ਇੱਕ ਗਲਤੀ ਤੇ Gulf countries ਹੋ ਜਾਣਗੇ ਰਾਖ

ਪ੍ਰਮਾਣੂ ਤਬਾਹੀ ਦੇ ਕੰਢੇ 'ਤੇ ਮੱਧ ਪੂਰਬ: ਈਰਾਨ ਦੇ ਬੁਸ਼ਹਿਰ ਪਲਾਂਟ 'ਤੇ ਹਮਲਿਆਂ ਨੇ ਵਧਾਈ ਦੁਨੀਆ ਦੀ ਚਿੰਤਾ

ਤਹਿਰਾਨ/ਯੇਰੂਸ਼ਲਮ: ਅਮਰੀਕਾ, ਇਜ਼ਰਾਈਲ ਅਤੇ ਈਰਾਨ ਵਿਚਕਾਰ ਚੱਲ ਰਹੀ ਜੰਗ ਹੁਣ ਇੱਕ ਬੇਹੱਦ ਖ਼ਤਰਨਾਕ ਮੋੜ 'ਤੇ ਪਹੁੰਚ ਗਈ ਹੈ, ਜਿੱਥੇ ਪ੍ਰਮਾਣੂ ਪਲਾਂਟਾਂ (Nuclear Plants) ਨੂੰ ਨਿਸ਼ਾਨਾ ਬਣਾਉਣ ਦੀਆਂ ਘਟਨਾਵਾਂ ਨੇ ਪੂਰੀ ਦੁਨੀਆ ਨੂੰ ਦਹਿਸ਼ਤ ਵਿੱਚ ਪਾ ਦਿੱਤਾ ਹੈ। ਈਰਾਨ ਦੇ ਬੁਸ਼ਹਿਰ (Bushehr) ਪਰਮਾਣੂ ਪਾਵਰ ਪਲਾਂਟ 'ਤੇ ਇੱਕ ਮਹੀਨੇ ਦੇ ਅੰਦਰ ਚੌਥੀ ਵਾਰ ਹੋਏ ਹਮਲਿਆਂ ਨੇ ਮੱਧ ਪੂਰਬ (Middle East) ਵਿੱਚ ਪ੍ਰਮਾਣੂ ਤਬਾਹੀ ਦਾ ਖ਼ਤਰਾ ਪੈਦਾ ਕਰ ਦਿੱਤਾ ਹੈ। ਈਰਾਨ ਦੇ ਵਿਦੇਸ਼ ਮੰਤਰੀ ਅੱਬਾਸ ਅਰਾਕਚੀ ਨੇ ਇੱਕ ਬੇਹੱਦ ਸਖ਼ਤ ਵਾਰਨਿੰਗ (Warning) ਜਾਰੀ ਕਰਦਿਆਂ ਕਿਹਾ ਹੈ ਕਿ ਜੇਕਰ ਬੁਸ਼ਹਿਰ ਪਲਾਂਟ 'ਤੇ ਕੋਈ ਸਿੱਧਾ ਹਮਲਾ ਹੁੰਦਾ ਹੈ, ਤਾਂ ਇਸ ਦਾ ਰੇਡੀਓਐਕਟਿਵ ਪ੍ਰਭਾਵ (Radioactive Fallout) ਸਿਰਫ਼ ਈਰਾਨ ਤੱਕ ਸੀਮਤ ਨਹੀਂ ਰਹੇਗਾ, ਬਲਕਿ ਸਮੁੰਦਰੀ ਹਵਾਵਾਂ ਰਾਹੀਂ ਇਹ ਜ਼ਹਿਰੀਲਾ ਰੇਡੀਏਸ਼ਨ ਗੁਆਂਢੀ ਖਾੜੀ ਦੇਸ਼ਾਂ (Gulf Countries) ਦੀਆਂ ਰਾਜਧਾਨੀਆਂ ਤੱਕ ਫੈਲ ਜਾਵੇਗਾ, ਜਿਸ ਨਾਲ ਲੱਖਾਂ ਲੋਕਾਂ ਦੀ ਜਾਨ ਜਾ ਸਕਦੀ ਹੈ।

ਅੰਤਰਰਾਸ਼ਟਰੀ ਪ੍ਰਮਾਣੂ ਏਜੰਸੀ (IAEA) ਦੇ ਡਾਇਰੈਕਟਰ ਜਨਰਲ ਰਾਫੇਲ ਗ੍ਰੋਸੀ ਨੇ ਵੀ ਇਸ ਸਥਿਤੀ 'ਤੇ ਗੰਭੀਰ ਚਿੰਤਾ ਪ੍ਰਗਟਾਈ ਹੈ ਅਤੇ ਚੇਤਾਵਨੀ ਦਿੱਤੀ ਹੈ ਕਿ ਯੁੱਧ ਦੌਰਾਨ ਪਰਮਾਣੂ ਸਥਾਨਾਂ ਨੂੰ ਨਿਸ਼ਾਨਾ ਬਣਾਉਣਾ ਅੰਤਰਰਾਸ਼ਟਰੀ ਕਾਨੂੰਨ ਦੀ ਘੋਰ ਉਲੰਘਣਾ ਹੈ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਜੇਕਰ ਕੋਈ ਮਿਜ਼ਾਈਲ ਗਲਤੀ ਨਾਲ ਵੀ ਰਿਐਕਟਰ ਕੋਰ (Reactor Core) ਜਾਂ ਕੂਲਿੰਗ ਸਿਸਟਮ ਨਾਲ ਟਕਰਾ ਜਾਂਦੀ ਹੈ, ਤਾਂ ਇਹ ਚਰਨੋਬਿਲ (Chernobyl) ਵਰਗਾ ਭਿਆਨਕ ਹਾਦਸਾ ਬਣ ਸਕਦਾ ਹੈ। ਈਰਾਨ ਨੇ ਇਨ੍ਹਾਂ ਹਮਲਿਆਂ ਦੀ ਤੁਲਨਾ ਯੂਕਰੇਨ ਦੇ ਜ਼ਾਪੋਰਿਜ਼ੀਆ (ZNPP) ਪਲਾਂਟ 'ਤੇ ਹੋਏ ਹਮਲਿਆਂ ਨਾਲ ਕੀਤੀ ਹੈ, ਜਿੱਥੇ ਪ੍ਰਮਾਣੂ ਪਲਾਂਟਾਂ ਨੂੰ ਜੰਗੀ ਢਾਲ ਵਜੋਂ ਵਰਤਿਆ ਜਾ ਰਿਹਾ ਹੈ।

ਦੂਜੇ ਪਾਸੇ, ਜੰਗ ਦੀ ਇਹ ਅੱਗ ਇਜ਼ਰਾਈਲ ਦੇ ਡਿਮੋਨਾ (Dimona) ਨਿਊਕਲੀਅਰ ਰਿਸਰਚ ਸੈਂਟਰ ਤੱਕ ਵੀ ਪਹੁੰਚ ਚੁੱਕੀ ਹੈ, ਜਿਸ ਨੂੰ ਈਰਾਨੀ ਮਿਜ਼ਾਈਲਾਂ ਲਗਾਤਾਰ ਨਿਸ਼ਾਨਾ ਬਣਾ ਰਹੀਆਂ ਹਨ। ਰਿਪੋਰਟਾਂ ਅਨੁਸਾਰ ਮਾਰਚ ਦੇ ਆਖ਼ਰੀ ਹਫ਼ਤੇ ਵਿੱਚ ਕਈ ਮਿਜ਼ਾਈਲਾਂ ਨੇਗੇਵ ਮਾਰੂਥਲ ਵਿੱਚ ਡਿਮੋਨਾ ਪਲਾਂਟ ਦੇ ਬਿਲਕੁਲ ਨੇੜੇ ਡਿੱਗੀਆਂ ਸਨ। ਮੰਨਿਆ ਜਾਂਦਾ ਹੈ ਕਿ ਇਜ਼ਰਾਈਲ ਨੇ ਉੱਥੇ 90 ਤੋਂ ਵੱਧ ਪ੍ਰਮਾਣੂ ਹਥਿਆਰ ਸਟੋਰ (Store) ਕੀਤੇ ਹੋਏ ਹਨ ਅਤੇ ਜੇਕਰ ਉੱਥੇ ਕੋਈ ਧਮਾਕਾ ਹੁੰਦਾ ਹੈ, ਤਾਂ ਇਹ ਤਬਾਹੀ ਹੀਰੋਸ਼ੀਮਾ ਅਤੇ ਨਾਗਾਸਾਕੀ ਨਾਲੋਂ 100 ਗੁਣਾ ਜ਼ਿਆਦਾ ਘਾਤਕ ਹੋ ਸਕਦੀ ਹੈ। ਵਰਤਮਾਨ ਵਿੱਚ, ਪੂਰੀ ਦੁਨੀਆ ਦੀਆਂ ਨਜ਼ਰਾਂ ਇਸ ਖੇਤਰ 'ਤੇ ਟਿਕੀਆਂ ਹੋਈਆਂ ਹਨ ਕਿਉਂਕਿ ਇੱਕ ਛੋਟੀ ਜਿਹੀ ਮਿਜ਼ਾਈਲ ਜਾਂ ਡਰੋਨ ਹਮਲਾ ਪੂਰੇ ਮੱਧ ਪੂਰਬ ਨੂੰ ਸਦੀਆਂ ਲਈ ਰੇਡੀਏਸ਼ਨ ਨਾਲ ਜ਼ਹਿਰੀਲਾ ਬਣਾ ਸਕਦਾ ਹੈ।