ਹਮਾਸ ਨੇ ਪੂਰੇ ਗਾਜ਼ਾ ਵਿੱਚ ਭੂਮੀਗਤ ਸੁਰੰਗਾਂ ਬਣਾਈਆਂ, ਇਜ਼ਰਾਈਲ ਤੋੜ ਰਿਹੈ ਸੁਰੰਗਾਂ

ਤੇਲ ਅਵੀਵ : ਹਮਾਸ ਦੇ ਅੱਤਵਾਦੀਆਂ ਵੱਲੋਂ ਇਜ਼ਰਾਈਲ 'ਤੇ ਕੀਤੇ ਗਏ ਹਮਲੇ ਤੋਂ ਬਾਅਦ ਇਜ਼ਰਾਇਲੀ ਫੌਜ ਗੁੱਸੇ 'ਚ ਆ ਗਈ ਹੈ। ਇਜ਼ਰਾਈਲੀ ਹਵਾਈ ਫੌਜ ਅੱਤਵਾਦੀਆਂ ਨੂੰ ਸੁਰੰਗ ਤੋਂ ਬਾਹਰ ਕੱਢਣ ਲਈ ਲਗਾਤਾਰ ਬੰਬ ਸੁੱਟ ਰਹੀ ਹੈ। ਦਰਅਸਲ, ਹਮਾਸ ਨੇ ਪੂਰੇ ਗਾਜ਼ਾ ਵਿੱਚ ਭੂਮੀਗਤ ਸੁਰੰਗਾਂ ਬਣਾਈਆਂ ਹਨ, ਜੋ ਇੱਕ ਦੂਜੇ ਨਾਲ ਜੁੜਦੀਆਂ ਹਨ। ਇਹ ਕਿਹਾ ਜਾਂਦਾ ਹੈ ਕਿ ਗਾਜ਼ਾ ਦੇ ਹੇਠਾਂ ਇੱਕ ਭੂਮੀਗਤ ਸ਼ਹਿਰ ਹੈ। ਅੱਤਵਾਦੀ ਇਸ ਵਿਚ ਲੁਕ ਜਾਂਦੇ ਹਨ, ਆਪਣੇ ਹਥਿਆਰ ਰੱਖਦੇ ਹਨ ਅਤੇ ਇਜ਼ਰਾਈਲ ਤੋਂ ਅਗਵਾ ਕੀਤੇ ਗਏ ਕਈ ਲੋਕਾਂ ਨੂੰ ਇੱਥੇ ਬੰਧਕ ਬਣਾ ਕੇ ਰੱਖਿਆ ਗਿਆ ਹੈ। ਇਜ਼ਰਾਈਲੀ ਹਵਾਈ ਫੌਜ ਇਨ੍ਹਾਂ ਸੁਰੰਗਾਂ ਨੂੰ ਢਾਹੁਣ 'ਚ ਲੱਗੀ ਹੋਈ ਹੈ। ਇਜ਼ਰਾਈਲ ਨੂੰ ਲਗਾਤਾਰ ਅਮਰੀਕਾ 'ਚ ਬਣੇ ਬੰਬ ਮਿਲ ਰਹੇ ਹਨ।

ਹਾਲਾਂਕਿ ਸਾਬਕਾ ਅਮਰੀਕੀ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਇਨ੍ਹਾਂ ਸੁਰੰਗਾਂ ਨੂੰ ਢਾਹੁਣ ਲਈ ਇਜ਼ਰਾਇਲੀ ਜ਼ਮੀਨੀ ਬਲਾਂ ਦੀ ਲੋੜ ਪਵੇਗੀ। ਅੱਤਵਾਦ ਰੋਕੂ ਮਾਹਰ ਅਤੇ ਅਮਰੀਕਾ ਦੇ ਸਾਬਕਾ ਸੀਨੀਅਰ ਰਾਸ਼ਟਰੀ ਸੁਰੱਖਿਆ ਅਧਿਕਾਰੀ ਮੈਥਿਊ ਲੇਵਿਟ ਨੇ ਕਿਹਾ ਕਿ ਇਜ਼ਰਾਈਲੀ ਫੌਜ ਵੱਧ ਤੋਂ ਵੱਧ ਸੁਰੰਗਾਂ ਨੂੰ ਤਬਾਹ ਕਰਨਾ ਚਾਹੁੰਦੀ ਹੈ। ਉਨ੍ਹਾਂ ਅੱਗੇ ਕਿਹਾ ਕਿ ਗਾਜ਼ਾ ਵਿੱਚ ਹਮਾਸ ਦੀਆਂ ਸੁਰੰਗਾਂ ਨੂੰ ਤਬਾਹ ਕਰਨਾ ਇਜ਼ਰਾਈਲ ਦਾ ਇੱਕ ਵੱਡਾ ਉਦੇਸ਼ ਹੈ। ਕਿਉਂਕਿ ਇਸ ਦੇ ਜ਼ਰੀਏ ਅੱਤਵਾਦੀ ਹਮਾਸ ਕਮਜ਼ੋਰ ਹੋ ਜਾਵੇਗਾ। ਹਮਾਸ ਹਮਲੇ ਤੋਂ ਬਾਅਦ ਬਾਈਡੇਨ ਪ੍ਰਸ਼ਾਸਨ ਨੇ ਕਿਹਾ ਕਿ ਉਹ ਇਜ਼ਰਾਈਲ ਨੂੰ ਅਜਿਹੀਆਂ ਕਿੱਟਾਂ ਦੇ ਰਿਹਾ ਹੈ ਜੋ ਆਪਣੇ ਆਮ ਹਥਿਆਰਾਂ ਨਾਲ ਗਾਈਡੇਡ ਬੰਬ ਬਣਾ ਸਕਦੀਆਂ ਹਨ, ਜੋ ਜ਼ਮੀਨ ਦੇ ਹੇਠਾਂ ਲੁਕੇ ਨਿਸ਼ਾਨਿਆਂ ਨੂੰ ਵੀ ਨਿਸ਼ਾਨਾ ਬਣਾ ਸਕਦੀਆਂ ਹਨ।