Ludhiana News: ਸਰਸ ਮੇਲੇ 'ਚ ਗਾਇਕ ਸਤਿੰਦਰ ਸਰਤਾਜ ਦੇ ਸ਼ੋਅ ਦੌਰਾਨ ਹੰਗਾਮਾ, ਲੋਕਾਂ ਨੇ ਰੱਜ ਕੇ ਕੀਤੀ ਭੰਨ ਤੋੜ
ਇੰਸਪੈਕਟਰ ਨਾਲ ਬਦਸਲੂਕੀ
By : Annie Khokhar
Satinder Sartaaj Saras Mela: ਪੰਜਾਬ ਦੇ ਲੁਧਿਆਣਾ ਵਿੱਚ ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਦੇ ਮੈਦਾਨ ਵਿੱਚ ਹੋ ਰਿਹਾ ਸਰਸ ਮੇਲਾ ਖ਼ੂਬ ਸੁਰਖ਼ੀਆਂ ਵਿੱਚ ਹੈ। ਹੋਵੇ ਵੀ ਕਿਉਂ ਨਾ? ਆਖਿਰ ਸਰਸ ਮੇਲੇ ਦੀ ਸ਼ੋਭਾ ਵਧਾਉਣ ਕਈ ਪੰਜਾਬੀ ਸਟਾਰਜ਼ ਜੋਂ ਪਹੁੰਚ ਰਹੇ ਹਨ। ਬੀਤੇ ਦਿਨੀਂ ਇੱਥੇ ਪੰਜਾਬੀ ਗਾਇਕ ਸਤਿੰਦਰ ਸਰਤਾਜ ਦੀ ਲਾਈਵ ਪਰਫ਼ਾਰਮੈਂਸ ਦੀ, ਪਰ ਸਰਤਾਜ ਦੇ ਸ਼ੋ ਦਾ ਰੰਗ ਫਿੱਕਾ ਪੈ ਗਿਆ। ਦਰਅਸਲ ਸਰਤਾਜ ਦੇ ਕੰਸਰਟ ਵਿੱਚ ਜ਼ਰੂਰਤ ਨਾਲੋਂ ਜ਼ਿਆਦਾ ਭੀੜ ਇਕੱਠੀ ਹੋ ਗਈ, ਜੋਂ ਕਿ ਪੰਜਾਬ ਪੁਲਿਸ ਦੇ ਵੱਸੋਂ ਬਾਹਰ ਹੋ ਗਈ।
ਲੋਕਾਂ ਨੂੰ ਅੰਦਰ ਜਾਣ ਲਈ ਸੰਘਰਸ਼ ਕਰਨਾ ਪਿਆ। ਭੀੜ ਨੂੰ ਕਾਬੂ ਕਰਨ ਲਈ ਡਿਊਟੀ 'ਤੇ ਤਾਇਨਾਤ ਪੁਲਿਸ ਅਧਿਕਾਰੀਆਂ ਨੂੰ ਭੀੜ ਨਾਲ ਧੱਕਾ ਮੁੱਕੀ ਕਰਨੀ ਪਈ। ਭੀੜ ਦੀ ਪੁਲਿਸ ਨਾਲ ਝੜਪ ਵੀ ਹੋ ਗਈ। ਇੱਕ ਵਿਅਕਤੀ ਨੇ ਡਿਊਟੀ 'ਤੇ ਤਾਇਨਾਤ ਇੰਸਪੈਕਟਰ ਨੂੰ ਉਸਦੀ ਵਰਦੀ ਤੋਂ ਸਟਾਰ ਉਤਰਵਾਉਣ ਦੀ ਧਮਕੀ ਵੀ ਦਿੱਤੀ। ਸਥਿਤੀ ਉਦੋਂ ਹੋਰ ਵਿਗੜ ਗਈ ਜਦੋਂ ਉਸ ਵਿਅਕਤੀ ਨੇ ਜਾਣ ਤੋਂ ਇਨਕਾਰ ਕਰ ਦਿੱਤਾ ਅਤੇ ਅੰਦਰ ਜਾਣ ਲਈ ਜ਼ਿੱਦ ਕਰਦਾ ਰਿਹਾ। ਇਸ ਦਰਮਿਆਨ ਸ਼ੋਅ ਵਿੱਚ ਵੱਡਾ ਹੰਗਾਮਾ ਹੋ ਗਿਆ। ਸ਼ੋਅ ਦੇਖਣ ਆਏ ਲੋਕਾਂ ਨੇ ਸਰਕਾਰੀ ਜਾਇਦਾਦ ਦੀ ਭੰਨਤੋੜ ਕੀਤੀ, ਫਾਇਰ ਬ੍ਰਿਗੇਡ ਦੀਆਂ ਗੱਡੀਆਂ 'ਤੇ ਚੜ੍ਹ ਗਏ ਅਤੇ ਮੇਲੇ ਵਿੱਚ ਕੁਰਸੀਆਂ ਵੀ ਤੋੜ ਦਿੱਤੀਆਂ।
ਕੰਵਰ ਗਰੇਵਾਲ ਅਤੇ ਮਨਰਾਜ ਪਾਤਰ, ਦਿਲਪ੍ਰੀਤ ਢਿਲੋਂ, ਵਿੱਕੀ ਢਿਲੋਂ, ਪਰੀ ਪੰਧੇਰ ਅਤੇ ਬਸੰਤ ਕੌਰ, ਗੁਰਨਾਮ ਭੁੱਲਰ ਅਤੇ ਜੋਸ਼ ਬਰਾੜ ਨੇ 7 ਅਕਤੂਬਰ ਤੋਂ ਸ਼ੁਰੂ ਹੋਏ ਲੁਧਿਆਣਾ ਦੇ ਸਰਸ ਮੇਲੇ ਵਿੱਚ ਪ੍ਰਦਰਸ਼ਨ ਕੀਤਾ ਹੈ। ਮਸ਼ਹੂਰ ਗਾਇਕਾਂ ਦੇ ਪ੍ਰਦਰਸ਼ਨਾਂ ਦੇ ਮੱਦੇਨਜ਼ਰ, ਪੁਲਿਸ ਪ੍ਰਸ਼ਾਸਨ ਨੇ ਸਖ਼ਤ ਸੁਰੱਖਿਆ ਪ੍ਰਬੰਧ ਕੀਤੇ ਹਨ।
ਪੰਜਾਬੀ ਸੂਫ਼ੀ ਗਾਇਕ ਸਰਤਾਜ ਦਾ ਪ੍ਰੋਗਰਾਮ 13 ਅਕਤੂਬਰ ਦੀ ਰਾਤ ਨੂੰ ਹੋਣਾ ਸੀ। ਪਹਿਲਾਂ 10 ਅਕਤੂਬਰ ਨੂੰ ਹੋਣ ਵਾਲਾ ਸੀ, ਪਰ ਗਾਇਕ ਨੇ ਕਰਵਾ ਚੌਥ 10 ਅਕਤੂਬਰ ਨੂੰ ਹੋਣ ਕਾਰਨ ਇਸਨੂੰ 13 ਅਕਤੂਬਰ ਨੂੰ ਕਰ ਦਿੱਤਾ। ਇਸ ਪ੍ਰੋਗਰਾਮ ਦੀਆਂ ਸਾਰੀਆਂ ਟਿਕਟਾਂ 10 ਅਕਤੂਬਰ ਤੋਂ ਪਹਿਲਾਂ ਬੁੱਕ ਕਰ ਲਈਆਂ ਗਈਆਂ ਸਨ। ਮੁੜ ਸ਼ਡਿਊਲ ਕਰਨ 'ਤੇ, ਪ੍ਰਸ਼ਾਸਨ ਨੇ ਸਪੱਸ਼ਟ ਕੀਤਾ ਕਿ 10 ਅਕਤੂਬਰ ਲਈ ਬੁੱਕ ਕੀਤੀਆਂ ਗਈਆਂ ਟਿਕਟਾਂ 13 ਅਕਤੂਬਰ ਨੂੰ ਤਬਦੀਲ ਕਰ ਦਿੱਤੀਆਂ ਜਾਣਗੀਆਂ। ਗਾਇਕ ਸਰਤਾਜ 13 ਅਕਤੂਬਰ ਦੀ ਰਾਤ ਨੂੰ ਸਰਸ ਮੇਲੇ ਵਿੱਚ ਪ੍ਰੋਗਰਾਮ ਅਨੁਸਾਰ ਪਹੁੰਚੇ। ਗਾਇਕ ਨੂੰ ਦੇਖਣ ਲਈ ਦਰਸ਼ਕਾਂ ਦੀ ਇੱਕ ਵੱਡੀ ਭੀੜ ਇਕੱਠੀ ਹੋ ਗਈ, ਅਤੇ ਪੁਲਿਸ ਨੂੰ ਉਨ੍ਹਾਂ ਨੂੰ ਕਾਬੂ ਕਰਨ ਲਈ ਸੰਘਰਸ਼ ਕਰਨਾ ਪਿਆ।
ਇਸ ਦੌਰਾਨ, ਇੱਕ ਵਿਅਕਤੀ ਨੇ ਡਿਊਟੀ 'ਤੇ ਮੌਜੂਦ ਪੁਲਿਸ ਸਟੇਸ਼ਨ ਡਿਵੀਜ਼ਨ ਨੰਬਰ 4 ਦੇ ਐਸਐਚਓ ਇੰਸਪੈਕਟਰ ਗਗਨਦੀਪ ਨਾਲ ਝਗੜਾ ਕੀਤਾ। ਉਸਨੇ ਇੰਸਪੈਕਟਰ ਦੀ ਵਰਦੀ ਤੇ ਵੀ ਹੱਥ ਪਾਇਆ। ਝਗੜੇ ਦੀ ਇੱਕ ਵੀਡੀਓ ਸਾਹਮਣੇ ਆਈ ਹੈ, ਜਿਸ ਵਿੱਚ ਨੌਜਵਾਨ ਐਸਐਚਓ ਨੂੰ ਧੱਕਾ ਦਿੰਦਾ ਦਿਖਾਈ ਦੇ ਰਿਹਾ ਹੈ।
