World Cup Semi-Final: ਅਭਿਸ਼ੇਕ ਸ਼ਰਮਾ ਦਾ ਖ਼ੌਫ਼ ਜਾਂ ਇੰਗਲੈਂਡ ਦੀ ਰਣਨੀਤੀ?

ਮੁੰਬਈ, 4 ਮਾਰਚ (2026): ਭਾਰਤ ਅਤੇ ਇੰਗਲੈਂਡ ਵਿਚਾਲੇ ਭਲਕੇ ਯਾਨੀ 5 ਮਾਰਚ ਨੂੰ ਹੋਣ ਵਾਲੇ ਟੀ-20 ਵਿਸ਼ਵ ਕੱਪ ਦੇ ਹਾਈ-ਵੋਲਟੇਜ ਸੈਮੀਫਾਈਨਲ ਤੋਂ ਪਹਿਲਾਂ ਮੈਦਾਨ ਦੇ ਅੰਦਰ ਅਤੇ ਬਾਹਰ ਗਰਮਾ-ਗਰਮੀ ਵਧ ਗਈ ਹੈ। ਵਾਨਖੇੜੇ ਸਟੇਡੀਅਮ ਵਿੱਚ ਹੋਣ ਵਾਲੇ ਇਸ ਮਹਾਂ-ਮੁਕਾਬਲੇ ਤੋਂ ਪਹਿਲਾਂ ਇੰਗਲੈਂਡ ਦੇ ਸਟਾਰ ਆਲਰਾਊਂਡਰ ਸੈਮ ਕੁਰਨ ਨੇ ਭਾਰਤੀ ਨੌਜਵਾਨ ਸਲਾਮੀ ਬੱਲੇਬਾਜ਼ ਅਭਿਸ਼ੇਕ ਸ਼ਰਮਾ ਨੂੰ ਲੈ ਕੇ ਆਪਣੀ ਟੀਮ ਦੀ ਫ਼ਿਕਰ ਅਤੇ ਤਿਆਰੀ ਦੋਵਾਂ ਦਾ ਪ੍ਰਗਟਾਵਾ ਕੀਤਾ ਹੈ।

ਪ੍ਰੈਸ ਕਾਨਫਰੰਸ ਦੌਰਾਨ ਸੈਮ ਕੁਰਨ ਨੇ ਮੰਨਿਆ ਕਿ ਅਭਿਸ਼ੇਕ ਸ਼ਰਮਾ ਦੀ ਵਿਸਫੋਟਕ ਬੱਲੇਬਾਜ਼ੀ ਇੰਗਲੈਂਡ ਲਈ ਵੱਡੀ ਚੁਣੌਤੀ ਬਣ ਸਕਦੀ ਹੈ। ਜਦੋਂ ਕੁਰਨ ਨੂੰ ਅਭਿਸ਼ੇਕ ਦੇ ਪਿਛਲੇ ਸੈਂਕੜੇ ਦੀ ਯਾਦ ਦਿਵਾਈ ਗਈ, ਤਾਂ ਉਸ ਨੇ ਮੁਸਕਰਾਉਂਦੇ ਹੋਏ ਕਿਹਾ, "ਮੈਨੂੰ ਉਮੀਦ ਹੈ ਕਿ ਅਭਿਸ਼ੇਕ ਇਸ ਵਾਰ ਅਜਿਹੀ ਪਾਰੀ ਨਹੀਂ ਖੇਡੇਗਾ।" ਹਾਲਾਂਕਿ, ਉਸ ਨੇ ਤੁਰੰਤ ਸਾਵਧਾਨ ਕਰਦਿਆਂ ਇਹ ਵੀ ਕਿਹਾ ਕਿ ਇੰਗਲੈਂਡ ਕੋਲ ਅਭਿਸ਼ੇਕ ਨੂੰ ਰੋਕਣ ਲਈ ਇੱਕ ਬਹੁਤ ਹੀ ਮਜ਼ਬੂਤ ਯੋਜਨਾ ਤਿਆਰ ਹੈ ਅਤੇ ਉਹ ਕਿਸੇ ਵੀ ਚੁਣੌਤੀ ਤੋਂ ਡਰਦੇ ਨਹੀਂ ਹਨ।

ਵਾਨਖੇੜੇ ਦੀ ਪਿੱਚ ਅਤੇ ਛੋਟੀਆਂ ਬਾਊਂਡਰੀਆਂ ਬਾਰੇ ਗੱਲ ਕਰਦਿਆਂ ਕੁਰਨ ਨੇ ਭਵਿੱਖਬਾਣੀ ਕੀਤੀ ਕਿ ਇਹ ਮੈਚ ਉੱਚ ਸਕੋਰ ਵਾਲਾ ਹੋਵੇਗਾ। ਉਨ੍ਹਾਂ ਕਿਹਾ ਕਿ ਆਈਪੀਐਲ ਖੇਡਣ ਕਾਰਨ ਇੰਗਲਿਸ਼ ਖਿਡਾਰੀ ਭਾਰਤੀ ਹਾਲਾਤਾਂ ਅਤੇ ਖਿਡਾਰੀਆਂ ਦੀਆਂ ਕਮਜ਼ੋਰੀਆਂ ਤੋਂ ਚੰਗੀ ਤਰ੍ਹਾਂ ਵਾਕਫ਼ ਹਨ। ਕੁਰਨ ਮੁਤਾਬਕ, ਜੇਕਰ ਮੈਚ ਦੌਰਾਨ ਸਟੇਡੀਅਮ ਵਿੱਚ ਭਾਰਤੀ ਪ੍ਰਸ਼ੰਸਕਾਂ ਦਾ ਸ਼ੋਰ ਘੱਟ ਰਹਿੰਦਾ ਹੈ, ਤਾਂ ਇਸ ਦਾ ਮਤਲਬ ਹੋਵੇਗਾ ਕਿ ਇੰਗਲੈਂਡ ਦੀ ਟੀਮ ਮੈਚ 'ਤੇ ਆਪਣੀ ਪਕੜ ਬਣਾ ਰਹੀ ਹੈ।

ਜੇਕਰ ਅਭਿਸ਼ੇਕ ਸ਼ਰਮਾ ਦੇ ਹਾਲੀਆ ਫਾਰਮ ਦੀ ਗੱਲ ਕਰੀਏ, ਤਾਂ ਇਸ ਵਿਸ਼ਵ ਕੱਪ ਵਿੱਚ ਉਨ੍ਹਾਂ ਦਾ ਸਫ਼ਰ ਉਤਰਾਅ-ਚੜ੍ਹਾਅ ਵਾਲਾ ਰਿਹਾ ਹੈ। ਪਹਿਲੇ ਤਿੰਨ ਮੈਚਾਂ ਵਿੱਚ ਫਲਾਪ ਰਹਿਣ ਤੋਂ ਬਾਅਦ ਉਨ੍ਹਾਂ ਨੇ ਇੱਕ ਸ਼ਾਨਦਾਰ ਅਰਧ ਸੈਂਕੜਾ ਜੜ ਕੇ ਵਾਪਸੀ ਕੀਤੀ ਸੀ, ਪਰ ਵੈਸਟਇੰਡੀਜ਼ ਖ਼ਿਲਾਫ਼ ਉਹ ਫਿਰ ਸਸਤੇ ਵਿੱਚ ਆਊਟ ਹੋ ਗਏ ਸਨ। ਹੁਣ ਦੇਖਣਾ ਇਹ ਹੋਵੇਗਾ ਕਿ ਕੀ ਅਭਿਸ਼ੇਕ ਵੀਰਵਾਰ ਰਾਤ ਨੂੰ ਵਾਨਖੇੜੇ ਦੇ ਮੈਦਾਨ ਵਿੱਚ ਇੰਗਲੈਂਡ ਦੇ ਗੇਂਦਬਾਜ਼ਾਂ ਦੇ ਪਰਖੱਚੇ ਉਡਾ ਕੇ ਭਾਰਤ ਨੂੰ ਫਾਈਨਲ ਵਿੱਚ ਪਹੁੰਚਾ ਪਾਉਂਦੇ ਹਨ ਜਾਂ ਨਹੀਂ।