ਭਾਰਤ-ਪਾਕਿਸਤਾਨ ਤਣਾਅ : ਚੰਡੀਗੜ੍ਹ ਤੋਂ ਜੰਮੂ-ਕਸ਼ਮੀਰ ਭੇਜੀ ਗਈ ਪੀਜੀਆਈ ਦੀ ਟੀਮ

ਹਸਪਤਾਲਾਂ 'ਚ ਐਮਰਜੈਂਸੀ ਮੋਡ ਜਾਰੀ

ਚੰਡੀਗੜ੍ਹ : ਭਾਰਤ-ਪਾਕਿਸਤਾਨ ਸਰਹੱਦੀ ਤਣਾਅ ਦੇ ਚਲਦੇ ਦੇਸ਼ ਭਰ ਵਿੱਚ ਐਮਰਜੈਂਸੀ ਸਥਿਤੀ ਬਣੀ ਹੋਈ ਹੈ। ਇਸ ਦੌਰਾਨ ਪੀਜੀਆਈ ਚੰਡੀਗੜ੍ਹ ਨੇ ਇੱਕ ਵੱਡਾ ਕਦਮ ਚੁੱਕਦੇ ਹੋਏ ਆਪਣੀ ਮੈਡੀਕਲ ਟੀਮ ਜੰਮੂ-ਕਸ਼ਮੀਰ ਭੇਜੀ ਹੈ। ਇਹ ਟੀਮ ਜ਼ਖਮੀ ਲੋਕਾਂ ਨੂੰ ਇਲਾਜ ਦੀ ਸਹੂਲਤ ਦੇਣ ਅਤੇ ਆਫ਼ਤ ਸਮੇਂ ਵਿੱਚ ਡਾਕਟਰੀ ਸੇਵਾਵਾਂ ਪ੍ਰਦਾਨ ਕਰਨ ਲਈ ਭੇਜੀ ਗਈ ਹੈ।

ਟੀਮ ਦੀ ਅਗਵਾਈ ਡਾ. ਆਸ਼ੂਤੋਸ਼ ਗੁਪਤਾ (ਪ੍ਰਿੰਸੀਪਲ-ਕਮ-ਡੀਨ, ਜੀਐਮਸੀ ਜੰਮੂ) ਕਰ ਰਹੇ ਹਨ। ਟੀਮ ਵਿੱਚ ਅਨੱਸਥੀਸੀਆ ਵਿਭਾਗ ਤੋਂ ਡਾ. ਅਮਿਤ ਸ਼ਰਮਾ ਅਤੇ ਡਾ. ਸਚਿਨ, ਜਨਰਲ ਤੇ ਵੈਸਕੁਲਰ ਸਰਜਰੀ ਤੋਂ ਡਾ. ਸਵਪਨੇਸ਼ ਸਾਹੂ ਅਤੇ ਡਾ. ਗੋਕੁਲ ਕ੍ਰਿਸ਼ਨਨ, ਆਰਥੋਪੈਡਿਕਸ ਤੋਂ ਡਾ. ਹਿਮਾਂਸ਼ੂ ਕੰਵਰ ਅਤੇ ਡਾ. ਉਦਿਤ ਕੇ. ਜਯੰਤ, ਪਲਾਸਟਿਕ ਸਰਜਰੀ ਤੋਂ ਡਾ. ਮਹੇਸ਼ ਅਤੇ ਡਾ. ਸਚਿਨ ਸੀ. ਨਾਇਰ, ਨਰਸਿੰਗ ਸਟਾਫ ਨਰਿੰਦਰ ਤਿਆਗੀ ਅਤੇ ਰਮੇਸ਼ ਕੁਮਾਰ, ਜਦਕਿ ਆਵਾਜਾਈ ਸਹਾਇਤਾ ਲਈ ਸ਼ਿਵਨਾਥ, ਪ੍ਰਦੀਪ ਕੁਮਾਰ ਅਤੇ ਲਖਵੀਰ ਸਿੰਘ ਸ਼ਾਮਲ ਹਨ।

ਪੀਜੀਆਈ ਦੇ ਡਾਇਰੈਕਟਰ ਡਾ. ਵਿਵੇਕ ਲਾਲ ਨੇ ਦੱਸਿਆ ਕਿ ਇਹ ਟੀਮ ਹਰੇਕ ਸੰਭਾਵੀ ਚੁਣੌਤੀ ਲਈ ਤਿਆਰ ਹੈ। ਉਨ੍ਹਾਂ ਕਿਹਾ ਕਿ ਹਸਪਤਾਲ ਦੇ ਸਾਰੇ ਐਮਰਜੈਂਸੀ ਇਨਫ੍ਰਾਸਟਰਕਚਰ ਨੂੰ ਹਾਈ ਅਲਰਟ 'ਤੇ ਰੱਖਿਆ ਗਿਆ ਹੈ। ਐਡਵਾਂਸਡ ਟਰੌਮਾ ਸੈਂਟਰ ਨੂੰ ਪੂਰੀ ਤਰ੍ਹਾਂ ਤਿਆਰ ਕਰ ਲਿਆ ਗਿਆ ਹੈ, ਜਿਸਦੀ ਨਿਗਰਾਨੀ ਉਨ੍ਹਾਂ ਨੇ ਖੁਦ ਕੀਤੀ।

ਇਸੇ ਦੌਰਾਨ, ਹਵਾਈ ਹਮਲੇ 'ਚ ਜ਼ਖਮੀ ਹੋਈ ਪੁਣਛ ਦੀ 48 ਸਾਲਾ ਔਰਤ ਨੂੰ ਪੀਜੀਆਈ ਲਿਆਂਦਾ ਗਿਆ ਹੈ। ਜਾਣਕਾਰੀ ਮੁਤਾਬਕ ਬੰਬ ਦਾ ਗੋਲਾ ਉਸਦੀ ਅੱਖ 'ਤੇ ਲੱਗਿਆ ਜਦੋਂ ਉਹ ਕਾਰ 'ਚ ਸੀ। ਉਸਦੀ ਹਾਲਤ ਨਾਜ਼ੁਕ ਹੈ ਅਤੇ ਸਰਜਰੀ ਦੁਪਹਿਰ ਤੱਕ ਚੱਲਦੀ ਰਹੀ।

ਛੁੱਟੀਆਂ ਰੱਦ, ਸਟਾਫ਼ ਅਲਰਟ 'ਤੇ

ਐਮਰਜੈਂਸੀ ਨੂੰ ਲੈ ਕੇ ਪੀਜੀਆਈ ਅਤੇ ਜੀਐਮਸੀਐਚ-32 ਨੇ ਸਾਰੇ ਕਰਮਚਾਰੀਆਂ ਦੀਆਂ ਛੁੱਟੀਆਂ ਅਗਲੇ ਹੁਕਮਾਂ ਤੱਕ ਰੱਦ ਕਰ ਦਿੱਤੀਆਂ ਹਨ। ਸਿਰਫ਼ ਜ਼ਰੂਰੀ ਹਾਲਾਤਾਂ ਵਿੱਚ ਹੀ ਛੁੱਟੀ ਦੀ ਇਜਾਜ਼ਤ ਦਿੱਤੀ ਜਾਵੇਗੀ। ਸਟਾਫ਼ ਨੂੰ ਕੰਮ ਤੋਂ ਬਾਅਦ ਵੀ ਤਿਆਰ ਰਹਿਣ ਅਤੇ ਫੌਰੀ ਹਾਜ਼ਰੀ ਦੇ ਨਿਰਦੇਸ਼ ਦਿੱਤੇ ਗਏ ਹਨ।

ਹਸਪਤਾਲਾਂ ਵਿੱਚ ਐਮਰਜੈਂਸੀ ਤਿਆਰੀਆਂ

ਸੈਕਟਰ-16 ਦੇ ਜਨਰਲ ਹਸਪਤਾਲ 'ਚ ਕੰਟਰੋਲ ਰੂਮ ਬਣਾਇਆ ਗਿਆ ਹੈ ਜਿੱਥੇ ਨੋਡਲ ਅਧਿਕਾਰੀ ਤਾਇਨਾਤ ਹੈ। GMCH-16 ਸਮੇਤ ਹੋਰ ਸਿਵਲ ਹਸਪਤਾਲਾਂ ਦੇ ਐਮਰਜੈਂਸੀ ਵਿਭਾਗਾਂ ਨੂੰ ਵਧੀਕ ਸਟਾਫ਼, ਦਵਾਈਆਂ ਅਤੇ ਉਪਕਰਣ ਮੁਹੱਈਆ ਕਰਵਾਏ ਗਏ ਹਨ।

ਹਸਪਤਾਲਾਂ ਦੇ ਸਾਰੇ ਕਮਿਊਨੀਕੇਸ਼ਨ ਨੈੱਟਵਰਕ ਨੂੰ ਅਪਡੇਟ ਕੀਤਾ ਗਿਆ ਹੈ, SOPs ਦੀ ਸਮੀਖਿਆ ਹੋਈ ਹੈ ਅਤੇ ਸਟਾਫ਼ ਨੂੰ ਵਿਸ਼ੇਸ਼ ਹਾਲਾਤਾਂ, ਜਿਵੇਂ ਕਿ ਬਲੈਕਆਊਟ ਵਿੱਚ ਕੰਮ ਕਰਨ ਦੀ ਟ੍ਰੇਨਿੰਗ ਦਿੱਤੀ ਗਈ ਹੈ। ਹੁਣ ਸਿਰਫ਼ ਜ਼ਰੂਰੀ ਸਰਜਰੀਆਂ ਕੀਤੀਆਂ ਜਾ ਰਹੀਆਂ ਹਨ।

ਖੂਨਦਾਨ ਅਤੇ ਸਹਿਯੋਗੀ ਨੈੱਟਵਰਕ

ਬਲੱਡ ਬੈਂਕਾਂ ਨੇ ਖੂਨਦਾਨ ਕੈਂਪ ਲਗਾ ਕੇ ਸਟਾਕ ਵਧਾਇਆ ਹੈ। ਪੀਜੀਆਈ, ਜੀਐਮਸੀਐਚ-32 ਅਤੇ ਨਿੱਜੀ ਹਸਪਤਾਲਾਂ ਦੇ ਸਹਿਯੋਗ ਨਾਲ ਨੈੱਟਵਰਕ ਬਣਾਇਆ ਗਿਆ ਹੈ। ਆਈਐਮਏ ਅਤੇ ਨਿੱਜੀ ਡਾਕਟਰਾਂ ਨਾਲ ਸੰਪਰਕ ਕਰਕੇ ਉਨ੍ਹਾਂ ਨੂੰ ਵੀ ਐਲਰਟ ਕੀਤਾ ਗਿਆ ਹੈ।

ਕਨਵੋਕੇਸ਼ਨ ਮੁਲਤਵੀ

ਸਰਕਾਰੀ ਮੈਡੀਕਲ ਕਾਲਜ (GMCH-32) ਦੀ 11ਵੀਂ ਕਨਵੋਕੇਸ਼ਨ ਜੋ ਅੱਜ ਹੋਣੀ ਸੀ, ਮੌਜੂਦਾ ਸਥਿਤੀ ਦੇ ਮੱਦੇਨਜ਼ਰ ਮੁਲਤਵੀ ਕਰ ਦਿੱਤੀ ਗਈ ਹੈ। ਕੇਂਦਰੀ ਮੰਤਰੀ ਜੇਪੀ ਨੱਡਾ ਜਾਂ ਅਨੁਪ੍ਰਿਆ ਪਟੇਲ ਦੀ ਮੌਜੂਦਗੀ ਦੀ ਉਮੀਦ ਸੀ, ਪਰ ਹੁਣ ਨਵੀਂ ਤਾਰੀਖ ਬਾਅਦ ਵਿੱਚ ਐਲਾਨੀ ਜਾਵੇਗੀ।