ਹਮਾਸ ਨੇ ਜੰਗ ਰੋਕਣ ਲਈ ਪਾਕਿਸਤਾਨ ਤੋਂ ਮਦਦ ਮੰਗੀ

ਤੇਲ ਅਵੀਵ, 7 ਦਸੰਬਰ, ਨਿਰਮਲ : ਹਮਾਸ ਨੇ ਇਜ਼ਰਾਈਲ ਨਾਲ ਜੰਗ ਰੋਕਣ ਲਈ ਪਾਕਿਸਤਾਨ ਤੋਂ ਮਦਦ ਮੰਗੀ ਹੈ। ਇਸਲਾਮਾਬਾਦ ਪਹੁੰਚੇ ਹਮਾਸ ਦੇ ਮੁਖੀ ਇਸਮਾਈਲ ਹਨੀਏ ਨੇ ਕਿਹਾ- ਪਾਕਿਸਤਾਨ ਇੱਕ ਬਹਾਦਰ ਦੇਸ਼ ਹੈ। ਇਹ ਮੁਜਾਹਿਦੀਨ ਦੀ ਧਰਤੀ ਹੈ। ਇਸਲਾਮ ਲਈ ਲੜਨ ਵਾਲਿਆਂ ਨੂੰ ਮੁਜਾਹਿਦੀਨ ਕਿਹਾ ਜਾਂਦਾ ਹੈ। ਪਾਕਿਸਤਾਨ ਦੇ ਜੀਓ ਨਿਊਜ਼ ਮੁਤਾਬਕ ਹਨੀਏ ਨੇ ਕਿਹਾ- ਜੇਕਰ ਪਾਕਿਸਤਾਨ ਚਾਹੇ ਤਾਂ ਇਜ਼ਰਾਇਲੀ ਹਮਲਿਆਂ ਨੂੰ ਰੋਕ ਸਕਦਾ ਹੈ। ਉਹ ਸਾਡਾ ਸਮਰਥਨ ਕਰ ਸਕਦਾ ਹੈ।

ਇੱਥੇ ਦੱਸ ਦੇਈਏ ਕਿ ਇਜ਼ਰਾਇਲੀ ਫੌਜ ਦਾ ਕਹਿਣਾ ਹੈ ਕਿ ਫੌਜੀਆਂ ਨੇ ਗਾਜ਼ਾ ਦੇ ਸਕੂਲਾਂ ਅਤੇ ਹਸਪਤਾਲਾਂ ਤੋਂ ਹਥਿਆਰ ਬਰਾਮਦ ਕੀਤੇ ਹਨ। ਇਸ ਦਾ ਇੱਕ ਵੀਡੀਓ ਵੀ ਸ਼ੇਅਰ ਕੀਤਾ ਗਿਆ ਹੈ। ਵੀਡੀਓ ’ਚ ਫੌਜੀ ਸਕੂਲ ’ਚੋਂ ਮਿਜ਼ਾਈਲਾਂ, ਗ੍ਰੇਨੇਡ ਅਤੇ ਬੰਦੂਕਾਂ ਕੱਢਦੇ ਹੋਏ ਦਿਖਾਈ ਦੇ ਰਹੇ ਹਨ।

ਇਸ ਦੇ ਨਾਲ ਹੀ ਅਲ ਜਜ਼ੀਰਾ ਮੁਤਾਬਕ ਗਾਜ਼ਾ ’ਚ ਕੋਈ ਸੁਰੱਖਿਅਤ ਥਾਂ ਨਹੀਂ ਬਚੀ ਹੈ। ਇੱਥੇ ਜੰਗਬੰਦੀ ਖਤਮ ਹੋਣ ਤੋਂ ਬਾਅਦ ਇੱਕ ਵਾਰ ਫਿਰ ਤੋਂ ਮਦਦ ਪਹੁੰਚਣਾ ਬੰਦ ਹੋ ਗਿਆ ਹੈ। ਇੱਕ ਫਲਸਤੀਨੀ ਔਰਤ ਨੇ ਕਿਹਾ, ਇੱਥੇ ਕੋਈ ਬੇਕਰੀ ਜਾਂ ਸੁਪਰਮਾਰਕੀਟ ਨਹੀਂ ਬਚਿਆ ਹੈ। ਸਾਨੂੰ ਭੋਜਨ ਨਹੀਂ ਮਿਲ ਰਿਹਾ। ਸਾਡੇ ਬੱਚੇ ਖਾਲੀ ਪੇਟ ਸੌਣ ਲਈ ਮਜਬੂਰ ਹਨ। ਹੁਣ ਲੱਗਦਾ ਹੈ ਕਿ ਅਸੀਂ ਇੱਥੇ ਭੁੱਖੇ ਮਰ ਜਾਵਾਂਗੇ।

ਸੋਸ਼ਲ ਮੀਡੀਆ ’ਤੇ ਵਾਇਰਲ ਇਸ ਵੀਡੀਓ ’ਚ ਇਕ ਫਲਸਤੀਨੀ ਬੱਚਾ ਕਹਿ ਰਿਹਾ ਹੈ ਕਿ ਉਸ ਨੂੰ ਖਾਣਾ ਨਹੀਂ ਮਿਲ ਰਿਹਾ। ਵਿਸ਼ਵ ਸਿਹਤ ਸੰਗਠਨ (ਡਬਲਯੂ.ਐਚ.ਓ.) ਦੇ ਡਾਇਰੈਕਟਰ ਜਨਰਲ ਟੇਡਰੋਸ ਅਡਾਨੋਮ ਦਾ ਕਹਿਣਾ ਹੈ ਕਿ ਗਾਜ਼ਾ ਪੱਟੀ ਵਿੱਚ ਸਿਹਤ ਪ੍ਰਣਾਲੀ ਤਬਾਹ ਹੋ ਚੁੱਕੀ ਹੈ ਅਤੇ ਪੂਰੀ ਤਰ੍ਹਾਂ ਤਬਾਹ ਹੋਣ ਵਾਲੀ ਹੈ। ਇੱਥੇ 36 ਵਿੱਚੋਂ ਸਿਰਫ਼ 14 ਹਸਪਤਾਲਾਂ ਵਿੱਚ ਲੋਕਾਂ ਦਾ ਇਲਾਜ ਚੱਲ ਰਿਹਾ ਹੈ। ਬਾਕੀ ਹਸਪਤਾਲ ਤਬਾਹ ਹੋ ਚੁੱਕੇ ਹਨ। ਗਾਜ਼ਾ ਵਿੱਚ ਜੰਗਬੰਦੀ ਦੀ ਤੁਰੰਤ ਲੋੜ ਹੈ।