Canada ’ਚ ਪੰਜਾਬੀ ਉਮੀਦਵਾਰ ਨੂੰ ਮਹਿੰਗਾ ਪੈ ਗਿਆ ਮੁਕੱਦਮਾ
ਕੈਨੇਡਾ ਦੇ ਬ੍ਰਿਟਿਸ਼ ਕੋਲੰਬੀਆ ਸੂਬੇ ਦੀਆਂ ਵਿਧਾਨ ਸਭਾ ਚੋਣਾਂ ਦੌਰਾਨ ਘਪਲਾ ਹੋਣ ਦਾ ਦੋਸ਼ ਲਾਉਣ ਵਾਲੇ ਹੋਨਵੀਰ ਸਿੰਘ ਰੰਧਾਵਾ ਨੇ ਆਖਰਕਾਰ ਮੁਕੱਦਮਾ ਵਾਪਸ ਲੈ ਲਿਆ ਹੈ
By : Upjit Singh
ਵੈਨਕੂਵਰ : ਕੈਨੇਡਾ ਦੇ ਬ੍ਰਿਟਿਸ਼ ਕੋਲੰਬੀਆ ਸੂਬੇ ਦੀਆਂ ਵਿਧਾਨ ਸਭਾ ਚੋਣਾਂ ਦੌਰਾਨ ਘਪਲਾ ਹੋਣ ਦਾ ਦੋਸ਼ ਲਾਉਣ ਵਾਲੇ ਹੋਨਵੀਰ ਸਿੰਘ ਰੰਧਾਵਾ ਨੇ ਆਖਰਕਾਰ ਮੁਕੱਦਮਾ ਵਾਪਸ ਲੈ ਲਿਆ ਹੈ। ਸਰੀ-ਗਿਲਫਰਡ ਰਾਈਡਿੰਗ ਦੇ ਫ਼ਸਵੇਂ ਮੁਕਾਬਲੇ ਵਿਚ ਐਨ.ਡੀ.ਪੀ. ਦੇ ਗੈਰੀ ਬੈੱਗ ਤੋਂ ਸਿਰਫ਼ 22 ਵੋਟਾਂ ਨਾਲ ਹਾਰਨ ਵਾਲੇ ਹੋਨਵੀਰ ਰੰਧਾਵਾ ਨੇ ਦਾਅਵਾ ਕੀਤਾ ਸੀ ਕਿ ਬਜ਼ੁਰਗਾਂ ਦੀ ਸੰਭਾਲ ਵਾਲੇ ਇਕ ਕੇਅਰ ਹੋਮ ਵਿਚ ਰਹਿੰਦੇ ਦੋ ਜਣਿਆਂ ਨੂੰ ਅੰਗਰੇਜ਼ੀ ਨਹੀਂ ਸੀ ਆਉਂਦੀ ਅਤੇ ਉਨ੍ਹਾਂ ਵੱਲੋਂ ਡਾਕ ਰਾਹੀਂ ਵੋਟ ਦੀ ਗੁਜ਼ਾਰਿਸ਼ ਵੀ ਨਹੀਂ ਸੀ ਕੀਤੀ ਗਈ ਪਰ ਸਟਾਫ਼ ਨੇ ਉਨ੍ਹਾਂ ਉਤੇ ਐਨ.ਡੀ.ਪੀ. ਦੇ ਹੱਕ ਵਿਚ ਵੋਟਾਂ ਪਾਉਣ ਲਈ ਦਬਾਅ ਪਾਇਆ। ਦੂਜੇ ਪਾਸੇ ਇਲੈਕਸ਼ਨਜ਼ ਬੀ.ਸੀ. ਦੇ ਹਵਾਲੇ ਨਾਲ ਕਿਹਾ ਗਿਆ ਹੈ ਕਿ 2024 ਦੀਆਂ ਵਿਧਾਨ ਸਭਾ ਚੋਣਾਂ ਮੁਕੰਮਲ ਤੌਰ ’ਤੇ ਆਜ਼ਾਦ ਅਤੇ ਨਿਰਪੱਖ ਮਾਹੌਲ ਵਿਚ ਹੋਈਆਂ।
2 ਲੱਖ ਡਾਲਰ ਤੋਂ ਵੱਧ ਖ਼ਰਚੇ, ਚੋਣ ਘਪਲੇ ਦੇ ਦੋਸ਼ ਫਿਰ ਵੀ ਸਾਬਤ ਨਾ ਹੋਏ
ਹੋਨਵੀਰ ਰੰਧਾਵਾ ਮੁਤਾਬਕ ਹੁਣ ਤੱਕ ਸਾਰੀ ਪ੍ਰਕਿਰਿਆ ਉਤੇ 2 ਲੱਖ ਡਾਲਰ ਖਰਚ ਹੋ ਚੁੱਕੇ ਹਨ। ਇਸੇ ਦੌਰਾਨ ਬ੍ਰਿਟਿਸ਼ ਕੋਲੰਬੀਆ ਵਿਚ ਐਨ.ਡੀ.ਪੀ. ਦੀ ਪ੍ਰੋਵਿਨਸ਼ੀਅਲ ਡਾਇਰੈਕਟਰ ਤਾਨੀਆ ਜਾਰਜ਼ਬੀਐਕ ਨੇ ਕਿਹਾ ਹੋਨਵੀਰ ਰੰਧਾਵਾ ਵੱਲੋਂ ਮੁਕੱਦਮੇ ਰਾਹੀਂ ਗੈਰੀ ਬੈੱਗ ਦੀ ਜਿੱਤ ਨੂੰ ਹਾਰ ਵਿਚ ਬਦਲਣ ਦਾ ਅਸਫ਼ਲ ਯਤਨ ਕੀਤਾ ਗਿਆ। ਉਧਰ ਗੈਰੀ ਬੈੱਗ ਨੇ ਕਿਹਾ ਕਿ ਬੀ.ਸੀ. ਕੰਜ਼ਰਵੇਟਿਵ ਪਾਰਟੀ ਨੂੰ ਆਰਗਾਇਲ ਲੌਜ ਦੇ ਵਸਨੀਕਾਂ ਅਤੇ ਸਟਾਫ਼ ਤੋਂ ਮੁਆਫ਼ੀ ਮੰਗਦਿਆਂ ਕਾਨੂੰਨੀ ਪ੍ਰਕਿਰਿਆ ਉਤੇ ਉਨ੍ਹਾਂ ਵੱਲੋਂ ਖ਼ਰਚ ਕੀਤੀ ਰਕਮ ਵਾਪਸ ਕਰਨੀ ਚਾਹੀਦੀ ਹੈ। ਇਥੇ ਦਸਣਾ ਬਣਦਾ ਹੈ ਕਿ ਹੋਨਵੀਰ ਰੰਧਾਵਾ ਦੇ ਵਕੀਲ ਮੁਤਾਬਕ ਇਲੈਕਸ਼ਨਜ਼ ਬੀ.ਸੀ. ਵੱਲੋਂ ਇਸ ਗੱਲ ਦੀ ਤਸਦੀਕ ਕੀਤੀ ਗਈ ਕਿ ਮਾਨਸਿਕ ਰੋਗੀਆਂ ਦੀ ਰਿਹਾਇਸ਼ ਵਾਲੇ ਆਰਗਾਇਲ ਲੌਜ ਨਾਲ ਸਬੰਧਤ ਇਕ ਸਟਾਫ਼ ਮੈਂਬਰ ਵੱਲੋਂ ਡਾਕ ਰਾਹੀਂ 22 ਵੋਟਾਂ ਪਾਉਣ ਦੀ ਸਹੂਲਤ ਮੰਗੀ ਗਈ। ਵਕੀਲ ਨੇ ਦਾਅਵਾ ਕੀਤਾ ਕਿ ਮਾਨਸਿਕ ਤੌਰ ’ਤੇ ਬਿਮਾਰ ਲੋਕਾਂ ਨੇ ਆਪਣੀ ਵੋਟ ਸਹੀ ਤਰੀਕੇ ਨਾਲ ਪਾਈ, ਇਸ ਬਾਰੇ ਯਕੀਨੀ ਤੌਰ ’ਤੇ ਕਹਿਣਾ ਮੁਸ਼ਕਲ ਹੈ।
ਹੋਨਵੀਰ ਰੰਧਾਵਾ ਨੇ ਆਖਰਕਾਰ ਮੁਕੱਦਮਾ ਵਾਪਸ ਲਿਆ
ਵਕੀਲ ਸਨੀ ਉਪਲ ਨੇ ਅੱਗੇ ਕਿਹਾ ਕਿ ਇਹ ਕੋਈ ਬੇਨਿਯਮੀ ਨਹੀਂ ਸਗੋਂ ਵੱਡਾ ਘਪਲਾ ਬਣਦਾ ਹੈ ਕਿਉਂਕਿ 22 ਜਣਿਆਂ ਵਾਸਤੇ ਡਾਕ ਰਾਹੀਂ ਵੋਟਾਂ ਦੀ ਸਹੂਲਤ ਮੰਗੀ ਗਈ ਅਤੇ ਇਸ ਗੱਲ ਦੀ ਪੜਤਾਲ ਕਰਨ ਵਾਲਾ ਕੋਈ ਨਹੀਂ ਸੀ ਕਿ ਮੈਂਟਲ ਹੈਲਥ ਫੈਸੀਲਿਟੀ ਦੇ ਲੋਕਾਂ ਨਾਲ ਕੋਈ ਧੋਖਾ ਤਾਂ ਨਹੀਂ ਕੀਤਾ ਜਾ ਰਿਹਾ। ਦੂਜੇ ਪਾਸੇ ਸਰੀ-ਗਿਲਫਰਡ ਰਾਈਡਿੰਗ ਤੋਂ ਜੇਤੂ ਐਨ.ਡੀ.ਪੀ. ਦੇ ਗੈਰੀ ਬੈੱਗ ਦਾਅਵਾ ਕੀਤਾ ਸੀ ਕਿ ਪੁਲਿਸ ਵੱਲੋਂ ਕੰਜ਼ਰਵੇਟਿਵ ਪਾਰਟੀ ਦੇ ਨੁਮਾਇੰਦਿਆਂ ਨੂੰ ਆਰਗਾਇਲ ਲੌਜ ਤੋਂ ਦੂਰ ਰਹਿਣ ਦੀ ਚਿਤਾਵਨੀ ਦਿਤੀ ਗਈ ਕਿਉਂਕਿ ਇਕ ਔਰਤ ਨੇ ਲੌਜ ਵਿਚ ਰਹਿੰਦੇ ਲੋਕਾਂ ਤੋਂ ਕੁਝ ਬਿਆਨਾਂ ਉਤੇ ਦਸਤਖਤ ਕਰਵਾਉਣ ਦੇ ਯਤਨ ਕੀਤੇ ਜਦਕਿ ਬਿਆਨਾਂ ਵਿਚ ਲਿਖੀ ਸ਼ਬਦਾਵਲੀ ਬਾਰੇ ਕੋਈ ਕੁਝ ਨਹੀਂ ਸੀ ਜਾਣਦਾ। ਹੋਨਵੀਰ ਰੰਧਾਵਾ ਦਾ ਕਦਮ ਅਜਿਹੇ ਸਮੇਂ ਸਾਹਮਣੇ ਆਇਆ ਹੈ ਜਦੋਂ ਬੀ.ਸੀ. ਕੰਜ਼ਰਵੇਟਿਵ ਪਾਰਟੀ ਆਗੂ ਜੌਹਨ ਰੁਸਤਾਦ ਨੂੰ ਅਹੁਦੇ ਤੋਂ ਹਟਾਇਆ ਜਾ ਚੁੱਕਾ ਹੈ। ਬੀਤੇ ਮਈ ਮਹੀਨੇ ਦੌਰਾਨ ਮੁੱਖ ਚੋਣ ਅਫ਼ਸਰ ਐਂਟਨ ਬੋਇਗਮੈਨ ਨੇ ਕਿਹਾ ਸੀ ਕਿ ਉਹ ਅਦਾਲਤੀ ਕਾਰਵਾਈ ਬਾਰੇ ਕੋਈ ਟਿੱਪਣੀ ਨਹੀਂ ਕਰਨਾ ਚਾਹੁੰਦੇ ਪਰ ਕੁਲ ਮਿਲਾ ਕੇ ਚੋਣਾਂ ਪੂਰੀ ਤਰ੍ਹਾਂ ਨਿਰਪੱਖ ਅਤੇ ਪਾਰਦਰਸ਼ੀ ਰਹੀਆਂ।
