ਹਮਾਸ ਦੇ ਹਮਲੇ ’ਚ ਕਿਸ ਦੇਸ਼ ਦੇ ਕਿੰਨੇ ਨਾਗਰਿਕ ਮਾਰੇ ਗਏ ਅਤੇ ਕਿੰਨੇ ਲਾਪਤਾ,ਜਾਣੋ

ਯੇਰੂਸ਼ਲਮ, 10 ਅਕਤੂਬਰ, ਨਿਰਮਲ : ਇਜ਼ਰਾਇਲ ’ਤੇ ਅੱਤਵਾਦੀ ਸੰਗਠਨ ਹਮਾਸ ਦੇ ਹਮਲੇ ’ਚ ਹੁਣ ਤੱਕ 900 ਤੋਂ ਜ਼ਿਆਦਾ ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ ਅਤੇ ਸੈਂਕੜੇ ਲੋਕ ਜ਼ਖਮੀ ਹਨ। ਮਰਨ ਵਾਲਿਆਂ ਵਿੱਚ ਕਈ ਵਿਦੇਸ਼ੀ ਨਾਗਰਿਕ ਵੀ ਸ਼ਾਮਲ ਹਨ। ਇਜ਼ਰਾਈਲ ’ਚ ਮਿਊਜ਼ਿਕ ਫੈਸਟੀਵਲ ’ਚ ਹਿੱਸਾ ਲੈਣ ਲਈ ਕਈ ਵਿਦੇਸ਼ੀ ਨਾਗਰਿਕ ਆਏ ਸਨ, ਜਿਸ ਦੌਰਾਨ ਹਮਾਸ ਦੇ ਅੱਤਵਾਦੀਆਂ ਨੇ ਇਜ਼ਰਾਈਲ ’ਤੇ ਹਮਲਾ ਕਰ ਦਿੱਤਾ। ਆਓ ਜਾਣਦੇ ਹਾਂ ਇਜ਼ਰਾਈਲ ’ਚ ਹਮਾਸ ਦੇ ਹਮਲੇ ’ਚ ਕਿਸ ਦੇਸ਼ ਦੇ ਕਿੰਨੇ ਨਾਗਰਿਕ ਮਾਰੇ ਗਏ ਹਨ ਅਤੇ ਕਿੰਨੇ ਲਾਪਤਾ ਹਨ।

ਅਰਜਨਟੀਨਾ ਦੇ ਵਿਦੇਸ਼ ਮੰਤਰੀ ਸੈਂਟੀਆਗੋ ਕੈਫੀਰੋ ਨੇ ਕਿਹਾ ਕਿ ਇਜ਼ਰਾਈਲ ਵਿੱਚ ਉਸ ਦੇ ਸੱਤ ਨਾਗਰਿਕਾਂ ਦੀ ਮੌਤ ਹੋ ਗਈ ਹੈ ਅਤੇ 15 ਅਜੇ ਵੀ ਲਾਪਤਾ ਹਨ। ਨਾਲ ਹੀ ਇਜ਼ਰਾਈਲ ’ਚ ਮੌਜੂਦ ਲਗਭਗ 625 ਅਰਜਨਟੀਨੀ ਨਾਗਰਿਕਾਂ ਨੇ ਆਪਣੇ ਦੇਸ਼ ਦੀ ਸਰਕਾਰ ਤੋਂ ਉਨ੍ਹਾਂ ਨੂੰ ਸੁਰੱਖਿਅਤ ਬਾਹਰ ਕੱਢਣ ਦੀ ਮੰਗ ਕੀਤੀ ਹੈ। ਆਸਟ੍ਰੀਆ ਦੀ ਸਰਕਾਰ ਨੇ ਦੱਸਿਆ ਕਿ ਤਿੰਨ ਆਸਟ੍ਰੀਆ-ਇਜ਼ਰਾਈਲੀ ਨਾਗਰਿਕ ਲਾਪਤਾ ਹਨ। ਇਨ੍ਹਾਂ ਨਾਗਰਿਕਾਂ ਕੋਲ ਦੋਵਾਂ ਦੇਸ਼ਾਂ ਦੀ ਦੋਹਰੀ ਨਾਗਰਿਕਤਾ ਹੈ। ਬ੍ਰਾਜ਼ੀਲ ਦੇ ਵਿਦੇਸ਼ ਮੰਤਰਾਲੇ ਨੇ ਇਹ ਵੀ ਜਾਣਕਾਰੀ ਦਿੱਤੀ ਹੈ ਕਿ ਉਸ ਦੇ ਤਿੰਨ ਬ੍ਰਾਜ਼ੀਲ-ਇਜ਼ਰਾਈਲੀ ਨਾਗਰਿਕ ਲਾਪਤਾ ਹਨ। ਇਹ ਤਿੰਨੋਂ ਨਾਗਰਿਕ ਇਜ਼ਰਾਈਲ ਦੇ ਸੰਗੀਤ ਉਤਸਵ ਵਿਚ ਸ਼ਾਮਲ ਹੋਣ ਲਈ ਗਏ ਸਨ। ਸ਼ੱਕ ਹੈ ਕਿ ਇਨ੍ਹਾਂ ਲੋਕਾਂ ਨੂੰ ਹਮਾਸ ਦੇ ਅੱਤਵਾਦੀਆਂ ਨੇ ਅਗਵਾ ਕੀਤਾ ਸੀ। ਇਜ਼ਰਾਈਲ ’ਤੇ ਹੋਏ ਹਮਲਿਆਂ ’ਚ ਕੰਬੋਡੀਆ ਦੇ ਇਕ ਨਾਗਰਿਕ ਦੇ ਮਾਰੇ ਜਾਣ ਦੀ ਖਬਰ ਹੈ। ਕੰਬੋਡੀਆ ਦੇ ਦੋ ਨਾਗਰਿਕ ਵੀ ਲਾਪਤਾ ਹਨ।

ਕੈਨੇਡੀਅਨ ਸਰਕਾਰ ਨੇ ਕਿਹਾ ਹੈ ਕਿ ਇਜ਼ਰਾਈਲ ਵਿੱਚ ਉਸ ਦੇ ਇੱਕ ਨਾਗਰਿਕ ਦੀ ਮੌਤ ਹੋ ਗਈ ਹੈ ਅਤੇ ਤਿੰਨ ਹੋਰ ਨਾਗਰਿਕ ਲਾਪਤਾ ਹਨ। ਚਿਲੀ ਦੇ ਦੋ ਨਾਗਰਿਕ ਵੀ ਲਾਪਤਾ ਹਨ ਅਤੇ ਇਹ ਜੋੜਾ ਹਮਾਸ ਦੇ ਹਮਲੇ ਦੇ ਸਮੇਂ ਇਜ਼ਰਾਇਲੀ ਸਰਹੱਦ ਦੇ ਨੇੜੇ ਰਹਿ ਰਿਹਾ ਸੀ। ਇਜ਼ਰਾਈਲ ਵਿੱਚ ਦੋ ਫਰਾਂਸੀਸੀ ਨਾਗਰਿਕਾਂ ਦੀ ਮੌਤ ਹੋਣ ਦੀ ਸੂਚਨਾ ਹੈ ਅਤੇ 14 ਹੋਰ ਲਾਪਤਾ ਹਨ। ਇਸੇ ਤਰ੍ਹਾਂ ਇਜ਼ਰਾਈਲ ਵਿੱਚ ਕਈ ਜਰਮਨ ਨਾਗਰਿਕ ਲਾਪਤਾ ਦੱਸੇ ਜਾ ਰਹੇ ਹਨ। ਖਦਸ਼ਾ ਹੈ ਕਿ ਇਨ੍ਹਾਂ ਨਾਗਰਿਕਾਂ ਨੂੰ ਬੰਧਕ ਬਣਾ ਲਿਆ ਗਿਆ ਹੈ। ਆਇਰਲੈਂਡ ਅਤੇ ਇਟਲੀ ਦੇ ਕ੍ਰਮਵਾਰ ਇੱਕ ਅਤੇ ਦੋ ਨਾਗਰਿਕ ਲਾਪਤਾ ਹਨ। ਦੋ ਮੈਕਸੀਕਨ ਨਾਗਰਿਕਾਂ ਨੂੰ ਹਮਾਸ ਦੇ ਅੱਤਵਾਦੀਆਂ ਦੁਆਰਾ ਅਗਵਾ ਕੀਤੇ ਜਾਣ ਦੀ ਖਬਰ ਹੈ।

ਨੇਪਾਲ ਸਭ ਤੋਂ ਪ੍ਰਭਾਵਿਤ ਦੇਸ਼ਾਂ ਵਿੱਚੋਂ ਇੱਕ ਹੈ। ਇਜ਼ਰਾਈਲ ਵਿੱਚ ਨੇਪਾਲ ਦੇ 10 ਨਾਗਰਿਕਾਂ ਦੀ ਮੌਤ ਹੋ ਗਈ ਹੈ ਅਤੇ ਇੱਕ ਹੋਰ ਲਾਪਤਾ ਹੈ। ਪਨਾਮਾ, ਪੈਰਾਗੁਏ ਅਤੇ ਪੇਰੂ ਵਿੱਚ ਵੀ ਦੋ-ਦੋ ਲੋਕ ਲਾਪਤਾ ਹਨ। ਇਸ ਦੇ ਨਾਲ ਹੀ ਇਜ਼ਰਾਈਲ ਵਿੱਚ 11 ਅਮਰੀਕੀ ਨਾਗਰਿਕਾਂ ਦੀ ਮੌਤ ਹੋ ਗਈ ਹੈ ਅਤੇ ਕਈ ਹੋਰ ਲਾਪਤਾ ਹਨ। ਇਜ਼ਰਾਈਲ ਵਿੱਚ ਇੱਕ ਬ੍ਰਿਟਿਸ਼ ਨਾਗਰਿਕ ਦੀ ਮੌਤ ਹੋ ਗਈ ਹੈ ਅਤੇ ਇੱਕ ਹੋਰ ਲਾਪਤਾ ਹੈ। ਇਜ਼ਰਾਈਲ ਵਿੱਚ ਦੋ ਯੂਕਰੇਨੀ ਨਾਗਰਿਕ ਮਾਰੇ ਗਏ ਹਨ। ਥਾਈਲੈਂਡ ਨੂੰ ਵੀ ਭਾਰੀ ਨੁਕਸਾਨ ਹੋਇਆ ਹੈ ਅਤੇ ਇਸ ਦੇ 18 ਨਾਗਰਿਕਾਂ ਦੀ ਜਾਨ ਚਲੀ ਗਈ ਹੈ। ਕਈ ਹੋਰ ਲਾਪਤਾ ਹਨ। ਇਜ਼ਰਾਈਲ ਵਿੱਚ ਇੱਕ ਰੂਸੀ ਨਾਗਰਿਕ ਦੀ ਵੀ ਮੌਤ ਹੋ ਗਈ ਹੈ ਅਤੇ ਇੱਕ ਲਾਪਤਾ ਹੈ।