ਰਾਜਸਥਾਨ 'ਚ ਭਾਰੀ ਮੀਂਹ ਕਾਰਨ ਪੰਜ ਲੋਕਾਂ ਦੀ ਮੌਤ

ਜੈਪੁਰ : ਰਾਜਸਥਾਨ ਵਿੱਚ ਮਾਨਸੂਨ ਇੱਕ ਵਾਰ ਫਿਰ ਸਰਗਰਮ ਹੋ ਗਿਆ ਹੈ। ਸੂਬੇ 'ਚ ਪਿਛਲੇ ਤਿੰਨ ਦਿਨਾਂ ਤੋਂ ਬਾਰਿਸ਼ ਜਾਰੀ ਹੈ। ਭਾਰੀ ਮੀਂਹ ਕਾਰਨ ਸੂਬੇ ਦੇ ਪੰਜ ਵੱਡੇ ਡੈਮ ਓਵਰਫਲੋ ਹੋ ਗਏ ਹਨ। ਇਸ ਤੋਂ ਬਾਅਦ ਨਦੀ ਕੰਢੇ ਵਸੇ ਕਈ ਪਿੰਡਾਂ ਨੂੰ ਅਲਰਟ 'ਤੇ ਕਰ ਦਿੱਤਾ ਗਿਆ ਹੈ। ਅੱਜ ਸਵੇਰੇ 8 ਵਜੇ ਤੱਕ ਬਾਂਸਵਾੜਾ ਵਿੱਚ ਸਭ ਤੋਂ ਵੱਧ 7.5 ਇੰਚ ਮੀਂਹ ਪਿਆ ਹੈ। ਇੱਥੇ ਮੀਂਹ ਕਾਰਨ ਹਾਦਸਿਆਂ ਵਿੱਚ 5 ਲੋਕਾਂ ਦੀ ਮੌਤ ਹੋ ਗਈ। ਸੋਮਵਾਰ ਨੂੰ ਜਲੌਰ ਅਤੇ ਸੈਂਚੌਰ ਦੇ ਸਕੂਲ ਬੰਦ ਕਰਨ ਦਾ ਐਲਾਨ ਕੀਤਾ ਗਿਆ ਹੈ।

ਮੌਸਮ ਵਿਭਾਗ (ਆਈਐਮਡੀ) ਨੇ ਐਤਵਾਰ ਨੂੰ ਸੱਤ ਜ਼ਿਲ੍ਹਿਆਂ ਵਿੱਚ ਭਾਰੀ ਤੋਂ ਬਹੁਤ ਭਾਰੀ ਮੀਂਹ ਦੀ ਭਵਿੱਖਬਾਣੀ ਕੀਤੀ ਹੈ। IMD ਨੇ ਇਸ ਦੇ ਲਈ ਰੈੱਡ ਅਤੇ ਆਰੇਂਜ ਅਲਰਟ ਜਾਰੀ ਕੀਤਾ ਹੈ । ਪਿਛਲੇ 24 ਘੰਟਿਆਂ ਦੌਰਾਨ ਰਾਜਸਥਾਨ ਦੇ ਪੰਜ ਜ਼ਿਲ੍ਹਿਆਂ ਵਿੱਚ 100 ਮਿਲੀਮੀਟਰ ਤੋਂ ਵੱਧ ਮੀਂਹ ਦਰਜ ਕੀਤਾ ਗਿਆ। ਆਈਐਮਡੀ ਦੇ ਅਨੁਸਾਰ, ਰਾਜ ਦੇ ਪੂਰਬੀ ਜ਼ਿਲ੍ਹਿਆਂ ਵਿੱਚੋਂ, ਬਾਂਸਵਾੜਾ ਦੇ ਬਾਗੀਦੌਰਾ ਵਿੱਚ ਸਭ ਤੋਂ ਵੱਧ 365 ਮਿਲੀਮੀਟਰ ਬਾਰਸ਼ ਦਰਜ ਕੀਤੀ ਗਈ, ਜਦੋਂ ਕਿ ਇਸੇ ਜ਼ਿਲ੍ਹੇ ਦੇ ਸੱਜਣਗੜ੍ਹ, ਸੱਲੋਪਤ, ਸ਼ੇਰਗੜ੍ਹ, ਕੇਸਰਪੁਰਾ, ਦਾਨਪੁਰ, ਭੂੰਗੜਾ ਅਤੇ ਗਹਿਟੋਲ ਵਿੱਚ ਵੀ 200 ਮਿਲੀਮੀਟਰ ਤੋਂ ਵੱਧ ਬਾਰਸ਼ ਦਰਜ ਕੀਤੀ ਗਈ। .

ਸ਼ਨੀਵਾਰ ਨੂੰ ਬਨਵਾਸਵਾੜਾ ਦੇ ਮਾਹੀ ਬਜਾਜ ਡੈਮ 'ਚ ਪਾਣੀ ਦਾ ਪੱਧਰ 280.50 ਮੀਟਰ ਤੱਕ ਪਹੁੰਚ ਗਿਆ। ਇਸ ਡੈਮ ਦੀ ਸਮਰੱਥਾ 281.50 ਮੀਟਰ ਤੱਕ ਹੈ। ਅਚਾਨਕ ਪਾਣੀ ਵਧਣ ਤੋਂ ਬਾਅਦ ਡੈਮ ਦੇ 16 ਗੇਟ 6 ਮੀਟਰ ਤੱਕ ਖੋਲ੍ਹ ਦਿੱਤੇ ਗਏ। ਡੈਮ ਤੋਂ ਪਾਣੀ ਛੱਡਣ ਕਾਰਨ ਉਦੈਪੁਰ ਵੱਲ ਜਾਣ ਵਾਲੀ ਪਲੋਦਾ-ਪਿੰਡਾਵਾਲ ਰੋਡ, ਜੈਪੁਰ ਰੋਡ, ਅਹਿਮਦਾਬਾਦ ਰੋਡ ਆਦਿ ਕਈ ਪ੍ਰਮੁੱਖ ਸੜਕਾਂ ਪ੍ਰਭਾਵਿਤ ਹੋਈਆਂ ਹਨ। ਦੱਸ ਦੇਈਏ ਕਿ ਕੋਟਾ ਬੈਰਾਜ, ਪਾਲੀ ਦਾ ਜਵਾਈ ਡੈਮ, ਝਾਲਾਵਾੜ ਦਾ ਕਾਲਿਸਿੰਧ ਡੈਮ ਅਤੇ ਡੂੰਗਰਪੁਰ ਦਾ ਸੋਮ ਕਮਲਾ ਅੰਬਾ ਡੈਮ ਵੀ ਓਵਰਫਲੋ ਹੋ ਗਿਆ ਹੈ।