ਕੈਨੇਡਾ ਵਿਚ ਭਾਰਤੀ ਨੌਜਵਾਨ ਨੂੰ ਹੋਵੇਗੀ ਸਜ਼ਾ

ਹੈਲੀਫੈਕਸ : ਕੈਨੇਡਾ ਦੀਆਂ ਸੜਕਾਂ ਨੂੰ ਲਹੂ-ਲੁਹਾਣ ਕਰਨ ਵਾਲੇ ਭਾਰਤੀ ਨੌਜਵਾਨ ਨੇ ਆਪਣਾ ਗੁਨਾਹ ਕਬੂਲ ਕਰ ਲਿਆ ਹੈ। ਅਦਾਲਤੀ ਦਸਤਾਵੇਜ਼ਾਂ ਮੁਤਾਬਕ ਦੀਪਕ ਸ਼ਰਮਾ 50 ਕਿਲੋਮੀਟਰ ਪ੍ਰਤੀ ਘੰਟਾ ਦੀ ਰਫ਼ਤਾਰ ਹੱਦ ਵਾਲੇ ਇਲਾਕੇ ਵਿਚ 126 ਕਿਲੋਮੀਟਰ ਦੀ ਰਫ਼ਤਾਰ ਨਾਲ ਜਾ ਰਿਹਾ ਸੀ ਜਦੋਂ ਉਸ ਨੇ 21 ਸਾਲਾ ਮੁਟਿਆਰ ਅਲੈਗਜ਼ੈਂਡਰੀਆ ਵੌਰਟਮੈਨ ਨੂੰ ਟੱਕਰ ਮਾਰੀ। ਨੋਵਾ ਸਕੋਸ਼ੀਆ ਸੂਬੇ ਦੇ ਹੈਲੀਫੈਕਸ ਵਿਖੇ ਵਾਪਰੇ ਹਾਦਸੇ ਦੌਰਾਨ ਅਲੈਗਜ਼ੈਂਡਰੀਆ ਬੁੜਕ ਦੇ ਗੱਡੀ ਦੀ ਵਿੰਡਸ਼ੀਲਡ ’ਤੇ ਆ ਡਿੱਗੀ ਪਰ ਦੀਪਕ ਸ਼ਰਮਾ ਨੇ ਗੱਡੀ ਰੋਕਣ ਦੀ ਬਜਾਏ ਹੋਰ ਤੇਜ਼ ਕਰ ਦਿਤੀ। ਇਸੇ ਦੌਰਾਨ ਦੀਪਕ ਸ਼ਰਮਾ ਨੇ ਇਕ ਇੰਟਰਸੈਕਸ਼ਨ ’ਤੇ ਖੜ੍ਹੀ ਗੱਡੀ ਵਿਚ ਟੱਕਰ ਮਾਰ ਦਿਤੀ ਅਤੇ ਵੌਰਟਮੈਨ ਧਰਤੀ ’ਤੇ ਡਿੱਗ ਗਈ। ਪੈਰਾਮੈਡਿਕਸ ਵੱਲੋਂ ਵੌਰਟਮੈਨ ਨੂੰ ਹਸਪਤਾਲ ਲਿਜਾਇਆ ਗਿਆ ਪਰ ਜ਼ਖਮਾਂ ਦੀ ਤਾਬ ਨਾ ਝਲਦਿਆਂ ਉਸ ਨੇ ਦਮ ਤੋੜ ਦਿਤਾ।

ਦੀਪਕ ਸ਼ਰਮਾ ਨੇ ਜਾਨਲੇਵਾ ਹਾਦਸੇ ਦਾ ਗੁਨਾਹ ਕਬੂਲਿਆ

ਇਥੇ ਦਸਣਾ ਬਣਦਾ ਹੈ ਕਿ ਡਲਹੌਜ਼ੀ ਯੂਨੀਵਰਸਿਟੀ ਦੀ ਵਿਦਿਆਰਥਣ ਅਲੈਗਜ਼ੈਂਡਰੀਆ ਵੌਰਟਮੈਨ ਦੇ ਸਰੀਰ ਦਾ ਕੋਈ ਹਿੱਸਾ ਨਹੀਂ ਸੀ ਬਚਿਆ ਜਿਥੇ ਡੂੰਘਾ ਜ਼ਖਮ ਨਾ ਹੋਵੇ। ਰੀੜ੍ਹ ਦੀ ਹੱੜੀ ਵਿਚ ਫਰੈਕਚਰ ਸੀ ਜਦਕਿ ਅੰਦਰੂਨੀ ਅੰਗਾਂ ਵਿਚ ਗੁੱਝੀਆਂ ਸੱਟਾਂ ਵੱਜੀਆਂ ਅਤੇ ਸਿਰ ਖੂਨ ਨਾਲ ਲੱਥਪਥ ਨਜ਼ਰ ਆਇਆ। ਜਦੋਂ ਵੌਰਟਮੈਨ ਧਰਤੀ ’ਤੇ ਡਿੱਗੀ ਤਾਂ ਕੁਝ ਲੋਕ ਮਦਦ ਵਾਸਤੇ ਆ ਗਏ ਪਰ ਦੀਪਕ ਸ਼ਰਮਾ ਰੌਲਾ ਪਾਉਣ ਲੱਗਾ ਕਿ ਉਹ ਸਭਨਾਂ ਨੂੰ ਮਾਰ ਦੇਵੇਗਾ। ਉਸ ਨੇ ਇਕ ਸ਼ਖਸ ’ਤੇ ਹਮਲਾ ਕਰਨ ਦਾ ਯਤਨ ਵੀ ਕੀਤਾ। ਇਸੇ ਦੌਰਾਨ ਜਦੋਂ ਪੁਲਿਸ ਅਫ਼ਸਰ ਪੁੱਜੇ ਤਾਂ ਦੀਪਕ ਸ਼ਰਮਾ ਡੰਡ-ਬੈਠਕਾਂ ਲਾ ਰਿਹਾ ਸੀ ਅਤੇ ਗ੍ਰਿਫ਼ਤਾਰੀ ਤੋਂ ਬਚਣ ਲਈ ਪੁਲਿਸ ਅਫ਼ਸਰਾਂ ਨੂੰ ਧੱਕਾ ਮਾਰ ਕੇ ਇਕ ਇਮਾਰਤ ਵੱਲ ਦੌੜਿਆ ਪਰ ਉਸ ਨੂੰ ਹੀ ਗ੍ਰਿਫ਼ਤਾਰ ਕਰ ਲਿਆ ਗਿਆ। 27 ਜਨਵਰੀ ਦੀ ਸ਼ਾਮ ਕਾਲੇ ਰੰਗ ਦੀ ਹੌਂਡਾ ਸਿਵਿਕ ਚਲਾ ਰਹੇ ਦੀਪਕ ਸ਼ਰਮਾ ਦੇ ਕਾਰਨਾਮੇ ਇਥੇ ਹੀ ਖਤਮ ਨਹੀਂ ਹੁੰਦੇ ਜਿਸ ਨੇ ਇਕ ਹੋਰ ਗੱਡੀ ਨੂੰ ਵੀ ਟੱਕਰ ਮਾਰੀ ਪਰ ਮੌਕੇ ਤੋਂ ਫ਼ਰਾਰ ਹੋ ਗਿਆ।

ਨੋਵਾ ਸਕੋਸ਼ੀਆ ਦੇ ਹੈਲੀਫੈਕਸ ਵਿਖੇ ਵਾਪਰਿਆ ਸੀ ਹਾਦਸਾ

ਦੂਜੀ ਗੱਡੀ ਦੇ ਡਰਾਈਵਰ ਨੇ ਹੌਂਡਾ ਸਿਵਿਕ ਦੀ ਤਸਵੀਰ ਖਿੱਚਦਿਆਂ 911 ’ਤੇ ਕਾਲ ਕਰ ਦਿਤੀ। ਦੀਪਕ ਸ਼ਰਮਾ ਰਫ਼ਤਾਰ ਵਧਾਉਂਦਾ ਜਾ ਰਿਹਾ ਸੀ ਅਤੇ ਵਰਨੌਨ ਸਟ੍ਰੀਟ ਵਿਚ ਉਸ ਦੀ ਟੱਕਰ ਇਕ ਟਰੱਕ ਨਾਲ ਹੁੰਦੇ ਹੁੰਦੇ ਬਚੀ। ਇਸ ਤੋਂ ਬਾਅਦ ਹੀ ਉਸ ਨੇ ਪੈਦਲ ਜਾ ਰਹੀ ਅਲੈਗਜ਼ੈਂਡਰੀਆ ਨੂੰ ਟੱਕਰ ਮਾਰੀ। ਦੱਸਿਆ ਜਾ ਰਿਹਾ ਹੈ ਕਿ ਦੀਪਕ ਸ਼ਰਮਾ ਇਸ ਤੋਂ ਪਹਿਲਾਂ ਵੀ ਮੋਟਰ ਵ੍ਹੀਕਲ ਐਕਟ ਦੀ ਕਈ ਵਾਰ ਉਲੰਘਣਾ ਕਰ ਚੁੱਕਾ ਹੈ। 2018 ਵਿਚ ਨਿਊ ਬ੍ਰਨਜ਼ਵਿਕ ਦੀ ਪੁਲਿਸ ਵੱਲੋਂ ਉਸ ਨੂੰ ਤੇਜ਼ ਰਫ਼ਤਾਰ ਗੱਡੀ ਚਲਾਉਣ ਦੀਆਂ ਦੋ ਟਿਕਟਾਂ ਦਿਤੀਆਂ ਗਈਆਂ। ਦੀਪਕ ਸ਼ਰਮਾ ਨੂੰ ਸਜ਼ਾ ਦਾ ਐਲਾਨ 22 ਸਤੰਬਰ ਨੂੰ ਕੀਤਾ ਜਾਵੇਗਾ।