ਦੁਸਹਿਰੇ 'ਤੇ ਚਲਾਏ ਪਟਾਕਿਆਂ ਨੇ ਹਵਾ ਜ਼ਹਿਰੀਲੇ ਕਣਾਂ ਨਾਲ ਭਰੀ

ਨਵੀਂ ਦਿੱਲੀ : ਦੋ ਦਿਨਾਂ ਦੇ ਮਾਮੂਲੀ ਸੁਧਾਰ ਤੋਂ ਬਾਅਦ ਬੁੱਧਵਾਰ ਨੂੰ ਦਿੱਲੀ ਦੀ ਹਵਾ ਵਿਚ ਪ੍ਰਦੂਸ਼ਣ ਦਾ ਪੱਧਰ ਫਿਰ ਵਧ ਗਿਆ। ਦਿੱਲੀ ਦਾ ਔਸਤ ਸੂਚਕ ਅੰਕ ਇੱਕ ਦਿਨ ਪਹਿਲਾਂ ਦੇ ਮੁਕਾਬਲੇ 23 ਅੰਕ ਵਧਿਆ ਹੈ। ਦਿੱਲੀ ਦੇ ਕਈ ਇਲਾਕੇ ਅਜਿਹੇ ਹਨ ਜਿੱਥੇ ਹਵਾ ਬੇਹੱਦ ਖ਼ਰਾਬ ਹੋਣ ਦੀ ਹੱਦ ਤੱਕ ਪਹੁੰਚ ਗਈ ਹੈ। ਦਿੱਲੀ ਦੇ ਲੋਕਾਂ ਨੂੰ ਪ੍ਰਦੂਸ਼ਣ ਨਾਲ ਭਰੀ ਹਵਾ ਤੋਂ ਕੋਈ ਰਾਹਤ ਮਿਲਦੀ ਨਜ਼ਰ ਨਹੀਂ ਆ ਰਹੀ।

ਐਤਵਾਰ ਇਸ ਸੀਜ਼ਨ ਦਾ ਸਭ ਤੋਂ ਪ੍ਰਦੂਸ਼ਿਤ ਦਿਨ ਸੀ। ਇਸ ਦਿਨ ਏਅਰ ਕੁਆਲਿਟੀ ਇੰਡੈਕਸ 300 ਨੂੰ ਪਾਰ ਕਰ ਗਿਆ ਸੀ ਯਾਨੀ ਕਿ ਬੇਹੱਦ ਖਰਾਬ ਸ਼੍ਰੇਣੀ 'ਚ ਹੈ, ਪਰ ਉਦੋਂ ਤੋਂ ਪ੍ਰਦੂਸ਼ਣ ਦੇ ਪੱਧਰ 'ਚ ਮਾਮੂਲੀ ਸੁਧਾਰ ਹੋਇਆ ਹੈ। ਦਿਨ ਭਰ ਧੁੱਪ ਰਹਿਣ ਕਾਰਨ ਪ੍ਰਦੂਸ਼ਕ ਕਣਾਂ ਦੇ ਫੈਲਾਅ 'ਚ ਮਾਮੂਲੀ ਵਾਧਾ ਹੋਇਆ ਸੀ ਪਰ ਬੁੱਧਵਾਰ ਨੂੰ ਇਕ ਵਾਰ ਫਿਰ ਦਿੱਲੀ ਦੀ ਹਵਾ 'ਚ ਪ੍ਰਦੂਸ਼ਣ ਦਾ ਪੱਧਰ ਵਧਣ ਲੱਗਾ। CPCB ਦੇ ਅਨੁਸਾਰ, ਬੁੱਧਵਾਰ ਨੂੰ ਔਸਤ ਗੁਣਵੱਤਾ ਸੂਚਕਾਂਕ 243 ਸੀ, ਜਦੋਂ ਕਿ ਮੰਗਲਵਾਰ ਨੂੰ ਇਹ ਸੂਚਕਾਂਕ 220 ਸੀ।

ਆਮ ਨਾਲੋਂ ਦੁੱਗਣਾ ਪ੍ਰਦੂਸ਼ਣ

ਬੁੱਧਵਾਰ ਨੂੰ ਦਿੱਲੀ ਦਾ ਸ਼ਾਦੀਪੁਰ ਇਲਾਕਾ ਸਭ ਤੋਂ ਵੱਧ ਪ੍ਰਦੂਸ਼ਿਤ ਸੀ, ਇੱਥੇ ਇੰਡੈਕਸ 305 ਸੀ, ਜਿਸਦਾ ਮਤਲਬ ਹੈ ਕਿ ਹਵਾ ਬਹੁਤ ਖਰਾਬ ਸ਼੍ਰੇਣੀ ਵਿੱਚ ਸੀ। ਇਸ ਸਮੇਂ ਦਿੱਲੀ ਦੀ ਹਵਾ ਵਿੱਚ ਆਮ ਨਾਲੋਂ ਦੁੱਗਣਾ ਪ੍ਰਦੂਸ਼ਣ ਹੈ। ਮਾਪਦੰਡਾਂ ਅਨੁਸਾਰ ਹਵਾ ਵਿੱਚ ਪ੍ਰਦੂਸ਼ਕ ਕਣ ਪੀਐਮ 10 ਦਾ ਪੱਧਰ 100 ਤੋਂ ਘੱਟ ਅਤੇ ਪ੍ਰਦੂਸ਼ਕ ਕਣ ਪੀਐਮ 2.5 ਦਾ ਪੱਧਰ 60 ਤੋਂ ਘੱਟ ਹੋਣਾ ਚਾਹੀਦਾ ਹੈ ਜਦੋਂਕਿ ਬੁੱਧਵਾਰ ਸ਼ਾਮ 4 ਵਜੇ ਪੀਐਮ 10 ਦਾ ਪੱਧਰ 205 ਅਤੇ PM 2.5 ਦਾ 106 ਸੀ। ਹਵਾ ਦੀ ਰਫ਼ਤਾਰ 'ਚ ਕਮੀ ਅਤੇ ਦੁਸਹਿਰੇ 'ਤੇ ਪਟਾਕੇ ਚਲਾਉਣ ਨੂੰ ਪ੍ਰਦੂਸ਼ਣ ਦਾ ਪੱਧਰ ਵਧਣ ਦਾ ਕਾਰਨ ਮੰਨਿਆ ਜਾ ਰਿਹਾ ਹੈ।

ਹੁਣ ਰਾਜਧਾਨੀ 'ਚ ਸਵੇਰੇ ਹਲਕੀ ਧੁੰਦ ਦੇਖਣ ਨੂੰ ਮਿਲੇਗੀ, ਜਦਕਿ ਦਿਨ ਵੇਲੇ ਆਸਮਾਨ ਸਾਫ ਰਹੇਗਾ। ਇਸ ਕਾਰਨ ਘੱਟੋ-ਘੱਟ ਤਾਪਮਾਨ ਆਮ ਨਾਲੋਂ ਹੇਠਾਂ ਰਹਿਣ ਦੀ ਸੰਭਾਵਨਾ ਹੈ। ਹੁਣ ਦਿੱਲੀ ਦੇ ਮੌਸਮ 'ਤੇ ਠੰਡ ਦਾ ਅਸਰ ਦਿਖਾਈ ਦੇ ਰਿਹਾ ਹੈ। ਦਿੱਲੀ ਦੀ ਸਟੈਂਡਰਡ ਆਬਜ਼ਰਵੇਟਰੀ ਸਫਦਰਜੰਗ ਨੇ ਬੁੱਧਵਾਰ ਨੂੰ ਵੱਧ ਤੋਂ ਵੱਧ ਤਾਪਮਾਨ 31.6 ਡਿਗਰੀ ਸੈਲਸੀਅਸ ਦਰਜ ਕੀਤਾ, ਜੋ ਕਿ ਆਮ ਤਾਪਮਾਨ ਹੈ।