ਫਰੀਦਾਬਾਦ ਵਿਚ ਪਹਿਲਵਾਨ ਨੂੰ ਮਾਰੀਆਂ ਗੋਲੀਆਂ

ਫਰੀਦਾਬਾਦ, 31 ਜਨਵਰੀ, ਨਿਰਮਲ : ਦਿੱਲੀ ਦੇ ਸੂਰਜਭਾਨ ਉਰਫ ਬੱਲੂ ਪਹਿਲਵਾਨ ਦੀ ਮੰਗਲਵਾਰ ਦੇਰ ਸ਼ਾਮ ਫਰੀਦਾਬਾਦ ’ਚ ਗੋਲੀ ਮਾਰ ਕੇ ਹੱਤਿਆ ਕਰ ਦਿੱਤੀ ਗਈ। ਦੋ ਬਦਮਾਸ਼ਾਂ ਨੇ 8 ਸਕਿੰਟਾਂ ’ਚ ਕਰੀਬ 15 ਤੋਂ 16 ਰਾਊਂਡ ਫਾਇਰ ਕੀਤੇ, ਜਿਨ੍ਹਾਂ ’ਚੋਂ 10 ਤੋਂ ਜ਼ਿਆਦਾ ਗੋਲੀਆਂ ਬੱਲੂ ਨੂੰ ਲੱਗੀਆਂ। ਜਦੋਂ ਬੱਲੂ ’ਤੇ ਹਮਲਾ ਹੋਇਆ ਤਾਂ ਉਹ ਜਿੰਮ ਤੋਂ ਬਾਹਰ ਆਇਆ ਸੀ। ਸਾਰੀ ਘਟਨਾ ਦਾ ਸੀਸੀਟੀਵੀ ਵੀਡੀਓ ਸਾਹਮਣੇ ਆਇਆ ਹੈ।

ਮੀਡੀਆ ਰਿਪੋਰਟਾਂ ਮੁਤਾਬਕ ਬੱਲੂ ਪਹਿਲਵਾਨ (39) ਨੂੰ ਪੁਲਿਸ ਨੇ ਦਿੱਲੀ ਤੋਂ ਕਾਬੂ ਕੀਤਾ ਸੀ। ਉਹ ਲਾਰੈਂਸ ਗਰੁੱਪ ਦੇ ਗੈਂਗਸਟਰ ਕਪਿਲ ਸਾਂਗਵਾਨ ਉਰਫ ਨੰਦੂ ਦਾ ਕਰੀਬੀ ਸੀ। ਕਤਲ ਪਿੱਛੇ ਗੈਂਗ ਵਾਰ ਦਾ ਮਾਮਲਾ ਵੀ ਸਾਹਮਣੇ ਆਇਆ ਹੈ।

ਫਰੀਦਾਬਾਦ ਦੇ ਡੀਸੀਪੀ ਰਾਜੇਸ਼ ਦੁੱਗਲ ਨੇ ਕਿਹਾ ਕਿ ਪੁਲਿਸ ਫਿਲਹਾਲ ਹਰ ਪਹਿਲੂ ਤੋਂ ਜਾਂਚ ਕਰ ਰਹੀ ਹੈ। ਕੁਝ ਵੀ ਕਹਿਣਾ ਜਲਦਬਾਜ਼ੀ ਹੋਵੇਗੀ। ਇਸ ਗੱਲ ਦੀ ਜਾਂਚ ਕੀਤੀ ਜਾ ਰਹੀ ਹੈ ਕਿ ਬੱਲੂ ਕਿਸ ਗੈਂਗ ਦੇ ਸੰਪਰਕ ਵਿੱਚ ਸੀ। ਕ੍ਰਾਈਮ ਬ੍ਰਾਂਚ ਦੀਆਂ ਟੀਮਾਂ ਹਮਲਾਵਰਾਂ ਨੂੰ ਫੜਨ ’ਚ ਜੁਟੀਆਂ ਹੋਈਆਂ ਹਨ।

ਦਰਅਸਲ, ਦਿੱਲੀ ਦੇ ਨਜਫਗੜ੍ਹ ਖੇਤਰ ਦੇ ਦੀਨਪੁਰ ਪਿੰਡ ਦਾ ਰਹਿਣ ਵਾਲਾ ਬੱਲੂ ਪਹਿਲਵਾਨ 4 ਮਹੀਨੇ ਪਹਿਲਾਂ ਹੀ ਫਰੀਦਾਬਾਦ ਦੇ ਵਾਈਐਮਸੀਏ ਖੇਤਰ ਵਿੱਚ ਰਹਿਣ ਲੱਗਾ ਸੀ। ਉਸ ਨੇ ਸੈਕਟਰ-11 ਹੁੱਡਾ ਮਾਰਕੀਟ ਸਥਿਤ ਸਪੈਕਟ੍ਰਮ ਜਿਮ ਜੁਆਇਨ ਕੀਤਾ ਸੀ। ਉਹ ਰੋਜ਼ ਜਿੰਮ ਜਾਂਦਾ ਸੀ। ਉਸ ਦਾ ਸਮਾਂ ਹਰ ਰੋਜ਼ ਇੱਕੋ ਜਿਹਾ ਨਹੀਂ ਸੀ। ਉਹ ਸ਼ਾਮ 4 ਤੋਂ 7 ਵਜੇ ਦੇ ਵਿਚਕਾਰ ਕਿਸੇ ਵੀ ਸਮੇਂ ਜਿੰਮ ਆ ਜਾਂਦਾ ਸੀ।

ਚਿੱਟੇ ਰੰਗ ਦੀ ਕਾਰ ’ਚ ਸਵਾਰ ਬਦਮਾਸ਼ ਪਹਿਲਾਂ ਹੀ ਬੱਲੂ ਦੀਆਂ ਗਤੀਵਿਧੀਆਂ ’ਤੇ ਨਜ਼ਰ ਰੱਖ ਰਹੇ ਸਨ। ਜਿਵੇਂ ਹੀ ਬੱਲੂ ਨੇ ਆਪਣੀ ਬੁਲੇਟ ਬਾਈਕ ਸਟਾਰਟ ਕੀਤੀ ਤਾਂ ਦੋ ਬਦਮਾਸ਼ ਕਾਰ ਤੋਂ ਹੇਠਾਂ ਉਤਰੇ ਅਤੇ ਬੱਲੂ ਵੱਲ ਭੱਜ ਕੇ ਆਏ ਅਤੇ ਗੋਲੀਆਂ ਚਲਾ ਦਿੱਤੀਆਂ। 8 ਸਕਿੰਟਾਂ ਦੇ ਅੰਦਰ ਹੀ ਬਦਮਾਸ਼ਾਂ ਨੇ ਗੋਲੀਆਂ ਚਲਾ ਦਿੱਤੀਆਂ ਅਤੇ ਕਾਰ ਲੈ ਕੇ ਫਰਾਰ ਹੋ ਗਏ। ਗੋਲੀਆਂ ਚੱਲਣ ਤੋਂ ਬਾਅਦ ਆਸ-ਪਾਸ ਦੇ ਲੋਕ ਅਤੇ ਜਿੰਮ ਕਰਨ ਵਾਲੇ ਨੌਜਵਾਨ ਮੌਕੇ ’ਤੇ ਪਹੁੰਚੇ ਤਾਂ ਬੱਲੂ ਦੀ ਮੌਤ ਹੋ ਚੁੱਕੀ ਸੀ।

ਦਿੱਲੀ ਦੇ ਨਜਫਗੜ੍ਹ ਇਲਾਕੇ ਦਾ ਗੈਂਗਸਟਰ ਜੋਤੀ ਬਾਬਾ ਅਤੇ ਕਪਿਲ ਸਾਂਗਵਾਨ ਉਰਫ਼ ਨੰਦੂ ਅਸਲੀ ਭਰਾ ਹਨ। ਜੋਤੀ ਬਾਬਾ ਇਸ ਸਮੇਂ ਜੇਲ੍ਹ ਵਿੱਚ ਹੈ, ਜਦੋਂ ਕਿ ਉਸਦੇ ਗਿਰੋਹ ਨੂੰ ਯੂਕੇ ਵਿੱਚ ਰਹਿਣ ਵਾਲੇ ਉਸਦਾ ਭਰਾ ਨੰਦੂ ਚਲਾ ਰਿਹਾ ਹੈ। ਬੱਲੂ ਪਹਿਲਵਾਨ ਨੰਦੂ ਦੇ ਕਰੀਬੀ ਸੀ।

ਮੀਡੀਆ ਰਿਪੋਰਟਾਂ ਮੁਤਾਬਕ ਨੰਦੂ ਦੇ ਜੀਜਾ ਸੁਨੀਲ ਉਰਫ਼ ਡਾਕਟਰ ਦੀ 2015 ਵਿੱਚ ਹੱਤਿਆ ਕਰ ਦਿੱਤੀ ਗਈ ਸੀ। ਸੁਨੀਲ ਨੂੰ ਗੈਂਗਸਟਰ ਮਨਜੀਤ ਮਾਹਲ ਦੇ ਸ਼ੂਟਰ ਨੈਫੇ ਉਰਫ਼ ਮੰਤਰੀ ਨੇ ਬੱਲੂ ਪਹਿਲਵਾਨ ਦੇ ਦਫ਼ਤਰ ਵਿੱਚ ਗੋਲੀ ਮਾਰ ਦਿੱਤੀ ਸੀ। ਮਨਜੀਤ ਮਾਹਲ ਨੇ ਨੰਦੂ ਨਾਲ ਰੰਜਿਸ਼ ਕਾਰਨ ਇਹ ਕਤਲ ਕੀਤਾ ਸੀ। ਇਸ ਕੇਸ ਵਿੱਚ ਬੱਲੂ ਪਹਿਲਵਾਨ ਗਵਾਹ ਸੀ।

ਬੱਲੂ ਨੇ ਅਦਾਲਤ ਵਿੱਚ ਮਨਜੀਤ ਖਿਲਾਫ ਗਵਾਹੀ ਦੇਣੀ ਸੀ। ਦੱਸਿਆ ਜਾ ਰਿਹਾ ਹੈ ਕਿ ਬੱਲੂ ਇਸ ਲਈ ਤਿਆਰ ਨਹੀਂ ਸੀ। ਸ਼ੱਕ ਹੈ ਕਿ ਨੰਦੂ ਨੇ ਇਸੇ ਕਾਰਨ ਬੱਲੂ ਦਾ ਕਤਲ ਕਰਵਾਇਆ ਹੋ ਸਕਦਾ ਹੈ।

ਗੈਂਗਸਟਰ ਮਨਜੀਤ ਮਾਹਲ ਇਸ ਸਮੇਂ ਦਿੱਲੀ ਦੀ ਤਿਹਾੜ ਜੇਲ੍ਹ ਵਿੱਚ ਬੰਦ ਹੈ। ਅਜਿਹੇ ’ਚ ਇਹ ਵੀ ਸ਼ੱਕ ਹੈ ਕਿ ਬੱਲੂ ਉਸ ਦੇ ਖਿਲਾਫ ਗਵਾਹੀ ਦੇ ਸਕਦਾ ਹੈ, ਇਸ ਲਈ ਮਨਜੀਤ ਮਾਹਲ ਨੇ ਆਪਣੇ ਗੁੰਡਿਆਂ ਰਾਹੀਂ ਉਸ ਦਾ ਕਤਲ ਕਰਵਾਇਆ ਹੋ ਸਕਦਾ ਹੈ। ਫਿਲਹਾਲ ਪੁਲਿਸ ਦੋਵਾਂ ਪਹਿਲੂਆਂ ਦੀ ਬਾਰੀਕੀ ਨਾਲ ਜਾਂਚ ਕਰ ਰਹੀ ਹੈ।

ਮੀਡੀਆ ਰਿਪੋਰਟਾਂ ਮੁਤਾਬਕ ਗੈਂਗਸਟਰ ਨੰਦੂ ਲਾਰੈਂਸ ਸਿੰਡੀਕੇਟ ਦਾ ਮੈਂਬਰ ਹੈ। ਪੁਲਿਸ ਨੂੰ ਪਤਾ ਲੱਗਾ ਸੀ ਕਿ ਬੱਲੂ ਗਰੋਹ ਦੇ ਪੈਸੇ ਇਕੱਠੇ ਕਰਨ ਵਿੱਚ ਵੀ ਸ਼ਾਮਲ ਸੀ। ਜਿਸ ਕਾਰਨ ਪੁਲਸ ਨੇ ਉਸ ਨੂੰ ਗ੍ਰਿਫਤਾਰ ਕਰ ਲਿਆ ਸੀ।