ਹੂਤੀ ਬਾਗੀਆਂ ਨੇ ਭਾਰਤ ਆ ਰਿਹੈ ਜਹਾਜ਼ ਕੀਤਾ ਹਾਈਜੈਕ

ਇਸ ਸਭ ਦੇ ਪਿੱਛੇ ਈਰਾਨ : ਇਜ਼ਰਾਈਲ ਫੌਜ

ਯੇਰੂਸ਼ਲਮ, 20 ਨਵੰਬਰ, ਨਿਰਮਲ : ਯਮਨ ਦੇ ਹੂਤੀ ਬਾਗੀਆਂ ਨੇ ਐਤਵਾਰ ਨੂੰ ਤੁਰਕੀ ਤੋਂ ਭਾਰਤ ਆ ਰਹੇ ਜਹਾਜ਼ ਨੂੰ ਹਾਈਜੈਕ ਕਰ ਲਿਆ। ਲਾਲ ਸਾਗਰ ਵਿੱਚ ਬੰਧਕ ਬਣਾਏ ਗਏ ਇਸ ਮਾਲਵਾਹਕ ਜਹਾਜ਼ ਦਾ ਨਾਮ ਗਲੈਕਸੀ ਲੀਡਰ ਹੈ ਅਤੇ ਇਸ ਵਿੱਚ 25 ਕਰੂ ਮੈਂਬਰ ਹਨ।

ਘਟਨਾ ਤੋਂ ਪਹਿਲਾਂ ਹੂਤੀ ਸਮੂਹ ਨੇ ਇਜ਼ਰਾਇਲੀ ਜਹਾਜ਼ਾਂ ’ਤੇ ਹਮਲੇ ਦੀ ਚਿਤਾਵਨੀ ਦਿੱਤੀ ਸੀ। ਹੂਤੀ ਬਾਗੀਆਂ ਦੇ ਬੁਲਾਰੇ ਨੇ ਕਿਹਾ ਕਿ ਇਜ਼ਰਾਈਲ ਦੀ ਤਰਫੋਂ ਜਾ ਰਹੇ ਸਾਰੇ ਜਹਾਜ਼ਾਂ ਨੂੰ ਨਿਸ਼ਾਨਾ ਬਣਾਇਆ ਜਾਵੇਗਾ।

ਹਾਲਾਂਕਿ, ਇਜ਼ਰਾਈਲ ਦੇ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਨੇ ਕਿਹਾ ਹੈ ਕਿ ਜਹਾਜ਼ ਉਨ੍ਹਾਂ ਦਾ ਨਹੀਂ ਹੈ ਅਤੇ ਇਸ ਵਿੱਚ ਕੋਈ ਵੀ ਇਜ਼ਰਾਈਲੀ ਜਾਂ ਭਾਰਤੀ ਨਾਗਰਿਕ ਨਹੀਂ ਹਨ। ਕਤਰ ਦੇ ਮੀਡੀਆ ਹਾਊਸ ਅਲਜਜ਼ੀਰਾ ਦੇ ਮੁਤਾਬਕ, ਇਹ ਕਾਰਗੋ ਜਹਾਜ਼ ਬ੍ਰਿਟੇਨ ਦਾ ਹੈ ਅਤੇ ਇਸ ਨੂੰ ਜਾਪਾਨੀ ਕੰਪਨੀ ਦੁਆਰਾ ਚਲਾਇਆ ਜਾਂਦਾ ਹੈ।

ਇਜ਼ਰਾਈਲ ਡਿਫੈਂਸ ਫੋਰਸਿਜ਼ (ਆਈ.ਡੀ.ਐੱਫ.) ਦੇ ਮੁਤਾਬਕ ਬਹਾਮਾਸ ਦੇ ਝੰਡੇ ਹੇਠ ਜਾ ਰਿਹਾ ਜਹਾਜ਼ ਬ੍ਰਿਟਿਸ਼ ਕੰਪਨੀ ਦੇ ਨਾਂ ’ਤੇ ਰਜਿਸਟਰਡ ਹੈ। ਇਜ਼ਰਾਈਲੀ ਕਾਰੋਬਾਰੀ ਅਬ੍ਰਾਹਮ ਉਂਗਰ ਇਸਦਾ ਅੰਸ਼ਕ ਸ਼ੇਅਰਧਾਰਕ ਹੈ। ਫਿਲਹਾਲ ਇਹ ਜਾਪਾਨੀ ਕੰਪਨੀ ਨੂੰ ਲੀਜ਼ ’ਤੇ ਦਿੱਤਾ ਗਿਆ ਸੀ।

ਇਜ਼ਰਾਈਲ ਦੇ ਵਿਦੇਸ਼ ਮੰਤਰਾਲੇ ਮੁਤਾਬਕ ਜਹਾਜ਼ ’ਤੇ ਯੂਕਰੇਨ, ਬੁਲਗਾਰੀਆ, ਫਿਲੀਪੀਨਜ਼ ਅਤੇ ਮੈਕਸੀਕੋ ਦੇ ਨਾਗਰਿਕ ਸਵਾਰ ਹਨ। ਇਸ ਦੇ ਨਾਲ ਹੀ ਇਜ਼ਰਾਈਲ ਦੇ ਪ੍ਰਧਾਨ ਮੰਤਰੀ ਦਫਤਰ ਨੇ ਇਸ ਨੂੰ ਅੱਤਵਾਦੀ ਘਟਨਾ ਦੱਸਿਆ ਅਤੇ ਇਸ ਲਈ ਈਰਾਨ ਨੂੰ ਜ਼ਿੰਮੇਵਾਰ ਠਹਿਰਾਇਆ।

ਇਸ ਦੇ ਨਾਲ ਹੀ ਹੂਤੀ ਫੌਜੀ ਬੁਲਾਰੇ ਯਾਹਿਆ ਸਾਰੀ ਨੇ ਕਿਹਾ ਹੈ ਕਿ ਉਹ ਜਹਾਜ਼ ’ਤੇ ਮੌਜੂਦ ਸਾਰੇ ਬੰਧਕਾਂ ਨੂੰ ਇਸਲਾਮਿਕ ਸਿਧਾਂਤਾਂ ਅਤੇ ਤਰੀਕਿਆਂ ਨਾਲ ਸੰਭਾਲ ਰਹੇ ਹਨ। ਉਨ੍ਹਾਂ ਨੇ ਲਾਲ ਸਾਗਰ ਵਿੱਚ ਇਜ਼ਰਾਈਲੀ ਜਹਾਜ਼ਾਂ ਨੂੰ ਨਿਸ਼ਾਨਾ ਬਣਾਉਣ ਦੀ ਫਿਰ ਧਮਕੀ ਦਿੱਤੀ ਹੈ।

ਇਜ਼ਰਾਈਲ ਦੇ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਨੇ ਇਸ ਨੂੰ ਈਰਾਨ ਦੁਆਰਾ ਇੱਕ ਅੰਤਰਰਾਸ਼ਟਰੀ ਜਹਾਜ਼ ’ਤੇ ਹਮਲਾ ਕਰਾਰ ਦਿੱਤਾ ਹੈ। ਉਨ੍ਹਾਂ ਕਿਹਾ ਕਿ ਇਹ ਈਰਾਨ ਵੱਲੋਂ ਅੱਤਵਾਦ ਦੀ ਇੱਕ ਹੋਰ ਕਾਰਵਾਈ ਹੈ। ਇਹ ਮੁਕਤ ਸੰਸਾਰ ਦੇ ਲੋਕਾਂ ’ਤੇ ਇੱਕ ਵੱਡਾ ਹਮਲਾ ਹੈ। ਇਸ ਤੋਂ ਇਲਾਵਾ ਇਹ ਦੁਨੀਆ ਦੀਆਂ ਸ਼ਿਪਿੰਗ ਲਾਈਨਾਂ ਨੂੰ ਵੀ ਪ੍ਰਭਾਵਿਤ ਕਰਦਾ ਹੈ। ਇਸ ਕਾਰਨ ਇਸ ਮਾਰਗ ਦੀ ਸੁਰੱਖਿਆ ਨੂੰ ਲੈ ਕੇ ਚਿੰਤਾ ਪੈਦਾ ਹੋਣੀ ਸੁਭਾਵਿਕ ਹੈ।

ਹਮਲੇ ਤੋਂ ਪਹਿਲਾਂ, ਈਰਾਨ-ਸਮਰਥਿਤ ਹੂਤੀ ਦੇ ਬੁਲਾਰੇ ਯਾਹਿਆ ਸਾਰਿਆ ਨੇ ਆਪਣੇ ਟੈਲੀਗ੍ਰਾਮ ਚੈਨਲ ’ਤੇ ਕਿਹਾ ਸੀ ਕਿ ਸਮੂਹ ਇਜ਼ਰਾਈਲੀ ਕੰਪਨੀਆਂ ਦੀ ਮਾਲਕੀ ਵਾਲੇ ਜਾਂ ਸੰਚਾਲਿਤ ਜਾਂ ਇਜ਼ਰਾਈਲੀ ਝੰਡੇ ਹੇਠ ਉਡਣ ਵਾਲੇ ਸਾਰੇ ਜਹਾਜ਼ਾਂ ਨੂੰ ਨਿਸ਼ਾਨਾ ਬਣਾਏਗਾ।

ਯਮਨ ਵਿੱਚ 2014 ਵਿੱਚ ਘਰੇਲੂ ਯੁੱਧ ਸ਼ੁਰੂ ਹੋਇਆ ਸੀ। ਇਸ ਦੀ ਜੜ੍ਹ ਸ਼ੀਆ-ਸੁੰਨੀ ਵਿਵਾਦ ਹੈ। ਕਾਰਨੇਗੀ ਮਿਡਲ ਈਸਟ ਸੈਂਟਰ ਦੀ ਰਿਪੋਰਟ ਮੁਤਾਬਕ ਦੋਹਾਂ ਭਾਈਚਾਰਿਆਂ ਵਿਚਾਲੇ ਲੰਬੇ ਸਮੇਂ ਤੋਂ ਵਿਵਾਦ ਚੱਲ ਰਿਹਾ ਸੀ, ਜੋ 2011 ’ਚ ਅਰਬ ਬਸੰਤ ਦੀ ਸ਼ੁਰੂਆਤ ਨਾਲ ਘਰੇਲੂ ਯੁੱਧ ’ਚ ਬਦਲ ਗਿਆ। 2014 ਵਿੱਚ ਸ਼ੀਆ ਬਾਗੀਆਂ ਨੇ ਸੁੰਨੀ ਸਰਕਾਰ ਵਿਰੁੱਧ ਮੋਰਚਾ ਖੋਲ੍ਹ ਦਿੱਤਾ ਸੀ।

ਇਸ ਸਰਕਾਰ ਦੀ ਅਗਵਾਈ ਰਾਸ਼ਟਰਪਤੀ ਅਬਦਰਾਬਬੂ ਮਨਸੂਰ ਹਾਦੀ ਕਰ ਰਹੇ ਸਨ। ਹਾਦੀ ਨੇ ਫਰਵਰੀ 2012 ਵਿੱਚ ਸਾਬਕਾ ਰਾਸ਼ਟਰਪਤੀ ਅਲੀ ਅਬਦੁੱਲਾ ਸਾਲੇਹ ਤੋਂ ਸੱਤਾ ਖੋਹ ਲਈ ਸੀ, ਜੋ ਅਰਬ ਬਸੰਤ ਤੋਂ ਬਾਅਦ ਲੰਬੇ ਸਮੇਂ ਤੱਕ ਸੱਤਾ ਵਿੱਚ ਰਹੇ ਸਨ। ਹਾਦੀ ਬਦਲਾਅ ਦੇ ਵਿਚਕਾਰ ਦੇਸ਼ ਵਿੱਚ ਸਥਿਰਤਾ ਲਿਆਉਣ ਲਈ ਸੰਘਰਸ਼ ਕਰ ਰਿਹਾ ਸੀ। ਉਸੇ ਸਮੇਂ, ਫੌਜ ਵੰਡੀ ਗਈ ਅਤੇ ਵੱਖਵਾਦੀ ਹਾਉਥੀ ਦੱਖਣ ਵਿੱਚ ਲਾਮਬੰਦ ਹੋ ਗਏ।