Islamabad 'ਚ ਡਿਪਲੋਮੈਟਿਕ ਡਰਾਮਾ: Iran ਨੂੰ Pakistan 'ਤੇ ਭਰੋਸਾ ਨਹੀਂ, ਸੁਰੱਖਿਆ ਲਈ ਭੇਜੇ 'ਡਮੀ' ਜਹਾਜ਼

ਇਸਲਾਮਾਬਾਦ: ਅਮਰੀਕਾ ਅਤੇ ਈਰਾਨ ਵਿਚਾਲੇ ਚੱਲ ਰਹੀ ਸ਼ਾਂਤੀ ਵਾਰਤਾ ਦੌਰਾਨ ਇਸਲਾਮਾਬਾਦ ਵਿੱਚ ਇੱਕ ਬੇਹੱਦ ਹੈਰਾਨ ਕਰਨ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ। ਈਰਾਨ ਨੂੰ ਪਾਕਿਸਤਾਨ ਦੀ ਸੁਰੱਖਿਆ ਪ੍ਰਣਾਲੀ 'ਤੇ ਇੰਨਾ ਘੱਟ ਭਰੋਸਾ ਹੈ ਕਿ ਉਨ੍ਹਾਂ ਨੇ ਆਪਣੇ ਵਾਰਤਾਕਾਰਾਂ ਨੂੰ ਇਸਲਾਮਾਬਾਦ ਭੇਜਣ ਲਈ ਕਈ 'ਨਕਲੀ' (Dummy) ਜਹਾਜ਼ਾਂ ਦਾ ਇਸਤੇਮਾਲ ਕੀਤਾ। ਮੀਡੀਆ ਰਿਪੋਰਟਾਂ ਮੁਤਾਬਕ, ਈਰਾਨ ਨੂੰ ਡਰ ਸੀ ਕਿ ਪਾਕਿਸਤਾਨ ਵਿੱਚ ਉਨ੍ਹਾਂ ਦੇ ਵਫ਼ਦ 'ਤੇ ਹਵਾਈ ਹਮਲਾ ਹੋ ਸਕਦਾ ਹੈ, ਇਸ ਲਈ ਸਿਰਫ਼ ਇੱਕ ਹੀ ਜਹਾਜ਼ ਵਿੱਚ ਅਸਲ ਵਫ਼ਦ ਸੀ, ਜਦਕਿ ਬਾਕੀ ਜਹਾਜ਼ ਸਿਰਫ਼ ਸੁਰੱਖਿਆ ਦੇ ਲਿਹਾਜ਼ ਨਾਲ ਚਲਾਏ ਗਏ ਸਨ।

ਸਕੂਲੀ ਬੱਚਿਆਂ ਦੀਆਂ ਯਾਦਾਂ ਨਾਲ ਮੇਜ਼ 'ਤੇ ਪਹੁੰਚਿਆ ਈਰਾਨੀ ਵਫ਼ਦ

ਈਰਾਨੀ ਸੰਸਦ ਦੇ ਸਪੀਕਰ ਮੁਹੰਮਦ ਬਾਘੇਰ ਗਾਲਿਬਾਫ ਅਤੇ ਵਿਦੇਸ਼ ਮੰਤਰੀ ਅੱਬਾਸ ਅਰਾਘਚੀ ਦੀ ਅਗਵਾਈ ਵਿੱਚ ਪਹੁੰਚੇ ਇਸ ਵਫ਼ਦ ਨੇ ਕੂਟਨੀਤਕ ਗੱਲਬਾਤ ਦੇ ਨਾਲ-ਨਾਲ ਇੱਕ ਭਾਵਨਾਤਮਕ ਸੁਨੇਹਾ ਵੀ ਦਿੱਤਾ ਹੈ। ਜਹਾਜ਼ ਵਿੱਚ ਖਾਲੀ ਰੱਖੀਆਂ ਸੀਟਾਂ 'ਤੇ ਬੱਚਿਆਂ ਦੇ ਸਕੂਲ ਬੈਗ, ਜੁੱਤੀਆਂ ਅਤੇ ਕੱਪੜੇ ਰੱਖੇ ਗਏ ਸਨ। ਇਹ ਸਮਾਨ ਮਿਨਾਬ ਖੇਤਰ ਵਿੱਚ ਹੋਏ ਉਸ ਹਮਲੇ ਦੇ ਪੀੜਤਾਂ ਦਾ ਹੈ, ਜਿਸ ਲਈ ਈਰਾਨ ਅਮਰੀਕਾ-ਇਜ਼ਰਾਈਲ ਨੂੰ ਜ਼ਿੰਮੇਵਾਰ ਮੰਨਦਾ ਹੈ। ਇਸ ਪ੍ਰਦਰਸ਼ਨ ਰਾਹੀਂ ਈਰਾਨ ਇਹ ਦਰਸਾਉਣਾ ਚਾਹੁੰਦਾ ਹੈ ਕਿ ਉਹ ਕੇਵਲ ਇੱਕ ਰਾਸ਼ਟਰ ਵਜੋਂ ਹੀ ਨਹੀਂ, ਸਗੋਂ ਆਪਣੇ ਮਾਸੂਮ ਨਾਗਰਿਕਾਂ ਦੇ ਦਰਦ ਨੂੰ ਲੈ ਕੇ ਗੱਲਬਾਤ ਦੀ ਮੇਜ਼ 'ਤੇ ਬੈਠਾ ਹੈ।

ਗੱਲਬਾਤ ਦੇ ਰਾਹ ਵਿੱਚ ਅੜਿੱਕਾ

ਇਸਲਾਮਾਬਾਦ ਵਿੱਚ ਅਮਰੀਕੀ ਵਫ਼ਦ ਦੀ ਅਗਵਾਈ ਉਪ ਰਾਸ਼ਟਰਪਤੀ ਜੇ.ਡੀ. ਵੈਂਸ ਕਰ ਰਹੇ ਹਨ, ਜਿਸ ਵਿੱਚ ਸਟੀਵ ਵਿਟਕੌਫ ਅਤੇ ਜੈਰੇਡ ਕੁਸ਼ਨਰ ਵਰਗੇ ਦਿੱਗਜ ਸ਼ਾਮਲ ਹਨ। ਹਾਲਾਂਕਿ ਟਰੰਪ ਪ੍ਰਸ਼ਾਸਨ ਨੇ 14 ਦਿਨਾਂ ਦੀ ਜੰਗਬੰਦੀ ਦਾ ਐਲਾਨ ਕਰ ਦਿੱਤਾ ਹੈ, ਪਰ ਈਰਾਨੀ ਏਜੰਸੀ 'ਤਸਨੀਮ' ਨੇ ਸਾਫ਼ ਕਰ ਦਿੱਤਾ ਹੈ ਕਿ ਗੱਲਬਾਤ ਤਦ ਹੀ ਸ਼ੁਰੂ ਹੋਵੇਗੀ ਜਦੋਂ ਲੇਬਨਾਨ ਵਿੱਚ ਇਜ਼ਰਾਈਲੀ ਹਮਲੇ ਰੋਕੇ ਜਾਣਗੇ ਅਤੇ ਈਰਾਨੀ ਜਾਇਦਾਦਾਂ (Assets) ਤੋਂ ਰੋਕ ਹਟਾਈ ਜਾਵੇਗੀ। ਗਾਲਿਬਾਫ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ 'X' 'ਤੇ ਸਪੱਸ਼ਟ ਕੀਤਾ ਹੈ ਕਿ ਇਹ ਦੋਵੇਂ ਸ਼ਰਤਾਂ ਸਮਝੌਤੇ ਦਾ ਆਧਾਰ ਹਨ।

ਟਰੰਪ ਦਾ ਦਾਅਵਾ

ਦੂਜੇ ਪਾਸੇ, ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਆਸ਼ਾਵਾਦ ਪ੍ਰਗਟ ਕਰਦਿਆਂ ਕਿਹਾ ਕਿ ਜੇਕਰ ਇਹ ਡੀਲ ਸਿਰੇ ਚੜ੍ਹਦੀ ਹੈ, ਤਾਂ ਹੋਰਮੁਜ਼ ਜਲਡਮਰੂ (Strait of Hormuz) ਆਪਣੇ ਆਪ ਖੁੱਲ੍ਹ ਜਾਵੇਗਾ। ਟਰੰਪ ਦਾ ਮੰਨਣਾ ਹੈ ਕਿ ਇਹ ਰਸਤਾ ਹਰ ਹਾਲਤ ਵਿੱਚ ਅੰਤਰਰਾਸ਼ਟਰੀ ਵਪਾਰ ਲਈ ਖੁੱਲ੍ਹਾ ਰਹਿਣਾ ਚਾਹੀਦਾ ਹੈ। ਇਸਲਾਮਾਬਾਦ ਵਿੱਚ ਚੱਲ ਰਹੀ ਇਹ 'Make or Break' ਮੀਟਿੰਗ ਮੱਧ ਪੂਰਬ ਦੀ ਭਵਿੱਖੀ ਸ਼ਾਂਤੀ ਲਈ ਇੱਕ ਨਿਰਣਾਇਕ ਮੋੜ ਸਾਬਤ ਹੋ ਸਕਦੀ ਹੈ।