Breaking : ਬਲੋਚ ਫੌਜ ਦਾ ਪਾਕਿਸਤਾਨੀ ਫੌਜ 'ਤੇ ਵੱਡਾ ਹਮਲਾ

ਬਲੋਚਿਸਤਾਨ ਵਿੱਚ ਪਿਛਲੇ ਕੁਝ ਦਿਨਾਂ ਤੋਂ ਹਿੰਸਾ ਦਾ ਮਾਹੌਲ ਬਣਿਆ ਹੋਇਆ ਹੈ। ਬਲੋਚ ਲਿਬਰੇਸ਼ਨ ਆਰਮੀ (BLA) ਨੇ ਪਾਕਿਸਤਾਨੀ ਫੌਜ ਅਤੇ ਖੁਫੀਆ ਏਜੰਸੀਆਂ 'ਤੇ ਲਗਾਤਾਰ ਵੱਡੇ ਹਮਲੇ ਕੀਤੇ ਹਨ। ਤਾਜ਼ਾ ਜਾਣਕਾਰੀ ਅਨੁਸਾਰ, 9 ਜੁਲਾਈ ਤੋਂ 11 ਜੁਲਾਈ 2025 ਤੱਕ, BLA ਨੇ ਪਾਕਿਸਤਾਨੀ ਫੌਜ ਦੇ 84 ਠਿਕਾਣਿਆਂ 'ਤੇ ਹਮਲੇ ਕਰਕੇ 50 ਫੌਜੀ ਜਵਾਨਾਂ ਅਤੇ 9 ਖੁਫੀਆ ਏਜੰਟਾਂ ਨੂੰ ਮਾਰ ਦਿੱਤਾ। ਇਸ ਤੋਂ ਇਲਾਵਾ, ਲਗਭਗ 51 ਫੌਜੀ ਜ਼ਖਮੀ ਹੋਏ ਹਨ।

BLA ਨੇ ਆਪਣੇ ਆਪ੍ਰੇਸ਼ਨ ਨੂੰ 'BAM' ਨਾਮ ਦਿੱਤਾ ਹੈ। BLA ਨੇ ਪਾਕਿਸਤਾਨ ਦੀ ਮਿਲਟਰੀ ਇੰਟੈਲੀਜੈਂਸ ਅਤੇ ISI ਦੇ 9 ਏਜੰਟਾਂ ਨੂੰ ਵੀ ਨਿਸ਼ਾਨਾ ਬਣਾਇਆ। ਇਹ ਹਮਲੇ ਕੋਲਵਾ, ਬੇਲਾ, ਕੱਛੀ ਅਤੇ ਝਾਲਾਵਾਨ ਖੇਤਰਾਂ ਵਿੱਚ ਹੋਏ। BLA ਨੇ ਪਾਕਿਸਤਾਨੀ ਫੌਜ ਦੇ 5 ਡਰੋਨ ਵੀ ਨਸ਼ਟ ਕਰ ਦਿੱਤੇ ਅਤੇ ਕਈ ਖਣਿਜ ਅਤੇ ਗੈਸ ਟੈਂਕਰਾਂ ਨੂੰ ਵੀ ਨੁਕਸਾਨ ਪਹੁੰਚਾਇਆ।

BLA ਦੇ ਬਿਆਨ ਅਨੁਸਾਰ, 72 ਘੰਟਿਆਂ ਦੇ ਇਸ ਆਪ੍ਰੇਸ਼ਨ ਦੌਰਾਨ, 30 ਹਮਲੇ ਪਾਕਿਸਤਾਨੀ ਫੌਜ 'ਤੇ, 2 ਖੁਫੀਆ ਏਜੰਸੀਆਂ 'ਤੇ, 4 ਪੁਲਿਸ ਚੈੱਕ ਪੋਸਟਾਂ 'ਤੇ ਅਤੇ 4 ਫੌਜੀ ਚੈੱਕ ਪੋਸਟਾਂ 'ਤੇ ਕੀਤੇ ਗਏ। ਇਸ ਦੌਰਾਨ, ਬਲੋਚ ਲੜਾਕਿਆਂ ਨੇ ਪਾਕਿ ਫੌਜ ਤੋਂ ਆਟੋਮੈਟਿਕ ਮਸ਼ੀਨ ਗਨ ਸਮੇਤ ਕਈ ਹਥਿਆਰ ਵੀ ਲੁੱਟ ਲਏ।

BLA ਨੇ ਪਾਕਿਸਤਾਨੀ ਸਰਕਾਰ 'ਤੇ ਦੋਸ਼ ਲਾਇਆ ਕਿ ਉਹ ਬਲੋਚਿਸਤਾਨ ਦੀ ਦੌਲਤ ਲੁੱਟ ਰਹੀ ਹੈ ਅਤੇ ਬਲੋਚ ਲੋਕਾਂ ਉੱਤੇ ਜ਼ੁਲਮ ਕਰ ਰਹੀ ਹੈ। ਉਨ੍ਹਾਂ ਨੇ ਚੇਤਾਵਨੀ ਦਿੱਤੀ ਕਿ ਪਾਕਿਸਤਾਨੀ ਫੌਜ ਹੁਣ ਬਲੋਚ ਲੋਕਾਂ ਨੂੰ ਹੋਰ ਤਸੀਹੇ ਨਹੀਂ ਦੇ ਸਕੇਗੀ।

ਇਸ ਤੋਂ ਪਹਿਲਾਂ ਵੀ, ਬਲੋਚ ਲਿਬਰੇਸ਼ਨ ਆਰਮੀ ਵੱਲੋਂ ਸੁਹਰਾਬ ਜ਼ਿਲ੍ਹੇ ਦੇ ਗਿੱਦੜ ਵਿੱਚ ਫੌਜੀ ਅੱਡੇ 'ਤੇ ਹਮਲੇ ਵਿੱਚ 18 ਪਾਕਿਸਤਾਨੀ ਸੈਨਿਕ ਮਾਰੇ ਗਏ ਸਨ। ਇਕ ਹੋਰ ਵਾਕਏ ਵਿੱਚ, ਬਲੋਚ ਬਾਗੀਆਂ ਨੇ ਜ਼ੋਬ ਖੇਤਰ ਤੋਂ ਵਾਪਸ ਆ ਰਹੇ 9 ਮਜ਼ਦੂਰਾਂ ਨੂੰ ਅਗਵਾ ਕਰਕੇ ਗੋਲੀ ਮਾਰ ਦਿੱਤੀ। ਇਸ ਦੌਰਾਨ, ਲਗਭਗ 20 ਲੋਕ ਲਾਪਤਾ ਹੋਣ ਦੀ ਵੀ ਖ਼ਬਰ ਹੈ।

ਬਲੋਚਿਸਤਾਨ ਵਿੱਚ ਵਧ ਰਹੀ ਹਿੰਸਾ ਪਾਕਿਸਤਾਨ ਲਈ ਵੱਡੀ ਚੁਣੌਤੀ ਬਣੀ ਹੋਈ ਹੈ।