ਕੈਨੇਡਾ ਦੇ ਡਾਕ ਮੁਲਾਜ਼ਮਾਂ ਵੱਲੋਂ 22 ਮਈ ਤੋਂ ਹੜਤਾਲ ਦਾ ਨੋਟਿਸ
ਕੈਨੇਡਾ ਦੇ ਡਾਕ ਮੁਲਾਜ਼ਮ ਸ਼ੁੱਕਰਵਾਰ ਤੋਂ ਮੁੜ ਹੜਤਾਲ ’ਤੇ ਜਾ ਸਕਦੇ ਹਨ ਅਤੇ ਛੇ ਮਹੀਨੇ ਵਿਚ ਦੂਜੀ ਵਾਰ ਕੰਮਕਾਜ ਠੱਪ ਹੁੰਦਾ ਨਜ਼ਰ ਆ ਰਿਹਾ ਹੈ
By : Upjit Singh
ਟੋਰਾਂਟੋ : ਕੈਨੇਡਾ ਦੇ ਡਾਕ ਮੁਲਾਜ਼ਮ ਸ਼ੁੱਕਰਵਾਰ ਤੋਂ ਮੁੜ ਹੜਤਾਲ ’ਤੇ ਜਾ ਸਕਦੇ ਹਨ ਅਤੇ ਛੇ ਮਹੀਨੇ ਵਿਚ ਦੂਜੀ ਵਾਰ ਕੰਮਕਾਜ ਠੱਪ ਹੁੰਦਾ ਨਜ਼ਰ ਆ ਰਿਹਾ ਹੈ। ਕੈਨੇਡਾ ਪੋਸਟ ਦੇ 55 ਹਜ਼ਾਰ ਮੁਲਾਜ਼ਮਾਂ ਦੀ ਹੜਤਾਲ ਕਾਰਨ ਲੱਖਾਂ ਲੋਕ ਅਤੇ ਕਾਰੋਬਾਰੀ ਅਦਾਰੇ ਪ੍ਰਭਾਵਤ ਹੋਣਗੇ ਜਿਨ੍ਹਾਂ ਨੂੰ ਡਾਕ ਮੁਲਾਜ਼ਮਾਂ ਵੱਲੋਂ ਹਰ ਸਾਲ ਦੋ ਅਰਬ ਤੋਂ ਵੱਧ ਚਿੱਠੀਆਂ ਅਤੇ 30 ਕਰੋੜ ਪਾਰਸਲ ਪੁੱਜਦੇ ਕੀਤੇ ਜਾਂਦੇ ਹਨ। ਕ੍ਰਾਊਨ ਕਾਰਪੋਰੇਸ਼ਨ ਨੇ ਦੱਸਿਆ ਕਿ ਹੜਤਾਲ ਹੋਣ ਦੀ ਸੂਰਤ ਵਿਚ ਚਿੱਠੀਆਂ ਜਾਂ ਪਾਰਸਲ ਲੈਣੇ ਬੰਦ ਕਰ ਦਿਤੇ ਜਾਣਗੇ ਪਰ ਸਮਾਜਿਕ ਸਹਾਇਤਾ ਦੇ ਚੈਕਸ ਦੀ ਡਿਲੀਵਰੀ ਪਹਿਲਾਂ ਵਾਂਗ ਹੁੰਦੀ ਰਹੇਗਾ। ਕੈਨੇਡਾ ਪੋਸਟ ਦੇ ਇਕ ਬੁਲਾਰੇ ਨੇ ਕਿਹਾ ਕਿ ਹੜਾਤਲ ਕਰ ਕੇ ਅਦਾਰੇ ਦੀ ਆਰਥਿਕ ਹਾਲਤ ਹੋਰ ਬਦਤਰ ਹੋਣ ਦਾ ਖਤਰਾ ਹੈ ਜੋ ਪਹਿਲਾਂ ਹੀ ਨਿਘਾਰ ਵੱਲ ਜਾ ਰਹੀ ਹੈ। 22 ਮਈ ਦਾ ਦਿਨ ਨੇੜੇ ਆਉਂਦਾ ਦੇਖ ਵੱਡੇ ਪੱਧਰ ’ਤੇ ਚਿੱਠੀਆਂ ਜਾਂ ਪਾਰਸਲ ਭੇਜਣ ਵਾਲਿਆਂ ਨੇ ਪਿੱਛੇ ਹਟਣਾ ਸ਼ੁਰੂ ਕਰ ਦਿਤਾ ਹੈ। ਦੱਸ ਦੇਈਏ ਕਿ ਪਿਛਲੇ ਸਾਲ ਨਵੰਬਰ ਅਤੇ ਦਸੰਬਰ ਵਿਚ 32 ਦਿਨ ਦੀ ਹੜਤਾਲ ਦੌਰਾਨ ਲੱਖਾਂ ਦੀ ਗਿਣਤੀ ਵਿਚ ਚਿੱਠੀਆਂ ਦਾ ਢੇਰ ਲੱਗ ਗਿਆ ਸੀ। ਉਧਰ ਕੈਨੇਡੀਅਨ ਯੂਨੀਅਨ ਆਫ਼ ਪੋਸਟਲ ਵਰਕਰਜ਼ ਨੇ ਦੋਸ਼ ਲਾਇਆ ਕਿ ਇੰਪਲੌਇਰ ਵੱਲੋਂ ਇਕ ਪਾਸੜ ਤੌਰ ’ਤੇ ਕੰਮਕਾਜ ਦੇ ਹਾਲਾਤ ਵਿਚ ਤਬਦੀਲੀ ਕੀਤੇ ਜਾਣ ਅਤੇ ਮੁਲਾਜ਼ਮਾਂ ਦੇ ਭੱਤੇ ਰੱਦ ਕਰਨ ਦੇ ਮੱਦੇਨਜ਼ਰ 72 ਘੰਟੇ ਦਾ ਨੋਟਿਸ ਦਿਤਾ ਗਿਆ ਹੈ।
ਲੱਖਾਂ ਲੋਕ ਅਤੇ ਕਾਰੋਬਾਰੀ ਅਦਾਰੇ ਹੋਣਗੇ ਪ੍ਰਭਾਵਤ
ਯੂਨੀਅਨ ਮੁਤਾਬਕ ਪਿਛਲੇ ਸਾਲ ਫੈਡਰਲ ਸਰਕਾਰ ਦੇ ਦਖਲ ਮਗਰੋਂ ਹੜਤਾਲ ਖਤਮ ਹੋਈ ਅਤੇ ਲੇਬਰ ਬੋਰਡ ਵੱਲੋਂ ਦੋਹਾਂ ਧਿਰਾਂ ਨੂੰ ਗੱਲਬਾਤ ਕਰਨ ਦੀ ਹਦਾਇਤ ਦਿਤੀ ਗਈ। ਗੱਲਬਾਤ ਦੇ ਦਰਵਾਜ਼ੇ ਹੁਣ ਵੀ ਖੁੱਲ੍ਹੇ ਹਨ ਪਰ ਤਨਖਾਹਾਂ ਵਿਚ ਵਾਧੇ ਵਰਗੇ ਮਸਲੇ ਪਹਿਲਾਂ ਵਾਂਗ ਸਭ ਤੋਂ ਅਹਿਮ ਹੋਣਗੇ। ਡਾਕ ਮੁਲਾਜ਼ਮਾਂ ਵੱਲੋਂ ਹੜਤਾਲ ਦੀ ਨੌਬਤ ਅਜਿਹੇ ਸਮੇਂ ਆਈ ਹੈ ਜਦੋਂ ਕੈਨੇਡਾ ਪੋਸਟ ਦੇ ਭਵਿੱਖ ਬਾਰੇ ਸਵਾਲ ਪੈਦਾ ਹੋ ਰਹੇ ਹਨ। ਫੈਡਰਲ ਸਰਕਾਰ ਵੱਲੋਂ ਪਿਛਲੇ ਦਿਨੀਂ ਜਾਰੀ ਇਕ ਰਿਪੋਰਟ ਮੁਤਾਬਕ 2023 ਦੌਰਾਨ ਕੈਨੇਡਾ ਪੋਸਟ 845 ਮਿਲੀਅਨ ਡਾਲਰ ਦੇ ਘਾਟੇ ਵਿਚ ਰਹੀ। ਦੂਜੇ ਪਾਸੇ ਕੈਨੇਡਾ ਪੋਸਟ ਦੇ ਮੁਲਾਜ਼ਮਾਂ ਦੀ ਹੜਤਾਲ ਕਾਰਨ ਛੋਟੇ ਕਾਰੋਬਾਰੀਆਂ ਨੂੰ ਇਕ ਅਰਬ ਡਾਲਰ ਤੋਂ ਵੱਧ ਨੁਕਸਾਨ ਹੋਇਆ। 15 ਨਵੰਬਰ ਤੋਂ ਸ਼ੁਰੂ ਹੋਈ ਹੜਤਾਲ 32 ਦਿਨ ਜਾਰੀ ਰਹੀ ਅਤੇ ਫੈਡਰਲ ਸਰਕਾਰ ਦੇ ਦਖਲ ਮਗਰੋਂ ਹੀ ਡਾਕ ਮੁਲਾਜ਼ਮ ਕੰਮ ’ਤੇ ਪਰਤੇ। ਮੁਲਾਜ਼ਮ ਯੂਨੀਅਨ ਆਉਂਦੇ ਚਾਰ ਸਾਲ ਦੌਰਾਨ ਤਨਖਾਹਾਂ ਵਿਚ 24 ਫੀ ਸਦੀ ਵਾਧੇ ਦੀ ਮੰਗ ਛੱਡ ਕੇ 19 ਫੀ ਸਦੀ ’ਤੇ ਆ ਚੁੱਕੀ ਹੈ ਪਰ ਆਰਜ਼ੀ ਕਾਮਿਆਂ ਨੂੰ ਮੈਡੀਕਲ ਛੁੱਟੀਆਂ, ਡਿਸਐਬਿਲਟੀ ਪੇਮੈਂਟਸ ਅਤੇ ਵਧੇਰੇ ਹੱਕਾਂ ਦੀ ਮੰਗ ਕੀਤੀ ਜਾ ਰਹੀ ਹੈ। ਪਿਛਲੇ ਸਾਲ ਹੜਤਾਲ ਦੌਰਾਨ ਫੈਡਰਲ ਅਤੇ ਸੂਬਾ ਸਰਕਾਰਾਂ ਵੱਲੋਂ ਕੈਨੇਡਾ ਵਾਸੀਆਂ ਨੂੰ ਆਰਥਿਕ ਸਹਾਇਤਾ ਦੇ ਚੈਕ ਅਤੇ ਅਹਿਮ ਸਰਕਾਰੀ ਚਿੱਠੀਆਂ ਪੁੱਜਦੀਆਂ ਰਹਿਣ ਦਾ ਯਕੀਨ ਦਿਵਾਇਆ ਪਰ ਇਸ ਦੇ ਬਾਵਜੂਦ ਕੋਰੀਅਰ ਅਤੇ ਕਾਰਗੋ ਦੇ ਰੂਪ ਵਿਚ ਬਦਲਵੇਂ ਪ੍ਰਬੰਧ ਵੀ ਕੀਤੇ ਗਏ।
ਮੁਲਾਜ਼ਮ ਯੂਨੀਅਨ ਨੇ ਖੁੱਲ੍ਹੇ ਰੱਖੇ ਗੱਲਬਾਤ ਦੇ ਦਰਵਾਜ਼ੇ
ਸਰਵਿਸ ਕੈਨੇਡਾ ਮੁਤਾਬਕ ਹੜਤਾਲ ਦੌਰਾਨ ਆਰਥਿਕ ਸਹਾਇਤਾ ਵਾਲੀਆਂ ਯੋਜਨਾਵਾਂ ਅਧੀਨ 94 ਫੀ ਸਦੀ ਤੋਂ 98 ਫੀ ਸਦੀ ਲੋਕਾਂ ਦੇ ਖਾਤਿਆਂ ਵਿਚ ਰਕਮ ਜਮ੍ਹਾਂ ਕੀਤੀ ਗਈ। ਕੈਨੇਡਾ ਪੋਸਟ ਅਤੇ ਕੈਨੇਡੀਅਨ ਯੂਨੀਅਨ ਆਫ਼ ਪੋਸਟਲ ਵਰਕਰਜ਼ ਦਰਮਿਆਨ ਹੋਏ ਸਮਝੌਤੇ ਮੁਤਾਬਕ ਹੜਤਾਲ ਦੀ ਸੂਰਤ ਵਿਚ ਵੀ ਕੈਨੇਡਾ ਚਾਈਲਡ ਬੈਨੇਫਿਟ, ਓਲਡ ਏਜ ਸਕਿਉਰਿਟੀ ਅਤੇ ਕੈਨੇਡਾ ਪੈਨਸ਼ਨ ਪਲੈਨ ਦੀਆਂ ਅਦਾਇਗੀਆਂ ਲਾਭਪਾਤਰੀਆਂ ਤੱਕ ਪੁੱਜਦੀਆਂ ਕਰਨੀਆਂ ਲਾਜ਼ਮੀ ਹਨ।
