ਬੋਰਡ ਪਰੀਖਿਆਵਾਂ ਦੀਆਂ ਕਾਪੀਆਂ ਵਿੱਚ ਵਿਦਿਆਰਥੀਆਂ ਵੱਲੋਂ ਪਾਸ ਕਰਨ ਦੀ ਅਪੀਲ!

ਮੇਰਠ, 31 ਮਾਰਚ: ਉੱਤਰ ਪ੍ਰਦੇਸ਼ ਬੋਰਡ ਦੀ ਸਾਲ 2026 ਦੀ ਹਾਈ ਸਕੂਲ ਅਤੇ ਇੰਟਰਮੀਡੀਏਟ ਪਰੀਖਿਆਵਾਂ ਦੌਰਾਨ ਕਾਪੀਆਂ ਦੀ ਜਾਂਚ ਵਿੱਚ ਕੁਝ ਅਜੀਬ ਅਤੇ ਹੈਰਾਨ ਕਰਨ ਵਾਲੇ ਮਾਮਲੇ ਸਾਹਮਣੇ ਆਏ ਹਨ। ਕਈ ਵਿਦਿਆਰਥੀਆਂ ਨੇ ਉੱਤਰ ਲਿਖਣ ਦੀ ਬਜਾਇ ਆਪਣੀਆਂ ਭਾਵਨਾਵਾਂ ਦਰਸਾਉਂਦਿਆਂ ਪਰੀਖਿਆਕਾਰਾਂ ਕੋਲੋਂ ਪਾਸ ਕਰਨ ਦੀ ਅਪੀਲ ਕੀਤੀ।

ਇੱਕ ਵਿਦਿਆਰਥੀ ਨੇ ਆਪਣੀ ਕਾਪੀ ਵਿੱਚ ਲਿਖਿਆ, “ਮੈਡਮ ਜੀ! ਤੁਸੀਂ ਬਹੁਤ ਦਿਆਲੂ ਹੋ, ਕਿਰਪਾ ਕਰਕੇ ਪੁੰਨ ਕਮਾਉਣ ਲਈ ਮੈਨੂੰ ਪਾਸ ਕਰ ਦਿਓ।” ਉਸ ਵਿਦਿਆਰਥੀ ਨੇ ਆਪਣੀ ਆਰਥਿਕ ਹਾਲਤ ਨੂੰ ਧਿਆਨ ਵਿੱਚ ਰੱਖਦਿਆਂ ਇੱਕ ਕਲਪਨਾਤਮਕ ਕਹਾਣੀ ਵੀ ਲਿਖੀ, ਤਾਂ ਜੋ ਅਧਿਆਪਕ ਉਸ ’ਤੇ ਤਰਸ ਖਾ ਸਕੇ।

ਇਸੇ ਤਰ੍ਹਾਂ, ਇਕ ਹੋਰ ਵਿਦਿਆਰਥੀ ਨੇ ਆਪਣੇ ਉੱਤਰਾਂ ਦੀ ਥਾਂ ਆਪਣੇ ਪਰਿਵਾਰ ਦੀਆਂ ਸਮੱਸਿਆਵਾਂ ਦਾ ਜ਼ਿਕਰ ਕੀਤਾ ਅਤੇ ਪਹਿਲਾਂ ਹੀ ਧੰਨਵਾਦ ਕਰਦਿਆਂ ਲਿਖਿਆ ਕਿ ਉਹ ਅਗਲੀ ਵਾਰ ਜ਼ਰੂਰ ਪੜ੍ਹਾਈ ਕਰੇਗਾ। ਸਭ ਤੋਂ ਹੈਰਾਨੀਜਨਕ ਗੱਲ ਇਹ ਰਹੀ ਕਿ ਕਈ ਵਿਦਿਆਰਥੀਆਂ ਨੇ ਸਿਰਫ਼ ਇੱਕ ਜਾਂ ਦੋ ਲਾਈਨਾਂ ਹੀ ਲਿਖੀਆਂ ਅਤੇ ਪੂਰੀ ਕਾਪੀ ਖਾਲੀ ਛੱਡ ਦਿੱਤੀ।

ਇਹੋ ਜਿਹੀਆਂ ਕਾਪੀਆਂ ਜਾਂਚ ਦੌਰਾਨ ਅਧਿਆਪਕਾਂ ਵਿਚ ਚਰਚਾ ਦਾ ਵਿਸ਼ਾ ਬਣੀਆਂ ਹੋਈਆਂ ਹਨ, ਜਿਸ ਨਾਲ ਇਹ ਸਾਫ਼ ਹੁੰਦਾ ਹੈ ਕਿ ਵਿਦਿਆਰਥੀਆਂ ਦੇ ਮਨ ਵਿੱਚ ਪਰੀਖਿਆ ਨੂੰ ਲੈ ਕੇ ਕਿੰਨਾ ਦਬਾਅ ਅਤੇ ਚਿੰਤਾ ਮੌਜੂਦ ਹੈ।