Karisma Kapoor: ਕਰਿਸ਼ਮਾ ਕਪੂਰ ਦੇ ਸਾਬਕਾ ਪਤੀ ਦੀ ਵਸੀਅਤ ਨੂੰ ਲੈਕੇ ਹੰਗਾਮਾ, ਬੱਚਿਆਂ ਨੇ ਸੌਤੇਲੀ ਮਾਂ 'ਤੇ ਲਾਏ ਇਲਜ਼ਾਮ

Karisma Kapoor Sanjay Kapoor Property Dispute: ਕਰਿਸ਼ਮਾ ਕਪੂਰ ਦਾ ਸਾਬਕਾ ਪਤੀ ਮਰਹੂਮ ਸੰਜੇ ਕਪੂਰ ਦੀ ਵਸੀਅਤ ਨੂੰ ਲੈਕੇ ਵਿਵਾਦ ਭਖਦਾ ਜਾ ਰਿਹਾ ਹੈ। ਕਰਿਸ਼ਮਾ ਕਪੂਰ ਦਾ ਪ੍ਰਾਪਰਟੀ ਵਿਵਾਦ ਅਦਾਲਤ ਵਿੱਚ ਪਹੁੰਚ ਗਿਆ ਹੈ। ਇਹੀ ਨਹੀਂ ਕਰਿਸ਼ਮਾ ਦੇ ਬੱਚਿਆਂ ਨੇ ਆਪਣੀ ਸੌਤੇਲੀ ਮਾਂ ਤੇ ਕਈ ਸੰਗੀਨ ਇਲਜ਼ਾਮ ਵੀ ਲਗਾਏ। ਇੱਥੋਂ ਤੱਕ ਕਿ ਪ੍ਰਿਆ ਕਪੂਰ ਨੂੰ ਲਾਲਚੀ ਤੱਕ ਕਿਹਾ ਗਿਆ।

ਅਦਾਕਾਰਾ ਦੇ ਦੋ ਬੱਚਿਆਂ ਨੇ ਸੋਮਵਾਰ, 13 ਅਕਤੂਬਰ ਨੂੰ ਦਿੱਲੀ ਹਾਈ ਕੋਰਟ ਵਿੱਚ ਆਪਣੇ ਸਵਰਗੀ ਪਿਤਾ ਸੰਜੇ ਕਪੂਰ ਦੀ ਕਥਿਤ ਵਸੀਅਤ 'ਤੇ ਸਵਾਲ ਉਠਾਏ। ਅਦਾਕਾਰਾ ਦੇ ਬੱਚਿਆਂ ਨੇ ਦਾਅਵਾ ਕੀਤਾ ਹੈ ਕਿ ਵਸੀਅਤ ਵਿੱਚ ਕਈ ਖਾਮੀਆਂ ਹਨ ਅਤੇ ਇਹ ਸੰਭਵ ਹੈ ਕਿ ਸੰਜੇ ਕਪੂਰ ਨੇ ਇਸ ਦਾ ਖਰੜਾ ਨਹੀਂ ਬਣਾਇਆ। ਕਰਿਸ਼ਮਾ ਦੀ ਧੀ ਸਮਾਇਰਾ ਅਤੇ ਪੁੱਤਰ ਕਿਆਨ ਰਾਜ ਦੀ ਨੁਮਾਇੰਦਗੀ ਕਰਨ ਵਾਲੇ ਵਕੀਲ ਨੇ ਜਸਟਿਸ ਜੋਤੀ ਸਿੰਘ ਦੇ ਸਾਹਮਣੇ ਇਹ ਦਲੀਲ ਦਿੱਤੀ।

ਕਰਿਸ਼ਮਾ ਦੇ ਬੱਚਿਆਂ ਦੀ ਦਲੀਲ

ਕਰਿਸ਼ਮਾ ਦੇ ਬੱਚਿਆਂ ਦੇ ਵਕੀਲ ਮਹੇਸ਼ ਜੇਠਮਲਾਨੀ ਨੇ ਆਪਣੇ ਸਵਰਗੀ ਪਿਤਾ ਦੀ ਕਥਿਤ ਵਸੀਅਤ ਨੂੰ ਚੁਣੌਤੀ ਦੇਣ ਵਾਲੀ ਪਟੀਸ਼ਨ ਦੀ ਸੁਣਵਾਈ ਦੌਰਾਨ ਇਹ ਦਲੀਲ ਦਿੱਤੀ। ਇਹ ਵਿਵਾਦ ਸੰਜੇ ਕਪੂਰ ਦੀ 30 ਹਜ਼ਾਰ ਕਰੋੜ ਦੀ ਜਾਇਦਾਦ ਨੂੰ ਲੈ ਕੇ ਹੈ। ਸਮਾਇਰਾ ਅਤੇ ਕਿਆਨ ਦੇ ਵਕੀਲਾਂ ਨੇ ਦਾਅਵਾ ਕੀਤਾ ਕਿ ਵਸੀਅਤ ਵਿੱਚ ਕੁਝ ਖ਼ਾਮੀਆਂ ਹਨ, ਜੋ ਸੰਜੇ ਕਪੂਰ ਲਈ ਬਹੁਤ ਅਸਾਧਾਰਨ ਸਨ।

ਵਕੀਲਾਂ ਨੇ ਚੁੱਕੇ ਸਵਾਲ

ਕਰਿਸ਼ਮਾ ਦੀ ਧੀ ਸਮਾਇਰਾ ਦੇ ਘਰ ਦਾ ਪਤਾ ਸੰਜੇ ਕਪੂਰ ਦੀ ਵਸੀਅਤ ਵਿੱਚ ਗਲਤ ਹੈ, ਅਤੇ ਪੁੱਤਰ ਕਿਆਨ ਦਾ ਨਾਮ ਕਈ ਥਾਵਾਂ 'ਤੇ ਗਲਤ ਲਿਖਿਆ ਗਿਆ ਹੈ। ਵਕੀਲ ਨੇ ਹਾਈ ਕੋਰਟ ਨੂੰ ਦੱਸਿਆ, "ਸੰਜੇ ਕਪੂਰ ਦੇ ਆਪਣੇ ਬੱਚਿਆਂ ਨਾਲ ਬਹੁਤ ਚੰਗੇ ਰਿਸ਼ਤੇ ਸਨ। ਉਨ੍ਹਾਂ ਨੇ ਵਸੀਅਤ ਵਿੱਚ ਕਈ ਥਾਵਾਂ 'ਤੇ ਆਪਣੀ ਧੀ ਦੇ ਪਤੇ ਦੀ ਗਲਤ ਸਪੈਲਿੰਗ ਅਤੇ ਆਪਣੇ ਪੁੱਤਰ ਦੇ ਨਾਮ ਦੀ ਗਲਤ ਸਪੈਲਿੰਗ ਕਿਵੇਂ ਲਿਖੇ?" ਵਕੀਲ ਨੇ ਕਿਹਾ ਕਿ ਵਸੀਅਤ ਸੰਜੇ ਕਪੂਰ ਦੇ ਨਾਮ ਨੂੰ ਬਦਨਾਮ ਕਰਦੀ ਹੈ।

ਜਾਰੀ ਰਹੇਗੀ ਸੁਣਵਾਈ

ਉਨ੍ਹਾਂ ਅੱਗੇ ਕਿਹਾ, "ਇਹ ਇੱਕ ਬਹੁਤ ਹੀ ਲਾਪਰਵਾਹੀ ਵਾਲਾ ਕੰਮ ਹੈ। ਇਸ ਵਸੀਅਤ ਵਿੱਚ ਗੰਭੀਰ ਗਲਤੀਆਂ ਹਨ। ਇਹ ਵਸੀਅਤ ਸੰਜੇ ਕਪੂਰ ਦੁਆਰਾ ਤਿਆਰ ਨਹੀਂ ਕੀਤੀ ਗਈ, ਪੜ੍ਹੀ ਨਹੀਂ ਗਈ ਜਾਂ ਬਣਾਈ ਨਹੀਂ ਗਈ।" ਵਕੀਲ ਨੇ ਅੱਗੇ ਕਿਹਾ ਕਿ ਇਸ ਗੱਲ ਦਾ ਕੋਈ ਸਬੂਤ ਨਹੀਂ ਹੈ ਕਿ ਬੱਚਿਆਂ ਦੀ ਸੌਤੇਲੀ ਮਾਂ, ਪ੍ਰਿਆ ਕਪੂਰ ਅਤੇ ਹੋਰਾਂ ਤੋਂ ਇਲਾਵਾ ਕਿਸੇ ਹੋਰ ਨੇ ਵਸੀਅਤ ਤਿਆਰ ਕੀਤੀ ਸੀ। ਵਕੀਲ ਨੇ ਕਿਹਾ, "ਜੇਕਰ ਇਹ ਵਸੀਅਤ ਜਾਅਲੀ ਹੈ, ਤਾਂ ਇਹ ਸਿਰਫ਼ ਇੱਕ ਵਿਅਕਤੀ ਦੁਆਰਾ ਬਣਾਈ ਗਈ ਹੋਵੇਗੀ।" ਅਦਾਲਤ ਕੱਲ੍ਹ ਵੀ ਮਾਮਲੇ ਦੀ ਸੁਣਵਾਈ ਜਾਰੀ ਰੱਖੇਗੀ।