ਮੈਂ ਜੰਗਬੰਦੀ ਨਹੀਂ ਕਰਾਂਗਾ : ਬੈਂਜਾਮਿਨ ਨੇਤਨਯਾਹੂ

ਤੇਲ ਅਵੀਵ : ਇਜ਼ਰਾਈਲ ਦੇ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਨੇ ਹਮਾਸ ਵਿਰੁੱਧ ਜੰਗਬੰਦੀ ਤੋਂ ਸਾਫ਼ ਇਨਕਾਰ ਕਰ ਦਿੱਤਾ ਹੈ। ਉਸ ਦਾ ਕਹਿਣਾ ਹੈ ਕਿ ਜੰਗਬੰਦੀ ‘ਸਮਰਪਣ’ ਦੇ ਬਰਾਬਰ ਹੋਵੇਗੀ। ਖਾਸ ਗੱਲ ਇਹ ਹੈ ਕਿ ਇਜ਼ਰਾਇਲੀ ਪੀਐੱਮ ਦਾ ਇਹ ਬਿਆਨ ਅਜਿਹੇ ਸਮੇਂ 'ਚ ਆਇਆ ਹੈ ਜਦੋਂ ਫੌਜ ਫਲਸਤੀਨ 'ਚ ਦਾਖਲ ਹੋ ਕੇ ਕਾਰਵਾਈ ਕਰ ਰਹੀ ਹੈ। ਉਨ੍ਹਾਂ ਇਹ ਵੀ ਕਿਹਾ ਹੈ ਕਿ ਜਿੱਤ ਤੱਕ ਜੰਗ ਜਾਰੀ ਰਹੇਗੀ।

ਨੇਤਨਯਾਹੂ ਨੇ ਇੱਕ ਪ੍ਰੈਸ ਬ੍ਰੀਫਿੰਗ ਵਿੱਚ ਕਿਹਾ ਕਿ ਹਮਾਸ ਦੇ ਲੜਾਕਿਆਂ ਨੇ 1,400 ਲੋਕਾਂ ਨੂੰ ਮਾਰਿਆ ਹੈ ਅਤੇ 230 ਤੋਂ ਵੱਧ ਨੂੰ ਬੰਧਕ ਬਣਾ ਲਿਆ ਹੈ। ਉਸ ਨੇ ਕਿਹਾ, 'ਜੰਗਬੰਦੀ ਦਾ ਸੱਦਾ ਇਜ਼ਰਾਈਲ ਲਈ ਹਮਾਸ ਅਤੇ ਅੱਤਵਾਦ ਨੂੰ ਸਮਰਪਣ ਕਰਨ ਦਾ ਸੱਦਾ ਹੈ। ਅਜਿਹਾ ਨਹੀਂ ਹੋਵੇਗਾ। 'ਇਜ਼ਰਾਈਲ ਨੇ ਗਾਜ਼ਾ ਵਿਚ ਦਾਖਲ ਹੋ ਕੇ ਤੇਜ਼ੀ ਨਾਲ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਇੱਥੇ ਹਮਾਸ ਨਿਯੰਤਰਿਤ ਸਿਹਤ ਮੰਤਰਾਲੇ ਦਾ ਕਹਿਣਾ ਹੈ ਕਿ 8 ਹਜ਼ਾਰ 300 ਤੋਂ ਵੱਧ ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ।

ਉਨ੍ਹਾਂ ਕਿਹਾ ਕਿ ਕੌਮਾਂਤਰੀ ਭਾਈਚਾਰੇ ਨੂੰ ਗਾਜ਼ਾ ਵਿੱਚ ਬਾਕੀ ਬੰਧਕਾਂ ਦੀ ਬਿਨਾਂ ਸ਼ਰਤ ਰਿਹਾਈ ਦੀ ਮੰਗ ਕਰਨੀ ਚਾਹੀਦੀ ਹੈ। ਇਜ਼ਰਾਇਲੀ ਫੌਜ ਨੇ ਜਾਣਕਾਰੀ ਦਿੱਤੀ ਹੈ ਕਿ ਹਮਾਸ ਦੇ ਇਲਾਕੇ 'ਚ ਕਾਰਵਾਈ ਤੋਂ ਬਾਅਦ ਇਕ ਮਹਿਲਾ ਫੌਜੀ ਨੂੰ ਬਚਾਇਆ ਗਿਆ ਹੈ। ਫੌਜ ਨੇ ਕਿਹਾ, "ਓਰੀ ਮੇਗਿਦੀਸ਼ ਨੂੰ ਜ਼ਮੀਨੀ ਕਾਰਵਾਈ ਦੌਰਾਨ ਬਚਾਇਆ ਗਿਆ ਸੀ।" ਇਹ ਵੀ ਦੱਸਿਆ ਗਿਆ ਕਿ ਉਸ ਦੀ ਮੈਡੀਕਲ ਜਾਂਚ ਵੀ ਕਰਵਾਈ ਗਈ ਹੈ ਅਤੇ ਉਹ ਤੰਦਰੁਸਤ ਹੈ।

ਇਜ਼ਰਾਈਲ ਦੀ ਕਾਰਵਾਈ ਜਾਰੀ

ਇਜ਼ਰਾਈਲੀ ਫੌਜ ਦਾ ਕਹਿਣਾ ਹੈ ਕਿ ਰਾਤ ਭਰ ਦੀ ਕਾਰਵਾਈ ਦੌਰਾਨ ਉਸ ਨੇ 'ਇਮਾਰਤਾਂ ਅਤੇ ਸੁਰੰਗਾਂ' ਵਿੱਚ ਲੁਕੇ ਦਰਜਨਾਂ ਅੱਤਵਾਦੀਆਂ ਨੂੰ ਮਾਰ ਦਿੱਤਾ ਹੈ। ਹਾਲ ਹੀ 'ਚ ਫੌਜ ਵੱਲੋਂ ਜਾਰੀ ਵੀਡੀਓ 'ਚ ਟੈਂਕਾਂ, ਸਨਾਈਪਰਾਂ ਵਰਗੇ ਫੌਜੀ ਉਪਕਰਣਾਂ ਨੂੰ ਸਰਗਰਮ ਹੁੰਦੇ ਦੇਖਿਆ ਜਾ ਰਿਹਾ ਹੈ। 7 ਅਕਤੂਬਰ ਨੂੰ ਹਮਾਸ ਨੇ ਇਜ਼ਰਾਈਲ 'ਤੇ ਰਾਕੇਟ ਦਾਗੇ ਸਨ। ਉਦੋਂ ਤੋਂ ਦੋਵਾਂ ਧਿਰਾਂ ਵਿਚਾਲੇ ਖੂਨੀ ਸੰਘਰਸ਼ ਜਾਰੀ ਹੈ।