ਕੀ ਹੁਣ ਕਰਮਚਾਰੀਆਂ ਦੀ ਥਾਂ ਲੈਣਗੇ ਉਨ੍ਹਾਂ ਦੇ 'AI clones'? Chines Company ਦਾ ਅਜੀਬੋ-ਗਰੀਬ ਕਾਰਨਾਮਾ ਆਇਆ ਸਾਹਮਣੇ

ਬੀਜਿੰਗ: ਆਰਟੀਫੀਸ਼ੀਅਲ ਇੰਟੈਲੀਜੈਂਸ (AI) ਦੀ ਦੁਨੀਆ ਵਿੱਚ ਇੱਕ ਅਜਿਹੀ ਹੈਰਾਨੀਜਨਕ ਘਟਨਾ ਸਾਹਮਣੇ ਆਈ ਹੈ ਜਿਸਨੇ ਕਾਰਪੋਰੇਟ ਜਗਤ ਵਿੱਚ ਹਲਚਲ ਮਚਾ ਦਿੱਤੀ ਹੈ। ਚੀਨ ਦੇ ਸ਼ੈਂਡੋਂਗ ਪ੍ਰਾਂਤ ਵਿੱਚ ਇੱਕ ਗੇਮਿੰਗ ਕੰਪਨੀ ਨੇ ਆਪਣੀ HR ਟੀਮ ਦੇ ਇੱਕ ਸਾਬਕਾ ਕਰਮਚਾਰੀ ਦਾ ਇੱਕ ਡਿਜੀਟਲ ਕਲੋਨ (Digital Clone) ਤਿਆਰ ਕੀਤਾ ਹੈ। ਇਹ ਕਦਮ ਇਸ ਲਈ ਚੁੱਕਿਆ ਗਿਆ ਹੈ ਤਾਂ ਜੋ ਉਸ ਕਰਮਚਾਰੀ ਦੇ ਅਸਤੀਫਾ ਦੇਣ ਤੋਂ ਬਾਅਦ ਵੀ ਕੰਪਨੀ ਦੇ ਕੰਮਕਾਜ 'ਤੇ ਕੋਈ ਅਸਰ ਨਾ ਪਵੇ ਅਤੇ ਡਿਜੀਟਲ ਅਵਤਾਰ ਉਸਦੀ ਗੈਰ-ਹਾਜ਼ਰੀ ਵਿੱਚ ਪਹਿਲਾਂ ਵਾਂਗ ਹੀ ਜ਼ਿੰਮੇਵਾਰੀਆਂ ਨਿਭਾਉਂਦਾ ਰਹੇ।

ਇਸ AI-ਸੰਚਾਲਿਤ 'ਡਿਜੀਟਲ ਵਰਕਰ' ਨੂੰ ਸਾਬਕਾ ਕਰਮਚਾਰੀ ਦੇ ਪਿਛਲੇ ਸਾਰੇ ਡੇਟਾ ਅਤੇ ਕੰਮ ਕਰਨ ਦੇ ਅੰਦਾਜ਼ 'ਤੇ ਸਖ਼ਤ ਟ੍ਰੇਨਿੰਗ (Training) ਦਿੱਤੀ ਗਈ ਹੈ। ਇਹ AI ਅਵਤਾਰ ਨਾ ਸਿਰਫ ਕਰਮਚਾਰੀਆਂ ਦੇ ਸਵਾਲਾਂ ਦੇ ਜਵਾਬ ਦੇਣ ਦੇ ਸਮਰੱਥ ਹੈ, ਸਗੋਂ ਇਹ ਮੀਟਿੰਗਾਂ ਦਾ ਸ਼ਡਿਊਲ (Schedule) ਤੈਅ ਕਰਨ, ਪੇਸ਼ਕਾਰੀਆਂ (Presentations) ਅਤੇ ਸਪ੍ਰੈਡਸ਼ੀਟਾਂ ਬਣਾਉਣ ਵਰਗੇ ਬੁਨਿਆਦੀ ਦਫਤਰੀ ਕੰਮ ਵੀ ਬਖੂਬੀ ਨਿਭਾ ਸਕਦਾ ਹੈ। ਕੰਪਨੀ ਦਾ ਦਾਅਵਾ ਹੈ ਕਿ ਸਾਬਕਾ ਕਰਮਚਾਰੀ ਨੇ ਆਪਣੇ ਡੇਟਾ ਦੀ ਵਰਤੋਂ ਲਈ ਆਪਣੀ ਸਹਿਮਤੀ ਦਿੱਤੀ ਸੀ ਅਤੇ ਹੁਣ ਇਹ ਪ੍ਰੋਜੈਕਟ ਅੰਦਰੂਨੀ ਜਾਂਚ (Internal investigation) ਦੇ ਦੌਰ ਵਿੱਚੋਂ ਲੰਘ ਰਿਹਾ ਹੈ।

ਇਸ ਮਾਮਲੇ ਨੇ ਕੰਮ ਵਾਲੀ ਥਾਂ ਦੀ ਨੈਤਿਕਤਾ (Workplace ethics) ਅਤੇ ਡੇਟਾ ਸੁਰੱਖਿਆ ਨੂੰ ਲੈ ਕੇ ਕਈ ਗੰਭੀਰ ਸਵਾਲ ਖੜ੍ਹੇ ਕਰ ਦਿੱਤੇ ਹਨ। ਕਾਨੂੰਨੀ ਮਾਹਰਾਂ ਦਾ ਮੰਨਣਾ ਹੈ ਕਿ ਕਰਮਚਾਰੀਆਂ ਦੇ ਈਮੇਲ, ਚੈਟ ਲੌਗ ਅਤੇ ਵਿਵਹਾਰ ਦੇ ਪੈਟਰਨ ਉਨ੍ਹਾਂ ਦੀ ਨਿੱਜੀ ਜਾਣਕਾਰੀ (Personal data) ਦਾ ਹਿੱਸਾ ਹੁੰਦੇ ਹਨ। ਮਾਹਿਰਾਂ ਨੇ ਚੇਤਾਵਨੀ ਦਿੱਤੀ ਹੈ ਕਿ ਬਿਨਾਂ ਸਖ਼ਤ ਸਹਿਮਤੀ ਅਤੇ ਕਾਨੂੰਨੀ ਨਿਯਮਾਂ ਦੀ ਪਾਲਣਾ ਕੀਤੇ ਬਿਨਾਂ ਕਿਸੇ ਵੀ ਕਰਮਚਾਰੀ ਦੇ ਡੇਟਾ ਨੂੰ AI ਸਿਖਲਾਈ ਲਈ ਵਰਤਣਾ ਗੋਪਨੀਯਤਾ ਦੇ ਕਾਨੂੰਨਾਂ ਦੀ ਉਲੰਘਣਾ ਹੈ। ਕੰਪਨੀ ਦੀਆਂ ਅਗਲੀਆਂ ਯੋਜਨਾਵਾਂ ਵਿੱਚ ਹਿਊਮਨਾਈਡ ਰੋਬੋਟ (Humanoid robots) ਨੂੰ ਵੀ ਦਫ਼ਤਰ ਵਿੱਚ ਲਿਆਉਣ ਦੀ ਗੱਲ ਕੀਤੀ ਜਾ ਰਹੀ ਹੈ, ਜੋ ਫਰੰਟ-ਡੈਸਕ ਦੀਆਂ ਭੂਮਿਕਾਵਾਂ ਸੰਭਾਲ ਸਕਣਗੇ। ਇਹ ਘਟਨਾ ਸਪੱਸ਼ਟ ਕਰਦੀ ਹੈ ਕਿ ਆਟੋਮੇਸ਼ਨ (Automation) ਦਾ ਭਵਿੱਖ ਜਿੰਨਾ ਦਿਲਚਸਪ ਹੈ, ਉੱਨਾ ਹੀ ਚੁਣੌਤੀਪੂਰਨ ਵੀ।