ਜੋਅ ਬਾਈਡਨ ਦੇ ਭਾਰਤ ਨਾ ਆਉਣ ’ਤੇ ਖੁਸ਼ ਹੋਇਆ ਚੀਨ

ਬੀਜਿੰਗ, 19 ਦਸੰਬਰ, ਨਿਰਮਲ : ਅਮਰੀਕਾ ਦੇ ਰਾਸ਼ਟਰਪਤੀ ਜੋਅ ਬਾਈਡਨ ਜੀ-20 ਸੰਮੇਲਨ ਦੌਰਾਨ ਭਾਰਤ ਆਏ ਸਨ ਤਾਂ ਉਨ੍ਹਾਂ ਨੂੰ ਗਣਤੰਤਰ ਦਿਵਸ ਪਰੇਡ ਵਿੱਚ ਮੁੱਖ ਮਹਿਮਾਨ ਵਜੋਂ ਸ਼ਾਮਲ ਹੋਣ ਲਈ ਸੱਦਾ ਦਿੱਤਾ ਗਿਆ ਸੀ। ਹਾਲਾਂਕਿ, ਜੋਅ ਬਾਈਡਨ ਗਣਤੰਤਰ ਦਿਵਸ ਸਮਾਰੋਹ ਵਿੱਚ ਸ਼ਾਮਲ ਨਹੀਂ ਹੋਣਗੇ। ਜੋਅ ਬਾਈਡਨ ਦਾ ਦੌਰਾ 30 ਜਨਵਰੀ ਤੋਂ ਪਹਿਲਾਂ ਹੋਣ ਵਾਲੇ ਅਮਰੀਕੀ ਰਾਸ਼ਟਰਪਤੀ ਦੇ ਸਟੇਟ ਆਫ ਦ ਯੂਨੀਅਨ ਸੰਬੋਧਨ ਕਾਰਨ ਮੁਲਤਵੀ ਕਰ ਦਿੱਤਾ ਗਿਆ ਹੈ। ਪਰ ਇਹ ਮੌਕਾ ਚੀਨ ਲਈ ਜ਼ਹਿਰ ਉਗਲਣ ਲਈ ਕਾਫੀ ਹੈ। ਚੀਨ ਦੇ ਸਰਕਾਰੀ ਅਖਬਾਰ ਗਲੋਬਲ ਟਾਈਮਜ਼ ਵਿੱਚ ਇਸ ਨਾਲ ਜੁੜਿਆ ਇੱਕ ਲੇਖ ਲਿਖਿਆ ਗਿਆ ਹੈ। ਇਸ ਬਾਰੇ ਗਲੋਬਲ ਟਾਈਮਜ਼ ਨੇ ਸਿਰਲੇਖ ਵਿੱਚ ਲਿਖਿਆ, ‘ਕੀ ਭਾਰਤ-ਅਮਰੀਕਾ ਹਨੀਮੂਨ ਖ਼ਤਮ ਹੋਣ ਵਾਲਾ ਹੈ?’ ਗਲੋਬਲ ਟਾਈਮਜ਼ ਬਾਈਡਨ ਦੇ ਦੌਰੇ ਦੀ ਗੈਰਹਾਜ਼ਰੀ ਨੂੰ ਭਾਰਤ ਲਈ ਵੱਡੀ ਕੂਟਨੀਤਕ ਹਾਰ ਵਜੋਂ ਦੇਖ ਰਿਹਾ ਹੈ।