Pakistani cricket Team: ਸ਼ਾਹਜ਼ੇਬ ਭੱਟੀ ਨੇ ਰਾਜਨੀਤੀ ਤੇ ਭ੍ਰਿਸ਼ਟਾਚਾਰ ਦੇ ਦੋਸ਼ ਲਗਾਉਂਦਿਆਂ ਲਿਆ ਸੰਨਿਆਸ

10 ਮਾਰਚ, 2026

ਪਾਕਿਸਤਾਨੀ ਕ੍ਰਿਕਟ ਜਗਤ ਤੋਂ ਇੱਕ ਬੇਹੱਦ ਹੈਰਾਨ ਕਰਨ ਵਾਲੀ ਖ਼ਬਰ ਸਾਹਮਣੇ ਆਈ ਹੈ। ਸਿਆਲਕੋਟ ਦੇ ਹੋਣਹਾਰ 24 ਸਾਲਾ ਕ੍ਰਿਕਟਰ ਸ਼ਾਹਜ਼ੇਬ ਭੱਟੀ ਨੇ ਪਾਕਿਸਤਾਨੀ ਕ੍ਰਿਕਟ ਪ੍ਰਣਾਲੀ ਵਿੱਚ ਫੈਲੇ ਭ੍ਰਿਸ਼ਟਾਚਾਰ, ਰਾਜਨੀਤੀ ਅਤੇ ਪੱਖਪਾਤ ਤੋਂ ਦੁਖੀ ਹੋ ਕੇ ਖੇਡ ਨੂੰ ਅਲਵਿਦਾ ਕਹਿ ਦਿੱਤਾ ਹੈ। ਜਿਸ ਉਮਰ ਵਿੱਚ ਇੱਕ ਖਿਡਾਰੀ ਦਾ ਕਰੀਅਰ ਆਪਣੇ ਸਿਖਰ ਵੱਲ ਵਧਦਾ ਹੈ, ਉਸ ਉਮਰ ਵਿੱਚ ਭੱਟੀ ਵੱਲੋਂ ਲਿਆ ਗਿਆ ਇਹ ਫੈਸਲਾ ਪਾਕਿਸਤਾਨ ਕ੍ਰਿਕਟ ਬੋਰਡ (PCB) ਦੇ ਘਰੇਲੂ ਢਾਂਚੇ 'ਤੇ ਗੰਭੀਰ ਸਵਾਲ ਖੜ੍ਹੇ ਕਰਦਾ ਹੈ।

ਸੋਸ਼ਲ ਮੀਡੀਆ 'ਤੇ ਕੱਢਿਆ ਭੜਾਸ: "ਮੇਰਾ ਸੁਪਨਾ ਬਰਬਾਦ ਕਰ ਦਿੱਤਾ"

ਸ਼ਾਹਜ਼ੇਬ ਭੱਟੀ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ 'X' (ਪਹਿਲਾਂ ਟਵਿੱਟਰ) 'ਤੇ ਇੱਕ ਭਾਵੁਕ ਪੋਸਟ ਰਾਹੀਂ ਆਪਣੇ ਸੰਨਿਆਸ ਦਾ ਐਲਾਨ ਕੀਤਾ। ਉਨ੍ਹਾਂ ਲਿਖਿਆ:

"ਅਲਵਿਦਾ ਪਾਕਿਸਤਾਨ ਕ੍ਰਿਕਟ। ਮੈਂ 24 ਸਾਲ ਦੀ ਉਮਰ ਵਿੱਚ ਕ੍ਰਿਕਟ ਛੱਡ ਰਿਹਾ ਹਾਂ। ਪਿਛਲੇ ਸਾਲ ਮੈਂ ਲਾਈਵ ਟੀਵੀ 'ਤੇ ਕਾਇਦ-ਏ-ਆਜ਼ਮ ਟਰਾਫੀ ਦਾ ਫਾਈਨਲ ਜਿੱਤਿਆ ਸੀ, ਪਰ ਉਸ ਤੋਂ ਬਾਅਦ ਮੈਨੂੰ ਲਗਾਤਾਰ 40 ਮੈਚਾਂ ਲਈ ਬੈਂਚ 'ਤੇ ਬਿਠਾਇਆ ਗਿਆ। ਮੇਰਾ ਸੁਪਨਾ ਪਾਕਿਸਤਾਨ ਲਈ ਖੇਡਣਾ ਸੀ, ਪਰ ਰਾਜਨੀਤੀ, ਭ੍ਰਿਸ਼ਟਾਚਾਰ ਅਤੇ ਸਿਸਟਮ ਦੀ ਘਾਟ ਨੇ ਮੇਰਾ ਕਰੀਅਰ ਖ਼ਤਮ ਕਰ ਦਿੱਤਾ। ਹੁਣ ਮੈਨੂੰ ਸਮਝ ਆ ਗਿਆ ਹੈ ਕਿ ਹਰ ਕੋਈ ਪਾਕਿਸਤਾਨ ਕ੍ਰਿਕਟ ਕਿਉਂ ਛੱਡ ਰਿਹਾ ਹੈ।"

ਫਾਈਨਲ ਦੇ ਹੀਰੋ ਤੋਂ ਗੁਮਨਾਮੀ ਤੱਕ ਦਾ ਸਫ਼ਰ

ਸ਼ਾਹਜ਼ੇਬ ਭੱਟੀ ਨੇ 2024-25 ਦੀ ਕਾਇਦ-ਏ-ਆਜ਼ਮ ਟਰਾਫੀ ਦੇ ਫਾਈਨਲ ਵਿੱਚ ਸਿਆਲਕੋਟ ਦੀ ਜਿੱਤ ਵਿੱਚ ਅਹਿਮ ਭੂਮਿਕਾ ਨਿਭਾਈ ਸੀ। ਉਸ ਨੇ ਪੇਸ਼ਾਵਰ ਵਿਰੁੱਧ ਇੱਕ ਰੋਮਾਂਚਕ ਮੁਕਾਬਲੇ ਵਿੱਚ ਅਜੇਤੂ 32 ਦੌੜਾਂ ਬਣਾ ਕੇ ਆਪਣੀ ਟੀਮ ਨੂੰ ਜੇਤੂ ਬਣਾਇਆ ਸੀ। ਇੰਨੇ ਸ਼ਾਨਦਾਰ ਪ੍ਰਦਰਸ਼ਨ ਦੇ ਬਾਵਜੂਦ, ਉਸ ਨੂੰ ਟੀਮ ਵਿੱਚ ਚੁਣਿਆ ਤਾਂ ਗਿਆ ਪਰ ਮੈਦਾਨ 'ਤੇ ਉਤਰਨ ਦਾ ਮੌਕਾ ਨਹੀਂ ਦਿੱਤਾ ਗਿਆ। ਭੱਟੀ ਅਨੁਸਾਰ, ਉਸ ਨੇ ਆਪਣੇ ਕਰੀਅਰ ਦਾ ਕੀਮਤੀ ਸਮਾਂ ਸਿਰਫ਼ ਬੈਂਚ 'ਤੇ ਬੈਠ ਕੇ ਗੁਜ਼ਾਰਿਆ।

ਕਰੀਅਰ 'ਤੇ ਇੱਕ ਨਜ਼ਰ

ਫਸਟ ਕਲਾਸ: 2 ਮੈਚ, 5 ਵਿਕਟਾਂ।

ਲਿਸਟ-ਏ: 1 ਮੈਚ, 2 ਵਿਕਟਾਂ।

ਟੀ-20: 1 ਮੈਚ, 1 ਵਿਕਟ।

ਸ਼ਾਹਜ਼ੇਬ ਭੱਟੀ ਨੂੰ ਪਾਕਿਸਤਾਨ ਸੁਪਰ ਲੀਗ (PSL) ਵਿੱਚ ਵੀ ਮੌਕਾ ਨਹੀਂ ਮਿਲਿਆ। ਫਿਲਹਾਲ ਇਹ ਸਪੱਸ਼ਟ ਨਹੀਂ ਹੈ ਕਿ ਉਹ ਕਿਸੇ ਹੋਰ ਦੇਸ਼ (ਜਿਵੇਂ ਕਿ ਅਮਰੀਕਾ ਜਾਂ ਯੂਏਈ) ਵੱਲੋਂ ਕ੍ਰਿਕਟ ਖੇਡਣ ਦੀ ਯੋਜਨਾ ਬਣਾ ਰਹੇ ਹਨ ਜਾਂ ਨਹੀਂ। ਪਰ ਉਨ੍ਹਾਂ ਦੇ ਇਸ ਕਦਮ ਨੇ ਪਾਕਿਸਤਾਨ ਵਿੱਚ ਨੌਜਵਾਨ ਪ੍ਰਤਿਭਾ ਦੀ ਹੋ ਰਹੀ ਕਦਰ 'ਤੇ ਇੱਕ ਵੱਡਾ ਪ੍ਰਸ਼ਨ ਚਿੰਨ੍ਹ ਲਗਾ ਦਿੱਤਾ ਹੈ।