ਬਾਕਸ ਆਫਿਸ 'ਤੇ ਆਈ 'ਗਦਰ 2' ਦੀ ਸੁਨਾਮੀ, ਤੋੜਿਆ KGF-2 ਦਾ ਰਿਕਾਰਡ

ਬਾਕਸ ਆਫਿਸ 'ਤੇ 'ਗਦਰ 2' ਦੀ ਸੁਨਾਮੀ ਆ ਚੁੱਕੀ ਹੈ। ਇਸ ਫਿਲਮ ਨੇ ਕਈ ਹੋਰ ਫਿਲਮਾਂ ਦੇ ਰਿਕਾਰਡ ਵੀ ਤੋੜ ਦਿੱਤੇ ਹਨ। ਪਰ, ਇੱਕ ਅਜਿਹੀ ਫਿਲਮ ਵੀ ਹੈ ਜਿਸ ਨੂੰ 'ਗਦਰ 2' ਮਾਤ ਦੇਣ ਵਿੱਚ ਅਸਫਲ ਰਹੀ ਹੈ।

ਗਦਰ 2 ਨੇ ਬਾਕਸ ਆਫਿਸ 'ਤੇ ਧਮਾਲ ਮਚਾ ਦਿੱਤੀ ਹੈ। ਤਿੰਨ ਦਿਨਾਂ ਦੇ ਅੰਦਰ ਸੰਨੀ ਦਿਓਲ ਅਤੇ ਅਮੀਸ਼ਾ ਪਟੇਲ ਦੀ ਇਸ ਫਿਲਮ ਨੇ 130 ਕਰੋੜ ਦਾ ਅੰਕੜਾ ਪਾਰ ਕਰ ਲਿਆ ਹੈ। ਇੰਨਾ ਹੀ ਨਹੀਂ ਅਨਿਲ ਸ਼ਰਮਾ ਦੇ ਨਿਰਦੇਸ਼ਨ 'ਚ ਬਣੀ ਇਸ ਫਿਲਮ ਨੇ ਐਤਵਾਰ ਨੂੰ 'KGF 2' ਅਤੇ 'ਬਾਹੂਬਲੀ 2' ਵਰਗੀਆਂ ਬਲਾਕਬਸਟਰ ਫਿਲਮਾਂ ਦੇ ਰਿਕਾਰਡ ਤੋੜ ਦਿੱਤੇ ਹਨ। ਹਾਲਾਂਕਿ 'ਗਦਰ 2' ਅਜੇ ਇਕ ਫਿਲਮ ਪਿੱਛੇ ਹੈ।

'ਗਦਰ 2' ਨੇ ਪਹਿਲੇ ਦਿਨ 40.1 ਕਰੋੜ ਦੀ ਓਪਨਿੰਗ ਕੀਤੀ ਸੀ। ਫਿਰ ਦੂਜੇ ਦਿਨ 43.08 ਕਰੋੜ ਦਾ ਕਾਰੋਬਾਰ ਕੀਤਾ। ਦੂਜੇ ਪਾਸੇ ਸੈਕਨਿਲਕ ਦੀ ਰਿਪੋਰਟ ਮੁਤਾਬਕ ਤੀਜੇ ਦਿਨ 20.71 ਫੀਸਦੀ ਦੇ ਉਛਾਲ ਨਾਲ 52 ਕਰੋੜ ਰੁਪਏ ਦਾ ਕਲੈਕਸ਼ਨ ਹੋਇਆ ਹੈ। ਮਤਲਬ ਤਿੰਨ ਦਿਨਾਂ 'ਚ ਫਿਲਮ ਨੇ ਕਰੀਬ 135.09 ਕਰੋੜ ਰੁਪਏ ਕਮਾ ਲਏ ਹਨ।

ਬਾਕਸ ਆਫਿਸ 'ਤੇ ਪਹਿਲੇ ਐਤਵਾਰ ਨੂੰ ਸਭ ਤੋਂ ਵੱਧ ਕਮਾਈ ਕਰਨ ਵਾਲੀਆਂ ਫਿਲਮਾਂ ਦੀ ਗੱਲ ਕਰੀਏ ਤਾਂ ਸ਼ਾਹਰੁਖ ਖਾਨ ਦੀ 'ਪਠਾਨ' ਸਭ ਤੋਂ ਉੱਪਰ ਹੈ। 'ਪਠਾਨ' ਨੇ ਆਪਣੇ ਪਹਿਲੇ ਐਤਵਾਰ ਨੂੰ 58.5 ਕਰੋੜ ਦੀ ਕਮਾਈ ਕੀਤੀ। ਪਰ, 'ਗਦਰ 2' ਨੇ ਆਪਣੇ ਪਹਿਲੇ ਐਤਵਾਰ ਨੂੰ 52 ਕਰੋੜ ਰੁਪਏ ਕਮਾ ਲਏ ਹਨ। ਮਤਲਬ 'ਗਦਰ 2' ਸਿਰਫ਼ 6.5 ਕਰੋੜ ਰੁਪਏ ਨਾਲ 'ਪਠਾਨ' ਦਾ ਰਿਕਾਰਡ ਤੋੜਨ 'ਚ ਨਾਕਾਮ ਰਹੀ ਹੈ। ਹਾਲਾਂਕਿ 'ਗਦਰ 2' ਨੇ 'ਕੇਜੀਐਫ 2', 'ਬਾਹੂਬਲੀ 2' ਅਤੇ 'ਟਾਈਗਰ ਜ਼ਿੰਦਾ ਹੈ' ਨੂੰ ਬਾਕਸ ਆਫਿਸ 'ਤੇ ਮਾਤ ਦਿੱਤੀ ਹੈ।