਹਾਂ ਨਿਯਮਾਂ ਦੀ ਵਰਤੋਂ ਵਨਡੇ ਅਤੇ ਟੀ-20 ਕ੍ਰਿਕਟ 'ਚ ਕੀਤੀ ਜਾਵੇਗੀ। ਇਸ ਨਿਯਮ ਦਾ ਨਾਮ ਸਟਾਪ ਕਲਾਕ ਹੈ। ਇਹ ਨਿਯਮ ਗੇਮ ਦੀ ਰਫਤਾਰ ਵਧਾਉਣ ਲਈ ਲਿਆਂਦਾ ਗਿਆ ਹੈ। ਤੁਹਾਨੂੰ ਦੱਸ ਦੇਈਏ ਕਿ ਓਵਰਾਂ ਵਿਚਕਾਰ ਲੱਗਣ ਵਾਲੇ ਸਮੇਂ ਨੂੰ ਘੱਟ ਕਰਨ ਲਈ ਸਟਾਪ ਕਲਾਕ ਪੇਸ਼ ਕੀਤਾ ਜਾ ਰਿਹਾ ਹੈ। ਇਹ ਨਿਯਮ ਦਸੰਬਰ 2023 ਤੋਂ ਅਪ੍ਰੈਲ 2024 ਤੱਕ ਪਰਖ ਦੇ ਆਧਾਰ 'ਤੇ ਲਾਗੂ ਕੀਤਾ ਜਾਵੇਗਾ।

CEC ਨੇ ਦਸੰਬਰ 2023 ਤੋਂ ਅਪ੍ਰੈਲ 2024 ਤੱਕ ਪੁਰਸ਼ਾਂ ਦੇ ਵਨਡੇ ਅਤੇ ਟੀ-20 ਕ੍ਰਿਕਟ ਵਿੱਚ ਅਜ਼ਮਾਇਸ਼ ਦੇ ਆਧਾਰ 'ਤੇ ਸਟਾਪ ਕਲਾਕ ਨੂੰ ਪੇਸ਼ ਕਰਨ ਲਈ ਸਹਿਮਤੀ ਦਿੱਤੀ। ਇਸ ਘੜੀ ਦੀ ਵਰਤੋਂ ਓਵਰਾਂ ਵਿਚਕਾਰ ਲੱਗਣ ਵਾਲੇ ਸਮੇਂ ਨੂੰ ਘਟਾਉਣ ਲਈ ਕੀਤੀ ਜਾਵੇਗੀ। ਨਿਯਮਾਂ ਮੁਤਾਬਕ ਜੇਕਰ ਗੇਂਦਬਾਜ਼ ਟੀਮ ਪਿਛਲਾ ਓਵਰ ਪੂਰਾ ਹੋਣ ਦੇ 60 ਸਕਿੰਟਾਂ ਦੇ ਅੰਦਰ ਅਗਲਾ ਓਵਰ ਸੁੱਟਣ ਲਈ ਤਿਆਰ ਨਹੀਂ ਹੁੰਦੀ ਹੈ ਤਾਂ ਪਾਰੀ ਵਿਚ ਤੀਜੀ ਵਾਰ ਅਜਿਹਾ ਹੋਣ 'ਤੇ 5 ਦੌੜਾਂ ਦਾ ਜੁਰਮਾਨਾ ਲਗਾਇਆ ਜਾਵੇਗਾ। ਇਹ ਫੈਸਲਾ ਅੰਤਰਰਾਸ਼ਟਰੀ ਕ੍ਰਿਕਟ ਕੌਂਸਲ (ਆਈਸੀਸੀ) ਦੀ ਬੋਰਡ ਮੀਟਿੰਗ ਵਿੱਚ ਲਿਆ ਗਿਆ।

ਇੱਕ ਰੋਜ਼ਾ ਮੈਚਾਂ ਵਿੱਚ, ਗੇਂਦਬਾਜ਼ੀ ਟੀਮ ਨੂੰ 50 ਓਵਰ ਕਰਨ ਲਈ 3.5 ਘੰਟੇ ਦਿੱਤੇ ਜਾਂਦੇ ਹਨ। ਜਦੋਂ ਕਿ ਟੀ-20 ਵਿੱਚ ਟੀਮ ਨੂੰ 20 ਓਵਰ ਕਰਨ ਲਈ ਇੱਕ ਘੰਟਾ 25 ਮਿੰਟ ਦਾ ਸਮਾਂ ਮਿਲਦਾ ਹੈ। ਜੇਕਰ ਕੋਈ ਟੀਮ ਸਮੇਂ ਸਿਰ ਓਵਰਾਂ ਨੂੰ ਪੂਰਾ ਨਹੀਂ ਕਰਦੀ ਹੈ, ਤਾਂ ਹੌਲੀ ਓਵਰ ਰੇਟ ਦੇ ਨਿਯਮ ਦੇ ਕਾਰਨ, ਟੀਮ ਨੂੰ ਬਾਕੀ ਓਵਰਾਂ ਵਿੱਚ 30 ਗਜ਼ ਦੇ ਘੇਰੇ ਦੇ ਅੰਦਰ ਇੱਕ ਹੋਰ ਖਿਡਾਰੀ ਰੱਖਣਾ ਪੈਂਦਾ ਹੈ। ਆਈਸੀਸੀ ਕੋਡ ਆਫ ਕੰਡਕਟ ਦੇ ਆਰਟੀਕਲ 2.22 ਦੇ ਤਹਿਤ ਜੁਰਮਾਨੇ ਦੀ ਵਿਵਸਥਾ ਵੀ ਹੈ।

ਬੱਲੇਬਾਜ਼ੀ ਕਰਨ ਵਾਲੀ ਟੀਮ ਨੂੰ ਫਾਇਦਾ ਹੋਵੇਗਾ

ਹੁਣ ਬੱਲੇਬਾਜ਼ੀ ਕਰਨ ਵਾਲੀ ਟੀਮ ਨੂੰ ਸਟਾਪ ਕਲਾਕ ਨਿਯਮ ਦਾ ਫਾਇਦਾ ਹੋਵੇਗਾ। ਜੇਕਰ ਕੋਈ ਟੀਮ ਪਿਛਲਾ ਓਵਰ ਪੂਰਾ ਹੋਣ ਤੋਂ ਬਾਅਦ ਅਗਲਾ ਓਵਰ ਸੁੱਟਣ ਲਈ ਦੋ ਵਾਰ 60 ਸਕਿੰਟ ਤੋਂ ਵੱਧ ਸਮਾਂ ਲੈਂਦੀ ਹੈ, ਤਾਂ ਬੱਲੇਬਾਜ਼ੀ ਕਰਨ ਵਾਲੀ ਟੀਮ ਨੂੰ 5 ਦੌੜਾਂ ਦਿੱਤੀਆਂ ਜਾਣਗੀਆਂ। ਇਹ ਹਮੇਸ਼ਾ ਦੇਖਿਆ ਗਿਆ ਹੈ ਕਿ ਮੈਚ ਦਾ ਨਤੀਜਾ ਬਦਲਣ ਲਈ 1-1 ਦੌੜਾਂ ਹੀ ਕਾਫੀ ਹੁੰਦੀਆਂ ਹਨ। ਅਜਿਹੇ 'ਚ ਬੱਲੇਬਾਜ਼ੀ ਕਰਨ ਵਾਲੀ ਟੀਮ ਲਈ ਇਹ 5 ਦੌੜਾਂ ਕਾਫੀ ਫਾਇਦੇਮੰਦ ਹੋ ਸਕਦੀਆਂ ਹਨ।