ਟਰੰਪ ਨੇ ਡਿਨਰ ਦੌਰਾਨ ਟਿਮ ਕੁੱਕ ਨੂੰ ਝਿੜਕਿਆ, ਜਾਣੋ ਕੀ ਪੈ ਗਈ ਭਸੂੜੀ ?

ਵਾਸ਼ਿੰਗਟਨ: ਅਮਰੀਕਾ ਦੇ ਸਾਬਕਾ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਵ੍ਹਾਈਟ ਹਾਊਸ ਵਿੱਚ ਇੱਕ ਉੱਚ-ਪੱਧਰੀ ਡਿਨਰ ਦੌਰਾਨ ਐਪਲ ਦੇ ਸੀ.ਈ.ਓ. ਟਿਮ ਕੁੱਕ ਤੋਂ ਉਨ੍ਹਾਂ ਦੀ ਕੰਪਨੀ ਦੇ ਨਿਵੇਸ਼ਾਂ ਬਾਰੇ ਤਿੱਖੇ ਸਵਾਲ ਪੁੱਛੇ। ਇਸ ਮੌਕੇ ਮੈਟਾ, ਓਪਨਏਆਈ, ਗੂਗਲ ਅਤੇ ਮਾਈਕ੍ਰੋਸਾਫਟ ਦੇ ਸੀ.ਈ.ਓ. ਵੀ ਮੌਜੂਦ ਸਨ।

ਟਰੰਪ ਦਾ ਟਿਮ ਕੁੱਕ 'ਤੇ ਸਵਾਲ

ਟਰੰਪ ਨੇ ਟਿਮ ਕੁੱਕ ਨੂੰ ਸਿੱਧਾ ਪੁੱਛਿਆ ਕਿ ਐਪਲ ਅਮਰੀਕਾ ਵਿੱਚ ਕਿੰਨਾ ਨਿਵੇਸ਼ ਕਰਨ ਜਾ ਰਹੀ ਹੈ। ਉਨ੍ਹਾਂ ਨੇ ਇਸ਼ਾਰਾ ਕਰਦਿਆਂ ਕਿਹਾ ਕਿ ਐਪਲ ਹੁਣ ਵੱਡੇ ਪੱਧਰ 'ਤੇ ਅਮਰੀਕਾ ਵਾਪਸ ਆ ਰਿਹਾ ਹੈ। ਟਰੰਪ ਦਾ ਇਹ ਇਸ਼ਾਰਾ ਚੀਨ 'ਤੇ ਨਿਰਭਰਤਾ ਘਟਾ ਕੇ ਭਾਰਤ ਵਿੱਚ ਐਪਲ ਦੇ ਵਧ ਰਹੇ ਉਤਪਾਦਨ ਵੱਲ ਸੀ। ਇਸ 'ਤੇ ਕੁੱਕ ਨੇ ਜਵਾਬ ਦਿੱਤਾ ਕਿ ਐਪਲ ਅਮਰੀਕਾ ਵਿੱਚ $600 ਬਿਲੀਅਨ ਦਾ ਨਿਵੇਸ਼ ਕਰੇਗਾ। ਕੁੱਕ ਨੇ ਟਰੰਪ ਦੀਆਂ ਨੀਤੀਆਂ ਦੀ ਪ੍ਰਸ਼ੰਸਾ ਕਰਦਿਆਂ ਕਿਹਾ ਕਿ ਉਨ੍ਹਾਂ ਦੀ ਅਗਵਾਈ ਨੇ ਅਮਰੀਕਾ ਵਿੱਚ ਅਜਿਹਾ ਮਾਹੌਲ ਬਣਾਇਆ ਹੈ ਜਿੱਥੇ ਵੱਡੇ ਨਿਵੇਸ਼ ਸੰਭਵ ਹੋ ਸਕੇ ਹਨ।

ਭਾਰਤ ਵਿੱਚ ਐਪਲ ਦੇ ਵਧ ਰਹੇ ਨਿਵੇਸ਼ 'ਤੇ ਟਰੰਪ ਦਾ ਇਤਰਾਜ਼

ਇਸ ਤੋਂ ਪਹਿਲਾਂ ਵੀ ਟਰੰਪ ਨੇ ਟਿਮ ਕੁੱਕ 'ਤੇ ਨਾਰਾਜ਼ਗੀ ਜ਼ਾਹਰ ਕੀਤੀ ਸੀ। ਉਨ੍ਹਾਂ ਨੇ ਕਿਹਾ, "ਮੈਂ ਟਿਮ ਕੁੱਕ ਨੂੰ ਕਿਹਾ, ਮੇਰੇ ਦੋਸਤ, ਮੈਂ ਤੁਹਾਡੇ ਨਾਲ ਚੰਗਾ ਵਿਵਹਾਰ ਕੀਤਾ ਹੈ। ਹੁਣ ਤੁਸੀਂ ਇੱਥੇ $500 ਬਿਲੀਅਨ ਦਾ ਨਿਵੇਸ਼ ਕਰਨ ਲਈ ਆ ਰਹੇ ਹੋ, ਪਰ ਮੈਂ ਸੁਣ ਰਿਹਾ ਹਾਂ ਕਿ ਤੁਸੀਂ ਭਾਰਤ ਵਿੱਚ ਵੀ ਨਿਰਮਾਣ ਕਰ ਰਹੇ ਹੋ। ਮੈਂ ਨਹੀਂ ਚਾਹੁੰਦਾ ਕਿ ਤੁਸੀਂ ਭਾਰਤ ਵਿੱਚ ਨਿਰਮਾਣ ਕਰੋ।"

ਐਪਲ ਨੇ ਚੀਨ 'ਤੇ ਆਪਣੀ ਨਿਰਭਰਤਾ ਘਟਾਉਣ ਲਈ ਭਾਰਤ ਵਿੱਚ ਵੱਡੇ ਪੱਧਰ 'ਤੇ ਉਤਪਾਦਨ ਸ਼ੁਰੂ ਕੀਤਾ ਹੈ। ਰਿਪੋਰਟਾਂ ਅਨੁਸਾਰ, ਐਪਲ ਭਾਰਤ ਵਿੱਚ ਆਪਣੀ ਉਤਪਾਦਨ ਸਮਰੱਥਾ ਨੂੰ 40 ਮਿਲੀਅਨ ਯੂਨਿਟ ਤੋਂ ਵਧਾ ਕੇ 60 ਮਿਲੀਅਨ ਯੂਨਿਟ ਕਰਨ ਦੀ ਯੋਜਨਾ ਬਣਾ ਰਿਹਾ ਹੈ। ਕੰਪਨੀ ਦਾ ਟੀਚਾ ਹੈ ਕਿ ਭਵਿੱਖ ਵਿੱਚ ਦੁਨੀਆ ਭਰ ਵਿੱਚ ਵਿਕਣ ਵਾਲੇ 25% ਆਈਫੋਨ ਭਾਰਤ ਵਿੱਚ ਬਣੇ ਹੋਣ।

ਹੋਰ ਤਕਨੀਕੀ ਦਿੱਗਜਾਂ ਨੇ ਵੀ ਦੱਸਿਆ ਨਿਵੇਸ਼

ਇਸ ਡਿਨਰ ਦੌਰਾਨ ਟਰੰਪ ਨੇ ਹੋਰ ਤਕਨੀਕੀ ਦਿੱਗਜਾਂ ਤੋਂ ਵੀ ਉਨ੍ਹਾਂ ਦੇ ਨਿਵੇਸ਼ਾਂ ਬਾਰੇ ਪੁੱਛਿਆ:

ਮਾਰਕ ਜ਼ੁਕਰਬਰਗ (ਮੈਟਾ): $600 ਬਿਲੀਅਨ

ਸੁੰਦਰ ਪਿਚਾਈ (ਗੂਗਲ): $100 ਬਿਲੀਅਨ ਤੋਂ ਵੱਧ, ਜੋ ਅਗਲੇ ਦੋ ਸਾਲਾਂ ਵਿੱਚ $250 ਬਿਲੀਅਨ ਹੋ ਜਾਵੇਗਾ

ਸੱਤਿਆ ਨਡੇਲਾ (ਮਾਈਕ੍ਰੋਸਾਫਟ): ਇਸ ਸਾਲ ਲਗਭਗ $75-80 ਬਿਲੀਅਨ

ਟਰੰਪ ਨੇ ਇਨ੍ਹਾਂ ਸਾਰੇ ਨਿਵੇਸ਼ਾਂ ਦੀ ਤਾਰੀਫ਼ ਕਰਦਿਆਂ ਕਿਹਾ ਕਿ ਇਸ ਨਾਲ ਅਮਰੀਕਾ ਵਿੱਚ ਨੌਕਰੀਆਂ ਦੇ ਵੱਡੇ ਮੌਕੇ ਪੈਦਾ ਹੋਣਗੇ।