ਕੈਨੇਡਾ ਵਿਚ ਪੰਜਾਬੀ ਨੌਜਵਾਨ ਦਾ ਕਤਲ, 2 ਪੰਜਾਬੀ ਗ੍ਰਿਫ਼ਤਾਰ
ਕੈਨੇਡਾ ਦੇ ਐਲਬਰਟਾ ਸੂਬੇ ਵਿਚ 32 ਸਾਲ ਦੇ ਸੁਖਵੀਰ ਸਿੰਘ ਦਾ ਕਤਲ ਕਰ ਦਿਤਾ ਗਿਆ ਅਤੇ ਮਾਮਲੇ ਦੀ ਪੜਤਾਲ ਕਰ ਰਹੀ ਐਡਮਿੰਟਨ ਪੁਲਿਸ ਵੱਲੋਂ ਦੋ ਪੰਜਾਬੀਆਂ ਨੂੰ ਗ੍ਰਿਫ਼ਤਾਰ ਕਰਦਿਆਂ ਤੀਜੇ ਦੀ ਭਾਲ ਕੀਤੀ ਜਾ ਰਹੀ ਹੈ।
By : Upjit Singh
ਐਡਮਿੰਟਨ : ਕੈਨੇਡਾ ਦੇ ਐਲਬਰਟਾ ਸੂਬੇ ਵਿਚ 32 ਸਾਲ ਦੇ ਸੁਖਵੀਰ ਸਿੰਘ ਦਾ ਕਤਲ ਕਰ ਦਿਤਾ ਗਿਆ ਅਤੇ ਮਾਮਲੇ ਦੀ ਪੜਤਾਲ ਕਰ ਰਹੀ ਐਡਮਿੰਟਨ ਪੁਲਿਸ ਵੱਲੋਂ ਦੋ ਪੰਜਾਬੀਆਂ ਨੂੰ ਗ੍ਰਿਫ਼ਤਾਰ ਕਰਦਿਆਂ ਤੀਜੇ ਦੀ ਭਾਲ ਕੀਤੀ ਜਾ ਰਹੀ ਹੈ। ਪੁਲਿਸ ਨੇ ਦੱਸਿਆ ਕਿ ਸੁਖਵੀਰ ਸਿੰਘ ਦੀ ਲਾਸ਼ 28 ਫਰਵਰੀ ਨੂੰ 17 ਸਟ੍ਰੀਟ ਅਤੇ ਯੈਲੋਹੈੱਡ ਟ੍ਰੇਲ ਨੇੜੇ ਇੰਡਸਟ੍ਰੀਅਲ ਏਰੀਆ ਵਿਚੋਂ ਬਰਾਮਦ ਕੀਤੀ ਗਈ। ਨੌਜਵਾਨ ਦੀ ਮੌਤ ਨੂੰ ਸ਼ੱਕੀ ਮੰਨਦਿਆਂ ਮਾਮਲਾ ਐਡਮਿੰਟਨ ਪੁਲਿਸ ਦੀ ਹੌਮੀਸਾਈਡ ਡਵੀਜ਼ਨ ਨੇ ਆਪਣੇ ਹੱਥਾਂ ਵਿਚ ਲੈ ਲਿਆ ਅਤੇ 5 ਮਾਰਚ ਨੂੰ ਪੋਸਟਮਾਰਟਮ ਮੁਕੰਮਲ ਹੋਇਆ।
ਐਡਮਿੰਟਨ ਦੇ ਇੰਡਸਟ੍ਰੀਅਲ ਏਰੀਆ ਵਿਚੋਂ ਮਿਲੀ ਸੀ ਸੁਖਵੀਰ ਸਿੰਘ ਦੀ ਲਾਸ਼
ਸੁਖਵੀਰ ਸਿੰਘ ਦੀ ਮੌਤ ਦੇ ਕਾਰਨਾਂ ਬਾਰੇ ਫਿਲਹਾਲ ਮੈਡੀਕਲ ਐਗਜ਼ਾਮੀਨਰ ਵੱਲੋਂ ਵਿਸਤਾਰਤ ਵੇਰਵੇ ਨਹੀਂ ਦਿਤੇ ਗਏ ਪਰ ਹਾਲਾਤ ’ਤੇ ਚੰਗੀ ਤਰ੍ਹਾਂ ਗੌਰ ਕਰਨ ਮਗਰੋਂ ਪੁਲਿਸ ਸਮਝ ਗਈ ਕਿ ਸੋਚੀ ਸਮਝੀ ਸਾਜ਼ਿਸ਼ ਤਹਿਤ ਵਾਰਦਾਤ ਨੂੰ ਅੰਜਾਮ ਦਿਤਾ ਗਿਆ। ਜਾਂਚਕਰਤਾਵਾਂ ਵੱਲੋਂ ਸੁਖਬੀਰ ਸਿੰਘ ਦੇ ਅੰਤਲੇ ਦਿਨਾਂ ਬਾਰੇ ਜਾਣਕਾਰੀ ਇਕੱਤਰ ਕਰਨ ਦੇ ਯਤਨ ਕੀਤੇ ਜਾ ਰਹੇ ਹਨ ਜਿਸ ਦੇ ਮੱਦੇਨਜ਼ਰ ਉਸ ਦੀ ਤਸਵੀਰ ਅਤੇ ਹੋਰ ਜਾਣਕਾਰੀ ਜਨਤਕ ਕੀਤੀ ਗਈ ਹੈ। ਐਡਮਿੰਟਨ ਪੁਲਿਸ ਨੇ ਦੱਸਿਆ ਕਿ ਸੁਖਵੀਰ ਸਿੰਘ ਨੂੰ ਆਖਰੀ ਵਾਰ 26 ਫਰਵਰੀ ਦੀ ਸ਼ਾਮ ਵਾਈਟਮਡ ਡਰਾਈਵ ਦੇ ਦੱਖਣ ਵੱਲ ਗੇਟਵੇਅ ਬੁਲੇਵਾਰਡ ਨੇੜਲੇ ਕਮਰਸ਼ੀਅਲ ਏਰੀਆ ਵਿਚ ਦੇਖਿਆ ਗਿਆ।
ਮਨਪ੍ਰੀਤ ਬਰਾੜ ਅਤੇ ਗੁਰਸਿਮਰਨ ਸਿੰਘ ਕਾਬੂ, ਲਵਪ੍ਰੀਤ ਸਿੱਧੂ ਵਿਰੁੱਧ ਵਾਰੰਟ
ਹੁਣ ਤੱਕ ਪੁਲਿਸ ਵੱਲੋਂ 29 ਸਾਲ ਦੇ ਮਨਪ੍ਰੀਤ ਬਰਾੜ ਅਤੇ 21 ਸਾਲ ਦੇ ਗੁਰਸਿਮਰਨ ਸਿੰਘ ਨੂੰ ਗ੍ਰਿਫ਼ਤਾਰ ਕਰਦਿਆਂ ਪਹਿਲੇ ਦਰਜੇ ਦੀ ਹੱਤਿਆ ਅਤੇ ਅਗਵਾ ਦੇ ਦੋਸ਼ ਆਇਦ ਕੀਤੇ ਗਏ ਹਨ। ਦੂਜੇ ਪਾਸੇ ਜਦਕਿ 27 ਸਾਲ ਦੇ ਲਵਪ੍ਰੀਤ ਸਿੱਧੂ ਵਿਰੁੱਧ ਦੀ ਗ੍ਰਿਫ਼ਤਾਰ ਵਾਸਤੇ ਕੈਨੇਡਾ ਪੱਧਰ ਵਾਰੰਟ ਜਾਰੀ ਕਰ ਦਿਤੇ ਗਏ। ਐਡਮਿੰਟਨ ਪੁਲਿਸ ਦਾ ਮੰਨਣਾ ਹੈ ਕਿ ਤਿੰਨੋ ਸ਼ੱਕੀ ਸੁਖਵੀਰ ਸਿੰਘ ਨੂੰ ਜਾਣਦੇ ਸਨ। ਪੁਲਿਸ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਜੇ ਕਿਸੇ ਕੋਲ ਇਸ ਕਤਲਕਾਂਡ ਜਾਂ ਸੁਖਵੀਰ ਸਿੰਘ ਬਾਰੇ ਅਹਿਮ ਜਾਣਕਾਰੀ ਹੋਵੇ ਤਾਂ 780 423 4567 ’ਤੇ ਕਾਲ ਕੀਤੀ ਜਾ ਸਕਦੀ ਹੈ। ਗੁਪਤ ਤਰੀਕੇ ਨਾਲ ਜਾਣਕਾਰੀ ਦੇਣ ਲਈ ਕ੍ਰਾਈਮ ਸਟੌਪਰਜ਼ ਨਾਲ 1800 222 8477 ’ਤੇ ਸੰਪਰਕ ਕੀਤਾ ਜਾ ਸਕਦਾ ਹੈ।
