ਕੈਨੇਡਾ ਵਿਚ ਮਾਪਿਆਂ ਦੇ ਇਕਲੌਤੇ ਪੁੱਤ ਨਾਲ ਅਣਹੋਣੀ

ਬਰੈਂਪਟਨ : ਕੈਨੇਡਾ ਵਿਚ ਵਾਪਰੀ ਇਕ ਹੋਰ ਅਣਹੋਣੀ ਭਾਰਤ ਰਹਿੰਦੇ ਮਾਪਿਆਂ ਦਾ ਘਰ ਸੁੰਨਾ ਕਰ ਗਈ। ਬਰੈਂਪਟਨ ਦੇ ਕਰਨਦੀਪ ਸਿੰਘ ਨੇ ਦੱਸਿਆ ਕਿ ਹਰਿਆਣਾ ਨਾਲ ਸਬੰਧਤ ਉਸ ਦਾ ਕਜ਼ਨ ਰੂਪਕ ਸਿੰਘ ਅਚਨਚੇਤ ਸਦੀਵੀ ਵਿਛੋੜਾ ਦੇ ਗਿਆ। ਇਕਲੌਤੇ ਪੁੱਤ ਨਾਲ ਵਰਤੇ ਭਾਣੇ ਬਾਰੇ ਮਾਪਿਆਂ ਨੂੰ ਪਤਾ ਲੱਗਾ ਤਾਂ ਉਨ੍ਹਾਂ ਦਾ ਦੁੱਖ ਦੇਖਿਆ ਨਹੀਂ ਸੀ ਜਾ ਰਿਹਾ। ਕਰਨਦੀਪ ਸਿੰਘ ਮੁਤਾਬਕ ਰੂਪਕ ਸਿੰਘ ਦੇ ਮਾਪੇ ਆਖਰੀ ਵਾਰ ਆਪਣੇ ਪੁੱਤ ਦਾ ਚਿਹਰਾ ਦੇਖਣਾ ਚਾਹੁੰਦੇ ਹਨ ਜਿਸ ਦੇ ਮੱਦੇਨਜ਼ਰ ਉਸ ਦੀ ਦੇਹ ਭਾਰਤ ਭੇਜਣ ਲਈ ਗੋਫੰਡਮੀ ਪੇਜ ਸਥਾਪਤ ਕੀਤਾ ਗਿਆ ਹੈ। ਇਥੇ ਦਸਣਾ ਬਣਦਾ ਹੈ ਕਿ ਕੁਝ ਦਿਨ ਪਹਿਲਾਂ ਅੰਮ੍ਰਿਤਸਰ ਜ਼ਿਲ੍ਹੇ ਨਾਲ ਸਬੰਧਤ ਸਿਮਰਨਪ੍ਰੀਤ ਕੌਰ ਸੜਕ ਹਾਦਸੇ ਦੌਰਾਨ ਅਕਾਲ ਚਲਾਣਾ ਕਰ ਗਈ। ਉਹ ਪਿਛਲੇ ਸਾਲ ਹੀ ਸਟੱਡੀ ਵੀਜ਼ਾ ’ਤੇ ਕੈਨੇਡਾ ਪੁੱਜੀ ਸੀ।

ਅਮਰੀਕਾ ਵਿਚ ਪੜ੍ਹਦੀ ਭਾਰਤੀ ਮੁਟਿਆਰ ਦੇ ਡੁੱਬਣ ਦਾ ਖਦਸ਼ਾ

ਦੂਜੇ ਪਾਸੇ ਅਮਰੀਕਾ ਦੀ ਪਿਟਜ਼ਬਰਗ ਯੂਨੀਵਰਸਿਟੀ ਵਿਚ ਪੜ੍ਹਦੀ 20 ਸਾਲਾ ਭਾਰਤੀ ਮੁਟਿਆਰ ਦੀ ਆਖਰੀ ਵੀਡੀਓ ਸਾਹਮਣੇ ਆਈ ਹੈ ਜੋ 6 ਮਾਰਚ ਤੋਂ ਲਾਪਤਾ ਹੈ। ਸੁਦੀਕਸ਼ਾ ਕੋਨਾਂਕੀ ਆਪਣੀਆਂ ਸਹੇਲੀਆਂ ਨਾਲ ਸੈਰ ਸਪਾਟਾ ਕਰਨ ਡੌਮੀਨਿਕਨ ਰਿਪਬਲਿਕ ਗਈ ਸੀ ਅਤੇ 6 ਮਾਰਚ ਨੂੰ ਸਵੇਰੇ ਸਵਾਰ ਚਾਰ ਵਜੇ ਉਸ ਨੂੰ ਆਪਣੇ ਦੋਸਤਾਂ ਨਾਲ ਹੋਟਲ ਤੋਂ ਬਾਹਰ ਜਾਂਦਿਆਂ ਦੇਖਿਆ ਗਿਆ। ਵੀਡੀਓ ਵਿਚ ਦੇਖਿਆ ਜਾ ਸਕਦਾ ਹੈ ਕਿ ਸੁਦੀਕਸ਼ਾ ਆਪਣੇ ਬੁਆਏ ਫਰੈਂਡ ਨਾਲ ਬਾਹਰ ਵੱਲ ਜਾ ਰਹੀ ਹੈ ਜਦਕਿ ਉਸ ਦੀਆਂ ਦੋ ਸਹੇਲੀਆਂ ਪਿੱਛੇ ਪਿੱਛੇ ਤੁਰਦੀਆਂ ਨਜ਼ਰ ਆਉਂਦੀਆਂ ਹਨ। ਇਸੇ ਦੌਰਾਨ ਮੌਕੇ ’ਤੇ ਮੌਜੂਦ ਇਕ ਸ਼ਖਸ ਨੇ ਪੁਲਿਸ ਨੂੰ ਦੱਸਿਆ ਕਿ ਸੁਦੀਕਸ਼ਾ ਸਮੁੰਦਰ ਵੱਲ ਗਈ ਅਤੇ ਇਕ ਵੱਡੀ ਛੱਲ ਉਸ ਨੂੰ ਰੋੜ੍ਹ ਕੇ ਲੈ ਗਈ। ਇਸ ਮਗਰੋਂ ਸੁਦੀਕਸ਼ਾ ਨੂੰ ਕਿਸੇ ਨੇ ਨਹੀਂ ਦੇਖਿਆ। ਸੁਦੀਕਸ਼ਾ ਦੇ ਸਮੁੰਦਰ ਵਿਚ ਡੁੱਬਣ ਦਾ ਖਦਸ਼ਾ ਸਾਹਮਣੇ ਆਉਣ ਦੇ ਬਾਵਜੂਦ ਪੁਲਿਸ ਡੌਮੀਨਿਕਨ ਰਿਪਬਲਿਕ ਦੀ ਪੁਲਿਸ ਵੱਲੋਂ ਅਗਵਾ ਦੇ ਨਜ਼ਰੀਏ ਤੋਂ ਪੜਤਾਲ ਕੀਤੀ ਜਾ ਰਹੀ ਹੈ। ਇਥੇ ਦਸਣਾ ਬਣਦਾ ਹੈ ਕਿ ਸੁਦੀਕਸ਼ਾ ਦਾ ਪਰਵਾਰ 2006 ਤੋਂ ਅਮਰੀਕਾ ਵਿਚ ਰਹਿ ਰਿਹਾ ਹੈ ਅਤੇ ਸਾਰੇ ਗਰੀਨ ਕਾਰਡ ਹੋਲਡਰ ਹਨ।

ਡੌਮੀਨਿਕਨ ਰਿਪਬਲਿਕ ਵਿਚ ਲੱਭਣ ਦੇ ਸਾਰੇ ਯਤਨ ਨਾਕਾਮ

ਉਧਰ ਵਰਜੀਨੀਆ ਦੀ ਲਾਊਡਨ ਕਾਊਂਟੀ ਦੇ ਸ਼ੈਰਿਫ ਦਫ਼ਤਰ ਨੇ ਕਿਹਾ ਕਿ ਅਮਰੀਕਾ ਦੇ ਵਿਦੇਸ਼ ਵਿਭਾਗ ਵੱਲੋਂ ਡੌਮੀਨਿਕਨ ਰਿਪਬਲਿਕ ਦੇ ਉਚ ਅਧਿਕਾਰੀਆਂ ਨਾਲ ਸੰਪਰਕ ਕਾਇਮ ਕੀਤਾ ਗਿਆ ਹੈ ਜਦਕਿ ਅਮਰੀਕਾ ਵਿਚ ਭਾਰਤ ਦੀ ਅੰਬੈਸੀ ਵੱਲੋਂ ਵੀ ਜਾਣਕਾਰੀ ਹਾਸਲ ਕੀਤੀ ਜਾ ਰਹੀ ਹੈ। ਯੂਨੀਵਰਸਿਟੀ ਆਫ਼ ਪਿਟਜ਼ਰਬਰਗ ਵੱਲੋਂ ਲੋਕਾਂ ਨੂੰ ਅਪੀਲ ਕੀਤੀ ਗਈ ਹੈ ਕਿ ਜੇ ਕਿਸੇ ਕੋਲ ਸੁਦੀਕਸ਼ਾ ਬਾਰੇ ਕੋਈ ਜਾਣਕਾਰੀ ਹੋਵੇ ਤਾਂ ਲਾਊਡਨ ਕਾਊਂਟੀ ਦੇ ਸ਼ੈਰਿਫ ਦਫ਼ਤਰ ਨਾਲ ਸੰਪਰਕ ਕੀਤਾ ਜਾਵੇ। ਸੁਦੀਕਸ਼ਾ ਦੇ ਪਿਤਾ ਸੁਬਰਾਯੁਦੂ ਕੋਨਾਂਕੀ ਨੇ ਮੀਡੀਆ ਨਾਲ ਗੱਲਬਾਤ ਕਰਦਿਆਂ ਦੱਸਿਆ ਕਿ ਉਹ ਬਸੰਤ ਰੁੱਤ ਦੀਆਂ ਛੁੱਟੀਆਂ ਦੇ ਮੱਦੇਨਜ਼ਰ ਪੁੰਟਾ ਕਾਨਾ ਪੁੱਜੀ ਅਤੇ ਭਵਿੱਖ ਵਿਚ ਡਾਕਟਰੀ ਦੀ ਪੜ੍ਹਾਈ ਕਰਨ ਦੀ ਤਿਆਰੀ ਕਰ ਰਹੀ ਸੀ। ਦੱਸ ਦੇਈਏ ਕਿ ਅਮਰੀਕਾ ਦੇ ਵਿਦੇਸ਼ ਵਿਭਾਗ ਵੱਲੋਂ ਡੌਮੀਨਿਕਨ ਰਿਪਬਲਿਕ ਜਾਣ ਵਾਲੇ ਆਪਣੇ ਨਾਗਰਿਕਾਂ ਨੂੰ ਬੇਹੱਦ ਸੁਚੇਤ ਰਹਿਣ ਦੀ ਐਡਵਾਇਜ਼ਰੀ ਜਾਰੀ ਕੀਤੀ ਗਈ ਹੈ। ਵਿਦੇਸ਼ ਵਿਭਾਗ ਦਾ ਕਹਿਣਾ ਹੈ ਕਿ ਹਥਿਆਰਬੰਦ ਲੁੱਟ, ਕਤਲ ਅਤੇ ਸੈਕਸ਼ੁਅਲ ਅਸਾਲਟ ਵਰਗੀਆਂ ਵਾਰਦਾਤਾਂ ਡੌਮੀਨਿਕਨ ਰਿਪਬਲਿਕ ਵਿਚ ਆਮ ਹਨ। ਉਧਰ ਭਾਰਤੀ ਅੰਬੈਸੀ ਨੇ ਕਿਹਾ ਕਿ ਡੌਮੀਨਿਕਨ ਰਿਪਬਲਿਕ ਦੀ ਸਰਕਾਰ ਨੂੰ ਹਰ ਸੰਭਵ ਸਹਿਯੋਗ ਦਿਤਾ ਜਾ ਰਿਹਾ ਹੈ।