ਚੰਦਰਚੂੜ ਦਾ ਬੰਗਲਾ ਤੁਰੰਤ ਖਾਲੀ ਕਰਨ ਲਈ SC ਨੇ ਕੇਂਦਰ ਨੂੰ ਲਿਖਿਆ ਪੱਤਰ

ਸੁਪਰੀਮ ਕੋਰਟ ਪ੍ਰਸ਼ਾਸਨ ਨੇ ਕੇਂਦਰ ਸਰਕਾਰ ਨੂੰ ਸਾਬਕਾ ਚੀਫ਼ ਜਸਟਿਸ ਡੀਵਾਈ ਚੰਦਰਚੂੜ ਦਾ ਬੰਗਲਾ ਤੁਰੰਤ ਖਾਲੀ ਕਰਨ ਲਈ ਪੱਤਰ ਲਿਖਿਆ ਹੈ। ਇਹ ਪੱਤਰ 1 ਜੁਲਾਈ ਨੂੰ ਹਾਊਸਿੰਗ ਅਤੇ ਸ਼ਹਿਰੀ ਮਾਮਲਿਆਂ ਦੇ ਮੰਤਰਾਲੇ ਨੂੰ ਭੇਜਿਆ ਗਿਆ, ਜਿਸ ਵਿੱਚ ਕਿਹਾ ਗਿਆ ਕਿ ਡਾ. ਚੰਦਰਚੂੜ ਨੂੰ ਕ੍ਰਿਸ਼ਨਾ ਮੈਨਨ ਮਾਰਗ 'ਤੇ ਸਥਿਤ ਬੰਗਲਾ ਨੰਬਰ 5 ਤੁਰੰਤ ਖਾਲੀ ਕਰਨਾ ਚਾਹੀਦਾ ਹੈ, ਕਿਉਂਕਿ ਉਨ੍ਹਾਂ ਨੂੰ ਮਿਲੀ ਰਹਿਣ ਦੀ ਆਗਿਆ ਦੀ ਮਿਆਦ 21 ਮਈ 2025 ਨੂੰ ਹੀ ਖਤਮ ਹੋ ਚੁੱਕੀ ਹੈ।

ਸੁਪਰੀਮ ਕੋਰਟ ਦੇ ਨਿਯਮਾਂ ਅਨੁਸਾਰ, ਸੇਵਾਮੁਕਤੀ ਤੋਂ ਬਾਅਦ ਸੀਜੇਆਈ ਨੂੰ ਕੁਝ ਸਮਾਂ ਲਈ ਸਰਕਾਰੀ ਨਿਵਾਸ ਵਿੱਚ ਰਹਿਣ ਦੀ ਆਗਿਆ ਮਿਲਦੀ ਹੈ, ਪਰ ਇਹ ਮਿਆਦ ਵੀ ਪੂਰੀ ਹੋ ਚੁੱਕੀ ਹੈ। ਪੱਤਰ ਵਿੱਚ ਮੰਗ ਕੀਤੀ ਗਈ ਕਿ ਇਹ ਬੰਗਲਾ ਅਦਾਲਤ ਦੇ ਹਾਊਸਿੰਗ ਪੂਲ ਵਿੱਚ ਵਾਪਸ ਕੀਤਾ ਜਾਵੇ, ਕਿਉਂਕਿ ਇਹ ਮੌਜੂਦਾ ਸੀਜੇਆਈ ਲਈ ਆਧਿਕਾਰਤ ਨਿਵਾਸ ਹੈ।

ਜਸਟਿਸ ਚੰਦਰਚੂੜ ਨਵੰਬਰ 2022 ਤੋਂ ਨਵੰਬਰ 2024 ਤੱਕ ਦੇਸ਼ ਦੇ 50ਵੇਂ ਸੀਜੇਆਈ ਰਹੇ। ਉਹ ਆਪਣੇ ਕਾਰਜਕਾਲ ਦੇ ਖਤਮ ਹੋਣ ਤੋਂ ਲਗਭਗ ਅੱਠ ਮਹੀਨੇ ਬਾਅਦ ਵੀ ਇਸ ਬੰਗਲੇ ਵਿੱਚ ਰਹਿ ਰਹੇ ਹਨ। ਉਨ੍ਹਾਂ ਨੇ ਇਸ ਦੇ ਪਿੱਛੇ ਨਿੱਜੀ ਹਾਲਾਤ ਦੱਸਦੇ ਹੋਏ ਕਿਹਾ ਕਿ ਉਨ੍ਹਾਂ ਨੂੰ ਸਰਕਾਰ ਵੱਲੋਂ ਕਿਰਾਏ 'ਤੇ ਵਿਕਲਪਿਕ ਰਿਹਾਇਸ਼ ਮਿਲੀ ਸੀ, ਪਰ ਉਹ ਜਗ੍ਹਾ ਰਹਿਣ ਯੋਗ ਨਹੀਂ ਸੀ, ਇਸ ਲਈ ਉਹ ਨਵੀਂ ਜਗ੍ਹਾ ਤਿਆਰ ਹੋਣ ਦੀ ਉਡੀਕ ਕਰ ਰਹੇ ਹਨ।