ਡੇਅਕੇਅਰ ਦੀ ਵਾੜ ਵਿਚ ਵੱਜੀ ਕਾਰ, 2 ਬੱਚਿਆਂ ਸਣੇ ਤਿੰਨ ਜ਼ਖਮੀ

ਵੌਅਨ, 5 ਅਕਤੂਬਰ (ਵਿਸ਼ੇਸ਼ ਪ੍ਰਤੀਨਿਧ) : ਇਕ ਬੇਕਾਬੂ ਕਾਰ ਦੇ ਡੇਅ ਕੇਅਰ ਵਿਚ ਦਾਖਲ ਹੋਣ ਕਾਰਨ ਦੋ ਬੱਚਿਆਂ ਸਣੇ ਤਿੰਨ ਜਣੇ ਜ਼ਖਮੀ ਹੋ ਗਏ। ਵੌਅਨ ਵਿਖੇ ਵਾਪਰੇ ਹਾਦਸੇ ਬਾਰੇ ਯਾਰਕ ਰੀਜਨਲ ਪੁਲਿਸ ਨੇ ਦੱਸਿਆ ਕਿ 80 ਸਾਲ ਦਾ ਬਜ਼ੁਰਗ ਅਚਾਨਕ ਕੰਟਰੋਲ ਗੁਆ ਬੈਠਾ ਅਤੇ ਕਾਰ ਡੇਅ ਦੀ ਫੈਂਸ ਵਿਚ ਜਾ ਵੱਜੀ ਜਿਸ ਦੇ ਦੂਜੇ ਪਾਸੇ ਬੱਚੇ ਮੌਜੂਦ ਸਨ।

ਹਾਲਾਂਕਿ ਬੱਚਿਆਂ ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਪਰ ਮੁਢਲੇ ਤੌਰ ’ਤੇ ਹਾਦਸਾ ਬੇਹੱਦ ਗੰਭੀਰ ਲੱਗ ਰਿਹਾ ਸੀ। ਸਾਰਜੈਂਟ ਕÇਲੰਟ ਵਿਟਨੀ ਨੇ ਕਿਹਾ ਕਿ ਹਾਲਾਤ ਖਤਰਨਾਕ ਹੋ ਸਕਦੇ ਹਨ ਪਰ ਖੁਸ਼ਕਿਸਮਤੀ ਨਾਲ ਬੱਚੇ ਮਾਮੂਲੀ ਤੌਰ ’ਤੇ ਜ਼ਖ਼ਮੀ ਹੋਏ। ਮਾਮਲੇ ਦੀ ਡੂੰਘਾਈ ਨਾਲ ਪੜਤਾਲ ਕੀਤੀ ਜਾ ਰਹੀ ਹੈ ਅਤੇ ਇਸ ਦੇ ਮੁਕੰਮਲ ਹੋਣ ’ਤੇ ਬਜ਼ੁਰਗ ਵਿਰੁੱਧ ਕਿਸੇ ਕਿਸਮ ਦਾ ਦੋਸ਼ ਆਇਦ ਕਰਨ ਜਾਂ ਨਾ ਕਰਨ ਦਾ ਫੈਸਲਾ ਲਿਆ ਜਾਵੇਗਾ।

ਹਾਦਸੇ ਮਗਰੋਂ ਡੇਅਰ ਕੇਅਰ ਵਿਚ ਮੌਜੂਦ ਸਾਰੇ ਬੱਚੇ ਸਹੀ ਸਲਾਮਤ ਮਿਲ ਗਏ ਅਤੇ ਮਾਪੇ ਇਨ੍ਹਾਂ ਨੂੰ ਲੈ ਕੇ ਘਰ ਰਵਾਨਾ ਹੋ ਗਏ। ਹਾਦਸੇ ਦੇ ਕਾਰਨ ਜਾਣਨ ਦੀ ਇੱਛਕ ਪੁਲਿਸ ਵੱਲੋਂ ਗਵਾਹਾਂ ਨੂੰ ਅੱਗੇ ਆਉਣ ਦੀ ਅਪੀਲ ਕੀਤੀ ਗਈ ਹੈ।