ਗਾਜ਼ੀਆਬਾਦ ਖੁਦਕੁਸ਼ੀ ਮਾਮਲਾ: ਪਿਤਾ ਨੇ ਰੋਂਦਿਆਂ ਸੁਣਾਈ ਰੂਹ ਕੰਬਾਊ ਦਾਸਤਾਨ

ਗਾਜ਼ੀਆਬਾਦ, 4 ਫਰਵਰੀ, 2026: ਦਿੱਲੀ ਦੇ ਨਾਲ ਲੱਗਦੇ ਗਾਜ਼ੀਆਬਾਦ ਵਿੱਚ ਤਿੰਨ ਨਾਬਾਲਗ ਭੈਣਾਂ ਵੱਲੋਂ 9ਵੀਂ ਮੰਜ਼ਿਲ ਤੋਂ ਛਾਲ ਮਾਰ ਕੇ ਕੀਤੀ ਗਈ ਖੁਦਕੁਸ਼ੀ ਦੇ ਮਾਮਲੇ ਵਿੱਚ ਇੱਕ ਦਰਦਨਾਕ ਖੁਲਾਸਾ ਹੋਇਆ ਹੈ। ਮ੍ਰਿਤਕ ਬੱਚੀਆਂ ਦੇ ਪਿਤਾ ਨੇ ਮੀਡੀਆ ਸਾਹਮਣੇ ਰੋਂਦਿਆਂ ਦੱਸਿਆ ਕਿ ਇਹ ਕੋਈ ਸਾਧਾਰਨ ਖੁਦਕੁਸ਼ੀ ਨਹੀਂ, ਸਗੋਂ ਇੱਕ ਖ਼ਤਰਨਾਕ 'ਕੋਰੀਅਨ ਲਵ ਗੇਮ' ਦਾ ਨਤੀਜਾ ਹੈ। ਇਸ ਗੇਮ ਵਿੱਚ ਬੱਚਿਆਂ ਨੂੰ 50 ਦਿਨਾਂ ਵਿੱਚ 50 ਟਾਸਕ ਪੂਰੇ ਕਰਨੇ ਪੈਂਦੇ ਸਨ ਅਤੇ 50ਵਾਂ ਟਾਸਕ ਮੌਤ ਦੀ ਛਾਲ ਸੀ।

ਵਿਚਕਾਰਲੀ ਭੈਣ ਸੀ 'ਕਮਾਂਡਰ'

ਪਿਤਾ ਨੇ ਦੱਸਿਆ ਕਿ ਉਨ੍ਹਾਂ ਦੀਆਂ ਤਿੰਨੋਂ ਧੀਆਂ (16, 14 ਅਤੇ 12 ਸਾਲ) ਇੱਕ-ਦੂਜੇ ਦੇ ਬਹੁਤ ਕਰੀਬ ਸਨ ਅਤੇ ਸਭ ਕੁਝ ਇਕੱਠੇ ਕਰਦੀਆਂ ਸਨ। ਫੋਨ ਦੀ ਜਾਂਚ ਤੋਂ ਪਤਾ ਲੱਗਾ ਕਿ ਵਿਚਕਾਰਲੀ ਧੀ (14 ਸਾਲ) ਇਸ ਗੇਮ ਵਿੱਚ 'ਕਮਾਂਡਰ' ਜਾਂ 'ਬੌਸ' ਵਜੋਂ ਕੰਮ ਕਰ ਰਹੀ ਸੀ। ਵੱਡੀ ਅਤੇ ਛੋਟੀ ਭੈਣ ਉਸ ਦੇ ਹਰ ਹੁਕਮ ਦੀ ਪਾਲਣਾ ਕਰਦੀਆਂ ਸਨ। ਪਿਤਾ ਅਨੁਸਾਰ, ਉਨ੍ਹਾਂ ਨੇ ਵਿਚਕਾਰਲੀ ਭੈਣ ਦੇ ਕਹਿਣ 'ਤੇ ਹੀ ਇਹ ਭਿਆਨਕ ਕਦਮ ਚੁੱਕਿਆ। ਉਹ ਇੰਨੀਆਂ ਜ਼ਿਆਦਾ ਪ੍ਰਭਾਵਿਤ ਸਨ ਕਿ ਅਕਸਰ ਕੋਰੀਆ ਜਾਣ ਦੀਆਂ ਗੱਲਾਂ ਕਰਦੀਆਂ ਸਨ।

ਘਟਨਾ ਵਾਲੀ ਰਾਤ ਦਾ ਮੰਜ਼ਰ

ਉਸ ਮੰਦਭਾਗੀ ਰਾਤ ਨੂੰ ਯਾਦ ਕਰਦਿਆਂ ਪਿਤਾ ਨੇ ਦੱਸਿਆ ਕਿ ਰਾਤ ਦੇ ਕਰੀਬ 2 ਵਜੇ ਬੱਚੀਆਂ ਨੇ ਪਾਣੀ ਪੀਣ ਦੇ ਬਹਾਨੇ ਕਮਰੇ ਦਾ ਦਰਵਾਜ਼ਾ ਅੰਦਰੋਂ ਬੰਦ ਕਰ ਲਿਆ। ਇਸ ਤੋਂ ਪਹਿਲਾਂ ਇੱਕ ਧੀ ਨੇ ਆਪਣੀ ਮਾਂ ਨੂੰ ਬਹੁਤ ਪਿਆਰ ਨਾਲ ਚੁੰਮਿਆ ਸੀ, ਜਿਵੇਂ ਉਹ ਆਖਰੀ ਵਿਦਾਇਗੀ ਲੈ ਰਹੀ ਹੋਵੇ। ਕੁਝ ਹੀ ਮਿੰਟਾਂ ਵਿੱਚ ਤਿੰਨਾਂ ਨੇ ਬਾਲਕੋਨੀ ਤੋਂ ਛਾਲ ਮਾਰ ਦਿੱਤੀ। ਉਨ੍ਹਾਂ ਦੇ ਫੋਨ ਵਿੱਚੋਂ ਇੱਕ ਸੁਸਾਈਡ ਨੋਟ ਵੀ ਮਿਲਿਆ ਹੈ, ਜਿਸ ਵਿੱਚ ਲਿਖਿਆ ਸੀ, "ਸਾਨੂੰ ਮਾਫ਼ ਕਰਨਾ, ਅਸੀਂ ਕੋਰੀਅਨ ਗੇਮ ਨਹੀਂ ਛੱਡ ਸਕਦੇ, ਇਸ ਲਈ ਅਸੀਂ ਜਾ ਰਹੇ ਹਾਂ।"

ਮਾਪਿਆਂ ਤੋਂ ਬਣਾਈ ਹੋਈ ਸੀ ਦੂਰੀ

ਪਿਤਾ ਨੇ ਦੱਸਿਆ ਕਿ ਪਿਛਲੇ ਦੋ ਸਾਲਾਂ ਤੋਂ ਬੱਚੀਆਂ ਨੇ ਸਕੂਲ ਜਾਣਾ ਬੰਦ ਕਰ ਦਿੱਤਾ ਸੀ। ਉਹ ਜ਼ਿਆਦਾਤਰ ਸਮਾਂ ਕਮਰੇ ਵਿੱਚ ਇਕੱਲੀਆਂ ਰਹਿ ਕੇ ਮੋਬਾਈਲ ਗੇਮਾਂ ਖੇਡਦੀਆਂ ਸਨ। ਜਦੋਂ ਵੀ ਮਾਪੇ ਕਮਰੇ ਵਿੱਚ ਆਉਂਦੇ, ਉਹ ਫੋਨ ਛੁਪਾ ਲੈਂਦੀਆਂ ਜਾਂ ਉੱਥੋਂ ਚਲੀਆਂ ਜਾਂਦੀਆਂ। ਪਿਤਾ ਨੇ ਭਰੇ ਮਨ ਨਾਲ ਕਿਹਾ ਕਿ ਉਨ੍ਹਾਂ ਨੂੰ ਅੰਦਾਜ਼ਾ ਵੀ ਨਹੀਂ ਸੀ ਕਿ ਬੱਚੇ ਮੋਬਾਈਲ 'ਤੇ ਮੌਤ ਦੀ ਖੇਡ ਖੇਡ ਰਹੇ ਹਨ। ਪੁਲਿਸ ਅਤੇ ਫੋਰੈਂਸਿਕ ਟੀਮ ਇਸ ਮਾਮਲੇ ਦੀ ਡੂੰਘਾਈ ਨਾਲ ਜਾਂਚ ਕਰ ਰਹੀ ਹੈ ਤਾਂ ਜੋ ਅਜਿਹੀਆਂ ਘਾਤਕ ਗੇਮਾਂ ਦੇ ਨੈੱਟਵਰਕ ਦਾ ਪਤਾ ਲਗਾਇਆ ਜਾ ਸਕੇ।