WhatsApp ਤੋਂ ਹੁਣ ਹੋਵੇਗੀ ਲੱਖਾਂ ਦੀ ਕਮਾਈ: YouTube ਵਾਂਗ

ਚੈਨਲ ਦਾ ਕਰ ਸਕੋਗੇ 'Monetization'; ਜਾਣੋ ਪੂਰਾ ਤਰੀਕਾ

ਨਵੀਂ ਦਿੱਲੀ: ਮੈਟਾ (Meta) ਦੀ ਮਲਕੀਅਤ ਵਾਲਾ ਦੁਨੀਆ ਦਾ ਸਭ ਤੋਂ ਮਸ਼ਹੂਰ ਮੈਸੇਜਿੰਗ ਐਪ WhatsApp ਹੁਣ ਸਿਰਫ਼ ਗੱਲਬਾਤ ਦਾ ਜ਼ਰੀਆ ਨਹੀਂ ਰਹੇਗਾ, ਸਗੋਂ ਇਹ ਕਮਾਈ ਦਾ ਇੱਕ ਵੱਡਾ ਪਲੇਟਫਾਰਮ (Platform) ਬਣਨ ਜਾ ਰਿਹਾ ਹੈ। ਤਾਜ਼ਾ ਰਿਪੋਰਟਾਂ ਅਨੁਸਾਰ WhatsApp ਇੱਕ ਅਜਿਹੇ ਸ਼ਾਨਦਾਰ ਫੀਚਰ 'ਤੇ ਕੰਮ ਕਰ ਰਿਹਾ ਹੈ ਜੋ ਉਪਭੋਗਤਾਵਾਂ ਨੂੰ ਆਪਣੇ WhatsApp ਚੈਨਲ ਰਾਹੀਂ ਪੈਸੇ ਕਮਾਉਣ ਦਾ ਮੌਕਾ ਦੇਵੇਗਾ। ਇਹ ਸਿਸਟਮ ਬਿਲਕੁਲ YouTube ਅਤੇ Instagram ਦੇ ਸਬਸਕ੍ਰਿਪਸ਼ਨ ਮਾਡਲ (Subscription Model) ਵਾਂਗ ਕੰਮ ਕਰੇਗਾ, ਜਿਸ ਨਾਲ ਕੰਟੈਂਟ ਕ੍ਰਿਏਟਰਾਂ (Content Creators) ਲਈ ਕਮਾਈ ਦੇ ਨਵੇਂ ਰਾਹ ਖੁੱਲ੍ਹਣਗੇ।

ਇਸ ਨਵੀਂ ਵਿਸ਼ੇਸ਼ਤਾ ਦੇ ਤਹਿਤ WhatsApp ਵਿੱਚ 'ਪੇਡ ਸਬਸਕ੍ਰਿਪਸ਼ਨ' (Paid Subscription) ਦਾ ਵਿਕਲਪ ਜੋੜਿਆ ਜਾਵੇਗਾ। ਇਸ ਰਾਹੀਂ ਚੈਨਲ ਮਾਲਕ ਆਪਣੇ ਗਾਹਕਾਂ ਲਈ ਵਿਸ਼ੇਸ਼ ਅਤੇ ਪ੍ਰੀਮੀਅਮ ਕੰਟੈਂਟ (Premium Content) ਜਿਵੇਂ ਕਿ ਖ਼ਾਸ ਵੀਡੀਓਜ਼, ਟਿਪਸ ਜਾਂ ਗੁਪਤ ਜਾਣਕਾਰੀ ਸਾਂਝੀ ਕਰ ਸਕਣਗੇ, ਜੋ ਸਿਰਫ਼ ਫੀਸ ਭਰਨ ਵਾਲੇ ਮੈਂਬਰਾਂ ਨੂੰ ਹੀ ਦਿਖਾਈ ਦੇਵੇਗੀ। ਖ਼ਾਸ ਗੱਲ ਇਹ ਹੈ ਕਿ ਕਿਸੇ ਵੀ ਚੈਨਲ ਨੂੰ ਜੁਆਇਨ ਕਰਨਾ ਲਾਜ਼ਮੀ ਨਹੀਂ ਹੋਵੇਗਾ ਅਤੇ ਆਮ ਸਮੱਗਰੀ ਪਹਿਲਾਂ ਵਾਂਗ ਮੁਫ਼ਤ (Free) ਰਹੇਗੀ। ਉਪਭੋਗਤਾ ਇਹ ਵੀ ਦੇਖ ਸਕਣਗੇ ਕਿ ਕਿਸੇ ਚੈਨਲ ਦੇ ਕਿੰਨੇ ਪੇਡ ਮੈਂਬਰ ਹਨ, ਜਿਸ ਨਾਲ ਚੈਨਲ ਦੀ ਪ੍ਰਸਿੱਧੀ ਅਤੇ ਕੁਆਲਿਟੀ (Quality) ਦਾ ਅੰਦਾਜ਼ਾ ਲਗਾਉਣਾ ਆਸਾਨ ਹੋ ਜਾਵੇਗਾ।

ਜੇਕਰ ਤੁਸੀਂ ਵੀ ਇਸ ਸੁਨਹਿਰੀ ਮੌਕੇ ਦਾ ਲਾਭ ਉਠਾਉਣਾ ਚਾਹੁੰਦੇ ਹੋ, ਤਾਂ WhatsApp ਚੈਨਲ ਬਣਾਉਣਾ ਬਹੁਤ ਸਰਲ ਹੈ। ਸਭ ਤੋਂ ਪਹਿਲਾਂ ਆਪਣੀ ਐਪ ਨੂੰ ਅਪਡੇਟ ਕਰੋ ਅਤੇ 'Updates' ਟੈਬ ਵਿੱਚ ਜਾ ਕੇ ਪਲੱਸ (+) ਆਈਕਨ 'ਤੇ ਕਲਿੱਕ ਕਰਕੇ 'Create Channel' ਦੀ ਚੋਣ ਕਰੋ। ਆਪਣੇ ਚੈਨਲ ਨੂੰ ਇੱਕ ਆਕਰਸ਼ਕ ਨਾਮ, ਡਿਸਕ੍ਰਿਪਸ਼ਨ (Description) ਅਤੇ ਵਧੀਆ ਪ੍ਰੋਫਾਈਲ ਫੋਟੋ ਦਿਓ। ਡਿਜੀਟਲ ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਹ ਫੀਚਰ ਖ਼ਾਸ ਕਰਕੇ ਐਜੂਕੇਸ਼ਨ, ਫਿਟਨੈੱਸ ਅਤੇ ਸਟਾਕ ਮਾਰਕੀਟ (Stock Market) ਦੇ ਮਾਹਿਰਾਂ ਲਈ ਬਹੁਤ ਲਾਹੇਵੰਦ ਸਾਬਤ ਹੋਵੇਗਾ ਕਿਉਂਕਿ WhatsApp ਦੀ ਪਹੁੰਚ ਬਹੁਤ ਵੱਡੀ ਹੈ।