"ਅਸੀਂ ਇੱਕ ਰਾਤ ਵਿੱਚ ਪੂਰੇ ਦੇਸ਼ ਨੂੰ ਤਬਾਹ ਕਰ ਸਕਦੇ ਹਾਂ, ਉਹ ਰਾਤ ਕੱਲ੍ਹ ਵੀ ਹੋ ਸਕਦੀ ਹੈ" - Trump ਦੀ Iran ਨੂੰ ਸਿੱਧੀ ਚੇਤਾਵਨੀ

ਵਾਸ਼ਿੰਗਟਨ: ਮੱਧ ਪੂਰਬ (Middle East) ਵਿੱਚ ਵਧਦੇ ਖ਼ਤਰਨਾਕ ਤਣਾਅ ਦੇ ਵਿਚਕਾਰ, ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਈਰਾਨ ਵਿਰੁੱਧ ਹੁਣ ਤੱਕ ਦਾ ਸਭ ਤੋਂ ਹਮਲਾਵਰ ਰੁਖ਼ ਅਪਣਾਇਆ ਹੈ। ਸੋਮਵਾਰ ਰਾਤ ਨੂੰ ਵ੍ਹਾਈਟ ਹਾਊਸ (White House) ਵਿੱਚ ਆਯੋਜਿਤ ਇੱਕ ਪ੍ਰੈਸ ਕਾਨਫਰੰਸ ਦੌਰਾਨ ਟਰੰਪ ਨੇ ਖੁੱਲ੍ਹੇਆਮ ਧਮਕੀ ਦਿੱਤੀ ਕਿ ਅਮਰੀਕੀ ਫੌਜੀ ਸ਼ਕਤੀ ਇੱਕੋ ਰਾਤ ਵਿੱਚ ਪੂਰੇ ਈਰਾਨ ਨੂੰ ਤਬਾਹ ਕਰਨ ਦੀ ਸਮਰੱਥਾ ਰੱਖਦੀ ਹੈ। ਉਨ੍ਹਾਂ ਨੇ ਬੇਹੱਦ ਸਖ਼ਤ ਲਹਿਜੇ ਵਿੱਚ ਕਿਹਾ, "ਉਹ ਰਾਤ ਕੱਲ੍ਹ ਵੀ ਹੋ ਸਕਦੀ ਹੈ," ਜਿਸ ਨੇ ਵਿਸ਼ਵ ਭਰ ਵਿੱਚ ਜੰਗ ਦੇ ਬੱਦਲ ਹੋਰ ਗੂੜ੍ਹੇ ਕਰ ਦਿੱਤੇ ਹਨ।

#WATCH | Washington, DC: US President Donald Trump says, "The entire country could be taken out in one night, and that night might be tomorrow night"

"We are here today to celebrate the success of one of the largest, most complex, most harrowing combat searches ever attempted by… pic.twitter.com/20JAcH0eTh

— ANI (@ANI) April 6, 2026

ਇਤਿਹਾਸ ਦੇ ਸਭ ਤੋਂ ਗੁੰਝਲਦਾਰ 'ਪਾਇਲਟ ਰੈਸਕਿਊ ਆਪ੍ਰੇਸ਼ਨ' ਦਾ ਜਸ਼ਨ

ਰਾਸ਼ਟਰਪਤੀ ਟਰੰਪ ਨੇ ਇਸ ਮੌਕੇ ਈਰਾਨ ਦੇ ਅੰਦਰ ਚਲਾਏ ਗਏ ਇੱਕ ਬੇਹੱਦ ਖ਼ਤਰਨਾਕ ਅਤੇ ਗੁਪਤ ਫੌਜੀ ਮਿਸ਼ਨ ਦੀ ਸਫਲਤਾ ਦਾ ਜ਼ਿਕਰ ਕੀਤਾ। ਉਨ੍ਹਾਂ ਦੱਸਿਆ ਕਿ ਅਮਰੀਕਾ ਨੇ ਆਪਣੇ ਇੱਕ ਬਹਾਦਰ ਪਾਇਲਟ ਨੂੰ ਬਚਾਉਣ ਲਈ 200 ਵਿਸ਼ੇਸ਼ ਸੈਨਿਕਾਂ (Soldiers) ਨੂੰ ਦੁਸ਼ਮਣ ਦੇ ਇਲਾਕੇ ਵਿੱਚ ਭੇਜਿਆ ਸੀ। ਟਰੰਪ ਨੇ ਇਸ ਨੂੰ ਫੌਜੀ ਇਤਿਹਾਸ ਦਾ ਸਭ ਤੋਂ ਵੱਡਾ ਅਤੇ ਗੁੰਝਲਦਾਰ ਬਚਾਅ ਮਿਸ਼ਨ (Rescue Mission) ਕਰਾਰ ਦਿੰਦਿਆਂ ਆਪਣੇ ਸੈਨਿਕਾਂ ਦੀ ਦਲੇਰੀ ਦੀ ਰੱਜ ਕੇ ਪ੍ਰਸ਼ੰਸਾ ਕੀਤੀ।

ਮਿਸ਼ਨ ਦੀ ਜਾਣਕਾਰੀ 'ਲੀਕ' ਹੋਣ 'ਤੇ ਭੜਕੇ ਟਰੰਪ

ਜਸ਼ਨ ਦੇ ਮਾਹੌਲ ਦੇ ਵਿਚਕਾਰ ਟਰੰਪ ਨੇ ਇੱਕ ਗੰਭੀਰ ਖੁਲਾਸਾ ਕਰਦਿਆਂ ਦੱਸਿਆ ਕਿ ਇਸ ਗੁਪਤ ਮਿਸ਼ਨ (Secret Mission) ਦੀ ਯੋਜਨਾ ਲੀਕ ਹੋ ਗਈ ਸੀ। ਉਨ੍ਹਾਂ ਦੋਸ਼ ਲਾਇਆ ਕਿ ਅੰਦਰੂਨੀ ਜਾਣਕਾਰੀ ਬਾਹਰ ਜਾਣ ਕਾਰਨ ਇਸ ਆਪ੍ਰੇਸ਼ਨ ਨੂੰ ਨੇਪਰੇ ਚਾੜ੍ਹਨਾ ਹੋਰ ਵੀ ਔਖਾ ਹੋ ਗਿਆ ਸੀ ਅਤੇ ਸੈਂਕੜੇ ਸੈਨਿਕਾਂ ਦੀ ਜਾਨ ਖ਼ਤਰੇ ਵਿੱਚ ਪੈ ਗਈ ਸੀ। ਟਰੰਪ ਨੇ ਚੇਤਾਵਨੀ ਦਿੱਤੀ ਕਿ ਜਾਣਕਾਰੀ ਲੀਕ ਕਰਨ ਵਾਲੇ ਵਿਅਕਤੀ ਨੂੰ ਬਖ਼ਸ਼ਿਆ ਨਹੀਂ ਜਾਵੇਗਾ। ਉਨ੍ਹਾਂ ਕਿਹਾ, "ਜਿਸ ਨੇ ਵੀ ਇਹ ਗੁਨਾਹ ਕੀਤਾ ਹੈ, ਉਸ ਨੂੰ ਲੱਭ ਕੇ ਸਖ਼ਤ ਸਜ਼ਾ ਦਿੱਤੀ ਜਾਵੇਗੀ ਅਤੇ ਜੇਲ੍ਹ ਭੇਜਿਆ ਜਾਵੇਗਾ।"

ਇਹ ਬਿਆਨਬਾਜ਼ੀ ਅਜਿਹੇ ਸਮੇਂ ਆਈ ਹੈ ਜਦੋਂ ਪੂਰੀ ਦੁਨੀਆ ਦੀਆਂ ਨਜ਼ਰਾਂ ਮੰਗਲਵਾਰ ਦੀ ਉਸ 'ਡੈੱਡਲਾਈਨ' (Deadline) 'ਤੇ ਟਿਕੀਆਂ ਹੋਈਆਂ ਹਨ, ਜਿਸ ਦਾ ਜ਼ਿਕਰ ਟਰੰਪ ਨੇ ਆਪਣੀ ਸੋਸ਼ਲ ਮੀਡੀਆ ਪੋਸਟ ਵਿੱਚ ਕੀਤਾ ਸੀ।