ਮਾਨਸੂਨ ਆ ਰਿਹੈ ਕਈ ਦਿਨ ਪਹਿਲਾਂ, ਪੜ੍ਹੋ ਤਫ਼ਸੀਲ

ਕੇਰਲ ਤੱਟ 'ਤੇ ਮਾਨਸੂਨ ਪੰਜ ਦਿਨ ਪਹਿਲਾਂ ਪਹੁੰਚਣ ਦੀ ਸੰਭਾਵਨਾ, ਮੌਸਮ ਵਿਭਾਗ ਨੇ 27 ਮਈ ਦੀ ਤਾਰੀਖ ਦਿੱਤੀ

ਭਾਰਤੀ ਮੌਸਮ ਵਿਭਾਗ (IMD) ਅਨੁਸਾਰ, ਇਸ ਵਾਰ ਦੱਖਣ-ਪੱਛਮੀ ਮਾਨਸੂਨ ਆਮ ਤੌਰ 'ਤੇ ਆਉਣ ਵਾਲੀ 1 ਜੂਨ ਦੀ ਤਾਰੀਖ ਤੋਂ ਪੰਜ ਦਿਨ ਪਹਿਲਾਂ, 27 ਮਈ 2025 ਨੂੰ ਕੇਰਲ ਤੱਟ 'ਤੇ ਪਹੁੰਚ ਸਕਦਾ ਹੈ। ਜੇ ਮਾਨਸੂਨ ਉਮੀਦ ਅਨੁਸਾਰ 27 ਮਈ ਨੂੰ ਆ ਜਾਂਦਾ ਹੈ, ਤਾਂ ਇਹ 2009 ਤੋਂ ਬਾਅਦ ਭਾਰਤ ਵਿੱਚ ਮਾਨਸੂਨ ਦੀ ਸਭ ਤੋਂ ਜਲਦੀ ਐਂਟਰੀ ਹੋਵੇਗੀ। ਆਮ ਤੌਰ 'ਤੇ, ਮਾਨਸੂਨ 1 ਜੂਨ ਨੂੰ ਕੇਰਲ ਵਿੱਚ ਦਾਖਲ ਹੁੰਦਾ ਹੈ ਅਤੇ 8 ਜੁਲਾਈ ਤੱਕ ਪੂਰੇ ਦੇਸ਼ ਵਿੱਚ ਫੈਲ ਜਾਂਦਾ ਹੈ।

ਮੌਸਮ ਵਿਭਾਗ ਨੇ ਇਸ ਵਾਰ ਚੰਗੀ ਬਾਰਿਸ਼ ਦੀ ਭਵਿੱਖਬਾਣੀ ਵੀ ਕੀਤੀ ਹੈ। ਅਪ੍ਰੈਲ ਵਿੱਚ IMD ਨੇ ਕਿਹਾ ਸੀ ਕਿ 2025 ਵਿੱਚ ਮਾਨਸੂਨ ਮੌਸਮ ਦੌਰਾਨ ਭਾਰਤ ਵਿੱਚ ਆਮ ਤੋਂ ਵੱਧ ਕੁੱਲ ਬਾਰਿਸ਼ ਹੋਣ ਦੀ ਸੰਭਾਵਨਾ ਹੈ ਅਤੇ ਐਲ ਨੀਨੋ ਪ੍ਰਭਾਵ ਦੇ ਆਸਾਰ ਨਹੀਂ ਹਨ, ਜੋ ਆਮ ਤੌਰ 'ਤੇ ਘੱਟ ਬਾਰਿਸ਼ ਨਾਲ ਜੁੜੇ ਹੁੰਦੇ ਹਨ।

ਇਸ ਵਾਰ ਮਾਨਸੂਨ ਤੋਂ ਪਹਿਲਾਂ ਦੀਆਂ ਗਤੀਵਿਧੀਆਂ ਵੀ ਕਾਫ਼ੀ ਤੇਜ਼ ਹਨ। ਪਿਛਲੇ ਕੁਝ ਹਫ਼ਤਿਆਂ ਵਿੱਚ ਉੱਤਰ ਭਾਰਤ ਦੇ ਕਈ ਇਲਾਕਿਆਂ ਵਿੱਚ ਮੀਂਹ ਪਿਆ ਹੈ, ਜਿਸ ਕਾਰਨ ਗਰਮੀ ਦੀ ਲਹਿਰ ਹੁਣ ਤੱਕ ਗੰਭੀਰ ਨਹੀਂ ਹੋਈ। ਮੌਸਮ ਵਿਭਾਗ ਨੇ ਕੇਰਲ ਵਿੱਚ ਮਾਨਸੂਨ ਦੀ ਐਂਟਰੀ ਤੋਂ ਬਾਅਦ 5 ਦਿਨਾਂ ਤੱਕ ਭਾਰੀ ਮੀਂਹ ਦੀ ਭਵਿੱਖਬਾਣੀ ਵੀ ਕੀਤੀ ਹੈ।