Budget 2026 ਤੋਂ ਬਾਅਦ Share Market 'ਚ ਸੁਨਾਮੀ: ਨਿਵੇਸ਼ਕਾਂ ਦੇ 10 ਲੱਖ ਕਰੋੜ ਡੁੱਬੇ

ਸੈਂਸੈਕਸ 1546 ਅਤੇ ਨਿਫਟੀ 495 ਅੰਕ ਡਿੱਗਿਆ

ਨਵੀਂ ਦਿੱਲੀ: 1 ਫਰਵਰੀ, 2026

ਕੇਂਦਰੀ ਬਜਟ 2026 ਦੇ ਐਲਾਨਾਂ ਤੋਂ ਬਾਅਦ ਅੱਜ ਭਾਰਤੀ ਸ਼ੇਅਰ ਬਾਜ਼ਾਰ ਵਿੱਚ ਭਾਰੀ ਉਥਲ-ਪੁਥਲ ਦੇਖਣ ਨੂੰ ਮਿਲੀ। ਬਜਟ ਵਿੱਚ ਫਿਊਚਰਜ਼ ਅਤੇ ਆਪਸ਼ਨਜ਼ (F&O) 'ਤੇ ਸਕਿਓਰਿਟੀਜ਼ ਟ੍ਰਾਂਜੈਕਸ਼ਨ ਟੈਕਸ (STT) ਵਧਾਉਣ ਦੇ ਫੈਸਲੇ ਨੇ ਬਾਜ਼ਾਰ ਵਿੱਚ ਅਜਿਹੀ ਸੁਨਾਮੀ ਲਿਆਂਦੀ ਕਿ ਨਿਵੇਸ਼ਕਾਂ ਦੇ ਲਗਭਗ 10 ਲੱਖ ਕਰੋੜ ਰੁਪਏ ਮਿੰਟਾਂ ਵਿੱਚ ਸਵਾਹ ਹੋ ਗਏ। ਬੀਐਸਈ (BSE) ਦਾ ਸੈਂਸੈਕਸ ਆਪਣੇ ਦਿਨ ਦੇ ਉੱਚੇ ਪੱਧਰ ਤੋਂ ਲਗਭਗ 2300 ਅੰਕ ਟੁੱਟ ਕੇ ਅੰਤ ਵਿੱਚ 1546 ਅੰਕਾਂ ਦੀ ਗਿਰਾਵਟ ਨਾਲ 80,722 'ਤੇ ਬੰਦ ਹੋਇਆ। ਇਸੇ ਤਰ੍ਹਾਂ ਐਨਐਸਈ (NSE) ਦਾ ਨਿਫਟੀ ਵੀ 495 ਅੰਕ ਡਿੱਗ ਕੇ 24,825 'ਤੇ ਆ ਗਿਆ।

ਬਾਜ਼ਾਰ ਵਿੱਚ ਆਈ ਇਸ ਤਬਾਹੀ ਦਾ ਸਭ ਤੋਂ ਵੱਡਾ ਅਸਰ ਸਰਕਾਰੀ ਬੈਂਕਾਂ (PSU Banks), ਧਾਤੂ (Metal) ਅਤੇ ਮੀਡੀਆ ਸੈਕਟਰ 'ਤੇ ਦੇਖਿਆ ਗਿਆ। ਪੀਐਸਯੂ ਬੈਂਕਾਂ ਦੇ ਸੂਚਕਾਂਕ ਵਿੱਚ 5.57% ਦੀ ਸਭ ਤੋਂ ਵੱਡੀ ਗਿਰਾਵਟ ਦਰਜ ਕੀਤੀ ਗਈ, ਜਿਸ ਵਿੱਚ ਸਟੇਟ ਬੈਂਕ ਆਫ਼ ਇੰਡੀਆ (SBI) 5.61% ਡਿੱਗ ਕੇ ਸਭ ਤੋਂ ਵੱਧ ਨੁਕਸਾਨ ਉਠਾਉਣ ਵਾਲਾ ਸ਼ੇਅਰ ਰਿਹਾ। ਬੈਂਕ ਨਿਫਟੀ, ਆਟੋ ਅਤੇ ਐਫਐਮਸੀਜੀ ਸੈਕਟਰ ਵੀ 2% ਤੋਂ ਵੱਧ ਦੀ ਗਿਰਾਵਟ ਨਾਲ ਬੰਦ ਹੋਏ। ਐਸਟੀਟੀ (STT) ਵਧਣ ਕਾਰਨ ਗ੍ਰੋ (Groww) ਅਤੇ ਏਂਜਲ ਵਨ (Angel One) ਵਰਗੇ ਸਟਾਕ ਐਕਸਚੇਂਜ ਪਲੇਟਫਾਰਮਾਂ ਦੇ ਸ਼ੇਅਰ ਵੀ ਤਾਸ਼ ਦੇ ਪੱਤਿਆਂ ਵਾਂਗ ਖਿੱਲਰ ਗਏ।

ਸੈਂਸੈਕਸ ਦੇ 30 ਸ਼ੇਅਰਾਂ ਵਿੱਚੋਂ ਸਿਰਫ਼ ਆਈਟੀ ਸੈਕਟਰ ਦੀਆਂ ਦਿੱਗਜ ਕੰਪਨੀਆਂ ਜਿਵੇਂ ਟੀਸੀਐਸ (TCS) ਅਤੇ ਇਨਫੋਸਿਸ (Infosys) ਦੇ ਨਾਲ-ਨਾਲ ਸਨ ਫਾਰਮਾ ਅਤੇ ਟਾਈਟਨ ਹੀ ਹਰੇ ਨਿਸ਼ਾਨ ਵਿੱਚ ਬੰਦ ਹੋ ਸਕੇ। ਦੂਜੇ ਪਾਸੇ ਅਡਾਨੀ ਪੋਰਟਸ, ਰਿਲਾਇੰਸ, ਟਾਟਾ ਸਟੀਲ ਅਤੇ ਆਈਟੀਸੀ ਵਰਗੇ ਵੱਡੇ ਸ਼ੇਅਰਾਂ ਵਿੱਚ 3% ਤੋਂ 5% ਤੱਕ ਦੀ ਗਿਰਾਵਟ ਦੇਖੀ ਗਈ। ਮਾਹਿਰਾਂ ਅਨੁਸਾਰ ਟੈਕਸ ਢਾਂਚੇ ਵਿੱਚ ਬਦਲਾਅ ਅਤੇ ਬਾਜ਼ਾਰ ਦੀਆਂ ਉਮੀਦਾਂ ਮੁਤਾਬਕ ਐਲਾਨ ਨਾ ਹੋਣ ਕਾਰਨ ਨਿਵੇਸ਼ਕਾਂ ਨੇ ਵੱਡੇ ਪੱਧਰ 'ਤੇ ਬਿਕਵਾਲੀ ਕੀਤੀ ਹੈ।