ਹੁਣ ਚਲਾਨ ਨਾਲ ਨਹੀਂ ਚੱਲੇਗਾ ਕੰਮ, driving license ਸਬੰਧੀ ਆ ਰਹੇ ਨਵੇਂ ਨਿਯਮ
ਤਾਂ ਲਾਇਸੈਂਸ ਨੂੰ ਛੇ ਮਹੀਨਿਆਂ ਲਈ ਮੁਅੱਤਲ ਕਰ ਦਿੱਤਾ ਜਾਵੇਗਾ। ਗੰਭੀਰ ਮਾਮਲਿਆਂ ਵਿੱਚ ਜਾਂ ਵਾਰ-ਵਾਰ ਗਲਤੀ ਦੁਹਰਾਉਣ 'ਤੇ ਲਾਇਸੈਂਸ ਨੂੰ ਹਮੇਸ਼ਾ ਲਈ ਰੱਦ ਵੀ ਕੀਤਾ ਜਾ ਸਕਦਾ ਹੈ।
By : Gill
ਨਵੀਂ ਦਿੱਲੀ: 27 ਫਰਵਰੀ, 2026
ਜੇਕਰ ਤੁਸੀਂ ਵੀ ਸੜਕ 'ਤੇ ਗੱਡੀ ਚਲਾਉਂਦੇ ਸਮੇਂ ਟ੍ਰੈਫਿਕ ਨਿਯਮਾਂ ਦੀ ਪ੍ਰਵਾਹ ਨਹੀਂ ਕਰਦੇ, ਤਾਂ ਹੁਣ ਵੱਡੀ ਮੁਸੀਬਤ ਵਿੱਚ ਫਸ ਸਕਦੇ ਹੋ। ਕੇਂਦਰ ਸਰਕਾਰ ਦੇਸ਼ ਵਿੱਚ ਸੜਕ ਸੁਰੱਖਿਆ ਨੂੰ ਮਜ਼ਬੂਤ ਕਰਨ ਲਈ ਡਰਾਈਵਿੰਗ ਲਾਇਸੈਂਸ (DL) ਦੀ ਪੂਰੀ ਪ੍ਰਣਾਲੀ ਨੂੰ ਬਦਲਣ ਦੀ ਤਿਆਰੀ ਕਰ ਚੁੱਕੀ ਹੈ। ਕੇਂਦਰੀ ਮੰਤਰੀ ਨਿਤਿਨ ਗਡਕਰੀ ਨੇ ਵੱਡਾ ਐਲਾਨ ਕਰਦਿਆਂ ਦੱਸਿਆ ਹੈ ਕਿ ਭਾਰਤ ਵਿੱਚ ਜਲਦੀ ਹੀ 'ਗ੍ਰੇਡ-ਅਧਾਰਤ ਡਰਾਈਵਿੰਗ ਲਾਇਸੈਂਸ ਪ੍ਰਣਾਲੀ' ਲਾਗੂ ਕੀਤੀ ਜਾਵੇਗੀ, ਜਿਸ ਤਹਿਤ ਤੁਹਾਡਾ ਲਾਇਸੈਂਸ ਇੱਕ 'ਰਿਪੋਰਟ ਕਾਰਡ' ਵਾਂਗ ਕੰਮ ਕਰੇਗਾ।
ਇਸ ਨਵੀਂ ਪ੍ਰਣਾਲੀ ਦੇ ਤਹਿਤ, ਹਰ ਡਰਾਈਵਿੰਗ ਲਾਇਸੈਂਸ ਨੂੰ ਕੁਝ ਨਿਸ਼ਚਿਤ ਅੰਕ (Points) ਦਿੱਤੇ ਜਾਣਗੇ। ਜਦੋਂ ਵੀ ਕੋਈ ਚਾਲਕ ਟ੍ਰੈਫਿਕ ਨਿਯਮਾਂ ਦੀ ਉਲੰਘਣਾ ਕਰੇਗਾ, ਤਾਂ ਸਿਰਫ਼ ਜੁਰਮਾਨਾ ਹੀ ਨਹੀਂ ਹੋਵੇਗਾ, ਸਗੋਂ ਉਸ ਦੇ ਲਾਇਸੈਂਸ ਵਿੱਚੋਂ ਅੰਕ ਵੀ ਕੱਟੇ ਜਾਣਗੇ। ਜੇਕਰ ਇਹ ਅੰਕ ਇੱਕ ਤੈਅ ਸੀਮਾ ਤੋਂ ਘੱਟ ਹੋ ਜਾਂਦੇ ਹਨ, ਤਾਂ ਲਾਇਸੈਂਸ ਨੂੰ ਛੇ ਮਹੀਨਿਆਂ ਲਈ ਮੁਅੱਤਲ ਕਰ ਦਿੱਤਾ ਜਾਵੇਗਾ। ਗੰਭੀਰ ਮਾਮਲਿਆਂ ਵਿੱਚ ਜਾਂ ਵਾਰ-ਵਾਰ ਗਲਤੀ ਦੁਹਰਾਉਣ 'ਤੇ ਲਾਇਸੈਂਸ ਨੂੰ ਹਮੇਸ਼ਾ ਲਈ ਰੱਦ ਵੀ ਕੀਤਾ ਜਾ ਸਕਦਾ ਹੈ।
ਇਹ ਸਿਸਟਮ ਖ਼ਾਸ ਤੌਰ 'ਤੇ ਓਵਰਸਪੀਡਿੰਗ, ਗੱਡੀ ਚਲਾਉਂਦੇ ਸਮੇਂ ਮੋਬਾਈਲ ਦੀ ਵਰਤੋਂ, ਗਲਤ ਦਿਸ਼ਾ (Wrong Side) ਵਿੱਚ ਗੱਡੀ ਚਲਾਉਣਾ ਅਤੇ ਸ਼ਰਾਬ ਪੀ ਕੇ ਡਰਾਈਵਿੰਗ ਕਰਨ ਵਰਗੇ ਅਪਰਾਧਾਂ 'ਤੇ ਸ਼ਿਕੰਜਾ ਕੱਸਣ ਲਈ ਤਿਆਰ ਕੀਤਾ ਗਿਆ ਹੈ। ਇਸ ਦਾ ਮਕਸਦ ਲੋਕਾਂ ਵਿੱਚ ਟ੍ਰੈਫਿਕ ਨਿਯਮਾਂ ਪ੍ਰਤੀ ਜ਼ਿੰਮੇਵਾਰੀ ਪੈਦਾ ਕਰਨਾ ਹੈ। ਸਰਕਾਰ ਮੁਤਾਬਕ, ਹੁਣ ਡਰਾਈਵਰ ਸਿਰਫ਼ ਪੈਸੇ ਦੇ ਕੇ ਚਲਾਨ ਭਰ ਕੇ ਨਹੀਂ ਬਚ ਸਕਣਗੇ, ਸਗੋਂ ਉਨ੍ਹਾਂ ਨੂੰ ਆਪਣਾ ਲਾਇਸੈਂਸ ਬਚਾਉਣ ਲਈ ਨਿਯਮਾਂ ਦੀ ਪਾਲਣਾ ਕਰਨੀ ਹੀ ਪਵੇਗੀ।
