ਗੂਗਲ ਮੈਪ 'ਨੇ ਪਹੁੰਚਾ ਦਿੱਤਾ ਮੌਤ ਦੇ ਮੂੰਹ ਤੱਕ

ਗੂਗਲ ਮੈਪ ਨੇ ਗਲਤ ਰਸਤਾ ਵਿਖਾਇਆ, ਕਾਰ ਰੇਲਵੇ ਟਰੈਕ 'ਤੇ ਫਸੀ – ਵੱਡਾ ਹਾਦਸਾ ਰੁਕਿਆ, ਨੌਜਵਾਨ ਗ੍ਰਿਫ਼ਤਾਰ

ਗੋਰਖਪੁਰ, 9 ਅਪ੍ਰੈਲ 2025 – ਸੋਮਵਾਰ ਦੇਰ ਰਾਤ ਇੱਕ ਨੌਜਵਾਨ ਗੂਗਲ ਮੈਪ ਦੀ ਸਹਾਇਤਾ ਨਾਲ ਘਰ ਵਾਪਸ ਜਾਂਦਿਆਂ ਗਲਤ ਰਸਤੇ 'ਤੇ ਰੁਖ ਕਰ ਗਿਆ ਅਤੇ ਆਪਣੀ ਕਾਰ ਸਿੱਧੀ ਰੇਲਵੇ ਟਰੈਕ 'ਤੇ ਲੈ ਗਿਆ। ਇਹ ਘਟਨਾ ਡੋਮਿਨਗੜ੍ਹ ਡੈਮ ਨੇੜੇ ਵਾਪਰੀ, ਜਿੱਥੇ ਨੌਜਵਾਨ ਦੀ ਕਾਰ ਟਰੈਕ 'ਤੇ ਫਸ ਗਈ ਅਤੇ ਸਾਹਮਣੇ ਤੋਂ ਇੱਕ ਮਾਲ ਗੱਡੀ ਆਉਂਦੀ ਵੇਖੀ ਗਈ।

ਮੌਕੇ ਦੀ ਸੂਚਨਾ ਮਿਲਦਿਆਂ, ਰੇਲ ਗੱਡੀ ਦੇ ਲੋਕੋ ਪਾਇਲਟ ਨੇ ਤੁਰੰਤ ਐਮਰਜੈਂਸੀ ਬ੍ਰੇਕ ਲਗਾ ਕੇ ਮਾਲਗੱਡੀ ਨੂੰ ਰੋਕ ਦਿੱਤਾ। ਹਾਲਾਂਕਿ ਇੰਜਣ ਕਾਰ ਨੂੰ ਹਲਕਾ ਛੂਹ ਗਿਆ, ਪਰ ਕਿਸੇ ਵੱਡੀ ਟੱਕਰ ਤੋਂ ਬਚਾਅ ਹੋ ਗਿਆ। ਇਸ ਦੌਰਾਨ, ਆਰਪੀਐਫ ਟੀਮ ਨੇ ਮੌਕੇ 'ਤੇ ਪਹੁੰਚ ਕੇ ਕਾਰ ਚਾਲਕ ਨੂੰ ਬਾਹਰ ਕੱਢਿਆ ਤੇ ਪੁੱਛਗਿੱਛ ਲਈ ਚੌਕੀ ਲੈ ਗਈ।

ਨੌਜਵਾਨ ਦੀ ਪਛਾਣ ਆਦਰਸ਼ ਰਾਏ ਵਜੋਂ ਹੋਈ ਹੈ, ਜੋ ਬਿਹਾਰ ਦੇ ਗੋਪਾਲਗੰਜ ਜ਼ਿਲ੍ਹੇ ਦੇ ਗੋਪਾਲਪੁਰ ਦਾ ਰਹਿਣ ਵਾਲਾ ਹੈ। ਪੁੱਛਗਿੱਛ ਦੌਰਾਨ ਉਸਨੇ ਦੱਸਿਆ ਕਿ ਉਹ ਗੋਰਖਪੁਰ ਆਪਣੇ ਦੋਸਤਾਂ ਨਾਲ ਪਾਰਟੀ ਕਰਨ ਆਇਆ ਸੀ। ਰਾਤ ਕਰਕੇ ਉਹ ਗੂਗਲ ਮੈਪ ਦੀ ਮਦਦ ਨਾਲ ਘਰ ਵਾਪਸ ਜਾ ਰਿਹਾ ਸੀ, ਪਰ ਨਕਸ਼ੇ ਨੇ ਗਲਤ ਪਿੰਡ ਵਿਖਾ ਦਿੱਤਾ – ਬਿਹਾਰ ਦੇ ਗੋਪਾਲਪੁਰ ਦੀ ਥਾਂ ਗੋਰਖਪੁਰ ਦੇ ਗੋਪਾਲਪੁਰ ਦੀ ਦਿਸ਼ਾ ਲੈ ਲਈ।

ਕਾਰ ਚਲਾਉਂਦੇ ਹੋਏ ਜਦ ਉਹ ਡੋਮਿਨਗੜ੍ਹ ਡੈਮ ਨੇੜੇ ਰੇਲਵੇ ਟਰੈਕ 'ਤੇ ਆਇਆ, ਤਾਂ ਉਸਨੇ ਟਰੈਕ ਪਾਰ ਕਰਨ ਦੀ ਕੋਸ਼ਿਸ਼ ਕੀਤੀ। ਇਸ ਦੌਰਾਨ ਕਾਰ ਦਾ ਅਗਲਾ ਪਹੀਆ ਬੈਲੇਸਟ ਵਿੱਚ ਫਸ ਗਿਆ। ਮਾਲਗੱਡੀ ਵੱਲੋਂ ਤੁਰੰਤ ਕਾਰਵਾਈ ਕਰਕੇ ਹਾਦਸਾ ਟਲ ਗਿਆ, ਪਰ ਟਰੈਕ ਤੇ 55 ਮਿੰਟ ਤੱਕ ਮਾਲਗੱਡੀ ਖੜ੍ਹੀ ਰਹੀ।

ਆਰਪੀਐਫ ਨੇ ਕਾਰ BR-01 HQ 4957 ਨੂੰ ਜ਼ਬਤ ਕਰ ਲਿਆ ਹੈ, ਤੇ ਨੌਜਵਾਨ ਖ਼ਿਲਾਫ ਰੇਲਵੇ ਐਕਟ ਤਹਿਤ ਕੇਸ ਦਰਜ ਕਰਕੇ ਮੰਗਲਵਾਰ ਨੂੰ ਅਦਾਲਤ 'ਚ ਪੇਸ਼ ਕੀਤਾ ਗਿਆ, ਜਿਥੋਂ ਜ਼ਮਾਨਤ ਮਿਲ ਗਈ। ਡਾਕਟਰੀ ਜਾਂਚ ਦੌਰਾਨ ਪੁਸ਼ਟੀ ਹੋਈ ਕਿ ਨੌਜਵਾਨ ਨੇ ਸ਼ਰਾਬ ਸੇਵਨ ਕੀਤਾ ਹੋਇਆ ਸੀ।

ਆਰਪੀਐਫ ਇੰਚਾਰਜ ਦਸ਼ਰਥ ਪ੍ਰਸਾਦ ਨੇ ਕਿਹਾ ਕਿ ਇਹ ਇੱਕ ਗੰਭੀਰ ਮਾਮਲਾ ਸੀ। ਗਲਤ ਨਕਸ਼ਾ ਤੇ ਲਾਪਰਵਾਹੀ ਕਾਰਨ ਕਈਆਂ ਦੀ ਜਾਨ ਤੇ ਬਣ ਸਕਦੀ ਸੀ। ਉਨ੍ਹਾਂ ਵੱਲੋਂ ਨੌਜਵਾਨ ਨੂੰ ਸਖ਼ਤ ਚੇਤਾਵਨੀ ਦਿੱਤੀ ਗਈ ਅਤੇ ਵਾਹਨ ਨੂੰ ਰਾਹ ਤੋਂ ਹਟਾ ਕੇ ਮਾਲਗੱਡੀ ਨੂੰ ਸਵੇਰੇ 2 ਵਜੇ ਰਵਾਨਾ ਕੀਤਾ ਗਿਆ।