ਨਿਊਯਾਰਕ ਵਿੱਚ ਇੰਡੀਆ ਡੇ ਪਰੇਡ ਵਿਚ ਰਾਮ ਮੰਦਰ ਦੀ ਝਾਂਕੀ

ਨਿਊਯਾਰਕ : ਭਾਰਤ ਦੀ ਆਜ਼ਾਦੀ ਦਾ ਜਸ਼ਨ ਮਨਾਉਣ ਲਈ ਹਰ ਸਾਲ ਨਿਊਯਾਰਕ ਵਿੱਚ ਇੰਡੀਆ ਡੇ ਪਰੇਡ ਹੁੰਦੀ ਹੈ। ਇਹ ਪਰੰਪਰਾ ਚਾਰ ਦਹਾਕਿਆਂ ਤੋਂ ਵੀ ਵੱਧ ਸਮੇਂ ਤੋਂ ਚੱਲੀ ਆ ਰਹੀ ਹੈ। ਇਸ ਸਾਲ 42ਵੀਂ ਇੰਡੀਆ ਡੇ ਪਰੇਡ ਮਨਾਈ ਗਈ। ਪਰੇਡ ਨੇ ਨਿਊਯਾਰਕ ਦੇ ਮੈਡੀਸਨ ਐਵੇਨਿਊ ਤੋਂ ਈਸਟ 38ਵੀਂ ਸਟਰੀਟ ਤੋਂ ਈਸਟ 27ਵੀਂ ਸਟਰੀਟ ਤੱਕ ਮਾਰਚ ਕੀਤਾ।

ਅਮਰੀਕਾ ਦੇ ਨਿਊਯਾਰਕ ਸ਼ਹਿਰ ਵਿੱਚ ਐਤਵਾਰ ਨੂੰ ਇੰਡੀਆ ਡੇ ਪਰੇਡ ਦਾ ਆਯੋਜਨ ਕੀਤਾ ਗਿਆ। ਇਸ ਵਿੱਚ ਅਯੁੱਧਿਆ ਦੇ ਰਾਮ ਮੰਦਿਰ ਸਮੇਤ 40 ਤੋਂ ਵੱਧ ਝਾਕੀਆਂ ਪ੍ਰਦਰਸ਼ਿਤ ਕੀਤੀਆਂ ਗਈਆਂ। ਤਿਰੰਗੇ ਨੂੰ ਲੈ ਕੇ ਹੋਈ ਪਰੇਡ ਵਿੱਚ ਭਾਰਤੀ ਲੋਕ ਢੋਲ ਵਜਾਉਂਦੇ ਅਤੇ ਨੱਚਦੇ ਦੇਖੇ ਗਏ। ਸੜਕਾਂ 'ਤੇ ਦੇਸ਼ ਭਗਤੀ ਅਤੇ ਧਾਰਮਿਕ ਗੀਤ ਵੀ ਵਜਾਏ ਗਏ।

ਕਾਰਨੀਵਲ ਵਿੱਚ ਲੱਕੜ ਨਾਲ ਬਣੀ ਰਾਮ ਮੰਦਰ ਦੀ ਝਾਂਕੀ ਨੇ ਸਭ ਦਾ ਧਿਆਨ ਆਪਣੇ ਵੱਲ ਖਿੱਚਿਆ। ਇਹ 18 ਫੁੱਟ ਲੰਬੀ, ਨੌਂ ਫੁੱਟ ਚੌੜੀ ਅਤੇ ਅੱਠ ਫੁੱਟ ਉੱਚੀ ਝਾਕੀ ਭਾਰਤ ਵਿੱਚ ਬਣਾਈ ਗਈ ਹੈ। ਪਰੇਡ ਵਿਚ ਹਿੱਸਾ ਲੈਣ ਲਈ ਇਸ ਨੂੰ ਏਅਰ ਕਾਰਗੋ ਦੁਆਰਾ ਨਿਊਯਾਰਕ ਭੇਜਿਆ ਗਿਆ ਸੀ।

ਫੈਡਰੇਸ਼ਨ ਆਫ ਇੰਡੀਅਨ ਐਸੋਸੀਏਸ਼ਨ ਦੇ ਅਨੁਸਾਰ, 50 ਤੋਂ ਵੱਧ ਮਾਰਚਿੰਗ ਗਰੁੱਪ ਅਤੇ 30 ਮਾਰਚਿੰਗ ਬੈਂਡ ਅਤੇ ਮਸ਼ਹੂਰ ਹਸਤੀਆਂ ਨੇ ਵੀ ਪਰੇਡ ਵਿੱਚ ਹਿੱਸਾ ਲਿਆ। ਬਾਲੀਵੁੱਡ ਅਦਾਕਾਰਾ ਸੋਨਾਕਸ਼ੀ ਸਿਨਹਾ ਗ੍ਰੈਂਡ ਮਾਰਸ਼ਲ ਸੀ। ਅਭਿਨੇਤਾ ਪੰਕਜ ਤ੍ਰਿਪਾਠੀ ਅਤੇ ਭਾਜਪਾ ਦੇ ਸੰਸਦ ਮੈਂਬਰ ਮਨੋਜ ਤਿਵਾੜੀ ਨੇ ਵਿਸ਼ੇਸ਼ ਮਹਿਮਾਨ ਵਜੋਂ ਸ਼ਿਰਕਤ ਕੀਤੀ।