ਮੋਹਾਲੀ ਪੁਲਿਸ ਨੇ ਜਵਾਹਰਪੁਰ ਲੁੱਟ ਮਾਮਲਾ ਤਿੰਨ ਦਿਨਾਂ 'ਚ ਸੁਲਝਾਇਆ

Mohali Police solved Jawaharpur robbery case in three days

ਚਾਰ ਦੋਸ਼ੀ ਗ੍ਰਿਫ਼ਤਾਰ

ਐਸ.ਏ.ਐਸ. ਨਗਰ, 3 ਮਈ 2025 –

ਜਿਲ੍ਹਾ ਐਸ.ਏ.ਐਸ. ਨਗਰ ਪੁਲਿਸ ਨੇ ਸੁਚੱਜੀ ਕਾਰਵਾਈ ਕਰਦਿਆਂ ਜਵਾਹਰਪੁਰ ਚੌਂਕ 'ਤੇ ਹੋਈ ਲੁੱਟ ਦੀ ਘਟਨਾ ਨੂੰ ਕੇਵਲ ਤਿੰਨ ਦਿਨਾਂ ਵਿੱਚ ਸੁਲਝਾ ਕੇ ਚਾਰ ਦੋਸ਼ੀਆਂ ਨੂੰ ਗ੍ਰਿਫ਼ਤਾਰ ਕਰਨ ਵਿੱਚ ਵੱਡੀ ਕਾਮਯਾਬੀ ਹਾਸਲ ਕੀਤੀ ਹੈ। ਇਹ ਜਾਣਕਾਰੀ ਐਸ.ਐਸ.ਪੀ. ਡਾ. ਦੀਪਕ ਪਰੀਕ, ਆਈ.ਪੀ.ਐਸ. ਨੇ ਦਿੱਤੀ।

ਗ੍ਰਿਫ਼ਤਾਰ ਦੋਸ਼ੀਆਂ ਦੀ ਪਛਾਣ:

ਰੋਹਿਤ ਕੁਮਾਰ ਉਰਫ ਜਮਨ (ਪਿੰਡ ਲਾਲੋਨੀ, ਜ਼ਿਲ੍ਹਾ ਕਰਨਾਲ, ਹਰਿਆਣਾ)

ਸਤਿੰਦਰ ਸਿੰਘ (ਪਿੰਡ ਭੁਦਾ ਸਾਹਿਬ, ਐਸ.ਏ.ਐਸ. ਨਗਰ, ਮੋਹਾਲੀ)

ਮੋਤੀ (ਪਿੰਡ ਨੀਲਾ ਖੇੜੀ, ਜ਼ਿਲ੍ਹਾ ਕਰਨਾਲ, ਹਰਿਆਣਾ)

ਅਕਸ਼ੈ (ਪਿੰਡ ਲਾਲੋਨੀ, ਥਾਣਾ ਤਰੋੜੀ, ਜ਼ਿਲ੍ਹਾ ਕਰਨਾਲ)

ਘਟਨਾ ਦਾ ਵੇਰਵਾ:

30 ਅਪ੍ਰੈਲ 2025 ਦੀ ਸਵੇਰ, ਉੱਤਰ ਪ੍ਰਦੇਸ਼ ਦੇ ਨਿਵਾਸੀ ਜ਼ਿਆ-ਉਲ-ਹਕ ਨੇ ਡੇਰਾ ਬਸੀ ਬੱਸ ਸਟੈਂਡ ਤੋਂ ਅੰਬਾਲਾ ਰੇਲਵੇ ਸਟੇਸ਼ਨ ਜਾਣ ਲਈ ਇੱਕ ਟੈਕਸੀ (ਹੁੰਡਈ ਐਕਸੈਂਟ, HR 67 C 1782) ਬੁੱਕ ਕੀਤੀ। ਜਵਾਹਰਪੁਰ ਚੌਂਕ ਨੇੜੇ, ਚੰਡੀਗੜ੍ਹ-ਅੰਬਾਲਾ ਨੈਸ਼ਨਲ ਹਾਈਵੇਅ 'ਤੇ, ਚਾਰ ਅਣਪਛਾਤੇ ਵਿਅਕਤੀਆਂ ਨੇ, ਜਿਨ੍ਹਾਂ ਵਿੱਚ ਟੈਕਸੀ ਡਰਾਈਵਰ ਵੀ ਸ਼ਾਮਲ ਸੀ, ਉਸ ਤੋਂ 20,600 ਰੁਪਏ ਨਕਦ, ਏ.ਟੀ.ਐਮ. ਕਾਰਡ, ਮੋਬਾਈਲ ਅਤੇ ਜਰੂਰੀ ਦਸਤਾਵੇਜ਼ ਬੰਦੂਕ ਦੀ ਨੋਕ 'ਤੇ ਲੁੱਟ ਲਏ।

ਪੁਲਿਸ ਕਾਰਵਾਈ:

ਮਾਮਲੇ ਦੀ ਜਾਂਚ ਲਈ ਐਸ.ਪੀ. (ਰੂਰਲ) ਮਨਪ੍ਰੀਤ ਸਿੰਘ ਅਤੇ ਡੀ.ਐਸ.ਪੀ. ਡੇਰਾ ਬਸੀ ਬਿਕਰਮਜੀਤ ਸਿੰਘ ਬਰਾਰ ਦੀ ਅਗਵਾਈ ਹੇਠ ਵਿਸ਼ੇਸ਼ ਟੀਮ ਬਣਾਈ ਗਈ। SHO ਇੰਸਪੈਕਟਰ ਸੁਮਿਤ ਮੋਰ ਦੀ ਟੀਮ ਨੇ ਮੌਕੇ ਤੋਂ ਸਬੂਤ ਇਕੱਠੇ ਕਰਕੇ, ਲੋਕਲ ਸਰੋਤਾਂ ਅਤੇ ਤਕਨੀਕੀ ਜਾਣਕਾਰੀ ਦੀ ਮਦਦ ਨਾਲ ਸਾਰੇ ਦੋਸ਼ੀਆਂ ਦੀ ਪਛਾਣ ਕਰ ਲਈ। ਚਾਰ ਦੋਸ਼ੀਆਂ ਨੂੰ ਰਾਮਗੜ੍ਹ ਮੁਬਾਰਕਪੁਰ ਰੋਡ, ਡੇਰਾ ਬਸੀ ਤੋਂ ਗ੍ਰਿਫ਼ਤਾਰ ਕੀਤਾ ਗਿਆ।

ਹੋਰ ਖੁਲਾਸੇ:

ਪਹਿਲੀ ਜਾਂਚ 'ਚ ਪਤਾ ਲੱਗਾ ਕਿ ਇਹ ਇੰਟਰ-ਸਟੇਟ ਗੈਂਗ ਤ੍ਰਾਇਸਿਟੀ 'ਚ ਹੋਰ ਕਈ ਅਜਿਹੀਆਂ ਘਟਨਾਵਾਂ 'ਚ ਸ਼ਾਮਲ ਰਹੀ ਹੈ। ਇਹ ਗੈਂਗ ਮੁੱਖ ਤੌਰ 'ਤੇ ਯੂ.ਪੀ.-ਬਿਹਾਰ ਦੇ ਮਜਦੂਰਾਂ ਨੂੰ ਨਿਸ਼ਾਨਾ ਬਣਾਉਂਦੀ ਸੀ।

ਵਾਧੂ ਜਾਣਕਾਰੀ:

ਪੁਲਿਸ ਨੇ ਦੱਸਿਆ ਕਿ ਅੱਜ, ਦੋਸ਼ੀ ਸਤਿੰਦਰ ਨੂੰ ਹਥਿਆਰ ਦੀ ਬਰਾਮਦਗੀ ਲਈ ਪਿੰਡ ਫੁਦਾ ਲਿਜਾਇਆ ਗਿਆ ਸੀ, ਜਿੱਥੇ ਪੁਲਿਸ ਹਿਰਾਸਤ ਤੋਂ ਭੱਜਣ ਦੀ ਕੋਸ਼ਿਸ਼ ਦੌਰਾਨ ਉਸ ਦੀ ਟੰਗ ਟੁੱਟ ਗਈ।

ਮਾਮਲੇ ਦੀ ਜਾਂਚ ਜਾਰੀ ਹੈ ਅਤੇ ਹੋਰ ਸਾਥੀਆਂ ਦੀ ਭਾਲ ਲਈ ਪੁਲਿਸ ਵਲੋਂ ਕੋਸ਼ਿਸ਼ਾਂ ਜਾਰੀ ਹਨ।

Mohali Police solved Jawaharpur robbery case in three days