ਹਮਾਸ ਸ਼ਰਤਾਂ ਨਾਲ ਸਮਝੌਤਾ ਕਰਨ ਲਈ ਤਿਆਰ

ਹਮਾਸ ਵੱਲੋਂ ਸੰਕੇਤ: "ਸਥਾਈ ਜੰਗਬੰਦੀ ਹੋਵੇ, ਸਾਰੇ ਬੰਧਕ ਰਿਹਾਅ ਹੋਣ"

ਇਜ਼ਰਾਈਲ ਦੀ ਫੌਜੀ ਵਾਪਸੀ, ਫਲਸਤੀਨੀ ਕੈਦੀਆਂ ਦੀ ਰਿਹਾਈ ਅਤੇ ਗਾਜ਼ਾ ਦੇ ਪੁਨਰ-ਨਿਰਮਾਣ ਦੀ ਮੰਗ

ਗਾਜ਼ਾ : ਫਲਸਤੀਨੀ ਗਠਜੋੜ ਹਮਾਸ ਨੇ ਗਾਜ਼ਾ ਵਿੱਚ ਚੱਲ ਰਹੀ ਜੰਗ ਖ਼ਤਮ ਕਰਨ ਲਈ ਇੱਕ ਵਿਆਪਕ ਸੰਝੌਤੇ ਦੀ ਪੇਸ਼ਕਸ਼ ਕੀਤੀ ਹੈ, ਜਿਸ ਵਿੱਚ ਸਭ ਇਜ਼ਰਾਈਲੀ ਬੰਧਕਾਂ ਦੀ ਰਿਹਾਈ, ਇਜ਼ਰਾਈਲ ਵਿੱਚ ਬੰਦ ਫਲਸਤੀਨੀ ਕੈਦੀਆਂ ਦੀ ਮੁਕਤੀ, ਫੌਜੀ ਵਾਪਸੀ ਅਤੇ ਗਾਜ਼ਾ ਦੇ ਪੁਨਰ ਨਿਰਮਾਣ ਦੀ ਗਰੰਟੀ ਦੀ ਮੰਗ ਸ਼ਾਮਲ ਹੈ।

ਅਸਥਾਈ ਨਹੀਂ, ਸਥਾਈ ਜੰਗਬੰਦੀ ਚਾਹੀਦੀ: ਹਮਾਸ

ਹਮਾਸ ਦੇ ਸੀਨੀਅਰ ਆਗੂ ਖਲੀਲ ਅਲ-ਹਯਾ ਨੇ ਵੀਰਵਾਰ ਨੂੰ ਇੱਕ ਟੈਲੀਵਿਜ਼ਨ ਸੰਬੋਧਨ ਦੌਰਾਨ ਕਿਹਾ ਕਿ ਉਨ੍ਹਾਂ ਦੀ ਸੰਘਠਨ ਇਜ਼ਰਾਈਲ ਦੀ ਅਸਥਾਈ 45 ਦਿਨਾਂ ਜੰਗਬੰਦੀ ਯੋਜਨਾ ਨੂੰ ਰੱਦ ਕਰਦੀ ਹੈ, ਕਿਉਂਕਿ ਇਸ ਵਿੱਚ "ਹਥਿਆਰ ਸੁੱਟਣ" ਜਿਹੀ ਅਸਵੀਕਾਰਯੋਗ ਸ਼ਰਤ ਸ਼ਾਮਲ ਹੈ। ਉਨ੍ਹਾਂ ਇਜ਼ਰਾਈਲ 'ਤੇ ਦੋਸ਼ ਲਾਇਆ ਕਿ ਪ੍ਰਧਾਨ ਮੰਤਰੀ ਨੇਤਨਯਾਹੂ ਜੰਗਬੰਦੀ ਦੀ ਵਰਤੋਂ ਸਿਰਫ਼ ਰਾਜਨੀਤਿਕ ਲਾਭ ਲਈ ਕਰ ਰਹੇ ਹਨ।

"ਅਸੀਂ ਅਜਿਹੇ ਕਿਸੇ ਵੀ ਅੰਸ਼ਕ ਸਮਝੌਤੇ ਦਾ ਹਿੱਸਾ ਨਹੀਂ ਬਣਾਂਗੇ ਜੋ ਕਤਲੇਆਮ, ਭੁੱਖਮਰੀ ਅਤੇ ਲੰਮੇ ਯੁੱਧ ਨੂੰ ਲੰਬਾ ਕਰਨ ਲਈ ਬਣਾਏ ਗਏ ਹੋਣ," — ਖਲੀਲ ਅਲ-ਹਯਾ, ਹਮਾਸ ਆਗੂ

ਕਾਹਿਰਾ ਵਿੱਚ ਚੱਲੀਆਂ ਤਾਜ਼ਾ ਗੱਲਬਾਤਾਂ ਕਿਸੇ ਨਤੀਜੇ ਤੇ ਨਹੀਂ ਪਹੁੰਚ ਸਕੀਆਂ। ਹਮਾਸ ਨੇ ਸਪੱਸ਼ਟ ਕੀਤਾ ਕਿ ਜਦ ਤੱਕ ਇਜ਼ਰਾਈਲ ਸਥਾਈ ਤੌਰ 'ਤੇ ਜੰਗ ਖਤਮ ਕਰਨ 'ਤੇ ਸਹਿਮਤ ਨਹੀਂ ਹੁੰਦਾ, ਉਹ ਬਾਕੀ 59 ਬੰਧਕਾਂ ਨੂੰ ਰਿਹਾਅ ਨਹੀਂ ਕਰੇਗਾ।

ਇਜ਼ਰਾਈਲੀ ਹਮਲੇ ਤੇਜ਼, ਨਾਗਰਿਕਾਂ 'ਤੇ ਵੱਧ ਰਿਹਾ ਦਬਾਅ

ਇਜ਼ਰਾਈਲੀ ਫੌਜ ਵੱਲੋਂ ਗਾਜ਼ਾ ਵਿੱਚ ਹਮਲੇ ਜਾਰੀ ਹਨ। ਵੀਰਵਾਰ ਨੂੰ 32 ਫਲਸਤੀਨੀ, ਜਿਨ੍ਹਾਂ 'ਚ ਔਰਤਾਂ ਅਤੇ ਬੱਚੇ ਵੀ ਸ਼ਾਮਲ ਹਨ, ਮਾਰੇ ਗਏ। ਜਬਾਲੀਆ ਵਿੱਚ ਸੰਯੁਕਤ ਰਾਸ਼ਟਰ ਦੇ ਇੱਕ ਸਕੂਲ 'ਤੇ ਹਮਲੇ ਵਿੱਚ 6 ਵਿਅਕਤੀ ਮਾਰੇ ਗਏ। ਇਜ਼ਰਾਈਲ ਦਾ ਦਾਅਵਾ ਹੈ ਕਿ ਉੱਥੇ ਹਮਾਸ ਦਾ ਕਮਾਂਡ ਸੈਂਟਰ ਸੀ।

ਇਸ ਦੌਰਾਨ, ਹਮਾਸ ਨੇ ਦੱਸਿਆ ਕਿ ਇਜ਼ਰਾਈਲੀ-ਅਮਰੀਕੀ ਸੈਨਿਕ ਅਦਨ ਅਲੈਗਜ਼ੈਂਡਰ ਨਾਲ ਸੰਪਰਕ ਟੁੱਟ ਗਿਆ ਹੈ, ਸੰਭਾਵਨਾ ਹੈ ਕਿ ਉਨ੍ਹਾਂ ਨੂੰ ਰੱਖੀ ਗਈ ਥਾਂ 'ਤੇ ਇਜ਼ਰਾਈਲ ਨੇ ਹਮਲਾ ਕੀਤਾ।

ਸੰਘਰਸ਼ ਦਾ ਪਿਛੋਕੜ

ਯੁੱਧ ਦੀ ਸ਼ੁਰੂਆਤ 7 ਅਕਤੂਬਰ 2023 ਨੂੰ ਹੋਈ ਸੀ, ਜਦ ਹਮਾਸ ਨੇ ਦੱਖਣੀ ਇਜ਼ਰਾਈਲ 'ਤੇ ਹਮਲਾ ਕੀਤਾ ਸੀ, ਜਿਸ 'ਚ 1,200 ਲੋਕ ਮਾਰੇ ਗਏ ਅਤੇ 251 ਬੰਧਕ ਬਣਾਏ ਗਏ। ਜਵਾਬ ਵਜੋਂ ਇਜ਼ਰਾਈਲ ਵੱਲੋਂ ਚਲਾਈ ਵਿਸ਼ਾਲ ਫੌਜੀ ਮੁਹਿੰਮ ਦੌਰਾਨ ਹੁਣ ਤੱਕ 51,000 ਤੋਂ ਵੱਧ ਫਲਸਤੀਨੀ ਮਾਰੇ ਜਾ ਚੁੱਕੇ ਹਨ।

ਇਜ਼ਰਾਈਲ ਵਿੱਚ ਵਧ ਰਹੀ ਮੰਗ

ਤੇਲ ਅਵੀਵ ਸਮੇਤ ਕਈ ਸ਼ਹਿਰਾਂ ਵਿੱਚ ਜਨਤਾ ਵੱਲੋਂ ਵੱਡੇ ਪੱਧਰ 'ਤੇ ਪ੍ਰਦਰਸ਼ਨ ਹੋ ਰਹੇ ਹਨ, ਜੋ ਬੰਧਕਾਂ ਦੀ ਸੁਰੱਖਿਅਤ ਰਿਹਾਈ ਦੀ ਮੰਗ ਕਰ ਰਹੇ ਹਨ। ਸਾਬਕਾ ਮੋਸਾਦ, ਹਵਾਈ ਸੈਨਾ ਅਤੇ ਸੇਨਾ ਦੇ ਅਧਿਕਾਰੀ ਵੀ ਸਰਕਾਰ 'ਤੇ ਦਬਾਅ ਪਾ ਰਹੇ ਹਨ ਕਿ ਜੰਗ ਦੀ ਥਾਂ ਬੰਧਕਾਂ ਦੀ ਰਿਹਾਈ ਨੂੰ ਤਰਜੀਹ ਦਿੱਤੀ ਜਾਵੇ।

"ਇਹ ਹਾਲਤ ਦਿਲ ਦਹਿਲਾ ਦੇਣ ਵਾਲੀ ਹੈ। ਅਸੀਂ ਚਾਹੁੰਦੇ ਹਾਂ ਕਿ ਸਾਡੇ ਆਪਣੇ ਘਰ ਵਾਪਸ ਆਉਣ," — ਯੋਨਾ ਸ਼ਨੀਤਜ਼ਰ, ਪ੍ਰਦਰਸ਼ਨਕਾਰੀ