ਹਿਮਾਚਲ ਵਿੱਚ ਵਿਨਾਸ਼ਕਾਰੀ ਮਾਨਸੂਨ : ਮਰਨ ਵਾਲਿਆਂ ਦੀ ਗਿਣਤੀ ਵਧੀ

ਹਿਮਾਚਲ ਪ੍ਰਦੇਸ਼ ਵਿੱਚ ਮਾਨਸੂਨ ਦੇ ਦੌਰਾਨ ਆਈ ਕੁਦਰਤੀ ਆਫ਼ਤਾਂ ਨੇ ਰਾਜ ਨੂੰ ਭਾਰੀ ਨੁਕਸਾਨ ਪਹੁੰਚਾਇਆ ਹੈ। ਰਾਜ ਆਫ਼ਤ ਪ੍ਰਬੰਧਨ ਅਥਾਰਟੀ (SDMA) ਮੁਤਾਬਕ, ਪਿਛਲੇ ਦੋ ਹਫ਼ਤਿਆਂ ਵਿੱਚ ਜ਼ਮੀਨ ਖਿਸਕਣ, ਅਚਾਨਕ ਹੜ੍ਹਾਂ, ਬੱਦਲ ਫਟਣ ਅਤੇ ਭਾਰੀ ਬਾਰਿਸ਼ ਨਾਲ ਹੋਈਆਂ ਘਟਨਾਵਾਂ ਕਾਰਨ ਮਰਨ ਵਾਲਿਆਂ ਦੀ ਗਿਣਤੀ 80 ਤੱਕ ਪਹੁੰਚ ਗਈ ਹੈ। SDMA ਦੀ ਰਿਪੋਰਟ (20 ਜੂਨ ਤੋਂ 7 ਜੁਲਾਈ) ਅਨੁਸਾਰ, 14 ਮੌਤਾਂ ਬੱਦਲ ਫਟਣ, 8 ਅਚਾਨਕ ਹੜ੍ਹਾਂ, 1 ਜ਼ਮੀਨ ਖਿਸਕਣ ਅਤੇ ਹੋਰ ਮੌਸਮੀ ਹਾਦਸਿਆਂ (ਬਿਜਲੀ ਦੇ ਕਰੰਟ, ਡੁੱਬਣ, ਡਿੱਗਣ ਆਦਿ) ਕਾਰਨ ਹੋਈਆਂ ਹਨ। ਕੁੱਲ 52 ਮੌਤਾਂ ਸਿੱਧੇ ਤੌਰ 'ਤੇ ਕੁਦਰਤੀ ਆਫ਼ਤਾਂ ਨਾਲ ਜੁੜੀਆਂ ਹਨ।

ਮੰਡੀ ਜ਼ਿਲ੍ਹਾ ਸਭ ਤੋਂ ਵੱਧ ਪ੍ਰਭਾਵਿਤ ਰਿਹਾ, ਜਿੱਥੇ 17 ਮੌਤਾਂ ਹੋਈਆਂ। ਕਾਂਗੜਾ ਵਿੱਚ 11 ਮੌਤਾਂ ਹੋਈਆਂ। ਕੁੱਲੂ, ਕਾਂਗੜਾ, ਮੰਡੀ ਅਤੇ ਸ਼ਿਮਲਾ ਵਿੱਚ ਫ਼ਸਲਾਂ, ਸੜਕਾਂ, ਪੁਲਾਂ ਅਤੇ ਬਿਜਲੀ ਦੇ ਢਾਂਚੇ ਨੂੰ ਵੱਡਾ ਨੁਕਸਾਨ ਪਹੁੰਚਿਆ। ਰਾਜ ਵਿੱਚ 128 ਲੋਕ ਜ਼ਖਮੀ ਹੋਏ, 320 ਘਰ ਪੂਰੀ ਤਰ੍ਹਾਂ ਅਤੇ 38 ਘਰ ਅੰਸ਼ਕ ਤੌਰ 'ਤੇ ਨੁਕਸਾਨੇ ਗਏ। 10,254 ਪਸ਼ੂਆਂ ਅਤੇ ਪੰਛੀਆਂ ਦੀ ਮੌਤ ਹੋਈ ਅਤੇ ਸਰਕਾਰੀ ਅੰਦਾਜ਼ੇ ਮੁਤਾਬਕ 692.65 ਕਰੋੜ ਰੁਪਏ ਦਾ ਨੁਕਸਾਨ ਹੋਇਆ।

SDMA ਨੇ 23 ਅਚਾਨਕ ਹੜ੍ਹਾਂ, 19 ਬੱਦਲ ਫਟਣ ਅਤੇ 16 ਜ਼ਮੀਨ ਖਿਸਕਣ ਦੀਆਂ ਘਟਨਾਵਾਂ ਦੀ ਪੁਸ਼ਟੀ ਕੀਤੀ ਹੈ। ਇਹ ਘਟਨਾਵਾਂ ਪਹਾੜੀ ਇਲਾਕਿਆਂ ਵਿੱਚ ਆਵਾਜਾਈ ਅਤੇ ਜੀਵਨ-ਜਾਚ 'ਤੇ ਵੱਡਾ ਅਸਰ ਪਾ ਰਹੀਆਂ ਹਨ। ਰਾਹਤ ਲਈ NDRF ਅਤੇ SDRF ਦੀਆਂ ਟੀਮਾਂ ਲਗਾਤਾਰ ਕੰਮ ਕਰ ਰਹੀਆਂ ਹਨ। ਸਰਕਾਰ ਵਲੋਂ ਪ੍ਰਭਾਵਿਤ ਪਰਿਵਾਰਾਂ ਨੂੰ ਮਦਦ ਦਿੱਤੀ ਜਾ ਰਹੀ ਹੈ ਅਤੇ ਲੋਕਾਂ ਨੂੰ ਸੰਵੇਦਨਸ਼ੀਲ ਖੇਤਰਾਂ ਤੋਂ ਦੂਰ ਰਹਿਣ ਦੀ ਅਪੀਲ ਕੀਤੀ ਗਈ ਹੈ।