ਮੋਹਾਲੀ ਦੇ ਨੌਜਵਾਨ ਦੀ ਲੰਡਨ ਵਿੱਚ ਮੌਤ

ਮੋਹਾਲੀ, 8 ਅਪ੍ਰੈਲ 2025 – ਮੋਹਾਲੀ ਦੇ ਇੱਕ 20 ਸਾਲਾ ਨੌਜਵਾਨ ਬਲਰਾਜ ਸਿੰਘ ਦੀ ਮੌਤ ਲੰਡਨ ਵਿਚ ਮਰਚੈਂਟ ਨੇਵੀ ਦੇ ਇੱਕ ਜਹਾਜ਼ 'ਤੇ ਹੋ ਗਈ। ਅਧਿਕਾਰੀਆਂ ਦਾ ਦਾਅਵਾ ਹੈ ਕਿ ਉਸਨੇ ਫਾਹਾ ਲੈ ਕੇ ਖੁਦਕੁਸ਼ੀ ਕਰ ਲਈ, ਪਰ ਪਰਿਵਾਰ ਇਸ ਨੂੰ ਹੱਤਿਆ ਮੰਨ ਰਿਹਾ ਹੈ।

ਮੌਤ ਤੋਂ ਥੋੜ੍ਹੀ ਦੇਰ ਪਹਿਲਾਂ ਵੀਡੀਓ ਕਾਲ:

16 ਮਾਰਚ ਨੂੰ ਸਵੇਰੇ 5 ਵਜੇ ਬਲਰਾਜ ਨੇ ਆਪਣੇ ਪਿਤਾ ਵਿਕਰਮ ਸਿੰਘ ਨਾਲ ਵੀਡੀਓ ਕਾਲ ਕੀਤੀ। ਉਹ ਪੂਰੀ ਤਰ੍ਹਾਂ ਠੀਕ ਦਿਖਾਈ ਦਿੱਤਾ। ਪਰ, ਠੀਕ 16 ਮਾਰਚ ਦੀ ਸ਼ਾਮ 9 ਵਜੇ ਪਰਿਵਾਰ ਨੂੰ ਮਰਚੈਂਟ ਨੇਵੀ ਦੇ ਅਧਿਕਾਰੀ ਵੱਲੋਂ ਪੁੱਤਰ ਦੀ ਮੌਤ ਦੀ ਜਾਣਕਾਰੀ ਮਿਲੀ।

ਜਹਾਜ਼ ਦੀ ਜ਼ਿੰਦਗੀ ਅਤੇ ਤਣਾਅ:

ਵਿਕਰਮ ਸਿੰਘ ਅਨੁਸਾਰ, ਬਲਰਾਜ ਨੇ ਦੱਸਿਆ ਸੀ ਕਿ ਉਸਨੂੰ 36 ਘੰਟੇ ਲਗਾਤਾਰ ਕੰਮ ਕਰਵਾਇਆ ਜਾਂਦਾ ਸੀ, ਜਿਸ ਕਰਕੇ ਉਸਦੇ ਪੈਰ ਬਰਬਾਦ ਹੋ ਗਏ। ਸੀਨੀਅਰ ਉਸਨੂੰ ਧਰਮ ਦੇ ਆਧਾਰ 'ਤੇ ਤੰਗ ਕਰਦੇ ਅਤੇ ਮਜ਼ਾਕ ਉਡਾਉਂਦੇ ਸਨ। ਇਹ ਗੱਲਾਂ ਉਸਨੇ ਕੰਪਨੀ ਦੇ ਉੱਚ ਅਧਿਕਾਰੀਆਂ ਤੱਕ ਵੀ ਪੁਚਾਈਆਂ, ਪਰ ਕੋਈ ਕਾਰਵਾਈ ਨਹੀਂ ਹੋਈ।

ਫ੍ਰੀਜ਼ਰ ਵਿੱਚ ਲਾਸ਼, ਅਤੇ ਪਰਿਵਾਰ ਦਾ ਸਵਾਲ:

ਵਿਕਰਮ ਸਿੰਘ ਜਦੋਂ ਲੰਡਨ ਪਹੁੰਚੇ, ਤਾਂ ਪੁੱਤਰ ਦੀ ਲਾਸ਼ ਇਕ ਆਇਰਿਸ਼ ਨਾਗਰਿਕ ਦੇ ਘਰ ਫ੍ਰੀਜ਼ਰ ਵਿੱਚ ਮਿਲੀ। ਉਨ੍ਹਾਂ ਲਾਸ਼ ਮੋਹਾਲੀ ਲਿਆਉਣ ਤੋਂ ਬਾਅਦ ਐਸ.ਡੀ.ਐਮ. ਨੂੰ ਪੱਤਰ ਦੇ ਕੇ ਪੋਸਟਮਾਰਟਮ ਦੀ ਮੰਗ ਕੀਤੀ।

ਅੰਤਿਮ ਸੰਸਕਾਰ ਅਤੇ ਕਾਨੂੰਨੀ ਕਾਰਵਾਈ:

ਪੋਸਟਮਾਰਟਮ ਤੋਂ ਬਾਅਦ ਪਰਿਵਾਰ ਨੇ ਬਲਰਾਜ ਦਾ ਅੰਤਿਮ ਸੰਸਕਾਰ ਕਰ ਦਿੱਤਾ। ਹੁਣ ਪਰਿਵਾਰ ਕਾਨੂੰਨੀ ਰਾਹੀਂ ਮਰਚੈਂਟ ਨੇਵੀ ਅਤੇ ਸੰਬੰਧਤ ਅਧਿਕਾਰੀਆਂ ਵਿਰੁੱਧ ਕਾਰਵਾਈ ਦੀ ਤਿਆਰੀ ਕਰ ਰਿਹਾ ਹੈ।