ਸੁਲਕਸ਼ਣਾ ਪੰਡਿਤ ਪਿਆਰ 'ਚ ਧੋਖਾ ਮਿਲਣ ਤੋਂ ਬਾਅਦ ਸਾਰੀ ਜ਼ਿੰਦਗੀ ਰਹੀ ਕੁਆਰੀ, ਸੰਜੀਵ ਕੁਮਾਰ ਨੇ ਤੋੜਿਆ ਸੀ ਦਿਲ

Sulakshana Pandit Sanjeev Kumar: ਪੁਰਾਣੇ ਜ਼ਮਾਨੇ ਦੀ ਬਾਲੀਵੁੱਡ ਅਦਾਕਾਰਾ ਅਤੇ ਗਾਇਕਾ ਸੁਲਕਸ਼ਣਾ ਪੰਡਿਤ ਦਾ ਵੀਰਵਾਰ ਯਾਨਿ 6 ਨਵੰਬਰ ਸ਼ਾਮ 7 ਵਜੇ ਮੁੰਬਈ ਵਿੱਚ ਦੇਹਾਂਤ ਹੋ ਗਿਆ। ਉਹ 71 ਸਾਲ ਦੀ ਸੀ। ਦਿਲ ਦਾ ਦੌਰਾ ਪੈਣ ਕਾਰਨ ਉਨ੍ਹਾਂ ਦਾ ਦੇਹਾਂਤ ਹੋ ਗਿਆ। ਉਹ ਲੰਬੇ ਸਮੇਂ ਤੋਂ ਬਿਮਾਰ ਵੀ ਸਨ।

ਸੁਲਕਸ਼ਣਾ ਪੰਡਿਤ ਨੇ ਮੁੰਬਈ ਦੇ ਨਾਨਾਵਤੀ ਹਸਪਤਾਲ ਵਿੱਚ ਆਖਰੀ ਸਾਹ ਲਿਆ। ਉਨ੍ਹਾਂ ਦਾ ਅੰਤਿਮ ਸੰਸਕਾਰ ਸ਼ੁੱਕਰਵਾਰ ਨੂੰ ਮੁੰਬਈ ਦੇ ਵਿਲੇ ਪਾਰਲੇ ਸਥਿਤ ਪਵਨ ਹੰਸ ਸ਼ਮਸ਼ਾਨਘਾਟ ਵਿੱਚ ਕੀਤਾ ਗਿਆ। ਸ਼ਬਾਨਾ ਆਜ਼ਮੀ ਅਤੇ ਪੂਨਮ ਢਿੱਲੋਂ ਵਰਗੀਆਂ ਬਾਲੀਵੁੱਡ ਹਸਤੀਆਂ ਨੇ ਅੱਜ ਉਨ੍ਹਾਂ ਦੇ ਅੰਤਿਮ ਸੰਸਕਾਰ ਵਿੱਚ ਸ਼ਿਰਕਤ ਕੀਤੀ।

ਨਿਊਜ਼ ਏਜੰਸੀ ਪੀਟੀਆਈ ਨਾਲ ਗੱਲ ਕਰਦੇ ਹੋਏ, ਸੁਲਕਸ਼ਣਾ ਦੇ ਭਰਾ ਲਲਿਤ ਪੰਡਿਤ ਨੇ ਕਿਹਾ, "ਉਨ੍ਹਾਂ ਨੂੰ ਸਾਹ ਲੈਣ ਵਿੱਚ ਤਕਲੀਫ਼ ਹੋ ਰਹੀ ਸੀ ਅਤੇ ਉਨ੍ਹਾਂ ਦੀ ਸਿਹਤ ਠੀਕ ਨਹੀਂ ਰਹਿੰਦੀ ਸੀ। ਅਸੀਂ ਉਨ੍ਹਾਂ ਨੂੰ ਨਾਨਾਵਤੀ ਹਸਪਤਾਲ ਲੈ ਜਾ ਰਹੇ ਸੀ, ਪਰ ਹਸਪਤਾਲ ਪਹੁੰਚਣ ਤੋਂ ਪਹਿਲਾਂ ਹੀ ਉਨ੍ਹਾਂ ਦੀ ਮੌਤ ਹੋ ਗਈ।"

ਸੰਜੀਵ ਕੁਮਾਰ ਨੇ ਠੁਕਰਾਇਆ ਤਾਂ ਜ਼ਿੰਦਗੀ ਭਰ ਰਹੀ ਕੁਆਰੀ

ਅਦਾਕਾਰ ਸੰਜੀਵ ਕੁਮਾਰ ਨਾਲ ਉਨ੍ਹਾਂ ਦੇ ਅਧੂਰੇ ਰਿਸ਼ਤੇ ਨੇ ਉਨ੍ਹਾਂ ਦੀ ਜ਼ਿੰਦਗੀ 'ਤੇ ਡੂੰਘਾ ਪ੍ਰਭਾਵ ਛੱਡਿਆ। ਬਾਅਦ ਵਿੱਚ ਉਨ੍ਹਾਂ ਨੂੰ ਸਿਹਤ ਅਤੇ ਵਿੱਤੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ। ਕਿਹਾ ਜਾਂਦਾ ਹੈ ਕਿ ਸੁਲਕਸ਼ਣਾ ਪੰਡਿਤ ਅਦਾਕਾਰ ਸੰਜੀਵ ਕੁਮਾਰ ਨੂੰ ਬਹੁਤ ਪਿਆਰ ਕਰਦੀ ਸੀ। 1975 ਵਿੱਚ, ਫਿਲਮ "ਉਲਝਨ" ਦੀ ਸ਼ੂਟਿੰਗ ਦੌਰਾਨ, ਉਨ੍ਹਾਂ ਦਾ ਪਿਆਰ ਪਰਵਾਨ ਚੜ੍ਹਿਆ, ਅਤੇ ਪੰਡਿਤ ਨੇ ਸੰਜੀਵ ਕੁਮਾਰ ਨੂੰ ਵਿਆਹ ਲਈ ਪ੍ਰਪੋਜ਼ ਕੀਤਾ।

ਹਾਲਾਂਕਿ, ਸੰਜੀਵ ਕੁਮਾਰ ਨੇ ਸੁਲਕਸ਼ਣਾ ਦੇ ਵਿਆਹ ਦੇ ਪ੍ਰਸਤਾਵ ਨੂੰ ਠੁਕਰਾ ਦਿੱਤਾ। ਇਸਦਾ ਕਾਰਨ ਸੰਜੀਵ ਦਾ ਹੇਮਾ ਮਾਲਿਨੀ ਲਈ ਇੱਕ ਤਰਫਾ ਪਿਆਰ ਸੀ। ਸੰਜੀਵ ਕੁਮਾਰ ਹੇਮਾ ਮਾਲਿਨੀ ਨਾਲ ਵਿਆਹ ਕਰਨਾ ਚਾਹੁੰਦਾ ਸੀ, ਪਰ ਹੇਮਾ ਨੇ ਸੰਜੀਵ ਦਾ ਦਿਲ ਤੋੜ ਦਿੱਤਾ ਸੀ। ਸੰਜੀਵ ਕੁਮਾਰ ਹੇਮਾ ਦੇ ਹੱਥੋਂ ਹੋਏ ਦਿਲ ਦੇ ਟੁੱਟਣ ਤੋਂ ਕਦੇ ਵੀ ਉਭਰ ਨਹੀਂ ਸਕੇ।

Sulakshana Pandit Sanjeev Kumar

ਉੱਧਰ, ਸੁਲਕਸ਼ਣਾ ਪੰਡਿਤ ਸੰਜੀਵ ਕੁਮਾਰ ਦੇ ਇਨਕਾਰ ਤੋਂ ਦੁਖੀ ਹੋ ਗਈ। ਉਹਨਾਂ ਨੇ ਆਪਣੀ ਬਾਕੀ ਦੀ ਜ਼ਿੰਦਗੀ ਕੁਆਰੀ ਰਹਿਣ ਦਾ ਫੈਸਲਾ ਕੀਤਾ ਅਤੇ ਆਪਣੀ ਜ਼ਿੰਦਗੀ ਇਕਾਂਤ ਵਿੱਚ ਬਿਤਾਈ। ਸੰਜੀਵ ਦੀ ਮੌਤ ਤੋਂ ਬਾਅਦ, ਸੁਲਕਸ਼ਣਾ ਮਾਨਸਿਕ ਤੌਰ 'ਤੇ ਅਸਥਿਰ ਹੋ ਗਈ ਅਤੇ ਕਈ ਸਾਲਾਂ ਤੱਕ ਆਪਣੀ ਭੈਣ, ਵਿਜੇਤਾ ਪੰਡਿਤ ਨਾਲ ਰਹੀ।

ਸੰਜੀਵ ਕੁਮਾਰ ਦੀ ਬਰਸੀ ਵਾਲੇ ਦਿਨ ਹੀ ਹੋਈ ਸੁਲਕਸ਼ਣਾ ਦੀ ਮੌਤ

ਸੰਜੀਵ ਕੁਮਾਰ ਦਾ ਅੱਜ ਤੋਂ 40 ਸਾਲ ਪਹਿਲਾਂ 6 ਨਵੰਬਰ ਨੂੰ ਦੇਹਾਂਤ ਹੋਇਆ ਸੀ। ਉਨਾਂ ਦਾ ਦੇਹਾਂਤ 1985 ਵਿੱਚ ਹੋਇਆ। ਇਹ ਬੜਾ ਹੀ ਅਜੀਬ ਸੰਜੋਗ ਸੀ ਕਿ ਸੁਲਕਸ਼ਣਾ ਦੀ ਮੌਤ ਸੰਜੀਵ ਤੋਂ ਠੀਕ 40 ਸਾਲ ਬਾਅਦ 6 ਨਵੰਬਰ ਨੂੰ ਹੀ ਹੋਇਆ।