ਤਬਦੀਲੀ ਕੁਦਰਤ ਦਾ ਅਟੱਲ ਨਿਯਮ ਪਰ...

"ਤਬਦੀਲੀ ਕੁਦਰਤ ਦਾ ਨਿਯਮ ਹੈ"। ਇਹ ਨਿਰੀ ਕਹਾਵਤ ਨਹੀਂ, ਸਗੋਂ ਜੀਵਨ ਦੀ ਹਕੀਕਤ ਹੈ। ਹਰ ਪਲ, ਹਰ ਲਹਿਜਾ ਕੁਝ ਨਾ ਕੁਝ ਬਦਲ ਰਿਹਾ ਹੁੰਦਾ ਹੈ। ਜਿਵੇਂ ਰੁੱਤਾਂ ਦਾ ਬਦਲਣਾ, ਮਨੁੱਖ ਦੇ ਹਾਲਾਤਾਂ ਵਿੱਚ ਤਬਦੀਲੀ ਆਉਣਾ, ਇਹ ਸਾਰੇ ਕੁਦਰਤੀ ਚੱਕਰ ਦੇ ਹਿੱਸੇ ਹਨ। ਜੇ ਅਸੀਂ ਤਬਦੀਲੀ ਨੂੰ ਸਵੀਕਾਰ ਨਹੀਂ ਕਰਦੇ, ਤਾਂ ਅਸੀਂ ਅੱਗੇ ਨਹੀਂ ਵਧ ਸਕਦੇ। ਵਿਕਾਸ ਲਈ ਬਦਲਾਅ ਜ਼ਰੂਰੀ ਹੈ।

ਅਸੀਂ ਆਪਣੇ ਆਲੇ-ਦੁਆਲੇ ਤੱਕੀਏ ਤਾਂ ਤਬਦੀਲੀ ਹਰ ਥਾਂ ਨਜ਼ਰ ਆਉਂਦੀ ਹੈ। ਜੇ ਅਸੀਂ ਹਮੇਸ਼ਾ ਇੱਕੋ ਢੰਗ ਨਾਲ ਸੋਚਦੇ ਰਹੀਏ, ਤਾਂ ਨਵੇਂ ਨਤੀਜੇ ਕਿਵੇਂ ਮਿਲਣਗੇ? ਤਬਦੀਲੀ ਸਾਡੀ ਸੋਚ ਵਿੱਚ ਆਉਣੀ ਚਾਹੀਦੀ ਹੈ, ਤਾਂ ਹੀ ਅਸੀਂ ਆਪਣੀ ਜ਼ਿੰਦਗੀ ਵਿੱਚ ਖੁਸ਼ੀ ਅਤੇ ਤਰੱਕੀ ਲਿਆ ਸਕਦੇ ਹਾਂ। ਜੇ ਅਸੀਂ ਇਸ ਕੁਦਰਤੀ ਨਿਯਮ ਦੀ ਉਲੰਘਣਾ ਕਰਦੇ ਹਾਂ, ਤਾਂ ਅਖ਼ੀਰਕਾਰ ਦੁੱਖ, ਉਦਾਸੀ ਅਤੇ ਨਿਰਾਸ਼ਾ ਸਾਡੀ ਸਾਥੀ ਬਣ ਜਾਂਦੀ ਹੈ।

ਅੱਜਕੱਲ੍ਹ, ਮਨੁੱਖ ਨੇ ਆਪਣੀ ਆਸਾਨੀ ਅਤੇ ਸੁਖ-ਸੁਵਿਧਾ ਲਈ ਕੁਦਰਤ ਵਿੱਚ ਦਖਲ ਦੇਣਾ ਸ਼ੁਰੂ ਕਰ ਦਿੱਤਾ ਹੈ। ਉਹ ਸੋਚਦਾ ਹੈ ਕਿ ਕੁਦਰਤ ਨੂੰ ਵਸ਼ ਵਿੱਚ ਕਰ ਲਿਆ ਹੈ, ਪਰ ਇਹ ਇਕ ਭੁਲਾਵਾ ਹੈ। ਅਸੀਂ ਆਪਣੇ ਅਖੌਤੀ ਵਿਕਾਸ ਲਈ ਕੁਦਰਤੀ ਸਰੋਤਾਂ ਦੀ ਬੇਅੰਤ ਵਰਤੋਂ ਕਰ ਰਹੇ ਹਾਂ। ਨਤੀਜੇ ਵਜੋਂ, ਅੱਜ ਸਾਨੂੰ ਵਾਯੂ ਪ੍ਰਦੂਸ਼ਣ, ਮਿਟੀ ਦੀ ਗਿਰਦੀ ਉਪਜਾਊ ਸ਼ਕਤੀ, ਗਲੋਬਲ ਵਾਰਮਿੰਗ ਅਤੇ ਵਧਦੀ ਗਰਮੀ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।

ਇਸੇ ਮਾਰਚ ਮਹੀਨੇ ਵਿੱਚ ਹੀ ਗਰਮੀ ਨੇ ਜੋ ਰੂਪ ਧਾਰ ਲਿਆ ਹੈ, ਉਹ ਚਿੰਤਾ ਦਾ ਵਿਸ਼ਾ ਹੈ। ਜਦੋਂ ਕਿ ਮੌਸਮ ਬਸੰਤ ਹੋਣਾ ਚਾਹੀਦਾ ਸੀ, ਅਸੀਂ ਗਰਮੀਆਂ ਦਾ ਅਹਿਸਾਸ ਕਰ ਰਹੇ ਹਾਂ। ਇਹ ਸਪਸ਼ਟ ਸੰਕੇਤ ਹੈ ਕਿ ਧਰਤੀ ਤੇ ਗਲੋਬਲ ਤਾਪਮਾਨ ਵਧ ਰਿਹਾ ਹੈ।

ਗਲੋਬਲ ਵਾਰਮਿੰਗ ਦੇ ਮੂਲ ਕਾਰਣ ਹਨ:

ਉਦਯੋਗੀਕਰਨ

ਕੁਦਰਤੀ ਸਰੋਤਾਂ ਦਾ ਅਨਿਯੰਤ੍ਰਿਤ ਸ਼ੋਸ਼ਣ

ਪਲਾਸਟਿਕ ਪ੍ਰਦੂਸ਼ਣ

ਕੋਲਾ, ਪੈਟਰੋਲ ਅਤੇ ਡੀਜ਼ਲ ਵਰਗੇ ਬਾਲਣਾਂ ਦਾ ਅਤਿ-ਉਪਯੋਗ

ਜੰਗਲਾਂ ਦੀ ਕਟਾਈ

ਇਹ ਸਾਰੇ ਕਾਰਨ ਵਾਤਾਵਰਣ ਨੂੰ ਗੰਭੀਰ ਨੁਕਸਾਨ ਪਹੁੰਚਾ ਰਹੇ ਹਨ। ਗ੍ਰੀਨਹਾਊਸ ਗੈਸਾਂ — ਜਿਵੇਂ ਕਾਰਬਨ ਡਾਈਆਕਸਾਈਡ, ਮੀਥੇਨ, ਨਾਈਟਰਸ ਆਕਸਾਈਡ — ਵਾਯੂਮੰਡਲ ਨੂੰ ਗਰਮ ਕਰ ਰਹੀਆਂ ਹਨ। ਰੁੱਖ ਜੋ ਕਾਰਬਨ ਡਾਈਆਕਸਾਈਡ ਸੋਖਦੇ ਹਨ, ਉਨ੍ਹਾਂ ਦੀ ਘਟਦੀ ਗਿਣਤੀ ਨੇ ਹਾਲਾਤ ਹੋਰ ਵੀ ਖਰਾਬ ਕਰ ਦਿੱਤੇ ਹਨ।

ਹੋਰ ਚਿੰਤਾ ਦੀ ਗੱਲ ਇਹ ਹੈ ਕਿ ਅਸੀਂ ਹਰ ਸਾਲ ਵੱਡੀਆਂ ਗੱਲਾਂ ਕਰਦੇ ਹਾਂ — ਵਾਤਾਵਰਣ ਬਚਾਉਣ, ਰੁੱਖ ਲਗਾਉਣ — ਪਰ ਇਹ ਸਿਰਫ਼ ਕਾਗ਼ਜ਼ੀ ਰਹਿ ਜਾਂਦੀਆਂ ਹਨ। ਹਕੀਕਤ ਵਿੱਚ ਕੋਈ ਥੋਸ ਕਦਮ ਨਹੀਂ ਚੁੱਕਿਆ ਜਾਂਦਾ।

ਸਮੱਸਿਆ ਦੀ ਮੂਲ ਜੜ੍ਹ ਅਸੀਂ ਜਾਣਦੇ ਹਾਂ, ਪਰ ਸਮਾਧਾਨ ਵੱਲ ਕਦਮ ਨਹੀਂ ਚੁੱਕਦੇ। ਇਹ ਸਮਾਂ ਹੈ ਜਦੋਂ ਅਸੀਂ ਆਪਣੀ ਜ਼ਿੰਮੇਵਾਰੀ ਨੂੰ ਸਵੀਕਾਰ ਕਰੀਏ।

ਹੱਲ ਕੀ ਹਨ?

ਵਧ ਤੋਂ ਵਧ ਰੁੱਖ ਲਗਾਏ ਜਾਣ

ਸੂਰਜੀ ਅਤੇ ਪੌਣ ਊਰਜਾ ਵਰਗੀਆਂ ਸਾਫ਼ ਊਰਜਾ ਸਰੋਤਾਂ ਦੀ ਵਰਤੋਂ

ਪਲਾਸਟਿਕ ਦੇ ਬਦਲੇ ਚੱਕਰੀ ਸਮੱਗਰੀ ਦੀ ਵਰਤੋਂ

ਸਾਈਕਲ ਜਾਂ ਸਰਵਜਨਕ ਆਵਾਜਾਈ ਦੀ ਵਰਤੋਂ

ਟਿਕਾਊ ਜੀਵਨ ਸ਼ੈਲੀ ਅਪਣਾਉਣਾ

ਉਦਯੋਗਾਂ ਵਿੱਚ ਪਦਾਰਥਾਂ ਦੀ ਰੀਸਾਇਕਲਿੰਗ ਅਤੇ ਨਿਕਾਸ ਪ੍ਰਬੰਧ

ਅਸੀਂ ਆਪਣੇ ਭਵਿੱਖ ਲਈ, ਆਪਣੀਆਂ ਆਉਣ ਵਾਲੀਆਂ ਪੀੜ੍ਹੀਆਂ ਲਈ, ਅਤੇ ਇਸ ਧਰਤੀ ਦੀ ਰੱਖਿਆ ਲਈ ਹੁਣੇ ਤੋਂ ਕਦਮ ਚੁੱਕਣੇ ਹੋਣਗੇ।

ਟਿਕਾਊ ਵਿਕਾਸ ਸਿਰਫ਼ ਇੱਕ ਨਾਅਰਾ ਨਹੀਂ, ਸਗੋਂ ਇੱਕ ਲੋੜ ਹੈ। ਜਦ ਤੱਕ ਅਸੀਂ ਕੁਦਰਤ ਨਾਲ ਸਾਂਝ ਨਹੀਂ ਪਾਈਏਗੇ, ਅਸੀਂ ਲੰਮੀ ਉਮਰ ਵਾਲਾ ਖੁਸ਼ਹਾਲ ਜੀਵਨ ਨਹੀਂ ਜੀ ਸਕਾਂਗੇ।