ਭਾਰਤ ਨੇ ਮਈ 'ਚ 722 ਕਰੋੜ ਰੁਪਏ ਦਾ ਖਰੀਦਿਆ ਸੋਨਾ, ਦੁਨੀਆ ਦਾ ਤੀਜਾ ਸਭ ਤੋਂ ਵੱਡਾ ਖਰੀਦਦਾਰ

ਨਵੀਂ ਦਿੱਲੀ: ਭਾਰਤੀ ਰਿਜ਼ਰਵ ਬੈਂਕ ਮਈ 'ਚ ਸੋਨੇ ਦਾ ਦੁਨੀਆ ਦਾ ਤੀਜਾ ਸਭ ਤੋਂ ਵੱਡਾ ਖਰੀਦਦਾਰ ਸੀ। ਵਰਲਡ ਗੋਲਡ ਕੌਂਸਲ ਮੁਤਾਬਕ ਪਿਛਲੇ ਮਹੀਨੇ ਭਾਰਤ ਨੇ ਕਰੀਬ 722 ਕਰੋੜ ਰੁਪਏ ਦਾ ਸੋਨਾ ਖਰੀਦਿਆ ਸੀ। ਭਾਰਤ ਤੋਂ ਵੱਧ ਸੋਨਾ ਸਿਰਫ਼ ਸਵਿਟਜ਼ਰਲੈਂਡ ਅਤੇ ਚੀਨ ਨੇ ਹੀ ਖਰੀਦਿਆ ਹੈ। ਪਿਛਲੇ 5 ਵਿੱਤੀ ਸਾਲਾਂ ਵਿੱਚ, ਭਾਰਤ ਨੇ ਆਪਣੇ ਸੋਨੇ ਦੇ ਭੰਡਾਰ ਵਿੱਚ ਲਗਭਗ 204 ਟਨ ਦਾ ਵਾਧਾ ਕੀਤਾ ਹੈ। ਦੇਸ਼ ਦਾ ਸੋਨਾ ਭੰਡਾਰ ਮਾਰਚ 2019 ਵਿੱਚ 618.2 ਟਨ ਸੀ, ਜੋ 31 ਮਾਰਚ, 2024 ਨੂੰ 33% ਵਧ ਕੇ 822.1 ਟਨ ਹੋ ਗਿਆ। ਹਾਲਾਂਕਿ ਇਸ ਦੌਰਾਨ ਸੋਨੇ ਦੀਆਂ ਕੀਮਤਾਂ 'ਚ ਕਰੀਬ 70 ਫੀਸਦੀ ਦਾ ਵਾਧਾ ਹੋਇਆ ਹੈ।

ਸੋਨੇ ਦੀਆਂ ਵਧਦੀਆਂ ਕੀਮਤਾਂ ਕਾਰਨ ਪਿਛਲੇ ਮਹੀਨੇ ਗਲੋਬਲ ਗੋਲਡ ਮਾਰਕਿਟ 'ਚ ਔਸਤ ਰੋਜ਼ਾਨਾ ਵਪਾਰ ਦੀ ਮਾਤਰਾ 18 ਲੱਖ ਕਰੋੜ ਰੁਪਏ ਸੀ। ਇਹ ਅਪ੍ਰੈਲ 2024 ਦੇ ਮੁਕਾਬਲੇ 13% ਘੱਟ ਹੈ, ਪਰ 2023 ਦੇ 13.6 ਲੱਖ ਕਰੋੜ ਰੁਪਏ ਪ੍ਰਤੀ ਦਿਨ ਦੀ ਔਸਤ ਨਾਲੋਂ 32.51% ਵੱਧ ਹੈ।

ਸੋਨੇ ਦੀ ਕੀਮਤ ਤੀਜੇ ਮਹੀਨੇ ਵਧੀ, ਪਰ ਸ਼ੁੱਕਰਵਾਰ ਨੂੰ ਡਿੱਗ ਗਈ

ਮਈ 'ਚ ਸੋਨੇ ਦੀਆਂ ਕੀਮਤਾਂ 'ਚ ਲਗਾਤਾਰ ਤੀਜੇ ਮਹੀਨੇ ਵਾਧਾ ਹੋਇਆ ਹੈ। ਪਰ ਸ਼ੁੱਕਰਵਾਰ ਨੂੰ ਦੇਸ਼ 'ਚ ਗਹਿਣਿਆਂ ਦਾ ਸੋਨਾ (22 ਕੈਰੇਟ) 773 ਰੁਪਏ ਪ੍ਰਤੀ 10 ਗ੍ਰਾਮ ਡਿੱਗ ਕੇ 65,872 ਰੁਪਏ 'ਤੇ ਆ ਗਿਆ। 24 ਕੈਰੇਟ ਸੋਨੇ ਦੀ ਕੀਮਤ ਵੀ ਵੀਰਵਾਰ ਦੇ ਮੁਕਾਬਲੇ 844 ਰੁਪਏ ਘਟ ਕੇ 71,913 ਰੁਪਏ ਪ੍ਰਤੀ 10 ਗ੍ਰਾਮ ਰਹਿ ਗਈ।