ਇੰਦੌਰ ਕਤਲ ਮਾਮਲੇ 'ਚ ਹੋਣ ਲੱਗੇ ਵੱਡੇ ਖੁਲਾਸੇ

ਸੋਨਮ ਨੇ ਰਾਜਾ ਨੂੰ ਹਨੀਮੂਨ 'ਤੇ ਮਾਰਨ ਦੀ ਰਚੀ ਸਾਜ਼ਿਸ਼

ਮੇਘਾਲਿਆ ਵਿੱਚ ਇੰਦੌਰ ਦੇ ਜੋੜੇ ਰਾਜਾ ਰਘੂਵੰਸ਼ੀ ਦੇ ਕਤਲ ਮਾਮਲੇ 'ਚ ਹੈਰਾਨੀਜਨਕ ਤੱਥ ਸਾਹਮਣੇ ਆ ਰਹੇ ਹਨ। ਪੁਲਿਸ ਜਾਂਚ ਵਿੱਚ ਪਤਾ ਲੱਗਾ ਹੈ ਕਿ ਰਾਜਾ ਦੀ ਪਤਨੀ ਸੋਨਮ ਨੇ ਆਪਣੇ ਪਤੀ ਦੇ ਕਤਲ ਦੀ ਯੋਜਨਾ ਬਣਾਈ ਅਤੇ ਇਸ ਲਈ ਮੱਧ ਪ੍ਰਦੇਸ਼ ਤੋਂ ਹਮਲਾਵਰਾਂ ਨੂੰ ਕਿਰਾਏ 'ਤੇ ਲਿਆ। ਪੁਲਿਸ ਨੇ ਸੋਨਮ ਨੂੰ ਯੂਪੀ ਦੇ ਗਾਜ਼ੀਪੁਰ ਤੋਂ ਗ੍ਰਿਫ਼ਤਾਰ ਕਰ ਲਿਆ ਹੈ, ਜਦਕਿ ਕੁੱਲ 3 ਮੁਲਜ਼ਮਾਂ ਦੀ ਗ੍ਰਿਫ਼ਤਾਰੀ ਹੋ ਚੁੱਕੀ ਹੈ।

ਪੁਲਿਸ ਮੁਤਾਬਕ, ਕਤਲ ਦਾ ਕਾਰਨ ਹਾਲੇ ਸਰਕਾਰੀ ਤੌਰ 'ਤੇ ਨਹੀਂ ਦੱਸਿਆ ਗਿਆ, ਪਰ ਸੂਤਰਾਂ ਅਨੁਸਾਰ, ਇਸ ਮਾਮਲੇ ਪਿੱਛੇ ਇੱਕ ਪ੍ਰੇਮ ਤਿਕੋਣ ਹੈ। ਖੁਲਾਸਾ ਹੋਇਆ ਹੈ ਕਿ ਸੋਨਮ ਦਾ ਰਾਜ ਕੁਸ਼ਵਾਹਾ ਨਾਮਕ ਵਿਅਕਤੀ ਨਾਲ ਅਫੇਅਰ ਸੀ, ਜਦਕਿ ਉਸਦਾ ਵਿਆਹ ਰਾਜਾ ਨਾਲ ਹੋਇਆ। ਨਿਊਜ਼ ਚੈਨਲਾਂ ਦੇ ਹਵਾਲੇ ਨਾਲ, ਸੋਨਮ ਅਤੇ ਰਾਜ ਨੇ ਰਾਜਾ ਨੂੰ ਮਾਰਨ ਦੀ ਯੋਜਨਾ ਬਣਾਈ ਸੀ। 11 ਮਈ ਨੂੰ ਸੋਨਮ ਦਾ ਵਿਆਹ ਰਾਜਾ ਨਾਲ ਹੋਇਆ, 21 ਮਈ ਨੂੰ ਦੋਵੇਂ ਹਨੀਮੂਨ 'ਤੇ ਗਏ ਅਤੇ 2 ਜੂਨ ਨੂੰ ਰਾਜਾ ਦੀ ਲਾਸ਼ ਮੇਘਾਲਿਆ ਦੀ ਇੱਕ ਖਾਈ 'ਚੋਂ ਮਿਲੀ।

ਜਾਂਚ ਦੌਰਾਨ ਇਹ ਵੀ ਸਾਹਮਣੇ ਆਇਆ ਕਿ ਹਨੀਮੂਨ ਦੌਰਾਨ ਸੋਨਮ ਲਗਾਤਾਰ ਕੁਝ ਲੋਕਾਂ ਨਾਲ ਫੋਨ 'ਤੇ ਸੰਪਰਕ 'ਚ ਸੀ ਅਤੇ ਆਪਣੀ ਲੋਕੇਸ਼ਨ ਸਾਂਝੀ ਕਰ ਰਹੀ ਸੀ। ਪੁਲਿਸ ਨੂੰ ਸ਼ੱਕ ਹੈ ਕਿ ਸੋਨਮ ਨੇ ਕਤਲ ਨੂੰ ਅੰਜਾਮ ਦੇਣ ਲਈ ਹਮਲਾਵਰਾਂ ਦੀ ਮਦਦ ਲਈ ਇਹ ਸਾਰਾ ਪਲਾਨ ਬਣਾਇਆ।

ਸੋਨਮ ਦੇ ਪਿਤਾ ਨੇ ਇੱਕ ਨਿਊਜ਼ ਚੈਨਲ ਨਾਲ ਗੱਲਬਾਤ ਦੌਰਾਨ ਦੱਸਿਆ ਕਿ ਰਾਜ ਨਾਮ ਦਾ ਮੁੰਡਾ ਉਨ੍ਹਾਂ ਨਾਲ ਕੰਮ ਕਰਦਾ ਹੈ, ਪਰ ਉਹ ਸੋਨਮ ਅਤੇ ਰਾਜ ਦੇ ਅਫੇਅਰ ਤੋਂ ਇਨਕਾਰ ਕਰਦੇ ਹਨ। ਉਨ੍ਹਾਂ ਕਿਹਾ ਕਿ ਸੋਨਮ ਅਤੇ ਰਾਜਾ ਦਾ ਵਿਆਹ ਦੋਵਾਂ ਦੀ ਸਹਿਮਤੀ ਨਾਲ ਹੋਇਆ ਸੀ ਅਤੇ ਕਿਸੇ ਵੀ ਤਰ੍ਹਾਂ ਦਾ ਦਬਾਅ ਨਹੀਂ ਸੀ।

ਪੁਲਿਸ ਵਲੋਂ ਜਾਂਚ ਜਾਰੀ ਹੈ ਅਤੇ ਹੋਰ ਤੱਥ ਸਾਹਮਣੇ ਆਉਣ ਦੀ ਉਮੀਦ ਹੈ।