Iran ਜੰਗ 'ਚ Trump ਦਾ ਵੱਡਾ ਐਲਾਨ: ਵਾਪਸ ਮੁੜੇਗੀ American army

ਵਾਸ਼ਿੰਗਟਨ: ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਈਰਾਨ ਯੁੱਧ (US-Iran War) ਨੂੰ ਲੈ ਕੇ ਹੁਣ ਤੱਕ ਦਾ ਸਭ ਤੋਂ ਵੱਡਾ ਅਪਡੇਟ (Update) ਦਿੱਤਾ ਹੈ। ਵ੍ਹਾਈਟ ਹਾਊਸ ਤੋਂ ਜਾਰੀ ਬਿਆਨ ਵਿੱਚ ਟਰੰਪ ਨੇ ਦਾਅਵਾ ਕੀਤਾ ਹੈ ਕਿ ਅਮਰੀਕਾ ਬਹੁਤ ਜਲਦੀ ਈਰਾਨ ਵਿੱਚੋਂ ਆਪਣੀ ਫ਼ੌਜੀ ਮੌਜੂਦਗੀ ਖ਼ਤਮ ਕਰ ਦੇਵੇਗਾ। ਉਨ੍ਹਾਂ ਕਿਹਾ ਕਿ ਅਮਰੀਕੀ ਫ਼ੌਜੀ ਕਾਰਵਾਈ ਅਗਲੇ "ਦੋ ਜਾਂ ਤਿੰਨ ਹਫ਼ਤਿਆਂ" ਵਿੱਚ ਮੁਕੰਮਲ ਹੋ ਸਕਦੀ ਹੈ। ਟਰੰਪ ਅਨੁਸਾਰ, ਇਜ਼ਰਾਈਲ ਦੇ ਸਹਿਯੋਗ ਨਾਲ ਈਰਾਨ ਵਿਰੁੱਧ ਜੋ ਹਵਾਈ ਹਮਲੇ (Air Strikes) ਸ਼ੁਰੂ ਕੀਤੇ ਗਏ ਸੀ, ਉਨ੍ਹਾਂ ਰਾਹੀਂ ਤੈਅ ਕੀਤੇ ਗਏ ਸਾਰੇ ਮੁੱਖ ਟੀਚੇ (Goals) ਪ੍ਰਾਪਤ ਕਰ ਲਏ ਗਏ ਹਨ।

ਟਰੰਪ ਨੇ ਵਿਸ਼ੇਸ਼ ਤੌਰ 'ਤੇ ਕਿਹਾ ਕਿ ਈਰਾਨ ਦੀ ਪ੍ਰਮਾਣੂ ਹਥਿਆਰ (Nuclear Weapons) ਬਣਾਉਣ ਦੀ ਸਮਰੱਥਾ ਨੂੰ ਕਮਜ਼ੋਰ ਕਰਨ ਦਾ ਅਮਰੀਕਾ ਦਾ ਮਿਸ਼ਨ ਸਫ਼ਲ ਰਿਹਾ ਹੈ। ਉਨ੍ਹਾਂ ਦਾਅਵਾ ਕੀਤਾ ਕਿ ਅਮਰੀਕਾ ਹੁਣ ਈਰਾਨੀ ਹਵਾਈ ਖੇਤਰ (Airspace) 'ਤੇ ਪੂਰੀ ਤਰ੍ਹਾਂ ਹਾਵੀ ਹੈ। ਕਈ ਸੀਨੀਅਰ ਈਰਾਨੀ ਫ਼ੌਜੀ ਅਤੇ ਸਿਆਸੀ ਨੇਤਾਵਾਂ ਦੇ ਖ਼ਾਤਮੇ ਤੋਂ ਬਾਅਦ, ਟਰੰਪ ਨੇ ਉੱਥੋਂ ਦੇ ਨਵੇਂ ਨੇਤਾਵਾਂ ਨੂੰ ਆਪਣੇ ਪੂਰਵਜਾਂ ਨਾਲੋਂ "ਘੱਟ ਕੱਟੜਪੰਥੀ" ਅਤੇ "ਵਧੇਰੇ ਤਰਕਸ਼ੀਲ" (Rational) ਦੱਸਿਆ ਹੈ। ਟਰੰਪ ਮੁਤਾਬਕ ਅਮਰੀਕਾ ਹੁਣ ਸਿਰਫ਼ ਆਪਣਾ ਬਾਕੀ ਬਚਿਆ ਕੰਮ ਨਿਬੇੜ ਰਿਹਾ ਹੈ।

ਤੇਲ ਦੀਆਂ ਅਸਮਾਨ ਛੂਹ ਰਹੀਆਂ ਕੀਮਤਾਂ (Skyrocketing Oil Prices) ਬਾਰੇ ਪੁੱਛੇ ਜਾਣ 'ਤੇ ਟਰੰਪ ਨੇ ਬੜੇ ਭਰੋਸੇ ਨਾਲ ਕਿਹਾ ਕਿ ਜਿਵੇਂ ਹੀ ਅਮਰੀਕਾ ਈਰਾਨ ਛੱਡੇਗਾ, ਕੀਮਤਾਂ ਆਪਣੇ ਆਪ ਹੇਠਾਂ ਆ ਜਾਣਗੀਆਂ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਅਮਰੀਕੀ ਫ਼ੌਜਾਂ ਦੀ ਵਾਪਸੀ ਕਿਸੇ ਸਮਝੌਤੇ (Deal) 'ਤੇ ਨਿਰਭਰ ਨਹੀਂ ਹੈ। ਈਰਾਨ ਵੱਲੋਂ ਤੇਲ ਟੈਂਕਰਾਂ ਲਈ ਅਹਿਮ 'ਹੋਰਮੁਜ਼ ਜਲਡਮਰੂ' (Strait of Hormuz) ਬੰਦ ਕੀਤੇ ਜਾਣ ਦੇ ਬਾਵਜੂਦ, ਟਰੰਪ ਨੇ ਕਿਹਾ ਕਿ ਉਨ੍ਹਾਂ ਨੂੰ ਈਰਾਨ ਨਾਲ ਕਿਸੇ ਸੌਦੇ ਦੀ ਲੋੜ ਨਹੀਂ ਹੈ। ਉਨ੍ਹਾਂ ਮੁਤਾਬਕ ਜਦੋਂ ਅਮਰੀਕਾ ਨੂੰ ਇਹ ਯਕੀਨ ਹੋ ਜਾਵੇਗਾ ਕਿ ਈਰਾਨ ਲੰਬੇ ਸਮੇਂ ਲਈ "ਪੱਥਰ ਯੁੱਗ" (Stone Age) ਵਿੱਚ ਵਾਪਸ ਚਲਾ ਗਿਆ ਹੈ ਅਤੇ ਪ੍ਰਮਾਣੂ ਹਥਿਆਰ ਨਹੀਂ ਬਣਾ ਸਕੇਗਾ, ਤਾਂ ਅਮਰੀਕੀ ਫ਼ੌਜ ਤੁਰੰਤ ਵਾਪਸ ਮੁੜ ਆਵੇਗੀ।