peace talks ਫ਼ੇਲ੍ਹ ਹੋਣਾ ਈਰਾਨ ਲਈ ਬੁਰੀ ਖ਼ਬਰ ਹੈ : ਜੇ.ਡੀ. ਵੈਂਸ

ਵਾਸ਼ਿੰਗਟਨ, 12 ਅਪ੍ਰੈਲ: ਇਸਲਾਮਾਬਾਦ ਵਿੱਚ ਅਮਰੀਕਾ ਅਤੇ ਇਰਾਨ ਵਿਚਕਾਰ ਹੋਈ ਲੰਬੀ ਵਾਰਤਾ ਦਾ ਕੋਈ ਠੋਸ ਨਤੀਜਾ ਨਹੀਂ ਨਿਕਲਿਆ। ਲਗਭਗ 21 ਘੰਟਿਆਂ ਤੱਕ ਚੱਲੀ ਇਸ ਗੱਲਬਾਤ ਤੋਂ ਬਾਅਦ, ਅਮਰੀਕੀ ਉਪ ਰਾਸ਼ਟਰਪਤੀ ਜੇ.ਡੀ. ਵੈਂਸ ਨੇ ਸਪਸ਼ਟ ਤੌਰ ‘ਤੇ ਕਿਹਾ ਕਿ ਵਾਰਤਾ ਵਿੱਚ ਕੋਈ ਮਹੱਤਵਪੂਰਨ ਤਰੱਕੀ ਨਹੀਂ ਹੋਈ ਅਤੇ ਦੋਵੇਂ ਪੱਖ ਬਿਨਾਂ ਕਿਸੇ ਸਮਝੌਤੇ ਦੇ ਵਾਪਸ ਪਰਤ ਰਹੇ ਹਨ। ਇਸ ਦੌਰਾਨ, ਮੱਧ ਪੂਰਬ ਵਿੱਚ ਸੀਜ਼ਫਾਇਰ ਦੀ ਸਥਿਤੀ ਵੀ ਬਹੁਤ ਨਾਜ਼ੁਕ ਬਣੀ ਹੋਈ ਹੈ। ਜੇਡੀ ਵੈਂਸ ਨੇ ਕਿਹਾ ਸ਼ਾਂਤੀ ਗੱਲਬਾਤ ਫ਼ੇਲ੍ਹ ਹੋਣਾ ਅਮਰੀਕਾ ਲਈ ਨਹੀਂ ਇਹ ਈਰਾਨ ਲਈ ਬੁਰੀ ਖ਼ਬਰ ਹੈ।

ਅਮਰੀਕਾ ਦੀਆਂ ‘ਰੇਡ ਲਾਈਨਜ਼’ ਸਪਸ਼ਟ ਹਨ

ਪ੍ਰੈਸ ਬ੍ਰੀਫਿੰਗ ਵਿੱਚ ਵੈਂਸ ਨੇ ਦੱਸਿਆ ਕਿ ਇਰਾਨ ਨੇ ਅਮਰੀਕਾ ਵੱਲੋਂ ਰੱਖੀਆਂ ਗਈਆਂ ਸ਼ਰਤਾਂ ਨੂੰ ਮੰਨਣ ਤੋਂ ਇਨਕਾਰ ਕਰ ਦਿੱਤਾ। ਉਨ੍ਹਾਂ ਨੇ ਇਹ ਵੀ ਕਿਹਾ ਕਿ ਅਮਰੀਕਾ ਨੇ ਇਮਾਨਦਾਰੀ ਨਾਲ ਸਮਝੌਤੇ ਦੀ ਕੋਸ਼ਿਸ਼ ਕੀਤੀ, ਪਰ ਗੱਲਬਾਤ ਅੱਗੇ ਨਹੀਂ ਵੱਧ ਸਕੀ। ਵੈਂਸ ਨੇ ਇਹ ਸਪਸ਼ਟ ਕੀਤਾ ਕਿ ਅਮਰੀਕਾ ਨੇ ਆਪਣੀਆਂ ‘ਰੇਡ ਲਾਈਨਜ਼’ ਪਹਿਲਾਂ ਹੀ ਤੈਅ ਕਰ ਦਿੱਤੀਆਂ ਸਨ, ਜਿਨ੍ਹਾਂ ਵਿੱਚ ਉਹ ਮੁੱਦੇ ਸ਼ਾਮਲ ਸਨ ਜਿਨ੍ਹਾਂ ‘ਤੇ ਸਮਝੌਤਾ ਹੋ ਸਕਦਾ ਸੀ ਅਤੇ ਜਿਨ੍ਹਾਂ ‘ਤੇ ਨਹੀਂ। ਇਸਦੇ ਬਾਵਜੂਦ, ਇਰਾਨ ਨੇ ਇਹ ਸ਼ਰਤਾਂ ਕਬੂਲ ਨਹੀਂ ਕੀਤੀਆਂ।

ਜਦੋਂ ਇਰਾਨ ਦੇ ਇਨਕਾਰ ਦੇ ਕਾਰਨਾਂ ‘ਤੇ ਚਰਚਾ ਕੀਤੀ ਗਈ, ਤਾਂ ਵੈਂਸ ਨੇ ਕਿਹਾ ਕਿ ਅਮਰੀਕਾ ਦੀ ਮੁੱਖ ਮੰਗ ਇਹ ਸੀ ਕਿ ਇਰਾਨ ਭਵਿੱਖ ਵਿੱਚ ਪਰਮਾਣੂ ਹਥਿਆਰਾਂ ਦੇ ਵਿਕਾਸ ਤੋਂ ਸਪਸ਼ਟ ਤੌਰ ‘ਤੇ ਦੂਰ ਰਹਿਣ ਦਾ ਵਾਅਦਾ ਕਰੇ। ਉਨ੍ਹਾਂ ਨੇ ਦੱਸਿਆ ਕਿ ਅਮਰੀਕਾ ਚਾਹੁੰਦਾ ਸੀ ਕਿ ਇਰਾਨ ਨਾ ਸਿਰਫ਼ ਆਪਣਾ ਮੌਜੂਦਾ ਪਰਮਾਣੂ ਪ੍ਰੋਗਰਾਮ ਰੋਕ ਦੇਵੇ, ਸਗੋਂ ਕਿਸੇ ਵੀ ਅਜਿਹੀ ਸਮਰੱਥਾ ਜਾਂ ਸਾਜ਼ੋ-ਸਾਮਾਨ ਨੂੰ ਵੀ ਹਾਸਲ ਨਾ ਕਰੇ, ਜਿਸ ਨਾਲ ਉਹ ਤੇਜ਼ੀ ਨਾਲ ਪਰਮਾਣੂ ਹਥਿਆਰ ਤਿਆਰ ਕਰਨ ਦੇ ਯੋਗ ਹੋ ਸਕੇ।

ਸਾਨੂੰ ਕੋਈ ਫ਼ਰਕ ਨਹੀਂ ਪੈਂਦਾ ਟਰੰਪ

ਗੱਲਬਾਤ ਫੇਲ੍ਹ ਹੋਣ ’ਤੇ ਜੇ.ਡੀ. ਵੈਂਸ ਦਾ ਇਹ ਬਿਆਨ ਰਾਸ਼ਟਰਪਤੀ ਟਰੰਪ ਦੀ ਆਈ ਟਿੱਪਣੀ ਤੋਂ ਬਾਅਦ ਆਇਆ ਹੈ। ਡੋਨਾਲਡ ਟਰੰਪ ਨੇ ਕਿਹਾ ਸੀ ਕਿ ਜੇ ਸਾਡੀਆਂ ਸ਼ਰਤਾਂ ’ਤੇ ਸਮਝੋਤਾ ਨਹੀਂ ਹੁੰਦਾ ਤਾਂ ਸਾਨੂੰ ਇਸ ਨਾਲ ਕੋਈ ਫਰਕ ਨਹੀਂ ਪੈਂਦਾ। ਵੈਂਸ ਦੇ ਮੁਤਾਬਕ, ਇਰਾਨ ਵੱਲੋਂ ਕੋਈ ਵੀ ਅਜਿਹਾ ਪੱਕਾ ਭਰੋਸਾ ਨਹੀਂ ਮਿਲਿਆ ਜੋ ਇਹ ਦਰਸਾਏ ਕਿ ਉਹ ਆਉਣ ਵਾਲੇ ਸਾਲਾਂ ਵਿੱਚ ਪਰਮਾਣੂ ਹਥਿਆਰਾਂ ਦੇ ਵਿਕਾਸ ਵੱਲ ਨਹੀਂ ਵੱਧੇਗਾ। ਇਹੀ ਕਾਰਨ ਸੀ ਕਿ ਗੱਲਬਾਤ ਵਿੱਚ ਜਾਮ ਪੈ ਗਿਆ ਅਤੇ ਇਹ ਇੱਕ ਮਹੱਤਵਪੂਰਨ ਮੁੱਦਾ ਬਣ ਗਿਆ।

ਹਾਲਾਂਕਿ, ਵਿਸ਼ੇਸ਼ਗਿਆਨ ਮੰਨਦੇ ਹਨ ਕਿ ਸ਼ਾਂਤੀ ਵਾਰਤਾ ਦੇ ਅਸਫਲ ਹੋਣ ਨਾਲ ਮੱਧ ਪੂਰਬ ਵਿੱਚ ਤਣਾਅ ਹੋਰ ਵੱਧ ਸਕਦਾ ਹੈ। ਜੇ ਜਲਦੀ ਕੋਈ ਕੂਟਨੀਤਿਕ ਹੱਲ ਨਾ ਨਿਕਲਿਆ, ਤਾਂ ਖੇਤਰ ਵਿੱਚ ਸਥਿਤੀ ਹੋਰ ਵੀ ਗੰਭੀਰ ਹੋ ਸਕਦੀ ਹੈ ਅਤੇ ਸੰਭਾਵਿਤ ਟਕਰਾਅ ਦਾ ਖ਼ਤਰਾ ਵਧ ਸਕਦਾ ਹੈ।