ਗੋਲਡ ਮੈਡਲਿਸਟ, ਯੂਨੀਵਰਸਿਟੀ ਟੌਪਰ ਡਾ. ਪ੍ਰੀਤਿਕਾ ਅਰੋੜਾ

ਫਾਜ਼ਿਲਕਾ, 17 ਸਤੰਬਰ (ਬਲਜੀਤ ਸਿੰਘ ਮੱਲ੍ਹੀ) : ਸਮਰਪਣ ਅਤੇ ਪ੍ਰਮਾਤਮਾ ਦੇ ਆਸ਼ੀਰਵਾਦ ਨਾਲ ਕੁਝ ਵੀ ਸੰਭਵ ਹੈ - ਇਹ ਕਹਿਣਾ ਹੈ ਡਾ. ਪ੍ਰੀਤਿਕਾ ਅਰੋੜਾ ਦਾ, ਜਿਸ ਨੇ ਹਾਲ ਹੀ ਵਿੱਚ ਗੁਰੂ ਰਵਿਦਾਸ ਯੂਨੀਵਰਸਿਟੀ ਵਿੱਚ ਟਾਪ ਕੀਤਾ ਹੈ ਅਤੇ ਇੱਕ ਗੋਲਡ ਮੈਡਲ ਜੇਤੂ ਡਾਕਟਰ ਬਣੀ ਹੈ। ਆਧੁਨਿਕ ਸਮਾਜ ਵਿੱਚ ਜਿੱਥੇ ਹਰ ਪਾਸੇ ਐਲੋਪੈਥੀ ਦਾ ਬੋਲਬਾਲਾ ਹੈ, ਡਾ: ਪ੍ਰੀਤਿਕਾ ਅਰੋੜਾ ਨੇ ਆਪਣੇ ਦਿਲ ਦੀ ਗੱਲ ਸੁਣੀ ਅਤੇ ਸਾਢੇ ਚਾਰ ਸਾਲ ਦਾ ਹੋਮਿਓਪੈਥੀ ਕੋਰਸ ਸਫਲਤਾਪੂਰਵਕ ਪੂਰਾ ਕੀਤਾ।

12ਵੀਂ ਜਮਾਤ ਤੋਂ ਬਾਅਦ, ਪ੍ਰੀਤਿਕਾ ਨੇ ਬੀਐਸਸੀ ਨਰਸਿੰਗ ਦੀ ਡਿਗਰੀ ਲਈ ਅਤੇ ਗੁੜਗਾਓਂ ਦੇ ਇੱਕ ਅੰਤਰਰਾਸ਼ਟਰੀ ਹਸਪਤਾਲ ਵਿੱਚ ਕੰਮ ਕੀਤਾ। ਉੱਥੇ ਪ੍ਰੀਤਿਕਾ ਨੂੰ ਕਾਫੀ ਐਕਸਪੋਜਰ ਮਿਲਿਆ ਪਰ ਉਸ ਦੇ ਮਨ ਵਿੱਚ ਕਿਤੇ ਨਾ ਕਿਤੇ ਹੋਮਿਓਪੈਥੀ ਵੱਲ ਝੁਕਾਅ ਸੀ, ਜਿਸ ਦਾ ਕਾਰਨ ਹੋਮਿਓਪੈਥੀ ਦੀ ਬੀਮਾਰੀ ਨੂੰ ਜੜ੍ਹ ਤੋਂ ਖਤਮ ਕਰਨ ਦੀ ਸਮਰੱਥਾ ਸੀ।

ਡਾਕਟਰ ਪ੍ਰੀਤਿਕਾ ਦੱਸਦੀ ਹੈ ਕਿ ਉਸ ਦਾ ਆਪਣਾ ਸਾਈਨਸ ਹੋਮਿਓਪੈਥੀ ਇਲਾਜ ਨਾਲ ਠੀਕ ਹੋ ਗਿਆ ਸੀ ਜਿਸ ਨੂੰ ਕੋਈ ਵੀ ਐਲੋਪੈਥੀ ਦਵਾਈ ਠੀਕ ਨਹੀਂ ਕਰ ਸਕਦੀ ਸੀ। ਇਸ ਤੋਂ ਬਾਅਦ ਰਾਜਿੰਦਰਾ ਹਸਪਤਾਲ ਵਿੱਚ ਨੌਕਰੀ ਕਰਨ ਤੋਂ ਬਾਅਦ ਪ੍ਰੀਤਿਕਾ ਨੂੰ ਕਮਿਊਨਿਟੀ ਹੈਲਥ ਅਫਸਰ ਦੀ ਸਰਕਾਰੀ ਨੌਕਰੀ ਵੀ ਮਿਲ ਗਈ। ਇੰਨੇ ਥੋੜ੍ਹੇ ਸਮੇਂ ਵਿੱਚ ਬਹੁਤ ਕੁਝ ਹਾਸਲ ਕਰਨ ਦੇ ਬਾਵਜੂਦ ਕੋਈ ਵੀ ਲਾਲਚ ਪ੍ਰੀਤਿਕਾ ਦਾ ਧਿਆਨ ਭਟਕ ਨਹੀਂ ਸਕਿਆ।

ਹੁਣ ਉਸਦਾ ਟੀਚਾ ਸਾਫ਼ ਨਜ਼ਰ ਆ ਰਿਹਾ ਸੀ ਅਤੇ ਉਹ ਸੀ ਹੋਮਿਓਪੈਥੀ ਦੀ ਡਿਗਰੀ ਪ੍ਰਾਪਤ ਕਰਨਾ। ਪ੍ਰੀਤਿਕਾ ਦੱਸਦੀ ਹੈ ਕਿ ਇੱਥੇ ਤੱਕ ਪਹੁੰਚਣ ਲਈ ਉਸ ਨੂੰ ਸਖ਼ਤ ਮਿਹਨਤ ਦੇ ਨਾਲ-ਨਾਲ ਉਸ ਦੀ ਮਾਂ ਦਾ ਪੂਰਾ ਸਹਿਯੋਗ ਮਿਲਿਆ, ਜਿਨ੍ਹਾਂ ਨੂੰ ਉਸ ਦੀ ਕਾਬਲੀਅਤ ’ਤੇ ਪੂਰਾ ਭਰੋਸਾ ਸੀ। ਕਿਹਾ ਜਾਂਦਾ ਹੈ ਕਿ ਜਦੋਂ ਪ੍ਰਮਾਤਮਾ ਕਿਸੇ ਨੂੰ ਉੱਚਾ ਚੁੱਕਦਾ ਹੈ ਤਾਂ ਦੁਨੀਆ ਦੀ ਕੋਈ ਵੀ ਤਾਕਤ ਉਸ ਨੂੰ ਹੇਠਾਂ ਨਹੀਂ ਉਤਾਰ ਸਕਦੀ। ਪ੍ਰੀਤਿਕਾ ਦੇ ਜੀਵਨ ਵਿੱਚ ਜਦੋਂ ਵੀ ਕੋਈ ਸੰਘਰਸ਼ ਆਇਆ, ਉਸਨੇ ਧਿਆਨ ਦਾ ਸਹਾਰਾ ਲਿਆ।

ਉਸਦਾ ਮੰਨਣਾ ਹੈ ਕਿ ਉਸਦੀ ਇਕਾਗਰਤਾ ਸ਼੍ਰੀ ਆਸ਼ੂਤੋਸ਼ ਮਹਾਰਾਜ ਜੀ ਦੁਆਰਾ ਪ੍ਰਦਾਨ ਕੀਤੇ ਗਏ ਬ੍ਰਹਮ ਗਿਆਨ ਦੀ ਸਿਮਰਨ ਪ੍ਰਕਿਰਿਆ ਦੁਆਰਾ ਹੀ ਇਸ ਪੱਧਰ ’ਤੇ ਪਹੁੰਚੀ ਹੈ। ਡਾ: ਪ੍ਰੀਤਿਕਾ ਅਰੋੜਾ ਦਾ ਇੱਕ ਹੀ ਸੁਪਨਾ ਹੈ ਕਿ ਉਹ ਮਨੁੱਖੀ ਸਮਾਜ ਦੀ ਵੱਧ ਤੋਂ ਵੱਧ ਸੇਵਾ ਕਰ ਸਕੇ।